Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami  |  No. 1 2017

 TABA YA LETLAKALA LA KA NTLE | KAMOO O KA HOLWAGO KE GO BALA BEIBELE

Nka Thoma Bjang?

Nka Thoma Bjang?

Ke tsela efe yeo e ka go thušago gore o thabele go bala Beibele le gore o holege kudu? Ela hloko ditšhišinyo tše hlano tšeo ba bantši ba bonego di šoma.

Hwetša lefelo la maleba. Leka go hwetša lefelo leo le homotšego. Phema ditšhitišo gore o kgone go tsepamiša kgopolo go seo o se balago. O ka ithuta mo gontši ge o balela lefelong leo le nago le seetša seo se lekanego le moya o hlwekilego.

Lokiša kgopolo ya gago. Ka ge Beibele e etšwa go Tatago rena wa legodimong, o tla holega kudu ge e ba o ka ba le kgopolo ya go swana le ya ngwana yo a ikemišeditšego go rutwa ke motswadi yo lerato. Ge e ba o na le dilo tšeo o inaganelago tšona le dikgopolo tšeo di fošagetšego ka Beibele, leka go di beela ka thoko e le gore Modimo a go rute.Psalme 25:4.

Rapela pele o bala. Beibele e hupere menagano ya Modimo, ka gona ga go makatše gore go nyakega gore a re thuše go e kwešiša. Modimo o holofetša go nea “moya o mokgethwa go bao ba mo kgopelago.” (Luka 11:13) Moya o mokgethwa o ka go thuša go kwešiša tsela yeo Modimo a naganago ka yona. Ge nako e dutše e eya, moya wo o tla go thuša go kwešiša ‘gaešita le dilo tše di tseneletšego tša Modimo.’1 Bakorinthe 2:10.

Balela go kwešiša. O se ke wa no balela gore o fetše. Naganišiša ka seo o se balago. Ipotšiše dipotšišo tše di swanago le tše: ‘Ke dika dife tšeo ke ithutago tšona go motho yo ke balago ka yena? Nka diriša se bjang bophelong bja ka?’

Tseba seo o nyakago go se fihlelela. E le gore o holwe ke go bala Beibele, leka go ithuta ka selo seo se tla go holago e le ka kgonthe bophelong. Mohlomongwe o ka ipeela go tseba ka dilo tše di latelago: ‘Ke nyaka go ithuta ka Modimo.’ ‘Ke nyaka go ba motho yo kaone, monna goba mosadi yo kaone lenyalong.’ Ke moka kgetha dikarolo tše itšego ka Beibeleng tšeo di ka go thušago go fihlelela seo. *

Ditšhišinyo tše tše hlano di tla go thuša gore o thome. Eupša o ka dira bjang gore o thabele seo o se balago? Sehlogo seo se latelago se nea ditšhišinyo tše dingwe.

^ par. 8 Ge e ba o sa tsebe gore ke dikarolo dife ka Beibeleng tšeo di ka go thušago maemong ao, Dihlatse tša Jehofa di tla thabela go go thuša.