Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  July 2016

Re thabela go amogela botho bjo bogolo bja Modimo

Re thabela go amogela botho bjo bogolo bja Modimo

Ka moka re amogetše botho bjo bogolo bja Modimo.”JOHANE 1:16.

DIKOPELO: 95, 13

1, 2. (a) Hlalosa seo se bolelwago ke papišo ya Jesu ya mabapi le mong wa serapa sa diterebe. (b) Papišo ye e gatelela bjang taba ya gore Jehofa o re bontšha botho bjo bogolo le gore ga a timane?

MESONG e mengwe, molemi wa diterebe o ile a ya mmarakeng go yo nyaka batho bao ba ka šomago mašemong a gagwe. Banna bao a ilego a ba hwetša ba ile ba dumelelana le yena ka tšhelete yeo a bego a tlo ba golela yona gomme ba thoma go šoma. Lega go le bjalo, molemi yo o be a sa dutše a nyaka bašomi ba oketšegilego. Ka gona o ile a boelela mmarakeng mosegare ka moka gomme a hira banna ba oketšegilego. O ile a holofetša gaešita le banna bao a ba hirilego thapama gore o tla ba golela tšhelete ya go lekana le ya banna ba mathomo. Ge letšatši le sobetše, o ile a kgoboketša bašomi bao gore a ba golele. Ka moka ga bona o ile a ba golela tšhelete ya go lekana, go sa šetšwe gore ba be ba šomile diiri tše dintši goba iri e tee feela. Ge bao ba hirilwego mesong ba lemoga seo, ba ile ba ngongorega. Molemi yo wa diterebe o ile a re go bona: ‘Na ga se la dumelelana le nna ka tenariase? Na ga go dumelelwe ke molao gore ke dire se ke nyakago go se dira ka dilo tša ka? Goba na le na le lehufa ka baka la ge ke le yo a lokilego goba yo a fanago?’Mat. 20:1-15.

 2 Papišo ye ya Jesu e re gopotša ka se sengwe sa dika tša Jehofa seo go bolelwago kudu ka sona ka Beibeleng, e lego ‘botho bja gagwe bjo bogolo.’ [1](Bala 2 Bakorinthe 6:1.) Banna bao ba šomilego iri e tee feela ba be ba sa swanelwa ke go hwetša mogolo o feletšego, eupša mong wa serapa seo sa diterebe o ile a ba bontšha botho bjo bogolo. Ge seithuti se sengwe sa Beibele se hlalosa polelwana “botho bjo bogolo” bjoo bo fetolelwago e le “kgaugelo” Dibeibeleng tše dintši, se ngwadile gore: “Seo polelwana ye e se bolelago se ka swantšhwa le ge motho a newa mpho yeo e sa mo swanelago, a newa selo seo ka tshwanelo a sa swanelago go se newa.”

MPHO YA JEHOFA E LERATO

3, 4. Ke ka baka la’ng Jehofa a bontšhitše batho botho bjo bogolo, gona o ba bontšhitše bjona bjang?

3 Mangwalo a bolela ka “mpho e sa lefelelwego ya botho bjo bogolo bja Modimo.” (Baef. 3:7) Ke ka baka la’ng Jehofa a re nea ‘mpho ye e sa lefelelwego,’ gona o re nea yona bjang? Ge re be re ka kgona go dira dilo ka moka tšeo Jehofa a di nyakago go rena, re be re tla swanelwa ke botho bja gagwe. Eupša ga re kgone go dira seo. Ke ka baka leo Kgoši Solomone yo bohlale a ngwadilego gore: “Lefaseng ga go motho yo a lokilego yo a dirago seo se lokilego gomme a sa dire sebe.” (Mmo. 7:20) Moapostola Paulo le yena o itše: “Bohle ba dirile sebe gomme ba hlaelelwa ke letago la Modimo” le gore “moputso woo sebe se o lefago ke lehu.” (Baroma 3:23; 6:23a) Re swanetšwe ke sona seo.

4 Lega go le bjalo, Jehofa o bontšhitše rena badiradibe lerato ka go re bontšha botho bjo bogolo ka tsela e sa bapišegego. Mpho e kgolo go di feta ka moka yeo a re neilego yona ke “Morwa wa gagwe yo a tswetšwego a nnoši,” yoo a mo rometšego mo lefaseng go tlo re hwela. (Joh. 3:16) Ka gona Paulo o ngwadile ka Jesu gore “ga bjale o rwešitšwe mphapahlogo wa letago le kgodišo gobane a ile a hwa, gore ka botho bjo bogolo bja Modimo a hwele motho yo mongwe le yo mongwe.” (Baheb. 2:9) Ee, “mpho yeo Modimo a e neago ke bophelo bjo bo sa felego ka Kriste Jesu Morena wa rena.”Baroma 6:23b.

5, 6. Mafelelo e ba afe ge re bušwa ke (a) sebe? (b) botho bjo bogolo bja Modimo?

5 Go tlile bjang gore batho ba be le sebe seo se lebišago lehung? Beibele e re: “Ka karogo ya motho o tee [Adama], lehu le bušitše e le kgoši” baneng ba Adama ka moka. (Baroma 5:12, 14, 17) Lega go le bjalo, re thabišwa ke gore re ka kgetha go se sa bušwa ke sebe. Jehofa o tla re bontšha botho bja gagwe bjo bogolo ge re ka bontšha tumelo sehlabelong sa Kriste sa topollo. Bjang? Beibele e re: “Moo sebe se ilego sa ata, botho bjo bogolo bja Modimo bo ile bja ata le go feta. Gore go tle go re’ng? Gore go etša ge sebe se bušitše e le kgoši gotee le lehu, ka mo go swanago le botho bjo bogolo bja Modimo bo buše e le kgoši ka toko go re lebiša bophelong bjo bo sa felego ka Jesu Kriste Morena wa rena.”—Baroma 5:20, 21.

6 Gaešita le ge re sa le badiradibe, ga se ra swanela go dumelela sebe se re buša. Ge re ka dira sebe, re tla kgopela Jehofa gore a re lebalele. Paulo o lemošitše Bakriste ka gore: “Sebe ga se sa swanela go le buša, ka ge le se tlase ga molao eupša le le tlase ga botho bjo bogolo bja Modimo.” (Baroma 6:14) Ka baka leo, re bušwa ke botho bjo bogolo bja Modimo. Mafelelo a seo e ba afe? Paulo o hlalositše ka gore: “Botho bjo bogolo bja Modimo . . . [bo] re tlwaetša gore re se ke ra gana go boifa Modimo, re gane dikganyogo tša lefase, re phele ka monagano o hlaphogetšwego le toko le boineelo go Modimo gare ga tshepedišo ye ya dilo ya gona bjale.”Tito 2:11, 12.

 BOTHO BJO BOGOLO BJA MODIMO “BJO BO BONTŠHWAGO KA DITSELA TŠE DI FAPAFAPANEGO”

7, 8. Polelwana yeo e rego botho bjo bogolo bja Jehofa bo ‘bontšhwa ka ditsela tše di fapafapanego’ e ra gore’ng? (Bona seswantšho seo se lego mathomong a sehlogo.)

7 Moapostola Petro o ngwadile gore: “Go fihla bokgoleng bjoo ka bjona yo mongwe le yo mongwe a amogetšego mpho, e dirišeng ge le hlankelana le le balaki ba babotse ba botho bjo bogolo bja Modimo bjo bo bontšhwago ka ditsela tše di fapafapanego.” (1 Pet. 4:10) Se se ra gore’ng? Se ra gore Jehofa a ka re thuša go lebeletšana le teko le ge e le efe. (1 Pet. 1:6) Tekong e nngwe le e nngwe, Jehofa o tla re bontšha botho bjo bogolo.

8 Ruri Jehofa o bontšha botho bja gagwe bjo bogolo ka ditsela tše di fapafapanego. Moapostola Johane o ngwadile gore: “Ka moka re amogetše botho bjo bogolo bja Modimo ka boati go tšwa go yena, ka gobane o tletše ka botho bjoo.” (Joh. 1:16) Ditsela tše di fapafapanego tšeo Jehofa a re bontšhago botho bja gagwe ka tšona di re tlišetša ditšhegofatšo tše dintši. Tše dingwe tša ditšhegofatšo tšeo ke dife?

9. Botho bjo bogolo bja Jehofa bo re hola bjang, gona re ka bontšha bjang gore re a bo leboga?

9 Go lebalelwa dibe. Ka baka la botho bja gagwe bjo bogolo, Jehofa o kgona go re lebalela dibe, ge feela re itshola gomme re tšwela pele re lwantšha mekgwa ya rena e mebe. (Bala 1 Johane 1:8, 9.) Taba ya gore Modimo o re lebalela dibe e swanetše go re tutueletša go mo leboga le go mo tumiša. Ge Paulo a be a ngwalela Bakristegotee le yena ba tloditšwego o itše: “[Jehofa] o re hlakodišitše matleng a leswiswi gomme a re fetišetša mmušong wa Morwa wa lerato la gagwe, yo ka yena re lokollwago ka topollo, e lego tebalelo ya dibe tša rena.” (Bakol. 1:13, 14) Go lebalelwa dibe go re tlišetša ditšhegofatšo tše dingwe tše dintši.

10. Ke’ng seo re se thabelago ka baka la botho bjo bogolo bja Modimo?

10 Go ba le khutšo le Modimo. Ka ge re le badiradibe, re ba manaba a Modimo re sa tšwa go belegwa. Paulo o be a dumela seo ka go ngwala gore: “Ge e ba ge re be re le manaba re ile ra boelanywa le Modimo ka lehu la Morwa wa gagwe.” (Baroma 5:10) Go boelanywa le Jehofa go dira gore re be khutšong le yena. Paulo o tswalanya tokelo ye le botho bjo bogolo bja Jehofa ka go bolela gore: “Ka ge bjale go boletšwe gore re [bana babo Kriste ba tloditšwego] lokile ka baka la tumelo, anke re thabeleng khutšo le Modimo ka Morena wa rena Jesu Kriste, yoo ka yena gape re kgonnego go batamela ka tumelo bothong bjo bjo bogolo bja Modimo bjo bjale re bo amogelago.” (Baroma 5:1, 2) A tokelo e kgolo gakaakaang!

Ditsela tšeo ka tšona Modimo a re bontšhago botho bja gagwe bjo bogolo: Tokelo ya go kwa ditaba tše dibotse (Bona serapa 11)

11. Batlotšwa ba tliša bjang “dinku tše dingwe” go lokeng?

11 Go lebelelwa re lokile. Ka moka ga rena re badiradibe ka tlhago. Eupša moporofeta Daniele o boletše e sa le pele gore mehleng ya bofelo, “bao ba nago le temogo,” e lego batlotšwa bao ba sa lego mo lefaseng, ba be ba tla ‘tliša ba bantši go lokeng.’ (Bala Daniele 12:3.) Ka go bolela ditaba tše dibotse le go dira barutiwa, ba dirile gore Jehofa a lebelele “dinku tše dingwe” tše dintši e le baloki. (Joh. 10:16) Eupša seo se kgonegile feela ka baka la botho bjo bogolo bja Jehofa. Paulo o hlalositše gore: “Go bjalo ka ge eka ke mpho e sa lefelelwego gore go bolelwe gore ba lokile ka botho bja gagwe bjo bogolo ka go lokollwa ka topollo yeo e lefilwego ke Kriste Jesu.”Baroma 3:23, 24.

Tokelo ya thapelo (Bona serapa 12)

12. Ke ka baka la’ng thapelo e le e nngwe ya ditsela tšeo Modimo a re bontšhago botho bja gagwe bjo bogolo?

12 Go batamela sedulo sa Modimo sa bogoši ka thapelo. Ka baka la botho bja gagwe bjo bogolo, Jehofa o re neile tokelo ya go batamela sedulong sa gagwe sa bogoši sa legodimong ka thapelo. Ge e le gabotse, Paulo o bitša  sedulo sa Jehofa sa bogoši gore ke “[sedulo] sa bogoši sa botho bjo bogolo bja Modimo” gomme o re kgothaletša go batamela go sona “ka tokologo ya polelo.” (Baheb. 4:16a) Jehofa o re neile tokelo ye ka Morwa wa gagwe, “yo ka yena re nago le tokologo ye ya go bolela le go batamela go yena ka bolokologi re kgodišegile ka baka la tumelo ya rena go yena.” (Baef. 3:12) Ruri go bolela le Jehofa ka bolokologi ka thapelo ke bohlatse bjo matla bja gore o re bontšha botho bja gagwe bjo bogolo.

Go thušwa ka nako e swanetšego (Bona serapa 13)

13. Botho bjo bogolo bja Modimo bo ka re ‘thuša bjang ka nako e swanetšego’?

13 Go newa thušo ka nako e swanetšego. Paulo o re kgothaleditše go batamela Jehofa ka bolokologi ka thapelo ‘gore re hwetše kgaugelo gotee le botho e le gore re thušwe ka nako e swanetšego.’ (Baheb. 4:16b) Ge re welwa ke diteko goba mathata, re ka rapela Jehofa ka nako le ge e le efe gore a re gaugele le go re thuša. Le ge seo se sa re swanele, o araba dithapelo tša rena, gantši a diriša Bakristegotee le rena, “e le gore re be le sebete kudu gomme re re: ‘Jehofa ke mothuši wa ka; nka se boife. Motho a ka ntira’ng?’”Baheb. 13:6.

14. Botho bjo bogolo bja Jehofa bo kgoma dipelo tša rena bjang?

14 Go homotšwa dipelo. Tšhegofatšo e kgolo yeo re e hwetšago ka baka la botho bjo bogolo bja Jehofa ke go homotšwa dipelo tše di robegilego. (Ps. 51:17) Paulo o ile a ngwalela Bakriste ba Thesalonika bao ba bego ba tlaišwa gore: “Eka Morena wa rena Jesu Kriste le Modimo Tatago rena, bao ba re ratilego gomme ba re nea khomotšo e sa felego le kholofelo e botse ka botho bjo bogolo bja Modimo, ba ka homotša dipelo tša lena gomme ba le matlafatša.” (2 Bathes. 2:16, 17) Ruri go a homotša go tseba gore Jehofa o a re hlokomela ka baka la botho bja gagwe bjo bogolo.

15. Re na le kholofelo efe ka baka la botho bjo bogolo bja Modimo?

15 Go ba le kholofelo ya go phela ka mo go sa felego. Ka ge re le badiradibe, re be re ka se be le kholofelo. (Bala Psalme 49:7, 8.) Eupša Jehofa o re nea kholofelo e kgahlišago. Jesu o  holofeditše balatedi ba gagwe gore: “Thato ya Tate ke ye, gore yo mongwe le yo mongwe yo a lemogago Morwa a dumela go yena, a be le bophelo bjo bo sa felego.” (Joh. 6:40) Ee, kholofetšo ya gore re tlo phela ka mo go sa felego ke mpho, ke pontšho e lerato ya botho bjo bogolo bja Modimo. Paulo, yoo go se nago pelaelo gore o be a thabišwa ke taba yeo, o itše: “Botho bjo bogolo bja Modimo bjo bo tlišago phološo mehuteng yohle ya batho bo bonagetše.”Tito 2:11.

O SE KE WA DIRIŠA GAMPE BOTHO BJO BOGOLO BJA MODIMO

16. Bakriste ba bangwe ba lekgolong la pele la nywaga ba be ba diriša bjang gampe botho bjo bogolo bja Modimo?

16 Le ge botho bjo bogolo bja Jehofa bo re tlišetša ditšhegofatšo tše dintši, ga se ra swanela go ipotša gore o amogela boitshwaro ka moka. Gare ga Bakriste ba lekgolong la pele la nywaga, go be go na le ba bangwe bao ba bego ba ‘fetola botho bjo bogolo bja Modimo gomme ba bo dira lebaka la boitshwarelelo gore ba itshware ka tsela e lešago dihlong.’ (Juda 4) Go bonagala Bakriste ba ba go se botege ba be ba ipotša gore ba ka dira dibe ke moka ba kgopela Jehofa gore a ba lebalele. Se sebe le go feta ke gore ba be ba bile ba leka go fora bana babo bona gore ba ba tlatše ditirong tša bona tše mpe. Gaešita le lehono, yo mongwe le yo mongwe yo a dirago seo o “[galefišitše] moya wa botho bjo bogolo bja Modimo ka lenyatšo.”Baheb. 10:29.

17. Petro o re neile keletšo efe e matla?

17 Lehono, Sathane o forile Bakriste ba bangwe gore ba nagane gore ba ka tšwela pele ba dira dibe gomme ba kgopela Modimo gore a ba lebalele. Le ge Jehofa a lebalela badiradibe bao ba itsholago, o letetše gore re lwe ka matla go lwantšha mekgwa ya rena e mebe. O buduletše Petro go ngwala gore: “Ka gona baratiwa, ka go tseba se e sa le pele, itišeng gore le se ke la fapošwa le bona ka phošo ya batho bao ba se nago molao gomme la se sa ba bao ba tiilego. Aowa, eupša tšwelang pele le gola bothong bjo bogolo bja Modimo le tsebong ya go tseba Morena le Mophološi wa rena Jesu Kriste.”2 Pet. 3:17, 18.

BOTHO BJO BOGOLO BJA MODIMO BO TLA LE BOIKARABELO

18. Botho bjo bogolo bja Jehofa bo re nea boikarabelo bofe?

18 Ka ge re amogetše botho bjo bogolo bja Jehofa, re kolota yena le baagišani ba rena. Re swanetše go diriša mpho ye go mo tumiša le go thuša ba bangwe. Re ka dira seo bjang? Paulo o araba ka gore: “Ka gona ka ge re na le dimpho tšeo di fapanego go ya ka botho bjo bogolo bja Modimo bjo re bo neilwego, . . . ge e ba e le ya bodiredi, a re tšweleng pele bodireding bjo; goba yo a rutago, a a tšwele pele go ruteng ga gagwe; goba yo a kgothatšago, a a tšwele pele go kgothatšeng ga gagwe; . . . yo a bontšhago kgaugelo, a a dire se ka go hlalala.” (Baroma 12:6-8) Botho bjo bogolo bjo Jehofa a re bontšhago bjona bo re nea boikarabelo bja go šoma ka mafolofolo tirelong ya gagwe, go ruta ba bangwe Beibele, go kgothatša Bakristegotee le go lebalela bao ba re kgopišago.

19. Ke boikarabelo bofe bjo re nago le bjona bjo re tlago go bo ahlaahla sehlogong se se latelago?

19 Ka ge re amogetše botho bjo bogolo bja Modimo ka lethabo, re swanetše go dira sohle se re ka se kgonago gore re “hlatsele ka botlalo ditaba tše dibotse tša botho bjo bogolo bja Modimo.” (Dit. 20:24) Boikarabelo bjo bo tla hlaloswa ka botlalo sehlogong se se latelago.

^ [1] (serapa 2) Lebelela polelwana “Botho bjo bogolo” (Undeserved kindness) ka go “Glossary of Bible Terms” ka go Phetolelo ya Lefase le Lefsa e kaonefaditšwego ya Seisemane.