Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) JULY 2016

Botša batho ditaba tše dibotse tša botho bjo bogolo bja Modimo

Botša batho ditaba tše dibotse tša botho bjo bogolo bja Modimo

[Hlatsela] ka botlalo ditaba tše dibotse tša botho bjo bogolo bja Modimo.”DITIRO 20:24.

DIKOPELO: 101, 84

1, 2. Moapostola Paulo o ile a bontšha bjang gore o be a leboga botho bjo bogolo bja Modimo?

MOAPOSTOLA Paulo o be a ka bolela ka kgodišego gore: ‘Botho bjo bogolo bja Modimo bjo a bego a bo lebišitše go nna ga se ya ba bja lefeela.’ (Bala 1 Bakorinthe 15:9, 10.) Ka ge Paulo a kile a tlaiša Bakriste, o be a tseba gabotse gore Modimo ga se a mo lebalela ka gobane a šomile ka thata goba gore seo se be se mo swanetše.

2 Ge Paulo a be a le kgauswi le go hwa, o ile a ngwalela mošomigotee le yena e lego Timotheo gore: “Ke leboga Kriste Jesu Morena wa rena, yo a mphilego matla, gobane o mpone ke botega ka go nkabela bodiredi.” (1 Tim. 1:12-14) Bodiredi bjo Paulo a bolelago ka bjona mo ke’ng? Paulo o ile a botša bagolo ba phuthego ya Efeso seo bodiredi bjoo bo bego bo se akaretša, ge a be a re: “Ga ke tšee moya wa ka o le bohlokwa go nna, ge feela nka fetša  tsela ya ka le bodiredi bjo ke bo amogetšego go Morena Jesu, gore ke hlatsele ka botlalo ditaba tše dibotse tša botho bjo bogolo bja Modimo.”Dit. 20:24.

3. Paulo o ile a newa bodiredi bofe bjo bo kgethegilego? (Bona seswantšho se se lego mathomong a sehlogo.)

3 Ke ‘ditaba dife tše dibotse’ tše Paulo a bego a di bolela tšeo di bego di hlatsela gore Jehofa o bontšha batho botho bja gagwe bjo bogolo? O ile a botša Bakriste ba Efeso gore: “Le kwele ka bolaki bja botho bjo bogolo bja Modimo bjo ke bo neilwego ka baka la lena.” (Baef. 3:1, 2) Paulo o be a laetšwe gore a botše batho bao e sego Bajuda ditaba tše dibotse e le gore le bona ba be gare ga bao ba biditšwego go ba boteeng le Kriste ge a tla be a buša legodimong. (Bala Baefeso 3:5-8.) Ka ge Paulo a ile a phetha bodiredi bjoo ka mafolofolo, o beetše Bakriste lehono mohlala o mobotse e bile o hlatsetše gore botho bjoo Modimo a mmontšhitšego bjona “ga se ya ba bja lefeela.”

NA BOTHO BJA MODIMO BO A GO TUTUETŠA?

4, 5. Ke ka baka la’ng re ka re ‘ditaba tše dibotse tša Mmušo’ ke ditaba tše dibotse tša “botho bjo bogolo bja Modimo”?

4 Mehleng ye ya bofelo, batho ba Jehofa ba laetšwe gore ba bolele “ditaba tše tše dibotse tša Mmušo . . . lefaseng ka moka gore e be bohlatse go ditšhaba tšohle.” (Mateo 24:14) Molaetša wo re o botšago batho le wona ke “ditaba tše dibotse tša botho bjo bogolo bja Modimo” ka gore ditšhegofatšo ka moka tšeo re tlago go di hwetša ge go buša Mmušo wa Modimo di tla ba di tlišwa ke Jehofa ka botho bjo a re bontšhitšego bjona ka Kriste. (Baef. 1:3) Na o ekiša Paulo ka go leboga botho bjo bogolo bja Jehofa ka go botša batho ba bangwe ditaba tše dibotse ka mafolofolo?—Bala Baroma 1:14-16.

5 Sehlogong se se fetilego, re ithutile kamoo rena badiradibe re holwago ke botho bjo bogolo bja Jehofa ka ditsela tše dintši. Ka gona re na le boikarabelo bja go botša batho ka moka kamoo Jehofa a re bontšhago lerato la gagwe le kamoo ba ka holwago ke lerato leo. Ke dibopego dife tša botho bjo bogolo bja Modimo tšeo re swanetšego go thuša batho go di tseba?

BOTŠA BATHO DITABA TŠE DIBOTSE TŠA SEHLABELO SA TOPOLLO

6, 7. Ge re botša batho ba bangwe ka topollo, ke ka baka la’ng re ka bolela gore re ba botša ditaba tše dibotse tša botho bjo bogolo bja Modimo?

6 Lefaseng le la batho ba go itaola, ba bantši ga ba sa lebelela go dira sebe e le bothata, moo ba sa tsebego le gore ba hloka topollo. Eupša ba bangwe ba bantši ba a bona gore go itaola ga go tliše lethabo la kgonthe. Ka morago ga gore batho ba bantši ba ithute Beibele le Dihlatse tša Jehofa, e ba gona ba tsebago gore sebe ke eng, gore se re kgoma bjang le seo re swanetšego go se dira gore re phološwe go ditlamorago tša sona. Batho ba dipelo tše dibotse ba thaba kudu ka morago ga go ithuta gore Jehofa, ka baka la lerato la gagwe le legolo le botho bjo bogolo, o ile a romela Morwa wa gagwe mo lefaseng gore a re lopolle sebeng le go ditlamorago tša sona e lego lehu.—1 Joh. 4:9, 10.

7 Ge Paulo a be a bolela ka Morwa yo a rategago wa Jehofa, o ngwadile gore: “Ka yena [Jesu] re lokolotšwe ka topollo ka madi a yena yoo, ee, re lebaletšwe dikarogo tša rena, go ya ka mahumo a botho bjo bogolo bja Modimo.” (Baef. 1:7) Sehlabelo sa Kriste sa topollo ke bohlatse bjo bogologolo bja gore Modimo o a re rata le gore o humile ka botho bjo bogolo. Ruri re thabišwa ke go tseba gore ge re bontšha tumelo mading a Jesu a tšholotšwego, re tla lebalelwa dibe gomme ra hlwekišwa  matswalo! (Baheb. 9:14) Ruri tše ke ditaba tše dibotse tšeo re swanetšego go di botša ba bangwe!

THUŠA BATHO GORE E BE BAGWERA BA MODIMO

8. Ke ka baka la’ng batho ba swanetše go boelanywa le Modimo?

8 Re neilwe boikarabelo bja go botša batho ba bangwe gore e ka ba bagwera ba Mmopi. Pele batho ba ka bontšha tumelo sehlabelong sa Jesu, Modimo o ba lebelela e le manaba a gagwe. Moapostola Johane o ngwadile gore: “Yo a dumelago go Morwa o na le bophelo bjo bo sa felego; yo a sa kwego Morwa a ka se ke a bona bophelo, eupša kgalefo ya Modimo e dula e le go yena.” (Joh. 3:36) Se se thabišago ke gore sehlabelo sa Jesu se kgona go re boelanya le Modimo. Paulo o itše: “Lena bao le kilego la ba ba arogilego e bile le le manaba gobane menagano ya lena e be e le medirong e kgopo, ga bjale o dirile poelanyo ka mmele wa yena yoo wa nama ka lehu la gagwe.”—Bakol. 1:21, 22.

9, 10. (a) Kriste o neile bana babo ba tloditšwego mošomo ofe? (b) “Dinku tše dingwe” di thuša bjang bana babo tšona ba tloditšwego?

9 Kriste o neile bana babo ba tloditšwego bao ba lego mo lefaseng seo Paulo a se bitšago “bodiredi bja poelano.” Ge Paulo a be a hlalosa taba ye, o ile a ngwalela Bakriste ba tloditšwego ba lekgolong la pele la nywaga gore: “Dilo tšohle di tšwa go Modimo yo a re boelantšego le yena ka noši ka Kriste gomme a re nea bodiredi bja poelano, e lego gore Modimo o be a boelanya lefase le yena ka Kriste, a sa ba balele dikarogo tša bona, gomme a re gafela molaetša wa poelano. Ka gona, re batseta bao ba emetšego Kriste legato, bjalo ka ge eka Modimo o lopa ka rena. Re le baemedi ba Kriste re a kgopela re re: ‘Boelanang le Modimo.’”—2 Bakor. 5:18-20.

10 “Dinku tše dingwe” di lebelela go thuša bana babo tšona ba tloditšwego bodireding bjo e le tokelo. (Joh. 10:16) Ka ge batlotšwa ba hlankela e le baemedi ba Kriste, ba kgatha tema e kgolo go ruteng batho dithuto tša Beibele le go ba thuša go ba bagwera ba Jehofa. Ye ke karolo e bohlokwahlokwa ya go bolela ka botlalo ditaba tše dibotse tša mabapi le botho bjo bogolo bja Modimo.

BOTŠA BATHO DITABA TŠE DIBOTSE TŠA GORE MODIMO O KWA DITHAPELO

11, 12. Ke ka baka la’ng go ruta batho gore ba ka rapela Jehofa e le ditaba tše dibotse?

11 Batho ba bantši ba no rapela gore ba ikwe ba le kaone, eupša ga ba dumele gore Modimo o kwa dithapelo tša bona. Ba swanetše go tseba gore Jehofa ke “Mokwi wa thapelo.” Mopsalme Dafida o ngwadile gore: “Wena Mokwi wa thapelo, go wena go tla tla batho ba mehuta ka moka. Melato ya ka e mpheta ka matla. Ge e le dikarogo tša rena, wena ka bowena o tla di khupetša.”—Ps. 65:2, 3.

12 Jesu o boditše barutiwa ba gagwe gore: “Ge e ba le kgopela selo le ge e le sefe ka leina la ka, ke tla se dira.” (Joh. 14:14) Ge Jesu a be a re “selo le ge e le sefe,” o be a bolela ka selo le ge e le sefe seo se sepedišanago le thato ya Jehofa. Johane o re kgonthišetša seo ka gore: “Ye ke kgodišego ye re nago le yona ya gore go sa šetšwe seo re se kgopelago go ya ka thato ya Modimo, Modimo o a re kwa.” (1 Joh. 5:14) Ruri ke tokelo go ruta ba bangwe gore thapelo ga se selo feela seo se ba dirago gore ba ikwe ba le kaone, eupša ke tsela e kgethegilego ya go batamela “sedulong sa bogoši sa botho bjo bogolo” bja Jehofa. (Baheb. 4:16) Ge re ka ba ruta go rapela ka tsela ya maleba, ba tseba yo ba swanetšego go mo rapela le dilo tšeo ba swanetšego go di rapelela, re ka ba thuša go gwerana le Jehofa le go  homotšwa ke yena ge ba le tlalelong.—Ps. 4:1; 145:18.

BOTHO BJO BOGOLO BJA MODIMO LEFASENG LE LEFSA

13, 14. (a) Batlotšwa ba tlo ba le ditokelo dife tše di kgahlišago nakong e tlago? (b) Batlotšwa ba tlo thuša batho bjang?

13 Jehofa o tlo re bontšha botho bja gagwe bjo bogolo gaešita le ka morago ga ge tshepedišo ye ya dilo e fedile. Ge Paulo a be a bolela ka tokelo e kgolo yeo Modimo a e neilego batho ba 144 000 bao ba biditšwego go yo buša le Kriste legodimong, o ngwadile gore: “Modimo o humile ka dikgaugelo gomme ka baka la lerato la gagwe le legolo leo a re ratilego ka lona, o re phedišitše gotee le Kriste, gaešita le ge re be re hwile dikarogong—le phološitšwe ka botho bjo bogolo bja Modimo. Godimo ga moo, o re tsošitše gotee le Kriste a re dudiša gotee legodimong boteeng le Kriste Jesu, gore nakong e tlago a bontšhe mahumo a fetišišago a botho bja gagwe bjo bogolo ka lešoko la gagwe go rena boteeng le Kriste Jesu.”—Baef. 2:4-7.

14 Re ka se tsoge re kwešišitše dilo tše di kgahlišago tšeo Jehofa a tlago go di direla Bakriste ba tloditšwego ge ba tla be ba buša le Kriste legodimong. (Luka 22:28-30; Bafil. 3:20, 21; 1 Joh. 3:2) Jehofa o tlo ba “[bontšha] mahumo a fetišišago a botho bja gagwe bjo bogolo” ka tsela e kgethegilego. Ba tla bopa “Jerusalema o Mofsa,” monyadiwa wa Kriste. (Kut. 3:12; 17:14; 21:2, 9, 10) Ba tla thušana le Jesu “go alafa ditšhaba,” ba thuša batho bao ba kwago gore ba hwetše tsela ya go lokologa bokgobeng bja sebe le lehu le go ba thuša go phethagala.—Bala Kutollo 22:1, 2, 17.

15, 16. Nakong e tlago, Jehofa o tlo bontšha bjang “dinku tše dingwe” botho bja gagwe bjo bogolo?

15 Go Baefeso 2:7, re bala gore Modimo o tlo re bontšha botho bjo bogolo “nakong e tlago.” Ga go pelaelo gore tshepedišong yeo e tlago ya dilo re tlo bona “mahumo a fetišišago a botho bja gagwe bjo bogolo.” (Luka 18:29, 30) E nngwe ya ditsela tše dikgolokgolo tšeo Jehofa a tlago go re bontšha botho bja gagwe bjo bogolo ka yona ke ge a tla be a tsoša bahu “Bodulabahu.” (Jobo 14:13-15; Joh. 5:28, 29) Banna le basadi ba botegago ba kgale bao ba hwilego pele Kriste a ka re hwela, gotee le bohle ba “dinku tše dingwe” bao ba hwago ba botega mehleng ye ya bofelo, ba tla tsošwa bahung gomme ba tšwela pele ba hlankela Jehofa.

16 Batho ba dimilionemilione bao ba hwilego ba sa tsebe selo ka Modimo, le bona ba tlo tsošwa. Ba tlo newa sebaka sa gore ba ikokobeletše bogoši bja Jehofa. Johane o ngwadile gore: “Ka bona bahu ba bagolo le ba banyenyane ba eme pele ga sedulo sa bogoši gomme mangwalo a go phuthwa a bulwa. Eupša lengwalo le lengwe la go phuthwa la bulwa; ke lengwalo la go phuthwa la bophelo. Bahu ba ahlolwa ka dilo tšeo di ngwadilwego mangwalong a go phuthwa go ya ka ditiro tša bona. Lewatle la ntšha bahu ba lego go lona, lehu le Bodulabahu tša ntšha bahu ba lego go tšona, gomme yo mongwe le yo mongwe wa bona a ahlolwa go ya ka mediro ya gagwe.” (Kut. 20:12, 13) Bao ba tlago go tsošwa bahung ba tlo swanelwa ke go ithuta go phela ka melao ya motheo ya Modimo yeo e lego ka Beibeleng. Go oketša moo, ba tlo swanelwa ke go latela tlhahlo e mphsa e holago yeo e ngwadilwego “mangwalong a go phuthwa” ao a tla bego a hlalosa dilo tšeo Jehofa a di nyakago go bao ba tlago go phela tshepedišong e mpsha ya dilo. Le gona Jehofa o tla ba a re bontšha botho bja gagwe bjo bogolo ge a tla be a re bontšha seo se ngwadilwego mangwalong ao a go phuthwa.

 TŠWELA PELE O BOTŠA BATHO DITABA TŠE DIBOTSE

17. Ke’ng seo re swanetšego go dula re se gopola ge re le tšhemong?

17 Ge bofelo bo dutše bo batamela, mošomo wa rena o mogolo ke go bolela ditaba tše dibotse go feta le ge e le neng pele. (Mar. 13:10) Ruri ditaba tše dibotse ke bohlatse bja gore Jehofa o bontšha batho botho bja gagwe bjo bogolo! Re swanetše go dula re gopola seo ge re le tšhemong. Morero wa rena ge re bolela ditaba tše dibotse ke go tumiša Jehofa. Re ka dira seo ka go botša batho gore dilo ka moka tšeo Jehofa a re holofeditšego tšona lefaseng le lefsa ke bohlatse bja botho bja gagwe bjo bogolo.

Hlankela ka mafolofolo o le ‘molaki yo mobotse wa botho bjo bogolo bja Modimo.’1 Pet. 4:10 (Bona dirapa 17-19)

18, 19. Re phagamiša bjang botho bjo bogolo bja Jehofa?

18 Ge re dutše re botša batho ditaba tše dibotse, re ka ba hlalosetša gore ge Kriste a tla be a buša, batho ba tlo holwa ka mo go feletšego ke sehlabelo sa topollo le gore ganyenyane-ganyenyane ba tlo phethagala. Beibele e re: ‘Tlholo ka boyona le yona e tla lokollwa bokgobeng bja tshenyego gomme ya ba tokologo ya letago ya bana ba Modimo.’ (Baroma 8:21) Seo se tlo kgonega feela ka baka la botho bjo bogolo bja Jehofa.

19 Re na le tokelo ya go botša batho ka moka bao ba tlago go re theetša kholofetšo e kgahlišago yeo e lego go Kutollo 21:4, 5, yeo e rego: “[Modimo] o tla phumola megokgo ka moka mahlong a bona gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele di fetile.” Ke moka Jehofa, yena yo a dutšego sedulong sa bogoši, o re: “Bonang! Dilo ka moka ke di dira tše mpsha.” Gape, o re: “Ngwala, gobane mantšu a a botega e bile ke a therešo.” Ge re bolela ditaba tše tše dibotse ka mafolofolo, ruri re dira gore batho ba bone botho bja Jehofa bjo bogolo!