Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  July 2016

Dipotšišo tše tšwago go babadi

Dipotšišo tše tšwago go babadi

Go kopanywa ga mapara a mabedi mo go hlaloswago go Hesekiele kgaolo 37 go bolela’ng?

Le gona molaetša woo o bolela ka go kopanywa ga batho ba Modimo mo go thomilego go direga mehleng ya bofelo.

Jehofa o ile a botša moporofeta wa gagwe Hesekiele gore a ngwale molaetša mapareng a mabedi. Godimo ga lepara le lengwe o be a swanetše go ngwala gore, “Go Juda le bana ba Isiraele badirišani ba gagwe,” gomme go le lengwe a ngwale gore, “Go Josefa lepara la Efuraime, le go bohle ba ntlo ya Isiraele badirišani ba gagwe.” Hesekiele o be a swanetše go kopanya mapara ao a mabedi gore e be “selo setee” ka seatleng sa gagwe.—Hesek. 37:15-17.

Polelwana yeo e rego “Efuraime” e bolela eng? Kgoši ya mathomo ya mmušo wa meloko e lesome wa ka leboa e lego Jeroboama, o be a etšwa molokong wa Efuraime, wo e bego e le mmušo o matla  go feta mmušo wa ka borwa wa Isiraele. (Doit. 33:13, 17; 1 Dikg. 11:26) Moloko wo o be o etšwa go morwa wa Josefa e lego Efuraime. (Num. 1:32, 33) Jakobo o be a šegofaditše Josefa ka mo go kgethegilego. Ka baka leo, e be e le mo go swanetšego gore lepara leo le bego le emela meloko e lesome le bitšwe “lepara la Efuraime.” Nakong ya ge Hesekiele a be a ngwala boporofeta bjo bja mabapi le mapara a mabedi, batho ba mmušo wa ka leboa wa Isiraele ba be ba šetše ba išitšwe bothopša ke Baasiria ka 740 B.C.E. (2 Dikg. 17:6) Ka gona, Baisiraele ba bantši ba moloko wo ba be ba šetše ba phatlaletše dinageng tšeo di bego di bušwa ke Bababilona, ka gobane Bababilona ba be ba fentše Mmušo wa Asiria.

Ka 607 B.C.E., batho ba melokong e mebedi ya mmušo wa ka borwa, mohlomongwe le ba bangwe bao ba bego ba šetše mmušong wa ka leboa, ba ile ba išwa bothopša Babilona. Dikgoši tša molokong wa Juda di bušitše meloko ye e mebedi, gomme baperisita ba be ba etšwa molokong wo wa Juda, ka gore baperisita ba be ba šoma tempeleng Jerusalema. (2 Dikor. 11:13, 14; 34:30) Ka gona e be e le mo go swanetšego gore mmušo wa meloko e mebedi o emelwe ke lepara leo le ngwadilwego gore “go Juda.”

Mapara a a mabedi a seswantšhetšo a ile a kopanywa neng? A ile a kopanywa ge Baisiraele ba be ba boela Jerusalema go yo aga tempele lefsa ka 537 B.C.E. Batho ba meloko e mebedi ba mmušo wa Juda le ba melokong e lesome ba mmušo wa Isiraele ba ile ba boela Jerusalema ba le mmogo ba etšwa bothopša Babilona. Bana ba Isiraele ba be ba kopane gape. (Hesek. 37:21, 22) Baisiraele ba ile ba boela ba hlankela Jehofa ka botee. Moporofeta Jesaya le moporofeta Jeremia le bona ba ile ba bolela ka go kopana mo.—Jes. 11:12, 13; Jer. 31:1, 6, 31.

Boporofeta bjo bo re ruta therešo efe ya bohlokwa? Bo re ruta gore Jehofa o tla dira gore barapedi ba gagwe e be ‘batee.’ (Hesek. 37:18, 19) Na kholofetšo ya Jehofa ya gore barapedi ba gagwe ba tla ba le botee ga se ya phethagala mehleng ya rena? Ee, e phethagetše. Boporofeta bjo bo phethagetše la mathomo ka 1919, ge batho ba Jehofa ba be ba rulaganywa lefsa ganyenyane-ganyenyane e bile ba kopanywa. Maiteko a Sathane a go ba aroganya a ile a se atlege.

Ka nako yeo, ba bantši ba bao ba bego ba kopantšwe ba be ba na le kholofelo ya go yo ba dikgoši le baperisita legodimong le Jesu. (Kut. 20:6) Ka tsela ya seswantšhetšo, ba be ba swana le lepara la Juda. Lega go le bjalo, ge nako e dutše e eya, batho ba bantši bao ba bego ba na le kholofelo ya go phela lefaseng ba ile ba itshwarelela morumong wa seaparo sa Bajuda ba ba moya. (Sak. 8:23) Bona ba be ba swana le lepara la Josefa, gomme ba be ba se na kholofelo ya go yo buša le Kriste.

Lehono, batlotšwa le dinku tše dingwe ba šomela Jehofa ba le gotee ka tlase ga Kgoši e tee e lego Jesu Kriste, yo a bitšwago ka tsela ya boporofeta gore ke “mohlanka wa ka Dafida.” (Hesek. 37:24, 25) Jesu o rapeletše gore balatedi ba gagwe ka moka ‘e be batee, go etša ge Tatagwe a le boteeng le yena gomme yena a le boteeng le Tatagwe.’ * (Joh. 17:20, 21) Le gona Jesu o boletše e sa le pele gore mohlatswana wa gagwe wa batlotšwa le “dinku tše dingwe” e tla “ba mohlape o tee.” Ka moka ga bona ba be ba tla etelelwa pele ke “modiši o tee.” (Joh. 10:16) Ruri mantšu a Jesu a hlalosa gabotse kamoo batho ba Jehofa lehono ba kopanego ka gona go sa šetšwe gore ba yo phela legodimong goba mo lefaseng!

^ par. 6 Go a kgahliša go bona tsela yeo Jesu a latelantšego diswantšho tšeo di hlalosago pontšho ya go ba gona ga gagwe. Sa mathomo o boletše ka “mohlanka yo a botegago le wa temogo,” e lego mohlatswana wa batlotšwa bao ba bego ba tlo etelela phuthego pele. (Mat. 24:45-47) Ke moka a anega diswantšho tšeo di bego di bolela ka go lebanya ka bao ba nago le kholofelo ya go phela legodimong. (Mat. 25:1-30) Mafelelong o boletše ka bao ba nago le kholofelo ya go phela lefaseng bao ba bego ba tlo thekga bana babo Kriste. (Mat. 25:31-46) Ka mo go swanago, phethagalo ya mathomo mehleng yeno ya boporofeta bja Hesekiele e šupa go seo se tlago go diragalela bao ba nago le kholofelo ya go phela legodimong. Le ge re sa bolele gore mmušo wa meloko e lesome o swantšhetša bao ba nago le kholofelo ya go phela lefaseng, eupša botee bjo bo hlaloswago boporofeteng bjo bo re gopotša ka botee bjo bo lego gona gare ga bao ba nago le kholofelo ya go tlo phela mo lefaseng le bao ba nago le kholofelo ya go phela legodimong.