Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) SEPTEMBER 2016

Holwa ke Tlhahlo ya Jehofa

Holwa ke Tlhahlo ya Jehofa

KGETHO E BOHLALE KUA POLAND

“KE KOLOBEDITŠWE ke na le mengwaga e 15, gomme ka morago ga dikgwedi tše tshela, ka ba mmulamadibogo wa go thuša. Ka morago ga ngwaga, ka dira kgopelo ya go ba mmulamadibogo wa ka mehla. Ge ke fetša sekolo se se phagamego, ke ile ka kgopela go hlankela moo go nyakegago bagoeledi ba ba oketšegilego ba Mmušo. Ke be ke nyaka go huduga toropong ya gešo le go se sa dula le koko yo e bego e se Hlatse ya Jehofa. Ruri ke ile ka nyama ge molebeledi wa tikologo a be a mpotša gore ke tlo šoma tšhemo ya gona mo toropong ya gešo! Ke ile ka itira okare ke thabile. Ke ile ka tloga moo ke nyamile gomme ka yo naganišiša ka seo ngwanabo rena yoo a sa tšwago go mpotša sona. Ke ile ka botša motho yo ke šomago tšhemo le yena gore: “Ke nagana gore ke itshwere go swana le Jona. Eupša Jona o ile a feleletša a ile Ninife. Ka gona, le nna ke tlo ya mo ke abetšwego gona.”

“Ga bjale ke na le mengwaga e mene ke bula madibogo toropong ya gešo, e bile ke kgona go bona bohlale bja go amogela tlhahlo yeo ke e neilwego. Bothata bja ka bjo bogolo e be e le pono ya ka e fošagetšego. Ga bjale ke thabile kudu. Ka kgwedi e tee, ke ile ka kgona go swara dithuto tša Beibele tše 24. Ke leboga Jehofa gore ke kgonne go thoma thuto le koko wa ka yo a bego a sa rate therešo.”

MAFELELO A THABIŠAGO KUA FIJI

Morutwana wa Beibele kua Fiji o ile a swanelwa ke go kgetha magareng ga go ya kopanong ya Dihlatse le go felegetša monna wa gagwe moletlong wa matswalo wa o mongwe wa leloko. Monna wa gagwe o ile a mo dumelela gore a ye kopanong. Morutwana yo o ile a botša monna wa gagwe gore o tla re go boa kopanong a tla moletlong. Lega go le bjalo, ge a boa gae a etšwa kopanong, o ile a bona go le kaone gore a se ye moletlong woo o bego o ka bea tswalano ya gagwe le Jehofa kotsing.

Ka lehlakoreng le lengwe, ge monna wa gagwe a be a botša ba leloko la gabo gore mosadi wa gagwe o tlo tla moletlong wo ge a boa “sebokeng sa Dihlatse,” ba ile ba re, “A ka se tle; Dihlatse tša Jehofa ga di keteke matšatši a matswalo!” *

Mafelelong, monna yoo ile a thabišwa ke gore mosadi wa gagwe o ile a emela ditumelo tša gagwe le letswalo la gagwe. Go botega ga gagwe go ile gwa dira gore a kgone go nea monna wa gagwe le ba bangwe bohlatse. Mafelelo e bile afe? Monna wa gagwe o ile a dumela go swarelwa thuto ya Beibele gomme a thoma go ya dibokeng le mosadi wa gagwe.

^ par. 7 Bala “Dipotšišo tše Tšwago go Babadi” ka go Morokami wa December 15, 2001.