Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) OCTOBER 2016

Bontšha Tumelo Dikholofetšong tša Jehofa

Bontšha Tumelo Dikholofetšong tša Jehofa

“Tumelo ke . . . bohlatse bjo bo lego molaleng bja dilo tša kgonthe tšeo di sa bonwego.”BAHEB. 11:1.

DIKOPELO: 54, 125

1. Bakriste ba therešo ba swanetše go ikwa bjang ka tumelo yeo ba nago le yona?

TUMELO ya Bakriste ba therešo ke seka sa bohlokwa kudu. Ga se batho ka moka ba nago le yona. (2 Bathes. 3:2) Lega go le bjalo, Jehofa o neile yo mongwe le yo mongwe wa barapedi ba gagwe “tekanyo ya tumelo.” (Baroma 12:3; Bagal. 5:22) Bohle bao ba nago le tumelo ya mohuta wo ba swanetše go leboga Jehofa.

2, 3. (a) Motho yo a nago le tumelo o tla hwetša ditšhegofatšo dife? (b) Re tlo ahlaahla dipotšišo dife?

2 Jesu Kriste o boletše gore Tatagwe wa legodimong o gogela batho go yena a diriša Morwa wa Gagwe. (Joh. 6:44, 65) Ka go re’alo, ge motho a eba le tumelo go Jesu, ke gona a ka lebalelwago dibe. Ke moka seo se mmulela sebaka sa gore a tle a be mogwera wa Jehofa ka mo go sa felego. (Baroma 6:23) Re dirile’ng gore Jehofa a re šegofatše ka tsela e botse gakaakaa? Ka ge re le badiradibe, re swanelwa ke lehu. (Ps. 103:10) Eupša Jehofa o ile a bona gore re ka kgona go dira dilo tše dibotse. O re bontšhitše botho bja gagwe bjo  bogolo ka go dira gore re amogele ditaba tše dibotse. Ke moka ra thoma go bontšha tumelo go Jesu e le gore re tle re hwetše bophelo bjo bo sa felego.Bala 1 Johane 4:9, 10.

3 Eupša gabotse tumelo ke’ng? Na e no ba go dumela ka monaganong dilo tšeo Modimo a re tshepišitšego tšona? Sa bohlokwa le go feta, re swanetše go bontšha tumelo ka ditsela dife?

“DUMELA PELONG YA GAGO”

4. Hlalosa gore ke ka baka la eng tumelo e sa akaretše monagano feela.

4 Tumelo ga se go no kwešiša morero wa Modimo. Ke seka seo se šušumeletšago motho go phela ka go dumelelana le thato ya Modimo. Go ba le tumelo tseleng yeo Modimo a tlago go phološa batho go šušumeletša motho gore a botše ba bangwe ditaba tše dibotse. Moapostola Paulo o hlalositše gore: “Ge e ba o bolela phatlalatša ‘lentšu leo le lego molomong wa gago,’ gore Jesu ke Morena, le gona o dumela pelong ya gago gore Modimo o mo tsošitše bahung, gona o tla phološwa. Gobane motho o dumela ka pelo bakeng sa toko, eupša motho o bolela phatlalatša ka molomo bakeng sa phološo.”Baroma 10:9, 10; 2 Bakor. 4:13.

5. Ke ka baka la’ng tumelo e le bohlokwa kudu, gona re ka dira’ng gore e dule e tiile? Nea mohlala.

5 Go molaleng gore e le gore re tle re phele ka mo go sa felego lefaseng le lefsa la Modimo, re swanetše go ba le tumelo le go e boloka e tiile. Go boloka tumelo ya rena e tiile go ka swantšhwa le semela seo se hlokago meetse. Ka go se swane le semela sa maitirelo, semela sa kgonthe se dula se fetoga. Se ka pona ka gobane se hloka meetse goba sa tšwela pele se gola ka gobane se nošetšwa gabotse. Eupša ge e ba se sa nošetšwe gabotse, se ka feleletša se hwile. Go bjalo le ka tumelo ya rena. E tla pona gomme ya hwa ge e ba re sa e hlokomele. (Luka 22:32; Baheb. 3:12) Eupša ge e ba re e hlokomela, e tla dula e tiile le go tšwela pele e “gola,” gomme le rena re tla ‘phela gabotse tumelong.’2 Bathes. 1:3; Tito 2:2.

KAMOO BEIBELE E HLALOSAGO TUMELO

6. Baheberu 11:1 e hlalosa tumelo ka ditsela dife tše pedi?

6 Beibele e hlalosa tumelo go Baheberu 11:1. (Bala.) Tumelo e theilwe dilong tše pedi tšeo re sa di bonego: (1) “Seo se holofetšwego”—se se ka akaretša dilo tša nakong e tlago tše di holofeditšwego tšeo di sego tša hlwa di direga, e lego dilo tša go swana le go fedišwa ga bobe le lefase le lefsa leo le tlago. (2) “Dilo tša kgonthe tšeo di sa bonwego.” Temaneng ye, lentšu la Segerika leo le fetoletšwego e le “bohlatse bjo bo lego molaleng” le šupa go “bohlatse bjo bo kgodišago” bja gore dilo tšeo di sa bonagalego di gona, dilo tša go swana le go ba gona ga Jehofa Modimo, Jesu Kriste, barongwa le mediro ya Mmušo wa legodimong. (Baheb. 11:3) Re bontšha bjang gore tumelo ya rena e a phela le gore re na le tumelo dilong tše re sa di bonego tšeo di boletšwego ka Lentšung la Modimo? Re bontšha seo ka mantšu a rena le ka ditiro. Ka ntle le moo, tumelo ya rena ga se ya felela.

7. Mohlala wa Noa o re thuša bjang go kwešiša seo go ba le tumelo go se bolelago? (Bona seswantšho seo se lego mathomong a sehlogo.)

7 Baheberu 11:7 e bolela ka tumelo ya Noa, yoo “ka morago ga go hwetša temošo ya Modimo mabapi le dilo tšeo di bego di sešo tša bonwa, [a bontšhitšego] go boifa Modimo, a aga areka gore a phološe ba lapa la gagwe.” Noa o bontšhitše tumelo ya gagwe ka go aga areka e kgolokgolo. Ga go pelaelo gore batho ba mehleng ya gagwe ba ile ba mmotšiša gore go re’ng a aga selo seo se segolo. Na Noa o ile a homola, goba a ba botša gore ba šetše ditaba tša bona? Aowa! Tumelo ya gagwe e ile ya mo šušumeletša go ba botša molaetša wa Modimo ka sebete le go ba lemoša ka kotsi yeo e tlago. Go ka direga gore Noa o ile a ba botša gantšintši  mantšu ao Jehofa a ilego a mmotša wona a gore: “Ke tlo fediša nama ka moka ka gobane lefase le tletše bošoro ka baka la yona . . . Ke tliša meetsefula godimo ga lefase gore ke fediše nama ka moka yeo e nago le matla a bophelo ka tlase ga magodimo. Selo se sengwe le se sengwe se se lego lefaseng se tla fedišwa.” Le gona ga go pelaelo gore Noa o ile a hlalosetša batho bao kamoo ba ka phologago Meetsefula, ka go ba botša taelo ya Modimo yeo e rego: “O tsene ka arekeng.” Ka go re’alo, Noa o ile a bontšha tumelo ya gagwe gape ka go ba “mmoledi wa toko.”Gen. 6:13, 17, 18; 2 Pet. 2:5.

8. Modimo o ile a budulela morutiwa Jakobo go hlalosa eng ka seo tumelo ya kgonthe e se bolelago?

8 Go ka direga gore lengwalo la Jakobo le ngwadilwe ka moragonyana ga gore Modimo a budulele moapostola Paulo go ngwala seo tumelo e se bolelago. Go swana le Paulo, Jakobo o hlalositše gore tumelo ya kgonthe ga se go fo dumela selo; eupša go nyakega mediro. Jakobo o ngwadile gore: “Mpontšhe tumelo ya gago ka ntle le mediro, nna ke tla go bontšha tumelo ya ka ka mediro.” (Jak. 2:18) Jakobo o tšwela pele go bontšha phapano magareng ga go no dumela selo le go bontšha tumelo. Batemona ba a dumela gore Modimo o gona, eupša ga ba  na tumelo ya kgonthe. Ka gona, ka go hloka tumelo ba lwantšha merero ya Modimo gore e se ke ya phethagala. (Jak. 2:19, 20) Go fapana le seo, ge Jakobo a bolela ka monna yo mongwe wa go botega wa bogologolo, o botšiša gore: “Na Aborahama tatago rena ga se a bolelwa gore o lokile ka mediro ka morago ga ge a ile a neela morwa wa gagwe Isaka aletareng? Le a bona gore tumelo ya gagwe e dirišane le mediro ya gagwe gomme tumelo ya gagwe ya dirwa e phethegilego ka mediro ya gagwe.” Ke moka e le gore Jakobo a gatelele ntlha ya gore tumelo e swanetše go bontšhwa ka mediro, o re: “Bjalo ka ge mmele ka ntle le moya o hwile, le tumelo ka ntle le mediro e hwile.”Jak. 2:21-23, 26.

9, 10. Moapostola Johane o re thuša bjang go kwešiša bohlokwa bja go bontšha tumelo ya rena?

9 Ka morago ga mengwaga e 30, moapostola Johane o ile a ngwala Ebangedi ya gagwe le mangwalo a mararo. Na o ile a dumelelana le seo bangwadi ba bangwe ba Beibele ba se hlalositšego ka tumelo ya kgonthe? Ee. Go feta mongwadi le ge e le ofe wa Beibele, Johane o dirišitše lediri la Segerika leo ka dinako tše dingwe le fetolelwago e le “go dumela” goba “go bontšha tumelo.”

10 Ka mohlala, Johane o hlalositše gore: “Yo a dumelago [bontšhago tumelo] go Morwa o na le bophelo bjo bo sa felego; yo a sa kwego Morwa a ka se ke a bona bophelo, eupša kgalefo ya Modimo e dula e le go yena.” (Joh. 3:36) Tumelo ya kgonthe e akaretša gore motho a kwe ditaelo tša Jesu. Johane o tsopotše gantši mantšu a Jesu ao a bontšhago gore go bontšha tumelo ke mogato o tšwelago pele.Joh. 3:16; 6:29, 40; 11:25, 26; 14:1, 12.

11. Re ka bontšha bjang gore re leboga go tseba therešo?

11 Ruri re leboga gore Jehofa o dirišitše moya wa gagwe o mokgethwa go re utollela therešo le go re thuša go bontšha tumelo ditabeng tše dibotse! (Bala Luka 10:21.) Le ka mohla re se ke ra kgaotša go leboga Jehofa ge a re gogetše go yena ka Morwa wa gagwe, yena “Moemedi yo Mogolo le Mophethagatši wa tumelo ya rena.” (Baheb. 12:2) E le go bontšha gore re leboga botho bjoo bjo bogolo bja Modimo, re swanetše go tšwela pele re tiiša tumelo ya rena ka go rapela le ka go ithuta Lentšu la Modimo.—Baef. 6:18; 1 Pet. 2:2.

Bontšha gore o na le tumelo ka go botša ba bangwe ditaba tše dibotse ka dinako tšohle (Bona serapa 12)

12. Re swanetše go bontšha ka ditsela dife gore re na le tumelo?

12 Re swanetše go dula re bontšha tumelo dikholofetšong tša Jehofa. Re swanetše go dira seo ka ditsela tšeo di bonwago ke ba bangwe. Ka mohlala, re tšwela pele re botša batho ka Mmušo wa Modimo le go dira barutiwa. Le gona re tšwela pele re “[direla] bohle botse, eupša kudukudu re bo [direla] bao ba tswalanego le rena tumelong.” (Bagal. 6:10) E bile re šoma ka thata go “[hlobola] semelo sa kgale le ditlwaelo tša sona,” ra phema selo le ge e le sefe seo se ka senyago tumelo ya rena.Bakol. 3:5, 8-10.

GO DUMELA GO MODIMO KE KAROLO YA MOTHEO WA RENA

13. (a) “Tumelo go Modimo” e bohlokwa gakaaka’ng? (b) Tumelo yeo e swantšhwa le eng, gona ka baka la’ng?

13 Beibele e re: “Ka ntle le tumelo go kgahliša Modimo gabotse ga go kgonege, gobane yo a batamelago Modimo o swanetše go dumela gore o gona le gore e ba moputsi wa bao ba mo tsomago ka phišego.” (Baheb. 11:6) Lentšu la Modimo le hlalosa “tumelo go Modimo” e le “motheo” woo ka moka ga rena re o hlokago gore re be Bakriste ba therešo le go dula re le bona. (Baheb. 6:1) Motheong woo, Bakriste ba swanetše go ‘oketša tumelong ya bona’ dika tše dingwe tša bohlokwa “e le gore [ba dule] leratong la Modimo.”Bala 2 Petro 1:5-7; Juda 20, 21.

14, 15. Ke’ng sa bohlokwa kudu gare ga tumelo le lerato?

 14 Bangwadi ba Mangwalo a Bakriste a Segerika ba gateletše bohlokwa bja tumelo ka go bolela ka yona ka makga a mantši kudu. Ga go na seka se sengwe seo go bolelwago kudu ka sona ka Beibeleng go feta tumelo. Na se se ra gore tumelo e phala dika ka moka tšeo Bakriste ba swanetšego go ba le tšona?

15 Ge Paulo a be a bapetša tumelo le lerato o itše: “Ge e ba ke na le tumelo yohle gore ke šuthiše dithaba, eupša ke se na lerato, gona ga ke selo.” (1 Bakor. 13:2) Jesu o bontšhitše gore seka se segologolo ke go rata Modimo ge a be a araba potšišo yeo e rego: “Taelo e kgolokgolo Molaong wa Moshe ke efe?” (Mat. 22:35-40) Lerato le akaretša dika tše dintši tša bohlokwa tšeo Mokriste a swanetšego go ba le tšona, go akaretša le tumelo. Beibele e re “[lerato] le dumela tšohle.” Le na le tumelo dilong tšeo Modimo a di boletšego ka Lentšung la gagwe la therešo.1 Bakor. 13:4, 7.

16, 17. Mangwalo a bontšha bjang gore tumelo le lerato di bohlokwa, eupša seka se segologolo ke sefe, gona ka baka la’ng?

16 Ka ge tumelo le lerato di le bohlokwa, bangwadi ba Mangwalo a Bakriste a Segerika ba boletše ka dika tše ka makga a mantši, gantši lefokong letee. Paulo o ile a kgothaletša bana babo gore ba “[apare] sephemelasefega sa tumelo le lerato.” (1 Bathes. 5:8) Petro o ngwadile gore: ‘Le ge le sa ka la bona Jesu, fela le a mo rata. Le ge le sa mmone ga bjale, fela le bontšha tumelo go yena.’ (1 Pet. 1:8) Jakobo o ile a botšiša bana babo ba tloditšwego gore: “Na Modimo ga se a kgetha bao ba diilago go ya ka lefase gore ba hume tumelong le go ba bajabohwa ba mmušo wo a o holofeditšego bao ba mo ratago?” (Jak. 2:5) Johane yena o ngwadile gore: “Ye ke taelo ya [Modimo] gore re be le tumelo leineng la Morwa wa gagwe Jesu Kriste gomme re ratane, go etša ge a re laetše.”1 Joh. 3:23.

17 Le ge tumelo e le bohlokwa, dika tšeo di tswalanago le yona di ka se sa šoma ge Modimo a phethagatša dikholofetšo tša gagwe gomme re hwetša dilo tšeo a re holofeditšego tšona. Eupša go rata Modimo le baagišani ba rena go ka se tsoge go fedile. Ke ka baka leo Paulo a ngwadilego gore: “Eupša bjale tše di dulago di le gona ke tše tharo tše: tumelo, kholofelo le lerato; eupša se segolo go di feta ka moka ke lerato.”1 Bakor. 13:13.

BOHLATSE BJO MATLA BJA TUMELO

18, 19. Re bona ka’ng gore lehono go na le batho bao ba bontšhago tumelo ya kgonthe, gona ke mang a swanetšego go retwa ka baka la seo?

18 Mehleng yeno, batho ba Jehofa ba be ba dutše ba bontšha tumelo Mmušong wa Modimo. Se se dirile gore go be le paradeise ya moya yeo e nago le badudi ba ka godimo ga dimilione tše seswai. Batho bao ba dulago lefelong le ba bonagatša dika tšeo di enywago ke moya o mokgethwa wa Modimo. (Bagal. 5:22, 23) Ruri bjo ke bohlatse bjo matla bja tumelo ya kgonthe le lerato!

19 Ga go na motho yo a swanetšego go retwa ka baka la seo. Ke Modimo a dirilego gore seo se kgonege. Modiro wo wa bohlokwa o tlišetša “Jehofa botumo, ya ba pontšho go iša mehleng ya neng le neng yeo e ka se kego ya senyega.” (Jes. 55:13) Ruri “ke mpho ya Modimo” gore re ‘phološwe ka tumelo.’ (Baef. 2:8) Paradeise ya rena ya moya e tla tšwela pele e gola e bile e atlega go fihla ge lefaseng ka moka go tla be go phela batho bao ba phethagetšego, bao ba lokilego le bao ba thabilego, e le gore leina la Jehofa le tumišwe ka mo go sa felego. Anke re tšweleng pele re bontšha tumelo dikholofetšong tša Jehofa!