Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  October 2016

‘Le se ke la Lebala go Amogela Batho Bašele’

‘Le se ke la Lebala go Amogela Batho Bašele’

“Le se ke la lebala go amogela baeng.”BAHEB. 13:2.

DIKOPELO: 124, 79

1, 2. (a) Ke ditlhohlo dife tšeo batho bašele ba ka lebeletšanago le tšona? (Bona seswantšho se se lego ka mo godimo.) (b) Moapostola Paulo o gopoditše Bakriste eng, gona seo se rotoša dipotšišo dife?

MENGWAGENG e ka bago e 30 e fetilego, Osei, [1] yo e bego e se Hlatse ka nako yeo, o ile a hudugela Yuropa a etšwa Ghana. O gopola ka gore: “Ke ile ka hlokomela kapela gore batho ba bantši ba be ba se na taba le nna. Boemo bja leratadima bja Yuropa le bjona bo ile bja mmakatša. Ge ke tloga boemafofaneng bja moo gomme ke ekwa kamoo naga yeo e tonyago ka gona, ke ile ka thoma go lla.” Osei o ile a fetša ngwaga a sa hwetše mošomo wa maleba, ka gobane o be a sa kgone go bolela leleme la moo. Ka ge a be a le kgole le gae, o ile a ikwa a le noši e bile a hlologela ba gabo.

2 Ge nkabe o be o le Osei, o be o tla nyaka gore batho ba bangwe ba go sware bjang? Na o be o ka se thabele gore ge o fihla Holong ya Mmušo o amogelwe ka lethabo, go sa šetšwe gore o tšwa kae goba gore o wa mmala ofe? Ge e le gabotse, Beibele e kgothaletša  Bakriste ba therešo gore ba se ke ba “lebala go amogela baeng,” goba batho bašele. (Baheb. 13:2) Anke re ahlaahleng dipotšišo tše di latelago: Jehofa o lebelela bjang batho bašele? Ke ka baka la’ng re swanetše go fetoša tsela yeo re lebelelago batho bašele? Le gona re ka thuša bjang batho ba go tšwa dinageng tše dingwe gore ba ikwe ba lokologile ge ba fihla phuthegong ya rena?

KAMOO JEHOFA A LEBELELAGO BATHO BAŠELE

3, 4. Go ya ka Ekisodo 23:9, Baisiraele ba be ba swanetše go swara badiiledi bjang, gona ka baka la’ng?

3 Ka morago ga gore Jehofa a lokolle batho ba gagwe bokgobeng Egipita, o ile a ba nea melao yeo e bego e tla ba thuša go phedišana gabotse le batho bašele bao ba ilego ba tloga le bona Egipita. (Ek. 12:38, 49; 22:21) Ka ge gantši batho bašele ba diila, Jehofa ka lerato o ile a dira ditokišetšo tša go ba hola. E nngwe ya ditokišetšo tšeo e be e le ya go budutša.Lef. 19:9, 10.

4 Go e na le gore Jehofa a laele Baisiraele gore ba hlomphe badiiledi, o ile a ba laela gore ba ba kwele bohloko. (Bala Ekisodo 23:9.) Ba be ba ‘tseba bophelo bja go ba modiiledi.’ Le pele Baisiraele e ka ba makgoba, mohlomongwe ba be ba hloilwe ke Baegipita ka baka la setlogo sa bona goba bodumedi bja bona. (Gen. 43:32; 46:34; Ek. 1:11-14) Baisiraele ba ile ba phela gabohloko e le badiiledi, eupša Jehofa o be a nyaka gore bona ba sware badiiledi bjalo ka ge eka ke ‘bao ba tswaletšwego nageng ya gabo bona.’—Lef. 19:33, 34.

5. Ke’ng seo se tla re thušago go lebelela batho bašele ka tsela yeo Jehofa a ba lebelelago ka yona?

5 Lehono, re ka kgodišega gore Jehofa o na le taba le batho bašele bao ba tlago dibokeng tša rena. (Doit. 10:17-19; Mal. 3:5, 6) Ge re ka naganišiša ka mathata ao ba lebeletšanago le ona, a bjalo ka go kgethollwa goba go se tsebe leleme la rena, re tla dira seo re ka se kgonago go ba bontšha botho le lerato.—1 Pet. 3:8.

NA O SWANETŠE GO LOKIŠA TSELA YEO O LEBELELAGO BATHO BAŠELE?

6, 7. Ke’ng seo se bontšhago gore Bakriste ba lekgolong la pele la nywaga ba ile ba lahla moya wa kgethollo?

6 Bakriste ba Bajuda ba lekgolong la pele la nywaga ba ile ba swanelwa ke go lahla moya wa kgethollo wo ba bego ba na le wona. Ka Pentekoste ya 33 C.E., Bakriste bao ba bego ba dula Jerusalema ba ile ba amogela ka lerato batho bašele bao ba bego ba sokologetše tumelong ya Sejuda. (Dit. 2:5, 44-47) Tsela yeo Bakriste ba Bajuda ba ilego ba swara badumedigotee ba go tšwa dinageng tše dingwe e bontšha gabotse gore ba be ba kwešiša seo se bolelwago ke “go amogela baeng,” goba batho bašele.

7 Lega go le bjalo, ge phuthego ya Bokriste e dutše e gola, go ile gwa tšwelela boemo bjo bo bego bo bontšha gore kgethollo e sa le gona. Bajuda ba ba bolelago Segerika ba ile ba ngongorega ka gore bahlologadi ba bona ga ba swarwe gabotse. (Dit. 6:1) Gore ba rarolle bothata bjo, baapostola ba ile ba kgetha banna ba šupago bao ba bego ba tla kgonthišetša gore ga go na motho yo a hlokomologwago. Banna bao ka moka ba be ba na le maina a Segerika, e lego seo se ka bago se be se šupa gore baapostola ba be ba nyaka go bontšha batho gore ga ba na kgethollo.Dit. 6:2-6.

8, 9. (a) Re ka lemoga bjang gore re na le mokgwa wa go kgetholla batho goba go ipona re le kaone? (b) Re swanetše go lahla mokgwa ofe? (1 Pet. 1:22)

8 Re lemoga goba re sa lemoge, ka moka ga rena re tutuetšwa ke setšo sa rena. (Baroma 12:2) Go feta moo, re fela re ekwa baagišani, bašomigotee goba bao re tsenago le bona sekolo ba bolela gampe ka batho ba ditlogo tše dingwe, morafo wa bona goba mmala wa bona. Wena o eme kae ditabeng tše? Gona o  dira’ng ge motho yo mongwe a dira metlae ka morafo wa geno—mohlomongwe a kwera setšo sa geno?

9 Ka nako e nngwe, moapostola Petro o ile a kgetholla batho bao e bego e se Bajuda, eupša ganyenyane-ganyenyane a ithuta go lahla mokgwa woo. (Dit. 10:28, 34, 35; Bagal. 2:11-14) Ka mo go swanago, ge e ba o bona eka o na le mokgwanyana wa go kgetholla batho, goba o bona eka morafo wa geno o kaone, o swanetše go lwela go lahla mokgwa woo. (Bala 1 Petro 1:22.) Re swanetše go gopola gore ga go le o tee wa rena yo a swanelwago ke go phološwa; ka moka ga rena ga se ra phethagala, go sa šetšwe gore re ba morafo ofe. (Baroma 3:9, 10, 21-24) Ka baka leo, ga re na lebaka la go ipona re phala batho ba bangwe. (1 Bakor. 4:7) Re swanetše go ekiša moapostola Paulo, yoo a boditšego Bakristegotee le yena ba tloditšwego gore: “Ga le sa hlwa le le bašele le badiiledi, eupša . . . le ditho tša ntlo ya Modimo.” (Baef. 2:19) Ge re dira maiteko a go lahla mokgwa wa go kgetholla batho ba merafo e mengwe, re tla kgona go apara motho yo mofsa.Bakol. 3:10, 11.

KAMOO RE KA BONTŠHAGO BATHO BAŠELE BOTHO

10, 11. Tsela yeo Boase a ilego a swara Ruthe ka yona e bontšha bjang gore o be a ekiša Jehofa?

10 Tsela yeo Boase a ilego a swara Ruthe wa Momoaba ka yona e bontšha gabotse gore o be a ekiša tsela yeo Jehofa a swarago batho bašele ka yona. Ka letšatši le lengwe ge Boase a eya mašemong a gagwe nakong ya puno, o ile a bona mosadi yo šele wa go šoma ka thata a šetše babuni ba gagwe morago gomme a topelela mašaledi a mabele. Ge Boase a ekwa gore Ruthe o be a kgopetše go budutša—le ge a be a na le tshwanelo ya go dira bjalo—ka lerato Boase o ile a mo dumelela go budutša le gare ga dingatana tša diako.Bala Ruthe 2:5-7, 15, 16.

11 Poledišano ya Boase le Ruthe e bontšha gabotse gore o be a tshwenyegile ka Ruthe le go kwešiša maemo a gagwe a thata a go ba motho o šele. Boase o ile a re a tle a dule le sehlopha sa basetsana ba gagwe gore a se ke a tshwenywa ke banna bao ba bego ba šoma mašemong. O ile a ba a kgonthišetša gore Ruthe o hwetša dijo tšeo di lekanego le meetse, go no swana le bašomi ba bangwe. Go oketša moo, Boase ga se a ka a bolela le yena ka lenyatšo, go e na le moo, o ile a mo kgothatša.Ruthe 2:8-10, 13, 14.

12. Mafelelo e ka ba afe ge re bontšha batho bašele botho?

12 Boase o be a sa kgahlwe feela ke tsela yeo Ruthe a bego a rata mmatswale wa gagwe e lego Naomi, eupša gape o be a kgahlwa ke gore ga bjale o be a rapela Jehofa. Botho bjo Boase a ilego a bo bontšha Ruthe e be e le bohlatse bja gore Jehofa o rata mosadi yo yo a bego a ‘tšhabetše ka tlase ga diphego tša Modimo wa Isiraele.’ (Ruthe 2:12, 20; Die. 19:17) Ka mo go swanago, le rena ge re bontšha ‘batho ba mehuta yohle’ botho, ba ka tla ka phuthegong gomme ba lemoga gore Jehofa o ba rata kudu.1 Tim. 2:3, 4.

Na re dumediša ka lethabo batho bašele bao ba tlago Holong ya Mmušo? (Bona serapa 13 le 14)

13, 14. (a) Ke ka baka la’ng re swanetše go dira maiteko a go dumediša batho bašele Holong ya Mmušo? (b) O ka thušwa ke’ng gore o kgone go bolela le batho ba ditšo tše dingwe?

13 Re ka bontšha batho bašele botho ka go ba dumediša ka lethabo ge ba etla Holong ya Mmušo. Re ka ba re lemogile gore batho bao ba ba le dihlong ge ba sa tšwa go fihla e bile ba na le go itulela ba nnoši. Ka baka la tsela yeo ba godišitšwego ka yona goba mohlako, ba ka ipona ba phalwa ke merafo e mengwe. Ka gona re swanetše go ba bontšha gore re na le taba le  bona. Ge e ba go na le lenaneo la JW Language ka segageno, le ka go thuša gore o ba dumediše ka segagabo bona.Bala Bafilipi 2:3, 4.

14 O ka ikwa o thatafalelwa ke go bolela le batho ba ditšo tše dingwe. Ge e ba go le bjalo, lwantšha seo ka go ba botša se sengwe ka wena. E se kgale o ka lemoga gore le na le dilo tše dintši tše le swanago ka tšona go feta tšeo le sa swanego ka tšona, e ka ba e le dilo tša kgonthe goba tšeo o inaganelago tšona. Le gona o ka lemoga gore setšo se sengwe le se sengwe se na le mekgwa ya sona e kgahlišago le e sa kgahlišego.

BA THUŠE GO IKWA BA AMOGELEGILE

15. Ke’ng se se tla re thušago go kwešiša batho bao ba lekago go tlwaela maemo a nageng yeo re dulago go yona?

15 E le gore o thuše ba bangwe go ikwa ba amogelegile phuthegong ya geno, ipotšiše go tšwa pelong gore: ‘Ge nkabe e le nna ke hudugetšego nageng e šele, ke be ke tla nyaka gore batho ba moo ba ntshware bjang?’ (Mat. 7:12) O se ke wa felela pelo batho bao ba lekago go tlwaela maemo a nageng yeo o dulago go yona. Mathomong, re ka no se kwešiše tsela yeo ba naganago ka yona goba ba dirago dilo ka yona. Eupša go e na le go letela gore ba rate setšo sa gabo rena, re swanetše go ba amogela ka tsela yeo ba lego ka yona.Bala Baroma 15:7.

16, 17. (a) Re ka dira’ng gore re tlwaelane le batho ba ditšo tše dingwe? (b) Re ka thuša bjang batho bašele bao ba lego phuthegong ya gabo rena?

16 Ge re ka ithuta ka dinaga tšeo batho bao ba tšwago go tšona le setšo sa bona, re ka ba tlwaela gabonolo. Nakong ya borapedi bja lapa, re ka ithuta ka ditšo tša bao re sa ba tlwaelago ka phuthegong goba bao re kopanago le bona tšhemong. Tsela e nngwe ya go tlwaelana le batho ba ditšo tše dingwe ke ka go ba laletša ka malapeng a rena. Ka ge Jehofa a “buletše ditšhaba mojako o išago tumelong,” le rena re  swanetše go amogela batho bašele bao “ba tswalanego le rena tumelong” ka malapeng a rena.Dit. 14:27; Bagal. 6:10; Jobo 31:32.

Na re laletša batho bašele ka malapeng a rena? (Bona serapa 16 le 17)

17 Ge re fetša nako le lapa leo le tšwago nageng e šele, re tla kwešiša maiteko ao le a dirago go tlwaelana le setšo sa rena. Eupša re ka lemoga gore ba hloka thušo gore ba ithute leleme la rena. Re ka ba thuša gape gore ba hwetše diofisi tšeo di ka ba thušago go hwetša mošomo wa maleba goba madulo. Maiteko ao a ka thuša bana babo rena ba.Die. 3:27.

18. Batho bašele ba ka ekiša mohlala wa mang, gona ba ka dira seo ka ditsela dife?

18 Ke therešo gore batho bašele ba tla leka ka thata go tlwaela setšo sa naga yeo ba hudugetšego go yona. Ruthe o ile a bea mohlala o mobotse kudu tabeng ye. Sa pele, o ile a hlompha setšo sa naga yeo a bego a hudugetše go yona ka go kgopela tumelelo ya go budutša. (Ruthe 2:7) Ga se a nyatša tokišetšo yeo goba go nyatša badudi ba nageng yeo. Sa bobedi, o ile a leboga kudu botho bjo a ilego a bo bontšhwa. (Ruthe 2:13) Ge batho bašele ba itshwara ka tsela yeo, ba tla hlomphiwa ka phuthegong le motseng.

19. Ke ka baka la’ng re swanetše go amogela batho bašele?

19 Re thabela gore Jehofa ka botho bja gagwe bjo bogolo o dirile gore batho ba ditlogo ka moka ba kwe ditaba tše dibotse. Go ka direga gore ge ba be ba le dinageng tša gabo bona ga se ba hwetša sebaka sa go ithuta Beibele le Dihlatse tša Jehofa goba go kopanela le tšona ka bolokologi. Eupša ka ge ga bjale ba hweditše sebaka sa go kopanela le rena, re swanetše go ba thuša gore ba se sa ikwa e le batho bašele. Ge re ba bontšha botho, ba tla lemoga gore Jehofa o a ba rata, le ge re sa kgone go ba thuša ka tša ditšhelete. Ka gona anke re amogeleng batho bašele, ka ge re le “baekiši ba Modimo.”Baef. 5:1, 2.

^ [1] (serapa 1) Leina le fetotšwe.