Eya go dikagare

Eya go lelokelelo la dikagare

Dihlatse tša Jehofa

Kgetha leleme Sepedi

 GO TŠWA BOBOLOKELONG BJA RENA

“Go Bolela ka Mafolofolo le ka Lethabo go Feta le ge e le Neng Pele”

“Go Bolela ka Mafolofolo le ka Lethabo go Feta le ge e le Neng Pele”

E BE e le mesong ya Labohlano la September 1922 gomme go šetše go thomile go fiša ge batho ba 8 000 ba tletše ka holong. Modulasetulo wa lenaneo o ile a tsebiša gore tiragalong yeo e bohlokwa motho yo mongwe le yo mongwe yo a nyakago go tšwa ka holong a ka na a tšwa, eupša o be a ka se dumelelwe go boela ka holong yeo.

Go ile gwa opelwa dikopelo nakong ya lenaneo la go bula leo le bitšwago “Tirelo ya go Tumiša Modimo” gomme ka morago Joseph F. Rutherford a ema sethaleng. Bontši bja batho bao ba bego ba le ka holong yeo ba be ba sa dudišege. Ba sego kae ba be ba ema-ema ka baka la phišo. Seboledi se ile sa ba kgopela gore ba dule fase gomme ba theetše. Ge polelo e thoma, ga go na motho yo a ilego a lemoga lešela le legolo leo le bego le phuthilwe ka bothakga ka godimo ga sethala.

Polelo yeo ya Ngwanabo rena Rutherford e be e na le sehlogo seo se rego: “Mmušo wa Modimo o kgauswi.” O ile a bolela ka lentšu le matla mo e ka bago iri le seripa a hlalosa kamoo baporofeta ba bogologolo ba ilego ba bolela ka sebete ka Mmušo wa Modimo wo o bego o sa tla. Ge a le kgauswi le go phetha polelo ya gagwe, o ile a botšiša gore: “Na le a dumela gore Kgoši ya letago e thomile go buša?” Batheetši ba ile ba arabela ka mogoo o mogolo ba re: “Ee!”

Ngwanabo rena Rutherford o ile a goeletša ka gore: “Ka gona boelang tšhemong, lena barwa ba Modimo yo a phagamego! Bonang, Kgoši e a buša! Lena le batseta ba yona. Ka gona tsebatšang, tsebatšang, tsebatšang.”

Ka yona nako yeo, lešela leo le bego le phuthilwe ka bothakga ka godimo ga sethala la phurollwa ka tsela e kgahlišago ka pele ga batheetši. Le be le na le mantšu ao a rego: “Tsebatšang Kgoši le Mmušo!”

Ray Bopp o gopola ka gore: “Ge seo se direga, batheetši ba ile ba thaba kudu.” Anna Gardner o re “marulelo a ile a šikinyega ge batheetši ba opa magoswi.” Fred Twarosh o itše: “Batheetši ka moka ba ile ba emelela ka nako e tee.” Evangelos Scouffas o itše: “Go be go le bjalo ka ge eka matla a magolo a re emeledišitše ditulong tša rena gomme ra emelela mahlo a rena a tletše ka megokgo.”

Ba bantši ba bao ba bego ba le gona kopanong yeo ba be ba šetše ba botša batho ditaba tše dibotse tša Mmušo. Lega go le bjalo, ga bjale ba be ba tseba gabotse seo ba swanetšego go se bolela. Ethel Bennecoff o boletše gore Barutwana ba Beibele ba ile ba tšwela pele “ba bolela ditaba tše dibotse tša Mmušo ka mafolofolo le ka lethabo go feta le ge e le neng pele.” Odessa Tuck, yoo ka nako yeo a bego a na le mengwaga e 18, o ile a tloga kopanong yeo a ikemišeditše go yo arabela potšišong yeo e rego: ‘Ke mang a tlago go ya?’ O itše: “Ke be ke sa tsebe gore go iwa kae, go yo dirwa eng goba gore selo seo se yo dirwa bjang. Selo feela seo ke bego ke se tseba ke gore ke be ke nyaka go swana le Jesaya yo a itšego: ‘Ke nna yo! Roma nna.’” (Jes. 6:8) Ralph Leffler o itše: “Letšatši leo le le sa lebalegego e bile mathomomayo a mošomo o mogolo wa go bolela ka Mmušo wa Modimo woo lehono o dirwago lefaseng ka moka.”

Ga go makatše ge kopano ye ya selete yeo e bego e swaretšwe kua Cedar Point, Ohio ka 1922 e le tiragalo e kgolo kudu historing ya Dihlatse tša Jehofa! George Gangas o itše: “Kopano yeo e ile ya ntutueletša gore le ka mohla ke se tsoge ke lofile kopano.” Ngwanabo rena George Gangas o boletše gore go tloga letšatšing leo ga a gopole a lofa kopano. Julia Wilcox o ngwadile gore: “Ke hloka mantšu a go hlalosa tsela yeo ke ikwago ka yona nako le nako ge dikgatišo tša rena di bolela ka kopano ya Cedar Point ya 1922. Ka mehla ke no nyaka gore: ‘Ke a leboga Jehofa ge o ile wa nthuša gore ke be gona kopanong yeo.’”

Ga go pelaelo gore ba bantši ba rena lehono go na le kopano ya selete yeo re kilego ra e thabela kudu le yeo e ilego ya re dira gore re be mafolofolo tirelong ya Jehofa le go re dira gore re rate Modimo wa rena yo mogolo le Kgoši yeo a e kgethilego. Ge re nagana ka dinako tše bjalo tše di thabišago, le rena re tutueletšega go bolela gore: “Ke a leboga Jehofa ge o ile wa nthuša gore ke be gona kopanong yeo.”