Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  May 2016

O Dira Bjang Diphetho tša Gago?

O Dira Bjang Diphetho tša Gago?

Tšwelang pele le hlatha seo thato ya Jehofa e lego sona.BAEFESO 5:17.

DIKOPELO: 69, 57

1. Mehlala e mengwe ya melao ya ka Beibeleng ke efe, gona go ekwa go re hola bjang?

KA Beibeleng, Jehofa o re neile melao yeo e re botšago ka mo go kwagalago seo a nyakago re se dira. Ka mohlala, o re botša gore re se ke ra rapela medimo ya diswantšho, ra utswa, ra tagwa goba ra dira dilo tšeo di gobogilego. (1 Bakorinthe 6:9, 10) Le gona Morwa wa Jehofa, e lego Jesu, o neile balatedi ba gagwe taelo ye e lebanyago: “Le dire batho ba ditšhaba ka moka barutiwa, le ba kolobetša leineng la Tate le la Morwa le la moya o mokgethwa, le ba ruta go boloka dilo tšohle tšeo ke le laetšego tšona. Tsebang gore ke na le lena matšatši ka moka go fihla bofelong bja tshepedišo ya dilo.” (Mateo 28:19, 20) Selo se sengwe le se sengwe seo Jehofa le Jesu ba re botšago gore re se dire se hola rena. Melao ya Jehofa e re ruta kamoo re ka itlhokomelago ka gona le go hlokomela malapa a rena gomme ra phela gabotse mmeleng le go thaba. Sa bohlokwa kudu, ge re ekwa melao ya Jehofa, go akaretša le taelo ya go dira boboledi, o thabela seo gomme o a re šegofatša.

2, 3. (a) Ke ka baka la’ng Beibele e sa re beele melao boemong bjo bongwe le bjo bongwe bophelong? (b) Ke dipotšišo dife tšeo di tlago go ahlaahlwa sehlogong se? (Bona seswantšho seo se lego mathomong a sehlogo.)

 2 Lega go le bjalo, Beibele ga e re beele melao boemong bjo bongwe le bjo bongwe bophelong. Ka mohlala, ga re hwetše tlhahlo e lebanyago ka Beibeleng ya seo re swanetšego go se apara. Se se bontšha gore Jehofa o bohlale. Le ge fešene e fetoga nako le nako gomme batho lefaseng ka moka ba apara mehuta e fapafapanego ya diaparo, Beibele yona ga e felelwe ke nako. E bile ga e na melao e mentši mabapi le mešomo goba boithabišo bjoo re swanetšego go bo kgetha goba melao e lebanyago ya seo re swanetšego go se dira gore re dule re phetše gabotse mmeleng. Jehofa o dumelela motho ka boyena le dihlogo tša malapa go itirela diphetho ditabeng tše.

3 Ka gona ge re swanetše go dira phetho e kgolo yeo e tlago go kgoma bophelo bja rena gomme re sa hwetše molao wo o bolelago ka yona ka Beibeleng, re ka ipotšiša gore: ‘Na Jehofa o na le taba ka phetho yeo ke e dirago? Na o tla thabišwa ke seo ke kgethago go se dira ge feela ke sa robe molao wa ka Beibeleng? Nka kgodišega bjang gore o tla thabišwa ke diphetho tšeo ke di dirago?’

DIPHETHO TŠA RENA DI KGOMA RENA LE BA BANGWE

4, 5. Diphetho tša rena di ka re kgoma bjang le go kgoma ba bangwe?

4 Batho ba bangwe ba nagana gore ba ka dira selo se sengwe le se sengwe seo ba nyakago go se dira. Eupša rena re nyaka go dira seo se thabišago Jehofa. Ka gona pele re dira phetho, re swanetše go nagana ka seo Beibele e se bolelago gomme re se kwe. Ka mohlala, Beibele e re botša kamoo Modimo a ikwago ka gona ka go dirišwa ga madi, ka gona re latela seo e se bolelago. (Genesi 9:4; Ditiro 15:28, 29) Re ka rapela Jehofa gore a re thuše go dira diphetho tšeo di tlago go mo thabiša.

5 Diphetho tša rena di a re kgoma. Phetho e botse e ka re thuša go batamela kgauswi le Jehofa. Phetho e mpe e ka senya segwera sa rena le yena. E bile diphetho tša rena di ka kgoma batho ba bangwe. Ga re nyake go dira selo le ge e le sefe seo se ka kgopišago bana babo rena goba sa fokodiša tumelo ya bona. Le gona ga re nyake go lweša bana babo rena ka phuthegong. Ka baka leo, go bohlokwa gore re dire diphetho tše dibotse.—Bala Baroma 14:19; Bagalatia 6:7.

6. Ke’ng seo se swanetšego go re hlahla ge re dira diphetho?

6 Re ka dira bjang diphetho tše dibotse ge Beibele e sa re botše ka go lebanya seo re swanetšego go se dira? Go e na le go fo dira seo re se ratago, re swanetše go nagana ka kelohloko ka boemo bja rena gomme re dire phetho yeo e tlago go thabiša Jehofa. Ke moka re ka kgodišega gore o tla re thuša go atlega.Bala Psalme 37:5.

KE ENG SEO JEHOFA A NYAKAGO KE SE DIRA?

7. Ge go se na molao wa Beibele boemong bjo itšego, re ka tseba bjang seo Jehofa a nyakago re se dira boemong bjoo?

7 Eupša re ka tseba bjang seo se tlago go thabiša Jehofa? Baefeso 5:17 e re: “Tšwelang pele le hlatha seo thato ya Jehofa e lego sona.” Ge go se na molao o  lebanyago wa Beibele boemong bjo itšego, re swanetše go nagana, goba re kwešiše seo Jehofa a nyakago re se dira boemong bjoo. Re ka dira seo bjang? Re swanetše go rapela le go dumelela moya wa gagwe o mokgethwa o re hlahla.

8. Jesu o be a tseba bjang seo Jehofa a bego a nyaka gore a se dire? Nea mohlala.

8 Jesu o be a dula a nagana ka seo Jehofa a bego a nyaka gore a se dire. Ka mohlala, ka makga a mabedi ge mašaba a be a swerwe ke tlala, Jesu o ile a rapela gomme a ba fepa ka mohlolo. (Mateo 14:17-20; 15:34-37) Eupša ge a be a swerwe ke tlala a le lešokeng gomme Diabolo a nyaka gore a fetoše maswika gore e be senkgwa, o ile a gana. (Bala Mateo 4:2-4.) O be a tseba Tatagwe gabotse, ka gona o be a tseba gore Jehofa o be a ka se nyake gore a diriše moya o mokgethwa go ikhola. O be a kgodišegile gore Tatagwe o be a tla mo hlahla le go mo nea dijo ka nako ya maleba.

9, 10. Ke’ng seo se tlago go re thuša go dira diphetho tše dibotse? Nea mohlala.

9 Go swana le Jesu, re ka dira diphetho tše dibotse ge e ba re ithekga ka Jehofa gore a re hlahle. Beibele e re: “Bota Jehofa ka pelo ya gago ka moka gomme o se ke wa ithekga ka tlhaologanyo ya gago. Mo ele hloko ditseleng tša gago ka moka gomme yena o tla letliša ditsela tša gago. O se ke wa ipona o le bohlale. Boifa Jehofa gomme o furalele bobe.” (Diema 3:5-7) Ge re ithuta Beibele gomme re lemoga kamoo Jehofa a naganago ka gona, re tla kwešiša seo a nyakago re se dira boemong bjo itšego. Le gona ge re dutše re ithuta go nagana go swana le Jehofa, go tla ba bonolo go dira diphetho tšeo di tlago go mo thabiša. Ka tsela ye, re ba le “pelo ya nama” goba yeo e kwago tlhahlo ya Modimo.Hesekiele 11:19.

10 A re re mosadi yo a nyetšwego o bona dieta tše dibotse ka lebenkeleng. Eupša di a tura. Le ge monna wa gagwe a se gona moo, o tseba seo a bego a tla se nagana ge a be a ka senya tšhelete gomme a di reka. O tseba seo bjang? Ba šetše ba na le nako e telele ba nyalane, ka gona o a tseba gore monna wa gagwe o nyaka gore ba diriše tšhelete ya bona bjang. Ka tsela e swanago, ge re ithuta go nagana go swana le Jehofa le seo a se dirilego nakong e fetilego, re tla tseba seo a nyakago re se dira maemong a fapafapanego.

O KA TSEBA BJANG SEO JEHOFA A SE NAGANAGO?

11. Ke dipotšišo dife tšeo re ka ipotšišago tšona ge re bala goba re ithuta Beibele? (Bona lepokisi le le rego, “ Ge o Ithuta Beibele, Ipotšiše Gore.”)

11 Re ka tseba bjang seo Jehofa a se naganago? Selo se bohlokwa kudu seo re ka se dirago ke go bala Beibele le go ithuta yona ka mehla. Ge re dutše re dira bjalo, re ka ipotšiša gore: ‘Se se nthuta’ng ka Jehofa? Ke ka baka la’ng a ile a dira dilo ka tsela ye?’ Le gona go swana le Dafida, re swanetše go kgopela Jehofa gore  a re thuše go mo tseba gakaone. Dafida o ngwadile gore: “Ntsebiše ditsela tša gago hle Jehofa; nthute ditsela tša gago. Ntshepediše therešong ya gago gomme o nthute, gobane o Modimo yo a mphološago. Ke holofetše wena letšatši ka moka.” (Psalme 25:4, 5) Ge re ithuta selo se itšego ka Jehofa, re ka nagana ka maemo ao re ka dirišago taba yeo go ona. Na re ka e diriša ka lapeng, mošomong, sekolong goba tšhemong? Ge re nagana ka boemo bjo itšego, go tla ba bonolo go tseba kamoo Jehofa a ka nyakago re diriša taba yeo.

E le gore re tsebe seo Jehofa a se naganago, re swanetše go bala Beibele le go ithuta yona ka mehla

12. Dikgatišo tša rena le diboka di ka re thuša bjang go tseba seo Jehofa a se naganago ka ditaba tše itšego?

12 Tsela e nngwe ya go tseba kamoo Jehofa a naganago ka gona ke ka go latela ka kelohloko seo mokgatlo wa gagwe o re rutago sona go tšwa Beibeleng. Ka mohlala, ge re swanetše go dira phetho e itšego, puku ya Tlhahlo ya go Dira Nyakišišo ya Dihlatse tša Jehofa e ka re thuša go tseba seo Jehofa a se naganago. Le gona re ka holwa ke diboka tša rena tša Bokriste ge re theetša ka kelohloko, re araba e bile re naganišiša ka seo se rutwago. Se  se tla re thuša go ithuta go nagana go swana le Jehofa. Ka go re’alo re tla kgona go dira diphetho tšeo di tla mo kgahlišago le tšeo a tlago go di šegofatša.

NAGANIŠIŠA KA SEO JEHOFA A SE NAGANAGO PELE O DIRA PHETHO

13. Nea mohlala wo o bontšhago kamoo go tseba seo Jehofa a se naganago go ka re thušago go dira diphetho tše bohlale.

13 Anke re boneng mohlala wa kamoo re ka dirago diphetho tše bohlale ge re ela hloko seo Jehofa a se naganago. A re re o nyaka go ba mmulamadibogo. O dirile diphetogo tše itšego bophelong bja gago e le gore o fetše nako e ntši bodireding. Eupša o sa dutše o sa kgonthišege ge e ba o tla kgona go phela ka tšhelete e nyenyane le dilo tše sego kae. Ke therešo gore Beibele ga e re re swanetše go ba babulamadibogo go bontšha gore re hlankela Jehofa. Re ka tšwela pele re mo hlankela ka potego re le bagoeledi. Eupša ka lehlakoreng le lengwe, Jesu o boletše gore Jehofa o šegofatša bao ba ikgafago ka baka la Mmušo. (Bala Luka 18:29, 30.) Le gona Beibele e re Jehofa o a thaba ge re dira sohle seo re ka se kgonago go mo tumiša, e bile o nyaka gore re thabele go mo hlankela. (Psalme 119:108; 2 Bakorinthe 9:7) Ge re ka rapela ka dilo tše le go naganišiša ka tšona, re ka dira phetho e botse boemong bjo re tla bego re le go bjona le yeo Jehofa a tla e šegofatšago.

14. O ka tseba bjang gore moaparo o itšego o thabiša Jehofa goba go se bjalo?

14 Mohlala o mongwe šo: A re re o tloga o rata diaparo tše itšego, eupša o a tseba gore ba bangwe ka phuthegong ba ka kgopišwa ke go go bona o apere diaparo tšeo. Beibele ga e bolele selo ka mohuta woo wa diaparo. Ka gona, o ka tseba bjang seo Jehofa a se naganago ka diaparo tšeo? Beibele e re: “Basadi ba ikgabiše ka moaparo o rulagantšwego gabotse, ka go se solege le ka go hlaphogelwa ga monagano, e sego ka mekgwa e feteletšego ya go loga moriri le ya go ikgabiša ka gauta goba diperela goba diaparo tša theko e kgolo, eupša ka tsela e swanelago basadi bao ba ipolelago gore ba ineetše go Modimo, e lego ka mediro e mebotse.” (1 Timotheo 2:9, 10) Mantšu a a šoma go bahlanka ka moka ba Jehofa, go akaretša le banna. Ge re na le boipoetšo, re tla nagana ka seo ba bangwe ba ka se naganago ka diaparo tšeo re kgethago go di apara. Le gona ka ge re rata bana babo rena, re phema go ba kgopiša goba go ba galefiša. (1 Bakorinthe 10:23, 24; Bafilipi 3:17) Ge e ba re ela hloko seo Beibele e se bolelago le kamoo Jehofa a naganago ka gona, re ka dira diphetho tšeo di tlago go mo thabiša.

15, 16. (a) Jehofa o ikwa bjang ge re tšwela pele re nagana ka dilo tše di gobogilego? (b) Ge re kgetha boithabišo, re ka tseba bjang bjo bo thabišago Jehofa? (c) Ke’ng seo re swanetšego go se dira pele re dira diphetho tše bohlokwa kudu?

15 Ka Beibeleng, re ithuta gore Jehofa o kwa bohloko kudu le go nyama ge batho ba dira dilo tše mpe le ge ba nagana ka tšona. (Bala Genesi 6:5, 6.) Go molaleng gore Jehofa ga a nyake gore re nagane ka dilo tše di gobogilego. Ge e le gabotse, ge e ba re tšwela pele re nagana ka dilo tše, re ka feleletša re di dira. Go e na le moo, Jehofa o nyaka gore re nagane ka dilo tše di hlwekilego le tše dibotse. Morutiwa Jakobo o ngwadile gore bohlale bja Jehofa “sa pelepele bo sekile,  gape bo na le khutšo, bo lekalekane, bo ikemišeditše go kwa, bo tletše kgaugelo le dienywa tše botse, ga bo kgetholle e bile ga bo na boikaketši.” (Jakobo 3:17) Ka gona Beibele e re botša gore re swanetše go phema boithabišo le ge e le bofe bjo bo ka dirago gore re nagane dilo tše di sa hlwekago le tše mpe goba re kganyoge go di dira. E bile ge e ba re kwešiša gabotse seo Jehofa a se ratago le seo a se hloilego, go tla ba bonolo go tseba gore ke dipuku dife, dimubi goba dipapadi tšeo re swanetšego go di kgetha. Go ka se nyakege gore re botšiše ba bangwe seo re swanetšego go se dira.

16 Ge re swanetše go dira phetho e itšego, gantši re ba le dikgetho tše dintši tšeo di ka thabišago Jehofa. Eupša ge re nyaka go dira phetho e bohlokwa kudu, go ka ba kaone go kgopela keletšo go mogolo goba ngwanabo rena yo a nago le phihlelo goba kgaetšedi. (Tito 2:3-5; Jakobo 5:13-15) Eupša ga se ra swanela go kgopela motho yoo gore a re direle phetho. Go e na le moo, re swanetše go nagana ka kelohloko ka seo re se tsebago go tšwa Beibeleng gomme re itirele phetho. (Baheberu 5:14) Moapostola Paulo o itše: “Yo mongwe le yo mongwe o tla rwala morwalo wa gagwe.”—Bagalatia 6:5.

17. Re holega bjang ge re dira diphetho tšeo di thabišago Jehofa?

17 Ge re dira diphetho tšeo di thabišago Jehofa, re batamela kgauswi kudu le yena e bile o tla re amogela le go re šegofatša. (Jakobo 4:8) Ke moka tumelo ya rena go Jehofa e a tia. Ka gona anke re naganišišeng ka seo re se balago ka Beibeleng e le gore re kwešiše kamoo Jehofa a naganago ka gona. Ke therešo gore re tlo dula re ithuta dilo tše difsa ka Jehofa. (Jobo 26:14) Eupša ge e ba re šoma ka thata go ithuta ka yena gona bjale, re tla hlalefa gomme ra kgona go dira diphetho tše dibotse. (Diema 2:1-5) Dikgopolo le maano a batho di a fetoga, eupša Jehofa ga a fetoge. Mopsalme yo mongwe o itše: “Morero wa Jehofa . . . o tla ema go iša mehleng ya neng le neng; menagano ya pelo ya gagwe ke ya go tloga molokong o mongwe go ya go o mongwe.” (Psalme 33:11) Ruri re ka dira diphetho tše dibotse kudu ge re ithuta go nagana go swana le Jehofa gomme ra dira seo se mo thabišago.