Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) MAY 2016

Ikhole ka Botlalo ka Ditokišetšo tša Jehofa

Ikhole ka Botlalo ka Ditokišetšo tša Jehofa

Nna, Jehofa, ke Modimo wa lena, Yo a le rutago gore le holege.”JESAYA 48:17.

DIKOPELO: 117, 114

1, 2. (a) Dihlatse tša Jehofa di ikwa bjang ka Beibele? (b) Wena o rata karolo efe ya Beibele?

KA GE re le Dihlatse tša Jehofa, re rata Beibele. E a re homotša, e re nea kholofelo le tlhahlo yeo re ka e botago. (Baroma 15:4) Beibele ga se puku ya dikgopolo tša batho, eupša ke “lentšu la Modimo.”1 Bathesalonika 2:13.

2 Go ka direga gore ka moka ga rena re na le dikarolo tša Beibele tšeo re di ratago. Ba bangwe ba rata Diebangedi ka gobane di re bontšha dika tša Jehofa tše dibotse tšeo di bonagaditšwego ke Jesu. (Johane 14:9) Ba bangwe ba rata dipuku tša boporofeta tše bjalo ka Kutollo, tšeo di re botšago ka “dilo tše di tlago go direga kgauswinyane.” (Kutollo 1:1) Ba bangwe ba homotšwa ke go bala Dipsalme, mola ba bangwe ba thabela go bala ka keletšo e botse yeo e lego ka pukung ya Diema. Ka gona go molaleng gore Beibele e ngwaletšwe batho ka moka.

3, 4. (a) Re ikwa bjang ka dikgatišo tša rena? (b) Ke dikgatišo dife tše re di hwetšago tšeo di ngwalelwago batho ba itšego ka go lebanya?

3 Ka ge re rata Beibele, re rata le dikgatišo tša rena tšeo di  theilwego Lentšung la Modimo. Dipuku tša rena, diporoutšha, dimakasine le dikgatišo tše dingwe ka moka ke ditokišetšo tšeo di tšwago go Jehofa. Di re thuša go dula re le kgauswi le yena le go matlafatša tumelo ya rena.Tito 2:2.

4 Bontši bja dikgatišo tša rena di ngwalelwa Dihlatse tša Jehofa ka moka. Lega go le bjalo, tše dingwe di ngwalelwa batho ba itšego ka go lebanya, go swana le bafsa goba batswadi. Bontši bja dihlogo le dibidio tša wepesaeteng ya rena di hlametšwe ka mo go kgethegilego batho bao e sego Dihlatse tša Jehofa. Ditokišetšo tše tše di fapafapanego di bontšha gore Jehofa o phethagaditše seo a se boletšego ge a be a re o tlo ruta batho ka moka dilo tše dintši.Jesaya 25:6.

5. Ke’ng seo re ka kgodišegago ka sona?

5 Ba bantši ba rena re duma go ba le nako e oketšegilego ya go bala Beibele le dikgatišo tša rena. Ka gona ga se ka mehla re ka bago le nako e lekanago ya go ithuta kgatišo e nngwe le e nngwe yeo re e hwetšago. Eupša re ka kgodišega gore Jehofa o a thaba ge re diriša nako ya rena ka bohlale go bala le go ithuta Beibele le dikgatišo tša rena. (Baefeso 5:15, 16) Lega go le bjalo, go na le kotsi yeo re swanetšego go e phema. Ke efe?

6. Ke’ng seo se ka re šitišago go holwa ke ditokišetšo tše di tšwago go Jehofa?

6 Ge e ba re sa hlokomele, re ka ipotša gore dikarolo tše dingwe tša Beibele goba dikgatišo tše itšego ga di šome go rena. Ka mohlala, re dira’ng ge re bona eka karolo e itšego ya Beibele ga e šome go rena? Goba re dira’ng ge re hwetša gore kgatišo e itšego ga se ya ngwalelwa rena ka go lebanya? Na re no bala kgatišo yeo ka lebelo goba ra se e bale? Ge e ba re dira bjalo, re ka fetwa ke ditaba tša bohlokwa tšeo di ka re holago. Re ka phema bjang kotsi yeo? Re swanetše go gopola gore dijo tša moya ka moka tšeo re di hwetšago di tšwa go Jehofa. Ka Beibeleng re bala gore: “Nna, Jehofa, ke Modimo wa lena, Yo a le rutago gore le holege.” (Jesaya 48:17) Sehlogong se, re tlo ahlaahla ditšhišinyo tše tharo tšeo di tlago go re thuša go holwa ke ditokišetšo ka moka tšeo di tšwago go Jehofa.

KAMOO O KA HOLWAGO KE MMALO WA GAGO WA BEIBELE

7. Ke ka baka la’ng re swanetše go bala Beibele ka monagano o bulegilego?

7 Bala Beibele ka monagano o bulegilego. Ke therešo gore dikarolo tše dingwe tša Beibele di ngwaletšwe batho ba itšego goba sehlopha se itšego sa batho. Lega go le bjalo, Beibele e bolela ka mo go kwagalago gore “Lengwalo ka moka le buduletšwe ke Modimo gomme le [a] hola.” (2 Timotheo 3:16) Ke ka baka leo re swanetšego go bala Beibele ka monagano o bulegilego. Ngwanabo rena yo mongwe ge a bala Beibele o dula a ipotša gore pegong e tee feela a ka ithuta dilo tše dintši. Seo se mo thuša gore a hwetše dintlha tše dingwe tšeo di utamego. Ka gona pele re bala Beibele, re swanetše go kgopela Jehofa gore a re thuše go ba le monagano o bulegilego le go re nea bohlale bja go kwešiša dithuto tšeo a nyakago re ithuta tšona.Esera 7:10; bala Jakobo 1:5.

Na o dira sohle se o ka se kgonago gore o holwe ke mmalo wa gago wa Beibele? (Bona serapa 7)

8, 9. (a) Ge re bala Beibele, ke dipotšišo dife tšeo re ka ipotšišago tšona? (b) Dika tšeo bagolo ba Bakriste ba swanetšego go ba le tšona di re ruta’ng ka Jehofa?

8 Ipotšiše dipotšišo. Ge o bala Beibele,  ema gomme o ipotšiše dipotšišo tše di latelago: ‘Taba ye e nthuta’ng ka Jehofa? Nka e diriša bjang bophelong bja ka? Nka e diriša bjang go thuša ba bangwe?’ Ge re naganišiša ka dipotšišo tše, re tla holwa kudu ke mmalo wa rena wa Beibele. Anke re neeng mohlala o tee. Beibele e bolela ka dika tše itšego tšeo bagolo ba Bakriste ba swanetšego go ba le tšona. (Bala 1 Timotheo 3:2-7.) Eupša ba bantši ba rena ga re bagolo, ka gona re ka nagana gore ditemana tšeo di ka se re thuše ka selo. Lega go le bjalo, anke re dirišeng dipotšišo tše tharo tše di lego serapeng se go bona kamoo dika tšeo di ka thušago yo mongwe le yo mongwe wa rena.

9 “Taba ye e nthuta’ng ka Jehofa?” Jehofa o re boditše dilo tšeo motho a swanetšego go di dira gore a swanelege go ba mogolo. O letetše mo gontši go banna ba bao ba hlokometšego phuthego. Se se bontšha gore phuthego e bohlokwa kudu go Jehofa. Beibele e re o e rekile “ka madi a Morwa wa gagwe.” (Ditiro 20:28) Ka gona Jehofa o letetše gore bagolo e be mehlala e mebotse, e bile ba ikarabela go yena tseleng yeo ba swarago ditho tša phuthego. O nyaka gore re ikwe re šireletšegile ka tlase ga tlhokomelo ya bona. (Jesaya 32:1, 2) Ge re bala ka dika tšeo mogolo a swanetšego go ba le tšona, re ithuta gore Jehofa ga a nyake phošo ka rena.

Jehofa o letetše gore yo mongwe le yo mongwe wa rena a be le tekatekano le go dira diphetho tše bohlale

10, 11. (a) Ge re bala ka dika tšeo bagolo ba swanetšego go ba le tšona, re ka diriša bjang taba yeo maphelong a rena? (b) Re ka diriša bjang taba ye go thuša ba bangwe?

 10 “Nka diriša bjang taba ye bophelong bja ka?” Ge e ba o le mogolo, o swanetše go dula o hlahloba dika tšeo gomme o leke go kaonefatša go tšona. Ge e ba o “katanela go fihlelela bolebeledi,” o swanetše go leka go fihlelela dika tšeo ka mo o ka kgonago ka gona. (1 Timotheo 3:1) Eupša Bakriste ka moka ba ka ithuta se sengwe dikeng tše. Ka mohlala, Jehofa o letetše gore yo mongwe le yo mongwe wa rena a be le tekatekano le go dira diphetho tše bohlale. (Bafilipi 4:5; 1 Petro 4:7) Ge bagolo e le “mehlala go mohlape,” re ka ithuta go bona gomme ra “[ekiša] tumelo ya bona.”1 Petro 5:3; Baheberu 13:7.

11 “Nka diriša bjang taba ye go thuša ba bangwe?” Re ka diriša dika tšeo bagolo ba Bakriste ba swanetšego go ba le tšona go thuša barutwana ba rena ba Beibele le batho bao ba thabelago go kwešiša gore bagolo ga ba swane le baruti. Le gona dika tšeo di ka re thuša go gopola mošomo o mogolo woo bagolo ba o dirago ka phuthegong. Ke moka seo se tla re thuša go ba hlompha. (1 Bathesalonika 5:12) Ge re dula re ba hlompha, ba tla phetha mešomo ya bona ka lethabo.Baheberu 13:17.

12, 13. (a) Ke ditaba dife tšeo re ka di nyakišišago re diriša dilo tšeo re nago le tšona? (b) Nea mohlala wo o bontšhago gore go tseba ditaba tša mabapi le puku e itšego ya Beibele go ka re utollela ditaba tšeo di sego molaleng.

12 Dira nyakišišo. Ge re ithuta Beibele, re ka nyaka dikarabo tša dipotšišo tše di latelago:

  • Ke mang yo a ngwadilego puku ye ya Beibele?

  • E ngwaletšwe kae, gona neng?

  • Ke ditiragalo dife tša bohlokwa tšeo di bego di direga ge puku ye e ngwalwa?

Go tseba dikarabo tša dipotšišo tša go swana le tše go ka re thuša go ithuta ditaba tšeo di sego molaleng.

13 Ka mohlala, Hesekiele 14:13, 14 e re: “Ge naga e ka ntshenyetša ka go dira tša go se botege, ke tla otlollela seatla sa ka go yona ka se sa e nea dijo, ke tla e romela tlala gomme ka fediša batho le diruiwa tšeo di lego go yona. ‘Le ge nkabe banna ba ba bararo, e lego Noa, Daniele le Jobo, ba be ba le gare ga yona, ba be ba tla hlakodiša feela meoya ya bona ka baka la toko ya bona,’ o re’alo Mmuši Morena Jehofa.” Ge re dira nyakišišo ka ditemana tše, re hwetša gore Hesekiele o ngwadile mantšu ao mo e ka bago nywaga e 612 pele Kriste a ka tla lefaseng. Noa le Jobo ba be ba šetše ba na le nywaga e mentši ba hwile, eupša Jehofa o be a sa dutše a gopola potego ya bona. Eupša Daniele yena o be a sa phela ka nako yeo. Go ka direga gore o be a na le nywaga e ka bago e 20 ge Jehofa a be a re o lokile go no swana le Noa le Jobo. Re ithuta’ng tabeng ye? Re ithuta gore Jehofa o bona  bahlanka ba gagwe ka moka e bile o ba tšeela godimo, go akaretša le bafsa.—Psalme 148:12-14.

IKHOLE KA DIKGATIŠO TŠE DI FAPAFAPANEGO

14. Dikgatišo le dilo tšeo di diretšwego bafsa di ba hola bjang, gona di ka hola ba bangwe bjang? (Bona seswantšho seo se lego mathomong a sehlogo.)

14 Dikgatišo tše di ngwaletšwego bafsa. Re ithutile gore re ka holwa ke dikarolo ka moka tša Beibele. Ka mo go swanago, re ka holwa ke dikgatišo tša rena ka moka. Anke re neeng mehlala e sego kae. Nywageng ya morago bjale, Jehofa o boletše le bafsa ka ditaba tše dintši. [1](Bona tlhaloso.) Ditaba tšeo di ba thuša go lebeletšana ka katlego le kgateletšo ya dithaka sekolong le mathata a go gola. Eupša rena ba bangwe re ka holwa bjang ke go bala dihlogo tše le dipuku tše di ngwaletšwego bafsa? Ge re di bala, re tseba mathata ao bafsa ba nago le ona gomme ra kgona go ba thuša le go ba kgothatša.

Bakriste bao ba godilego ga se ba swanela go ipotša gore ba ka se bale dihlogo tšeo di ngwaletšwego bafsa

15. Ke ka baka la’ng Bakriste bao ba godilego ba swanetše go bala dihlogo tše di ngwaletšwego bafsa?

15 Bakriste bao ba godilego ga se ba swanela go ipotša gore ba ka se bale dihlogo tšeo di ngwaletšwego bafsa. Mathata a mantši ao go bolelwago ka ona dihlogong tša bafsa a wela Bakriste ka moka. Ka mohlala, ka moka ga rena re swanetše go emela ditumelo tša rena, go laola maikwelo a rena, go lwantšha kgateletšo ya dithaka le go phema bagwera ba babe le boithabišo bjo bobe. Ka gona le ge dikgatišo tše di ngwaletšwe bafsa, ditaba tšeo di tšwa ka Beibeleng, gomme di ka hola Bakriste ka moka.

16. Ke selo sefe se sengwe seo dikgatišo tša rena di thušago bafsa go se dira?

16 Le gona dikgatišo tšeo di ngwaletšwego bafsa di ka ba thuša go tiiša segwera sa bona le Jehofa. (Bala Mmoledi 12:1, 13.) Di ka thuša le batho ba bagolo. Ka mohlala, tokollo ya Phafoga! ya July-September 2009 e be e na le sehlogo se se rego, “Bafsa ba a Botšiša . . . Nka Dira Bjang Gore go Bala Beibele go Thabiše?” Sehlogo seo se na le ditšhišinyo tše dibotse e bile se na le lepokisi leo o ka le segago, wa le boloka gomme wa le šomiša ge o ithuta. Na batho ba bagolo ba ile ba holwa ke sehlogo seo? Mma yo mongwe o re o be a thatafalelwa ke go bala Beibele. Eupša o ile a diriša ditšhišinyo tša sehlogong seo gomme ga bjale o thabela go bala Beibele. O re o thabela go bona kamoo dipuku tša Beibele di tswalanago ka gona le go bopa seswantšho se sebotse. O okeditše ka gore: “Ruri go bala Beibele go ntlišetša lethabo leo ke sa kago ka le bona.”

17, 18. Dikgatišo tšeo di ngwaletšwego batho bao e sego Dihlatse di ka re hola bjang? Nea mohlala.

17 Dikgatišo tšeo di ngwaletšwego batho bao e sego Dihlatse. Go thoma ka 2008, re thabetše kgatišo e ithutwago ya Morokami. Kgatišo ye e ngwaletšwe Dihlatse  tša Jehofa, eupša e bile re na le dimakasine tšeo di ngwaletšwego batho bao e sego Dihlatse. Re ka holwa bjang ke dimakasine tšeo? E re re fe mohlala. Ge o laletša motho Holong ya Mmušo gomme a etla, o a thaba. Ge seboledi se dutše se tšwela pele ka polelo, o nagana ka motho yoo. O ipotšiša gore moeng wa gago o ikwa bjang ka dilo tšeo a di kwago le kamoo polelo yeo e ka fetošago bophelo bja gagwe. Mafelelong o kwa o thaba le go leboga kudu seo o se kwago polelong yeo.

18 Re ka diragalelwa ke selo se se swanago ge re bala dikgatišo tšeo di ngwaletšwego batho bao e sego Dihlatse. Ka mohlala, kgatišo ya batho bohle ya Morokami le dihlogo tše di lego wepesaeteng ya jw.org di hlalosa Beibele ka mantšu a bonolo le ao a kwešišegago. Ge re bala dihlogo tšeo, re kwešiša gakaone therešo ya Beibele le go e rata, gaešita le ge re šetše re e tseba. Le gona re ka ithuta ditsela tše difsa tša go hlalosa ditumelo tša rena tšhemong. Ka mo go swanago, makasine wa Phafoga! o tiiša tumelo ya rena ya gore go na le Mmopi. Le gona o re thuša go tseba kamoo re ka emelago ditumelo tša rena.—Bala 1 Petro 3:15.

19. Re ka bontšha bjang gore re leboga Jehofa bakeng sa ditokišetšo tša gagwe?

19 Go molaleng gore Jehofa o re neile dikeletšo tše dintši kudu le tlhahlo gore re holege. (Mateo 5:3) Anke re tšweleng pele re bala le go diriša dilo ka moka tšeo a re rutilego tšona. Ge re dira bjalo, re tla holega e bile re tla bontšha Jehofa gore re leboga ditokišetšo tša gagwe ka moka.—Jesaya 48:17.