Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) MARCH 2017

Godiša Bao ba Swanelwago ke go Godišwa

Godiša Bao ba Swanelwago ke go Godišwa

“Go Yo a dutšego sedulong sa bogoši le go Kwana a e be tšhegofatšo, kgodišo, letago le matla go iša mehleng ya neng le neng.”KUT. 5:13.

DIKOPELO: 9, 108

1. Ke ka baka la’ng batho ba bangwe ba swanelwa ke go godišwa, gona re tlo ithuta ka’ng sehlogong se?

GO GODIŠA motho go bolela go mo swara ka tsela e kgethegilego le go mo hlompha. Gantši re godiša motho yo a dirilego selo se itšego se sebotse goba yo a hlankelago maemong a kgethegilego. Ka gona re ka ipotšiša gore: Re swanetše go godiša bomang, gona ke ka baka la’ng re swanetše go ba godiša?

2, 3. (a) Ke ka baka la’ng Jehofa a swanelwa ke go godišwa ka mo go kgethegilego? (Bona seswantšho se se lego ka mo godimo.) (b) Kwana yeo go bolelwago ka yona go Kutollo 5:13 ke mang, gona ke ka baka la’ng re swanetše go mo godiša?

2 Go etša ge Kutollo 5:13 e bontšha, re swanetše go godiša “Yo a dutšego sedulong sa bogoši le . . . Kwana.” Kutollo kgaolo 4 e bontšha le lengwe la mabaka ao re swanetšego go godiša Jehofa. Kgaolong yeo, dibopiwa tša moya kua legodimong di reta Jehofa ka mantšu a hlabošago, “yena Yo a phelago go iša mehleng ya neng le neng.” Di re: “Wena Jehofa Modimo wa rena o swanelwa ke go amogela letago, kgodišo le matla, gobane o bopile dilo ka moka gomme di bile gona le go bopša ka baka la thato ya gago.”Kut. 4:9-11.

 3 Kwana ke Jesu Kriste, yona “Kwana ya Modimo yeo e tlošago sebe sa lefase!” (Joh. 1:29) Beibele e re botša gore Jesu o feta kgole batho ka moka bao ga bjale ba bušago e le dikgoši le bao e kilego ya ba dikgoši. E re: “[Ke] yena Kgoši ya bao ba bušago e le dikgoši le Morena wa bao ba bušago e le marena, yena a nnoši yo a sa hwego, yo a dulago seetšeng se se sa batamelegego, yo go se nago motho yo a kilego a mmona goba yo a ka mmonago.” (1 Tim. 6:14-16) Ruri seo ke therešo, ka gore ga go na kgoši le ge e le efe yeo e kilego ya re hwela gore re lebalelwe dibe tša rena. Na ga o ikwe o tutueletšega go goeletša gotee le barongwa ba dimilionemilione ba legodimong bao ba rego: “Kwana [yeo] e bego e hlabilwe e swanelwa ke go amogela matla, mahumo, bohlale, bokgoni, kgodišo, letago le tšhegofatšo”?Kut. 5:12.

4. Ke ka baka la’ng go godiša Jehofa le Kriste e se taba ya boikgethelo?

4 Go godiša Jehofa le Kriste ga se taba ya boikgethelo. Ge e ba re nyaka bophelo bjo bo sa felego, re swanetše go ba godiša. Mantšu a Jesu ao a lego go Johane 5:22, 23 a re thuša go bona taba yeo gabotse. A re: “Tate ga a ahlole motho le gatee, eupša o gafetše kahlolo ka moka go Morwa, e le gore bohle ba godiše Morwa go etša ge ba godiša Tate. Yo a sa godišego Morwa, ga a godiše Tate yo a mo romilego.”Bala Psalme 2:11, 12.

5. Ke ka baka la’ng re swanetše go hlompha le go godiša batho ba bangwe go fihla tekanyong e itšego?

5 Batho ba bopilwe ka ‘seswantšho sa Modimo.’ (Gen. 1:27) Ke ka baka leo ba bantši ba bona ba kgonago go bonagatša dika tša Modimo, gaešita le ge ba dira seo ka tekanyo e sa swanego. Batho ba kgona go bontšhana lerato, botho le kwelobohloko. Ka ge ba bopilwe ba na le letswalo, ka tlhago ba tseba se se nepagetšego le se se fošagetšego, se se lokilego le se sebe, gaešita le ge ba fela ba dira diphošo. (Baroma 2:14, 15) Batho ba bantši ba rata dilo tše dibotse le tše di hlwekilego. Ka moka ga bona ba nyaka go phedišana le ba bangwe ka khutšo. Ba lemoga goba ba sa lemoge, ba kgona go bonagatša dika tša Modimo go fihla bokgoleng bjo itšego. Ka baka leo, ba swanelwa ke go hlomphiwa le go godišwa ka tekanyo e itšego.Ps. 8:5.

KAMOO RE KA GODIŠAGO BA BANGWE KA TSELA YA MALEBA

6, 7. Dihlatse tša Jehofa di fapana bjang le batho ba bantši tabeng ya go godiša ba bangwe?

6 Re swanetše go tseba moo re felelago gona ge re godiša batho ba bangwe. Batho ba bantši ba laolwa kudu ke moya wa lefase la Sathane. Ke ka baka leo ba ratago go dira batho ba itšego medingwana ya bona go e na le gore ba no ba hlompha le go ba godiša ka tsela e lekanetšego. Ba hlompha ka mo go feteletšego baetapele ba bodumedi le ba dipolotiki, boradipapadi gotee le batho ba bangwe ba go tuma, e bile ba ba lebelela eka ke barongwa. Ka baka leo, bafsa le batho ba bagolo ba tšea batho bao e le mehlala ya bona, mohlomongwe ka go ekiša tsela yeo ba dirago dilo ka yona, tsela yeo ba aparago ka yona, goba yeo ba itshwarago ka yona.

7 Bakriste ba therešo ga ba godiše batho ka tsela e bjalo e feteletšego. Kriste ke motho a nnoši yo a kilego a phela mo lefaseng yo a re beetšego mohlala o phethagetšego wo re swanetšego go o latela. (1 Pet. 2:21) Modimo a ka se kwane le rena ge re ka godiša batho ba bangwe ka tsela e feteletšego. Re swanetše go dula re gopola therešo ye ya bohlokwa: “Bohle ba dirile sebe gomme ba hlaelelwa ke letago la Modimo.” (Baroma 3:23) Ruri ga se ra swanela go godiša motho le ge e le ofe tše ekego ke modingwana!

8, 9. (a) Dihlatse tša Jehofa di lebelela bjang bahlankedi ba mmušo? (b) Re swanetše go ba thekga go fihla bokgoleng bofe?

8 Lefaseng la lehono, batho ba bangwe ba  hlankela maemong a phagamego. Ka mohlala, bahlankedi ba mmušo ba neilwe mošomo wa go thuša batho le go kgonthišetša gore ba latela melao. Mošomo wa bona o hola batho ka moka. Ke ka baka leo moapostola Paulo a eleditšego Bakriste gore ba lebelele bahlankedi ba bjalo ba mmušo e le “balaodi ba bagolo” bao re swanetšego go ikokobeletša bona. O itše go bona: “Neang bohle tše di ba swanelago, yo a swanelwago ke lekgetho, le mo nee lekgetho; . . . yo a swanelwago ke kgodišo, le mo nee kgodišo e bjalo.”Baroma 13:1, 7.

9 Ke ka baka leo Dihlatse tša Jehofa di godišago bahlankedi bao ba mmušo. Di dira seo ge di laelwa go dira bjalo, goba e le ge di latela setšo sa mo di dulago. Re dirišana gabotse le bahlankedi bao ba mmušo ge ba dutše ba dira mešomo ya bona. Eupša ga re ba godiše ka tsela e feteletšego goba go ba thekga dilong tšeo Modimo a di hloilego. Re ba godiša ka tsela yeo Mangwalo a rego re ba godiše ka yona. Re ka se robe melao ya Modimo goba ra tšea lehlakore ditabeng tša lefase e le ge re leka go ba kgahliša.Bala 1 Petro 2:13-17.

10. Bahlanka ba Jehofa ba bogologolo ba re beetše mohlala ofe o mobotse wa go dirišana le babuši le bahlankedi ba mmušo?

10 Bahlanka ba Jehofa ba bogologolo ba re beetše mohlala o mobotse wa go dirišana le babuši le bahlankedi ba mmušo. Ge Mmušo wa Roma o be o laela badudi ba dinageng tšeo o bego o di laola gore ba yo ingwadiša, Josefa le Maria ba ile ba dira seo. Ba ile ba tšea leeto la go ya Betlelehema gaešita le ge Maria a be a le kgauswi le go belega ngwana wa gagwe wa mathomo. (Luka 2:1-5) Ka morago ge Paulo a be a latofatšwa ka gore o tshetše molao, o ile a itwela ka tlhompho le go godiša Kgoši Heroda Agaripa le Fesito, yoo a bego a buša naga ya Judea yeo e bego e laolwa ke Mmušo wa Roma.Ditiro 25:1-12; 26:1-3.

11, 12. (a) Ke ka baka la’ng tsela yeo re swarago bahlankedi ba mmušo ka yona e sa swane le yeo re swarago baetapele ba bodumedi? (b) Go ile gwa ba le mafelelo afe a mabotse ka morago ga gore Hlatse ya kua Austria e godiše radipolotiki yo a itšego?

11 Lega go le bjalo, Dihlatse tša Jehofa ga di sware baetapele ba bodumedi ka tsela e kgethegilego, gaešita le ge baetapele bao ba nyaka go swarwa bjalo. Madumedi a maaka a senya Modimo leina, e bile a ruta batho maaka a diriša Lentšu la Modimo. Ka baka leo, re hlompha baetapele ba bodumedi go no swana le batho ba bangwe, eupša ga se ra swanela go ba swara ka tsela e kgethegilego. Gopola gore Jesu o ile a botša baetapele ba bodumedi ba mehleng ya gagwe ka go lebanya gore ke baikaketši le bahlahli bao ba foufetšego. (Mat. 23:23, 24) Eupša go nea bahlankedi ba mmušo kgodišo yeo e ba swanetšego le go ba hlompha, go ka ba le mafelelo a mabotse kudu.

12 Ngwanabo rena Leopold Engleitner e be e le Hlatse e fišegago kua Austria, yoo Manazi a ilego a mo swara gomme a mo romela kampeng ya tlaišo kua Buchenwald ka terene. Monna yo mongwe wa mohlomphegi e lego Heinrich Gleissner le yena o be a golegilwe gomme a le ka tereneng yeo. E be e le radipolotiki wa kua Austria. Eupša Manazi a be a mo hloile kudu. Ge terene e lebile kampeng yeo ya tlaišo, ka tlhompho Ngwanabo rena Engleitner o ile a hlalosetša Gleissner ditumelo tša gagwe, gomme Gleissner a theetša ka kelohloko. Ka morago ga ntwa ya bobedi ya lefase, mohlomphegi Gleissner o ile a diriša leboelela matla a gagwe a bolaodi go thuša Dihlatse tša Jehofa tša kua Austria. Mohlomongwe o ka nagana ka ditšhegofatšo tše dingwe tšeo Dihlatse di bilego le tšona feela ka gobane di ile tša hlompha bahlankedi ba mmušo le go ba nea kgodišo yeo Beibele e rego re ba nee yona.

 BATHO BA BANGWE BAO RE SWANETŠEGO GO BA GODIŠA

13. Ke bomang bao ka mo go kgethegilego re swanetšego go ba hlompha le go ba godiša, gona ka baka la’ng?

13 Re swanetše go godiša badumedigotee le rena le go ba hlompha, kudukudu bagolo bao ba re eteletšego pele. (Bala 1 Timotheo 5:17.) Re godiša bana babo rena ba go sa šetšwe gore ke ba morafo ofe, ba rutegile gakaakaang, ba na le maemo afe setšhabeng le gore ke bahumi goba badiidi. Beibele e ba bitša “dimpho tšeo e lego banna,” e bile e bontšha gore Modimo o ba šomiša kudu ka mokgatlong wa gagwe go re hlokomela. (Baef. 4:8) Nagana ka bagolo ba phuthego, balebeledi ba tikologo, ditho tša Komiti ya Lekala le ditho tša Sehlopha se Bušago. Bana babo rena ba lekgolong la pele la mengwaga ba be ba hlompha kudu bao ba bego ba etelela pele phuthego. Le rena re swanetše go dira bjalo. Ga re lebelele bana babo rena ba go tuma ka mokgatlong eka ke medingwana, goba go ba swara eka ke barongwa. Lega go le bjalo, re a ba hlompha le go ba godiša ka gobane ba šoma ka thata e bile ba ikokobeditše.Bala 2 Bakorinthe 1:24; Kutollo 19:10.

14, 15. Hlalosa phapano gare ga badiši ba makgonthe ba Bakriste le bao ba ipotšago gore ke badiši.

14 Bagolo bao ba re eteletšego pele ke badiši bao ba ikokobeditšego. Go bontšha gore ba ikokobeditše, ga ba nyake re ba swara eka ke batho ba go tuma. Ka baka leo, ba fapana kgole le baetapele ba bodumedi ba mehleng yeno le ba lekgolong la pele la mengwaga bao Jesu a boletšego ka bona gore: “Ba rata dibaka tša ka pelepele menyanyeng le ditulo tša ka pele disinagogeng, le go dumedišwa ka tlhompho marekišetšong le go bitšwa Rabi ke batho.”Mat. 23:6, 7.

15 Badiši ba makgonthe ba Bakriste ka boikokobetšo ba kwa mantšu a Jesu ao a rego: “Le se ke la bitšwa Rabi gobane Morutiši wa lena ke o tee, mola lena ka moka le le bana ba motho. Go feta moo, le se ke la bitša motho mo lefaseng la re tate, gobane Tatago lena ke o tee, Yo a lego legodimong. Le gona le se ke la bitšwa baetapele, gobane Moetapele wa lena ke o tee, Kriste. Eupša yo mogolo go le feta ka moka mo gare ga lena e swanetše go ba modiredi wa lena. Mang le mang yo a ikgodišago o tla kokobetšwa gomme mang le mang yo a ikokobetšago o tla godišwa.” (Mat. 23:8-12) Ke ka baka leo o bonago bagolo lefaseng ka moka ba ratwago, ba hlomphiwago le go godišwa ke badumedigotee le bona.

Ge bagolo ba ikokobeditše, phuthego e tla ba rata, ya ba hlompha le go ba godiša (Bona dirapa 13-15)

16. Ke ka baka la’ng o swanetše go tšwela pele o dira maiteko a go kwešiša seo Beibele e se bolelago mabapi le go godiša ba bangwe le go diriša seo o ithutilego sona?

16 Ke therešo gore go ka tšea nako gore re  tsebe batho bao re swanetšego go ba godiša le tekanyo yeo re swanetšego go ba godiša ka yona. Seo se ile sa diragalela le Bakriste ba lekgolong la pele la mengwaga. (Dit. 10:22-26; 3 Joh. 9, 10) Eupša re swanetše go dira maiteko a go latela seo Beibele e se bolelago mabapi le go godiša ba bangwe. Ge re ka tseba batho bao re swanetšego go ba godiša le tekanyo yeo re swanetšego go ba godiša ka yona, Jehofa o tla re šegofatša kudu.

MEHOLA YA GO GODIŠA BA BANGWE KA TSELA YA MALEBA

17. E mengwe ya mehola ya go godiša bao ba lego maemong a phagamego ke efe?

17 Ge re ka hlompha bao ba lego maemong a phagamego le go ba godiša, ba ka re thuša gore re bolele ditaba tše dibotse ntle le tšhitišo. Gantši ba feleletša ba lemoga gore re dira mošomo o mobotse. Mengwageng e mmalwa e fetilego, Birgit, e lego mmulamadibogo wa kua Jeremane, o ile a ya moletlwaneng wa bao ba phasitšego dithuto tša bona sekolong seo morwedi wa gagwe a bego a tsena go sona. Barutiši ba ile ba botša Birgit gore ba thabetše go ruta bana ba Dihlatse go theoša le mengwaga. Ba ile ba bolela gore sekolong sa bona go be go ka se thabiše ge nkabe go be go se na bana ba Dihlatse. Birgit o ile a re go bona: “Bana ba rena ba rutwa go phela ka melao ya Modimo, le gona ba rutwa gore ba hlomphe barutiši ba bona le go ba godiša.” Morutiši yo mongwe o ile a re go Birgit: “Ge nkabe bana ka moka ba swana le ba Dihlatse tša Jehofa, sekolong go be go tla swana le paradeiseng.” Ka morago ga dibeke tše mmalwa, yo mongwe wa barutiši bao o ile a ba gona kopanong ya selete kua Leipzig.

18, 19. Ke ka baka la’ng re sa swanela go nea bagolo kgodišo e feteletšego?

18 Ke therešo gore ge re godiša bagolo ka phuthegong re swanetše go dira bjalo re hlahlwa ke melao ya motheo e holago le e phethagetšego yeo e lego ka Lentšung la Modimo. (Bala Baheberu 13:7, 17.) Re swanetše go ba reta ka ge ba šoma ka thata e bile re latele tlhahlo yeo ba re neago yona. Ge re ka dira bjalo, re tla ba thuša gore ba tšwele pele ba phetha maikarabelo a bona ka lethabo. Eupša se ga se re gore re leke go ekiša mogolo yo re naganago gore o a re kgahla. Ga se ra swanela go ekiša tlwaa tsela yeo a aparago ka yona le go itokiša, tsela yeo a fago dipolelo ka yona goba gaešita le tsela yeo a bolelago ka yona. Ge re ka dira bjalo, re ka ipakela mahlo a batho. Ga se ra swanela go lebala gore mogolo yoo ke motho go swana le rena. Motho yo re swanetšego go mo latela le go mo ekiša ke Kriste.

19 Ge re hlompha bagolo le go ba godiša ka tsela e lekanetšego, gomme re sa ba sware eka ke batho ba maemo, re a ba thuša. Re ba thuša gore ba se ke ba thoma go ikgogomoša, go ikwa ba phala ba bangwe goba go ipona.

20. Go godiša ba bangwe go re thuša bjang?

20 Go godiša ba bangwe go re thuša gore re se ke ra ipona re le ba bohlokwa kudu. Go re thuša gore re se ke ra ipetha sehuba ge batho ba bangwe ba re godiša. Le gona go re thuša gore re sepedišane le mokgatlo wa Jehofa—woo o sa neego motho le ge e le ofe kgodišo e feteletšego goba yeo e sa mo swanelago—go sa šetšwe gore motho yoo ke modumedi goba motho feela. Go feta moo, seo se tla re thuša gore re se ke ra kgopišega ge motho yoo re bego re mo godiša a dira phošo.

21. Ke’ng seo se re thabišago kudu ge re nea ba bangwe kgodišo yeo e ba swanetšego?

21 Selo seo se re thabišago kudu ge re nea ba bangwe kgodišo yeo e ba swanetšego ke gore re thabiša Modimo. Ge re dira bjalo, re bontšha gore re a mo kwa le gore re a mmotegela. Seo se mo thuša gore a kgone go araba motho le ge e le ofe yo a mo kwerago. (Die. 27:11) Lefase le tletše ka batho bao ba godišago batho ba bangwe ka tsela e fošagetšego. Rena re leboga gore Jehofa o re ruta kamoo re swanetšego go godiša batho ba bangwe.