Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) MARCH 2016

Leka go kwešiša gore ke thušo ya mohuta mang goba thekgo le kgothatšo e tšwago ka Beibeleng tšeo bana beno le dikgaetšedi ba di hlokago

Na o ka Thuša ka Phuthegong ya Geno?

Na o ka Thuša ka Phuthegong ya Geno?

PELE Jesu a ka boela legodimong, o ile a botša barutiwa ba gagwe gore: “Le tla ba dihlatse tša ka . . . go fihla karolong ya kgole ya lefase.” (Ditiro 1:8) Ba be ba tla kgona bjang go nea bohlatse lefaseng ka moka?

Martin Goodman, e lego moprofesara Yunibesithing ya Oxford, o re “seo se bego se hlaola Bakriste go dihlopha tše dingwe tša bodumedi, go akaretša le tša Bajuda, nakong ya ge go be go buša Roma, e be e le tsela yeo ba tšeelago godimo taelo ya gore ba bolele ditaba tše dibotse.” Jesu o be a sepela metseng le metsaneng a bolela ditaba tše dibotse. Bakriste ba therešo ba be ba swanetše go ekiša mohlala wa gagwe gomme ba bolele “ditaba tše dibotse tša Mmušo wa Modimo” kae le kae. Ba be ba swanetše go nyaka batho bao ba bego ba nyaka go tseba therešo. (Luka 4:43) Ke ka baka leo lekgolong la pele la nywaga go bego go na le “baapostola,” e lego lentšu leo le bolelago gore bao ba romilwego go yo dira mošomo o itšego. (Mareka 3:14) Jesu o ile a laela balatedi ba gagwe gore: “Eyang le dire batho ba ditšhaba ka moka barutiwa.”Mateo 28:18-20.

Baapostola ba Jesu ba 12 ga ba sa le gona mo lefaseng, eupša bahlanka ba bantši ba Jehofa ba ekiša mohlala wa bona ge ba le tšhemong. Ge ba kgopelwa go ya mo go nago le tlhokagalo, ba arabela ka gore: “Ke nna yo! Roma nna!” (Jesaya 6:8) Ba bangwe, go swana le ba dikete bao ba alogilego Sekolong sa Gilead, ba hudugetše dinageng tša kgole. Ba bangwe ba hudugetše lefelong le lengwe nageng ya gabo bona. Ba bantši ba ithutile leleme lešele e le gore ba kgone go  thuša phuthego goba sehlopha se itšego. Ga se gore go be go le bonolo go dira seo, eupša bana babo rena ba le dikgaetšedi ba be ba ikemišeditše go ikgafa go bontšha kamoo ba ratago Jehofa le batho. Ka gona ba ile ba rulaganya dilo ka kelohloko, ba diriša nako ya bona, matla a bona le tšhelete ya bona go yo bolela ditaba tše dibotse mo go nago le tlhokagalo. (Luka 14:28-30) Se bana babo rena ba le dikgaetšedi ba se dirago se tloga se retega.

Ga se ka moka ga rena re ka kgonago go yo hlankela mo go nago le tlhokagalo goba go ithuta leleme lešele. Eupša ka moka ga rena re ka swana le baromiwa diphuthegong tša gabo rena.

EBA MOROMIWA PHUTHEGONG YA GENO

Nea thušo e nyakegago

Lekgolong la pele la nywaga, Bakriste ba be ba fišega bodireding le ge ba bangwe ba be ba dula metseng ya gabo bona gomme e se baromiwa. Paulo o ile a botša Timotheo gore: “Dira modiro wa moebangedi gomme o phethe bodiredi bja gago ka botlalo.” (2 Timotheo 4:5) Bakriste ba lekgolong la pele la nywaga ba ile ba dira seo, gomme le rena re swanetše go dira bjalo lehono. Bakriste ka moka ba swanetše go kwa taelo ya gore ba bolele molaetša wa Mmušo le go dira batho barutiwa. Le ka diphuthegong tša gabo rena, go na le ditsela tše dintši tšeo ka tšona re ka swanago le baromiwa.

Ka mohlala, ge baromiwa ba hudugela dinageng dišele, ba kopana le maemo a mafsa gomme ba swanelwa ke go hwetša ditsela tša go tlwaelana le bophelo bjo bofsa. Le ge re ka se tsoge re hudugetše mo go nago le tlhokagalo, na re ka hwetša ditsela tše difsa tša go dira boboledi? Ka mohlala, ka 1940, bana babo rena ba ile ba kgothaletšwa go dira modiro wa seterateng gatee mo bekeng. Na o kile wa leka go dira modiro wa seterateng? Na o kile wa diriša diteroli tša go bea dikgatišo? Tabakgolo še: Na o ikemišeditše go leka mekgwa e mefsa ya go bolela ditaba tše dibotse?

Ka go kgothaletša ba bangwe go “dira modiro wa moebangedi”

Ge e ba o na le boemo bjo bo nepagetšego bja kgopolo, o tla tšea karolo ka mafolofolo bodireding. Bao ba hudugelago mo go nago le tlhokagalo goba bao ba ithutago leleme lešele, gantši ke bagoeledi bao ba nago le bokgoni e bile ba ka thuša phuthego kudu. Ka mohlala, ba etelela pele modirong wa boboledi. Baromiwa le bona ba etelela phuthego pele go fihla ge bana babo rena ba lefelong leo ba swanelegela go etelela phuthego pele. Ge e ba o le ngwanabo rena yo a kolobeditšwego, na o  “katanela go fihlelela” ditokelo, ke gore, na o ikemišeditše go hlankela bana beno le dikgaetšedi ka phuthegong ya geno o le mohlanka wa bodiredi goba mogolo?1 Timotheo 3:1.

EBA ‘YO A MATLAFATŠAGO’

Ka go thuša bao ba hlokago thušo

Go na le ditsela tše dingwe tšeo ka tšona re ka thušago phuthego. Ka moka ga rena, ba bafsa le ba bagolo, re ka ‘matlafatša’ badumedigotee le rena bao ba hlokago thušo.Bakolose 4:11, mongwalo wa ka tlase.

Ge e ba re nyaka go thuša bana babo rena le dikgaetšedi, re swanetše go ba tseba gabotse. Beibele e re kgothaletša gore re “hlokomelaneng,” goba re nagane ka seo bana babo rena le dikgaetšedi ba se hlokago, ge re bokane mmogo. (Baheberu 10:24) Se ga se bolele gore re swanetše go nyaka go tseba dilo ka moka tšeo di diregago maphelong a bona. Se se bolela gore re swanetše go katanela go kwešiša bana babo rena le dikgaetšedi le go tseba seo ba se hlokago. Ba ka ba ba nyaka thušo ka selo se itšego, go thekgwa maikwelong goba kgothatšo e tšwago ka Beibeleng. Ke therešo gore mabakeng a mangwe ke bagolo le bahlanka ba bodiredi feela bao ba ka ba thušago. (Bagalatia 6:1) Eupša ka moka ga rena re ka kgona go thuša bana babo rena le dikgaetšedi bao ba tšofetšego, goba malapa ka moka ao a nago le mathata.

Ka go kgothatša bao ba nago le mathata

Salvatore o ile a hwetša thušo e bjalo. Ka ge a ile a ba le mathata a magolo a tšhelete, o ile a swanelwa ke go rekiša kgwebo ya gagwe, ntlo ya gagwe le dilo tše dintši tšeo ba bego ba na le tšona. O ile a tshwenyega kudu ka lapa la gagwe. Lapa le lengwe phuthegong ya bona le ile la lemoga gore Salvatore le lapa la gagwe ba hloka thušo. Ba ile ba nea Salvatore tšhelete gomme ba thuša yena le mosadi wa gagwe go hwetša mošomo. Le gona lapa leo le ile la fetša matšatši a mantši le theetša lapa la Salvatore le go le kgothatša. Malapa ao e ile ya ba bagwera ba bagolo. Ga bjale malapa ao a sa gopola dinako tše di thabišago tšeo a bilego le tšona dinakong tšeo tše thata.

Bakriste ba therešo ga ba dikadike go botša ba bangwe ka seo ba se dumelago. Re swanetše go ekiša Jesu gomme re tsebiše batho ka dilo tše di kgahlišago tšeo Modimo a re holofeditšego tšona. Go sa šetšwe gore re ka kgona go hudugela mo go nago le tlhokagalo goba go se bjalo, ka moka ga rena re ka dira sohle seo re ka se kgonago go thuša ba bangwe ka diphuthegong tša gabo rena. (Bagalatia 6:10) Ge re nea ba bangwe, re tla thaba e bile re tla “enywa dienywa modirong o mongwe le o mongwe o mobotse.”Bakolose 1:10; Ditiro 20:35.