Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) MARCH 2016

Jehofa o Hlahla Batho ba Gagwe Tseleng ya Bophelo

Jehofa o Hlahla Batho ba Gagwe Tseleng ya Bophelo

“Tsela še. Sepelang ka yona.”JESAYA 30:21.

DIKOPELO: 65, 48

1, 2. (a) Maphelo a batho ba bantši a phološitšwe ke temošo efe? (Bona seswantšho se se lego ka mo godimo.) (b) Batho ba Modimo ba na le tlhahlo efe yeo e ka phološago maphelo a bona?

“EMA, LEBELELA, EKWA.” Ka nywaga e fetago e 100, mantšu a a be a dutše a tšwelela maswaong a magolo a tsela diporong tša Amerika Leboa. Ka baka la’ng? E le gore dikoloi di se ke tša thulwa ke terene yeo e kitimago ge di tshela diporo. Go ela hloko maswao a a temošo go phološitše maphelo a batho ba bantši.

2 Jehofa o dira se se fetago go re nea maswao a tšhireletšo. O hlahla batho ba gagwe e le gore ba tle ba hwetše bophelo bjo bo sa felego le go phema dikotsi. Jehofa o etša modiši yo lerato yo a hlahlago dinku tša gagwe le go di lemoša gore di pheme ditsela tše kotsi.Bala Jesaya 30:20, 21.

JEHOFA O BE A DUTŠE A HLAHLA BATHO BA GAGWE

3. Go tlile bjang gore batho ba sepele tseleng yeo e lebišago lehung?

3 Go tloga mathomong, Jehofa o be a dutše a nea batho ditaelo tše di lebanyago goba tlhahlo. Ka mohlala, serapeng sa Edene, Jehofa o ile a nea ditaelo tše di kwagalago  tšeo di bego di tlo dira gore batho ba phele ka mo go sa felego ka lethabo. (Genesi 2:15-17) Eupša Adama le Efa ba ile ba gana tlhahlo ya Tatago bona yo lerato. Efa o ile a kwa keletšo yeo go bonagalago e be e etšwa go noga, ke moka Adama yena a theetša mosadi wa gagwe. Mafelelo e bile afe? Bobedi bja bona ba ile ba tlaišega gomme ba hwa ba se na kholofelo ya tsogo. Le gona, ka baka la go se kwe ga bona, batho ka moka ba ile ba gapeletšega go sepela tseleng yeo e lebišago lehung.

4. (a) Ke ka baka la’ng go ile gwa nyakega tlhahlo e oketšegilego ka morago ga Meetsefula? (b) Maemo a mafsa a ile a utolla bjang kamoo Modimo a lebelelago bophelo?

4 Modimo o ile a nea Noa tlhahlo yeo e ilego ya phološa maphelo. Ka morago ga Meetsefula, Jehofa o ile a laela batho gore ba se ke ba ja madi goba go a nwa. Ka baka la’ng? Ka gobane Jehofa o be a tlo dumelela batho gore ba je nama. Ka baka la maemo a a mafsa, ba be ba hloka tlhahlo e mpsha, yeo e rego: “Feela le se ke la ja—nama yeo e nago le moya wa yona—e lego madi a yona.” (Genesi 9:1-4) Taelong ye, re ithuta kamoo Modimo a lebelelago bophelo, ka ge e le bja gagwe. Ke Mmopi le gona o re nea bophelo, ka gona o na le tshwanelo ya go dira melao ya mabapi le bophelo. Ka mohlala, o ile a laela gore batho ba se ke ba bolaya batho ba bangwe. Modimo o lebelela bophelo le madi e le dilo tše kgethwa, le gona o tla otla mang le mang yo a di dirišago gampe.Genesi 9:5, 6.

5. Re tlo ahlaahla’ng sehlogong se, gona ka baka la’ng?

5 Ka morago ga mehla ya Noa, Modimo o ile a tšwela pele a hlahla batho ba gagwe. Sehlogong se, re tlo ahlaahla mehlala e sego kae ya kamoo a ilego a ba hlahla ka gona. Sehlogo se se tla matlafatša phetho yeo re e dirilego ya go latela tlhahlo ya Jehofa yeo e re lebišago lefaseng le lefsa.

SETŠHABA SE SEFSA, TLHAHLO E MPSHA

6. Ke ka baka la’ng go be go nyakega gore Baisiraele ba kwe melao yeo Modimo a ba neilego yona a diriša Moshe, gona ba be ba swanetše go dira’ng?

6 Mehleng ya Moshe, Jehofa o ile a nea batho ba gagwe tlhahlo e kwagalago ya kamoo ba swanetšego go itshwara ka gona le go mo hlankela. Ka baka la’ng? Le lebakeng le, maemo a be a fetogile. Ka nywaga ya ka godimo ga e makgolo a mabedi, Baisiraele e be e le makgoba kua Egipita moo batho ka moka ba bego ba rapela bahu, medingwana le go dira dilo tše dingwe tše dintši tšeo di bego di hlompholla Modimo. Ge batho ba Modimo ba be ba lokollwa Egipita, ba be ba hloka tlhahlo e mpsha. E be e tlo ba setšhaba seo se bego se tlo latela Molao wa Jehofa feela. Dipuku tše dingwe tšeo di hlalosago mantšu di bolela gore lentšu la Seheberu la “molao” le tswalana le lentšu leo le bolelago “go hlahla, go laela, go ruta.” Molao woo o be o šireletša Baisiraele boitshwarong bjo bo gobogilego le bodumeding bja maaka bja ditšhaba tšeo di bego di ba dikologile. Ge Baisiraele ba be ba ekwa Modimo, o be a ba šegofatša. Ge ba be ba sa mo kwe, ba be ba welwa ke ditlamorago tše šoro.Bala Doiteronomio 28:1, 2, 15.

7. (a) Hlalosa lebaka la gore Jehofa a nee batho ba gagwe tlhahlo. (b) Molao wa Jehofa e bile moetetši bjang go Baisiraele?

7 Tlhahlo e mpsha e be e nyakega ka lebaka le lengwe. Molao wa Jehofa o be o lokišeletša Baisiraele tiragalo e bohlokwa morerong wa gagwe, e lego go tla ga Mesia, yena Jesu Kriste. Molao o be o gopotša Baisiraele gore ga se ba phethagala. Le gona o be o ba thuša go kwešiša gore ba be ba hloka topollo, ke gore, sehlabelo se se phethagetšego seo se bego se tla tloša dibe tša bona ka mo go feletšego.  (Bagalatia 3:19; Baheberu 10:1-10) Go oketša moo, Molao o ile wa šireletša lešika la Mesia le go thuša Baisiraele go mo tseba ge a tšwelela. Ee, Molao o be o le bjalo ka tlhahlo ya lebakanyana, goba “moetetši,” wa go ba iša go Kriste.Bagalatia 3:23, 24.

8. Ke ka baka la’ng re swanetše hlahlwa ke melao ya motheo yeo e lego Molaong wa Moshe?

8 Ka ge re le Bakriste, le rena re ka holwa ke tlhahlo ya Jehofa yeo a neilego Molaong wa Moshe. Bjang? Re ka ema gomme ra lebelela melao ya motheo yeo Molao woo o theilwego go yona. Gaešita le ge re se sa le ka tlase ga melao yeo, re sa dutše re ka phela ka e mengwe ya yona letšatši le letšatši le tirelong ya rena go Jehofa. Jehofa o dirile gore melao yeo e ngwalwe ka Beibeleng e le gore re phele ka yona, re hlahlwe ke melao ya yona ya motheo le gona re leboge gore Jesu o re rutile mo gontši go feta Molao woo. Ekwa seo Jesu a se boletšego ge a re: “Le kwele gore go ile gwa thwe: ‘O se ke wa hlotlola.’ Eupša nna ke re go lena, yo mongwe le yo mongwe yo a tšwelago pele a lebeletše mosadi e le gore a mo kganyoge o šetše a hlotlotše le yena pelong ya gagwe.” Ka gona ga se feela gore re swanetše go phema go hlotlola eupša gape re swanetše go gana dikgopolo goba dikganyogo tše di gobogilego.Mateo 5:27, 28.

9. Ke maemo afe a mafsa ao a ilego a dira gore Modimo a nee tlhahlo e mpsha?

9 Ka morago ga ge Jesu a tlile e le Mesia, Jehofa o ile a nea tlhahlo e mpsha gomme a utolla mo go oketšegilego ka morero wa gagwe. Ke ka baka la’ng seo se be se nyakega? Ka ngwaga wa 33, Jehofa o ile a lahla setšhaba sa Isiraele gomme a kgetha phuthego ya Bokriste gore e be batho ba gagwe. Ka gona maemo a batho ba Modimo a be a fetogile gape.

TLHAHLO BAKENG SA ISIRAELE YA MOYA

10. Ke ka baka la’ng phuthego ya Bokriste e ile ya newa melao e mefsa, gona e be e fapana bjang le yeo e bego e neilwe Baisiraele?

10 Jehofa o be a neile Baisiraele Molao a diriša Moshe go ba ruta kamoo ba swanetšego go phela ka gona le go mo hlankela. Go thoma lekgolong la pele la nywaga, batho ba Modimo ba be ba sa hlwe ba etšwa setšhabeng setee feela eupša ba be ba etšwa ditšhabeng le ditlogong tše dintši, e bile ba be ba bitšwa Isiraele ya moya. Ba be ba bopa phuthego ya Bokriste gomme ba le ka tlase ga kgwerano e mpsha. Jehofa o ile a ba nea tlhahlo e mpsha goba e oketšegilego ya kamoo ba swanetšego go phela ka gona le go mo hlankela. Ruri “Modimo ga a bebe sefahlego, eupša setšhabeng se sengwe le se sengwe motho yo a mmoifago gomme a dira se se lokilego o a amogelega go yena.” (Ditiro 10:34, 35) Bakriste bao ba ile ba latela “molao wa Kriste,” woo o theilwego kudu melaong ya motheo yeo e bego e ngwadilwe dipelong tša bona, e sego maswikeng. Molao wo o be o tlo hlahla Bakriste le go ba hola go sa šetšwe gore ba dula kae.Bagalatia 6:2.

11. “Molao wa Kriste” o be o tla kgoma dikarolo dife tše pedi tša bophelo bja Bokriste?

11 Isiraele ya moya e ile ya holwa kudu ke tlhahlo yeo Jehofa a bego a e nea yona ka Jesu. Pele ga ge a ka thoma kgwerano e mpsha, Jesu o ile a nea ditaelo tše pedi tše bohlokwa. E nngwe e be e le mabapi le go bolela ditaba tše dibotse. E nngwe e be e le mabapi le kamoo Bakriste ba swanetšego go itshwara ka gona le go swarana ka gona. Tlhahlo ye e be e lebišitšwe go Bakriste ka moka, ka gona e šoma go rena ka moka  lehono, go sa šetšwe gore re tlo phela ka mo go sa felego legodimong goba lefaseng.

12. Ke phetogo efe yeo e ilego ya ba gona modirong wa boboledi?

12 Nakong e fetilego, batho ba ditšhaba tše dingwe ba be ba swanetše go tla Isiraele gore ba hlankele Jehofa. (1 Dikgoši 8:41-43) Eupša Jesu o ile a nea taelo yeo e lego go Mateo 28:19, 20. (Bala.) O ile a botša barutiwa ba gagwe gore ‘ba ye’ go batho ka moka. Ka Pentekoste ya ngwaga wa 33, Jehofa o ile a bontšha gore o nyaka ditaba tše dibotse di bolelwa lefaseng ka moka. Letšatšing leo, mo e ka bago ditho tše 120 tša phuthego e mpsha di ile tša tlala moya o mokgethwa gomme tša thoma go bolela ka maleme go Bajuda le go batho bao ba bego ba sokologetše tumelong ya Sejuda. (Ditiro 2:4-11) Ka morago, ditaba tše dibotse di ile tša botšwa le Basamaria. Ke moka, ka ngwaga wa 36, ditaba tšeo di ile tša botšwa le Bantle bao ba sa bollago. Se se be se ra gore Bakriste ba be ba swanetše go bolela ditaba tše dibotse go batho ka moka lefaseng!

13, 14. (a) Ke’ng seo se akaretšwago ‘taelong e mpsha’ ya Jesu? (b) Re ithuta’ng mohlaleng wa Jesu?

13 Le gona Jesu o ile a nea “taelo e mpsha” ya kamoo re swanetšego go swara bana babo rena le dikgaetšedi. (Bala Johane 13:34, 35.) Letšatši le letšatši re swanetše go ba bontšha gore re a ba rata, eupša le gona re swanetše go ikemišetša go ba hwela. Se ke selo seo se bego se sa hlokagale Molaong wa Moshe.Mateo 22:39; 1 Johane 3:16.

14 Jesu ke mohlala o mogolo kudu wa motho yo a ilego a bontšha lerato le bjalo la go hloka boithati. O be a rata barutiwa ba gagwe kudu moo a ilego a ba hwela ka go rata. Le gona o letetše gore balatedi ba gagwe ka moka ba dire se se swanago. Ka gona re swanetše go ikemišetša go kgotlelela mathata gaešita le go hwela bana babo rena le dikgaetšedi.1 Bathesalonika 2:8.

TLHAHLO YA LEHONO LE YA NAKONG E TLAGO

15, 16. Ke maemo afe a mafsa ao re nago le ona, gona Modimo o re hlahla bjang?

15 Jesu o kgethile “mohlanka yo a botegago le wa temogo” gore a nee balatedi ba gagwe “dijo tša [moya] ka nako e swanetšego.” (Mateo 24:45-47) Dijo tše di akaretša tlhahlo e bohlokwa yeo Modimo a e neago batho ba gagwe ge maemo a fetoga. Maemo a rena ke a mafsa ka tsela efe?

16 Re phela “mehleng ya bofelo,” le gona kgauswinyane re tlo lebeletšana le masetlapelo a sa kago a ba gona. (2 Timotheo 3:1; Mareka 13:19) Le gona Sathane le batemona ba gagwe ba rakilwe legodimong gomme ba lahlelwa lefaseng, ba tlaiša batho o šoro. (Kutollo 12:9, 12) Go oketša moo, re kwa taelo ya Jesu ka go bolela ditaba tše dibotse lefaseng ka bophara go batho ba bantši le ka maleme a mantši go feta le ge e le neng pele!

17, 18. Re swanetše go arabela bjang tlhahlong yeo re e newago?

17 Mokgatlo wa Modimo o re nea didirišwa tše dintši go re thuša modirong wa boboledi. Na o a di diriša? Dibokeng tša rena, re newa tlhahlo ya kamoo re ka dirišago didirišwa tše gabotse. Na o lebelela tlhahlo ye e etšwa go Modimo?

18 E le gore Modimo a re šegofatše, re swanetše go kwa tlhahlo ka moka yeo a re neago yona a diriša phuthego  ya Bokriste. Ge e ba re ekwa gona bjale, go tlo ba bonolo go latela tlhahlo nakong ya “masetlapelo a magolo,” ge lefase ka moka le kgopo la Sathane le fedišwa. (Mateo 24:21) Ka morago ga moo, re tlo newa tlhahlo e mpsha e le gore re phele lefaseng le lefsa la go loka leo le tla bago le se na tutuetšo ya Sathane.

Lefaseng le lefsa, re tlo newa tlhahlo e mpsha e le gore re phele Paradeiseng (Bona serapa 19 le 20)

19, 20. Ke mangwalo afe a go phuthwa ao a tlago go bulwa, gona a tlo re hola bjang?

19 Mehleng ya Moshe, setšhaba sa Isiraele se be se hloka tlhahlo e mpsha, ka gona Modimo o ile a se nea Molao. Ka morago, phuthego ya Bokriste e ile ya swanelwa ke go latela “molao wa Kriste.” Ka mo go swanago, Beibele e re botša gore lefaseng le lefsa, re tlo hwetša mangwalo a go phuthwa ao a nago le tlhahlo e mpsha. (Bala Kutollo 20:12.) Go ka direga gore mangwalo a a go phuthwa a tlo hlalosa seo Jehofa a se nyakago go batho ka nako yeo. Ka go ithuta wona, batho ka moka, go akaretša le bao ba tla bego ba tsošitšwe bahung, ba tla tseba seo Modimo a se nyakago go bona. Mangwalo a go phuthwa a tlo re thuša go ithuta ka mo go oketšegilego ka tsela ya Jehofa ya go nagana. Le gona re tlo kwešiša Beibele gakaone, ka gona Paradeiseng re tlo swarana ka lerato, tlhompho le go godišana. (Jesaya 26:9) Nagana gore ke dilo tše dintši gakaakang tšeo re tlago go ithuta tšona le go di ruta ba bangwe ge re tla be re hlahlwa ke Kgoši ya rena, Jesu Kriste!

20 Ge re ka tla ra latela tlhahlo yeo e “ngwadilwego mangwalong a go phuthwa” gomme ra dula re botegela Jehofa nakong ya teko ya mafelelo, o tla ngwala maina a rena sa ruri “lengwalong la go phuthwa la bophelo.” Re tla hwetša bophelo bjo bo sa felego! Ka gona re swanetše go EMA gore re bale seo Beibele e se bolelago, re LEBELELE gore re kwešiše seo e re botšago sona, ke moka re KWE ka go latela tlhahlo ya Modimo gona bjale. Ge re ka dira dilo tše, re tla phologa masetlapelo a magolo gomme ra thabela go ithuta ka Modimo wa rena yo bohlale le yo lerato e lego Jehofa, ka mo go sa felego.Mmoledi 3:11; Baroma 11:33.