Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  June 2017

O se ke wa Lebelela Feela Ponagalo ya Motho ya ka Ntle!

O se ke wa Lebelela Feela Ponagalo ya Motho ya ka Ntle!

DON, e lego yo mongwe wa Dihlatse tša Jehofa kua Canada, o leka ka gohle go botša batho bao ba dulago diterateng ditaba tše dibotse. Ge Don a bolela ka yo mongwe wa batho bao o re: “Monna yo a bitšwago Peter, yoo a bego a dula seterateng, e be e le yo mongwe wa banna ba ditšhila-tšhila bao nkilego ka ba bona bao ba dulago diphasetšing tša meago. O be a sa kgahliše e bile a na le tsela ya go dira gore batho ba ralokele kgole le yena. O be a dula a gana ge batho ba leka go mo thuša.” Lega go le bjalo, ka go se fele pelo Don o ile a fetša mengwaga ya ka godimo ga e 14 a leka go thuša monna yo ka botho.

Ka letšatši le lengwe, Peter o ile a botšiša Don a re: “Go re’ng o itshwenya ka nna? Batho ba bangwe ga ba sa na taba le nna. Go re’ng wena o tshwenyega ka nna?” Ka bohlale, Don o ile a diriša mangwalo a mararo go leka go kgoma pelo ya Peter ka molaetša wa Beibele. Sa pele, Don o ile a botšiša Peter ge e ba a tseba leina la Modimo, gomme a mo kgopela gore a le bale ka Beibeleng go Psalme 83:18. Sa bobedi, Don o ile a bontšha Peter gore o tshwenyegile ka yena ka go mo kgopela gore a bale Baroma 10:13, 14, yeo e bontšhago gore “yo mongwe le yo mongwe yo a bitšago leina la Jehofa o tla phološwa.” Mafelelong, Don o ile a bala Mateo 9:36, ke moka ka morago ga moo a kgopela Peter gore a le bale ka boyena. Temana yeo e re: “Ge [Jesu] a bona mašaba a a šokela, gobane a be a šokiša gomme a gašane go swana le dinku tše di se nago modiši.” Ka yona nako yeo, Peter o ile a thoma go lla gomme a botšiša Don a re: “Na le nna ke yo mongwe wa dinku tše?”

Peter o ile a thoma go fetoša bophelo bja gagwe. O ile a thoma go hlapa, a kota ditedu tša gagwe gomme a apara diaparo tša go hlweka tšeo Don a ilego a mo nea tšona. Go tloga ka yona nako yeo, Peter o ile a dula a hlwekile.

Peter o be a na le pukwana yeo a bego a ngwala ditaba tša gagwe ka go yona. Matlakaleng a mathomo o be a ngwadile ditaba tše di sa kgahlišego, eupša ditaba tšeo a di ngwadilego malobanyana mo di a kgahliša. Letlakaleng le lengwe o ngwadile gore: “Lehono ke rutilwe leina la Modimo. Gona bjale ge ke rapela, ke a tseba gore ke rapela Jehofa. Go a kgahliša go tseba leina la Modimo. Don o mpoditše gore  Jehofa e ka ba Mogwera wa ka, le gore a ka dula a ntheetša ka dinako tšohle.”

Mantšu a mafelelo ao Peter a a ngwadilego o be a a ngwaletše bana ba gabo. O ngwadile gore:

“Ga se ka tsoga botse lehono. Ke nagana gore ke tšofetše kudu. Eupša le ge nka hwa lehono, ke a tseba gore ke tlo kopana gape le mogwera wa ka [Don] Paradeiseng. Ge le ka ikhwetša le bala lengwalo le, le tsebeng gore ga ke sa phela. Eupša ge polokong ya ka le ka bona monna yo le sa mo tsebego, le boleleng le yena, e bile ke a le kgopela hle, le baleng pukwana ye e talalerata [o bolela ka puku yeo e rego, “Therešo ye Išago Bophelong bjo bo sa Felego,” yeo a bego a e hweditše mengwageng e mentši pele ga mo]. * Pukwana ye e bolela gore ke tlo bona mogwera yoo wa ka gape Paradeiseng. Ke dumelelana le yona ka pelo ka moka. Ngwanabo lena, Peter.”

Ka morago ga poloko ya Peter, sesi wa gagwe e lego Ummi o hlalositše ka gore: “Mo e ka bago mengwageng e mebedi e fetilego, Peter o ile a boledišana le nna. E be e le la mathomo ka morago ga mengwaga e mentši ke mo kwa a thabile. O ile a ba a myemyela.” Ummi o ile a botša Don gore: “Ke tlo bala puku yeo, ka gobane selo seo se kgomilego pelo ya kgaetšedi ye ya ka e swanetše go ba e le sa bohlokwa.” Go oketša moo, Ummi o dumetše gore Hlatse ya Jehofa e ithute Beibele le yena ba diriša puku ya Ke Eng Seo ge e le Gabotse Beibele e se Rutago?

Le rena ga se ra swanela go lebelela ponagalo ya motho ya ka ntle. Re swanetše go bontšha batho ba mehuta yohle lerato la kgonthe le go se ba felele pelo ge re ba thuša. (1 Tim. 2:3, 4) Ge re dutše re dira bjalo, re ka kgoma dipelo tša batho ba go swana le Peter, bao ka ntle ba ka bonagalago ba sa kgahliše, eupša ba na le dipelo tše dibotse. Re ka kgodišega gore Modimo, yoo ‘a bonago dipelo,’ o tla dira gore therešo e mele ka dipelong tša batho bao ba ratago go loka.—1 Sam. 16:7; Joh. 6:44.

^ par. 7 Puku ye e gatišitšwe ke Dihlatse tša Jehofa, eupša gona bjale ga e sa gatišwa.