Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) JUNE 2016

Na o Dumelela Mmopi yo Mogolo Gore a go Bope?

Na o Dumelela Mmopi yo Mogolo Gore a go Bope?

Bonang! Go etša letsopa leo le lego ka seatleng sa mmopi yo a bopago ka letsopa, le lena le bjalo ka seatleng sa ka.”JEREMIA 18:6.

DIKOPELO: 60, 22

1, 2. Ke ka baka la’ng Modimo a ile a lebelela Daniele e le “monna yo a rategago kudu,” gona re ka bontšha bjang gore re kwa Modimo go swana le Daniele?

GE Bajuda ba be ba išwa Babilona, ba ile ba tsena motseng wo o bego o tletše medingwana ya maaka le batho bao ba bego ba rapela batemona. Lega go le bjalo, Bajuda ba botegago, ba go swana le Daniele le bagwera ba gagwe ba bararo, ba ile ba gana go bopša ke batho ba Babilona. (Daniele 1:6, 8, 12; 3:16-18) Daniele le bagwera ba gagwe ba ile ba dumelela Jehofa gore a ba bope gomme ba tšwela pele ba hlankela yena feela. Gaešita le ge Daniele a ile a dula tikologong e mpe kudu bophelo bja gagwe ka moka, morongwa wa Modimo o ile a re ke “monna yo a rategago kudu.”Daniele 10:11, 19.

2 Mehleng ya Beibele, mmopi o be a lahlela letsopa motšheneng wa go bopa gore a bope selo se itšego. Lehono, barapedi ba therešo ba a tseba gore Jehofa ke Mmuši wa legohle le gore o na le matla a go bopa ditšhaba. (Bala Jeremia 18:6.) Le gona Modimo o na le matla a go bopa yo mongwe le yo mongwe wa rena. Lega go le bjalo, Jehofa ga a gapeletše motho  go fetoga. Go e na le moo, o nyaka gore re mo dumelele go re bopa. Sehlogong se, re tla ithuta seo re swanetšego go se dira gore re dule re le letsopa le boleta ka diatleng tša Modimo. Re tlo ahlaahla dipotšišo tše di latelago tše tharo: (1) Re ka phema bjang mekgwa yeo e ka dirago gore re gane keletšo ya Modimo gomme ra swana le letsopa le thata? (2) Re ka hlagolela bjang dika tšeo di ka re thušago go dula re ekwa gomme ra swana le letsopa le boleta? (3) Batswadi ba Bakriste ba ka šomišana bjang le Modimo ge ba bopa bana ba bona?

PHEMA MEKGWA YEO E KA THATAFIŠAGO PELO YA GAGO

3. Ke mekgwa efe yeo e ka thatafišago dipelo tša rena? Nea mohlala.

3 Diema 4:23 e re: “Go feta tšohle tšeo di swanetšego go šireletšwa, šireletša pelo ya gago ka gobane methopo ya bophelo e tšwa go yona.” E le gore dipelo tša rena di se ke tša thatafala, re swanetše go phema mekgwa e mebe ya go swana le boikgogomošo, go tlwaela go dira sebe le go hloka tumelo. Ge re sa hlokomele, dilo tše di ka dira gore re se kwe Modimo le go ba marabele. (Daniele 5:1, 20; Baheberu 3:13, 18, 19) Seo se ile sa diragalela Usia Kgoši ya Juda. (Bala 2 Dikoronika 26:3-5, 16-21.) Mathomong, Usia o be a ekwa Modimo e bile a na le tswalano e botse le yena, ka go re’alo Modimo a tiiša mmušo wa gagwe. Eupša “gateetee ge a matlafetše, pelo ya gagwe e ile ya ikgogomoša.” O ile a ikgogomoša kudu moo a ilego a leka go fiša diorelo ka tempeleng gaešita le ge mošomo woo o be o swanetše go dirwa ke baperisita feela. Ge baperisita ba mmotša gore o dira sebe, Usia o ile a galefa kudu! Jehofa o ile a kokobetša kgoši yeo ya moikgogomoši, gomme ya ba molephera go fihlela e ehwa.Diema 16:18.

4, 5. Go ka direga’ng ge re ka ba le boikgogomošo? Nea mohlala.

4 Ge re ka ikgogomoša, re ka thoma go nagana gore re kaone go feta batho ba bangwe gomme ra thoma go gana keletšo yeo re e newago go tšwa ka Beibeleng. (Diema 29:1; Baroma 12:3) Seo se ile sa diragalela mogolo yo a bitšwago Jim. O ile a se dumelelane le bagolo ba phuthegong ya gabo ka selo se itšego. Jim o re: “Ke ile ka botša bagolo bao gore ga ba na lerato, ke moka ka tšwa sebokeng seo.” Ka morago ga dikgwedi tše e ka bago tše tshela, Jim o ile a hudugela phuthegong e nngwe eupša a se kgethwe gore e be mogolo moo. O ile a šulafalelwa. O be a tloga a kgodišegile gore ga a na phošo moo a ilego a tlogela go hlankela Jehofa gomme a fola moyeng ka nywaga e lesome. O bolela gore o be a ikgogomoša le gore o ile a thoma go bona Jehofa molato ka seo se bego se direga. Bana babo rena ba ile ba mo etela ka nywaga e mentši ba leka go mo thuša, eupša o be a gana thušo ya bona.

5 Jim o re: “Ke be ke dula ke ipotša gore bagolo bao ba fošitše.” Mohlala wa Jim o bontšha gore boikgogomošo bo ka dira gore re se ipone diphošo. Ge re dira bjalo, ga re sa le letsopa le boleta. (Jeremia 17:9) Na o kile wa kgopišwa ke ngwanabo rena goba kgaetšedi? Na o kile wa nyamišwa ke go lahlegelwa ke tokelo e itšego? O ile wa arabela bjang? Na o ile wa ikgogomoša, goba na o ile wa lemoga gore go dira khutšo le bana beno le go dula o botegela Jehofa ke tšona dilo tša bohlokwa kudu?Bala Psalme 119:165; Bakolose 3:13.

6. Go ka direga’ng ka rena ge e ba re tlwaela go dira sebe?

 6 Ge motho a tšwela pele a dira sebe e bile a uta seo a se dirago, go ka ba thata gore a amogele keletšo e tšwago go Modimo. E bile a ka se sa tšhaba go dira dibe tše dingwe. Ngwanabo rena yo mongwe o re ge nako e dutše e eya boitshwaro bja gagwe bjo bobe bo ile bja se sa mo tshwenya gakaalo. (Mmoledi 8:11) Ngwanabo rena yo mongwe yo a ilego a tlwaela ka nakwana go bogela diswantšho tša batho bao ba sa aparago o re: “Ke ile ka thoma go swayaswaya bagolo diphošo.” Go bogela diswantšho tšeo go ile gwa senya tswalano ya gagwe le Jehofa. Ka morago ga gore batho ba bangwe ba tsebe ka bothata bja ngwanabo rena yo, bagolo ba ile ba mo thuša. Ke therešo gore ka moka ga rena ga se ra phethagala. Eupša ge e ba re lebelela diphošo bathong bao ba re eletšago goba re itokafatša ge re dirile phošo go e na le go kgopela Modimo gore a re lebalele le go re thuša, dipelo tša rena di ka thatafala.

Baisiraele bao ba sa kwego ba ile ba hwela lešokeng ka baka la dipelo tša bona tše thata le go hloka tumelo

7, 8. (a) Baisiraele ba bogologolo ba bontšhitše bjang gore go hloka tumelo go kotsi? (b) Re ithuta’ng mohlaleng wa bona?

7 Ge Jehofa a be a lokolla Baisiraele Egipita, ba ile ba bona mehlolo ya gagwe e mentši. Go sa šetšwe seo, ge ba dutše ba batamela go tsena Nageng ya Kholofetšo, dipelo tša bona di ile tša thatafala. Ka baka la’ng? Ba be ba se na tumelo go Modimo. Go e na le gore ba bote Jehofa, ba ile ba boifa gomme ba ngongorega ka Moshe. Ba be ba bile ba nyaka go boela Egipita, moo e bego e le makgoba! Jehofa o ile a kwa bohloko kudu gomme a re: “Setšhaba se se tla kgaotša neng go nnyatša?” (Numeri 14:1-4, 11; Psalme 78:40, 41) Baisiraele bao ba ile ba hwela lešokeng ka baka la dipelo tša bona tše thata le go hloka tumelo.

8 Lehono, re kgauswi kudu le go tsena lefaseng le lefsa, gomme tumelo ya rena e a lekwa. Ka gona re swanetše go lekola tumelo ya rena gore e tiile gakaakaang. Re ka kgodišega bjang gore e tiile? Ka go hlahloba mantšu a Jesu ao a lego go Mateo 6:33. Ipotšiše gore: ‘Na dipakane tša ka le diphetho tša ka di bontšha gore ke tloga ke na le tumelo mantšung ao a Jesu? Na ke fela ke lofa diboka goba tšhemo e le gore ke yo dira tšhelete? Ke tla dira’ng ge mošomo wa boiphedišo o nnyaka nako e oketšegilego le matla? Na ke tla dumelela lefase le le mpopa, mohlomongwe le go ntira gore ke tlogele go hlankela Jehofa?’

9. Ke ka baka la’ng re swanetše go ‘dula re itekola’ go bona ge e ba re sa le tumelong, gona re ka dira seo bjang?

9 Ge e ba re sa kwe seo Beibele e se bolelago ka bagwera ba babe, go kgaolwa, goba boithabišo, dipelo tša rena di ka thatafala. O swanetše go dira’ng ge e ba se se thoma go go diragalela? O swanetše go lekola tumelo ya gago kapelapela! Beibele e re: “Dulang le itekola go bona ge e ba le sa le tumelong, dulang le itlhatsela seo lena ka noši le lego sona.” (2 Bakorinthe 13:5) O se ke wa iphora, gomme ka mehla o diriše Lentšu la Modimo go lokiša kgopolo ya gago.

 DULA O SWANA LE LETSOPA LE BOLETA

10. Ke’ng seo se ka re thušago gore re swane le letsopa le boleta ka diatleng tša Jehofa?

10 E le go re thuša go dula re swana le letsopa le boleta, Modimo o re neile Lentšu la gagwe, phuthego ya Bokriste le bodiredi. Ge re bala Beibele letšatši le letšatši le go naganišiša ka seo re se balago, re tla ba boleta ka diatleng tša Modimo gomme a kgona go re bopa. Jehofa o ile a laela dikgoši tša Isiraele gore di ingwalele kopi ya Molao wa Gagwe le go o bala letšatši le letšatši. (Doiteronomio 17:18, 19) Baapostola ba be ba tseba gore go bala Mangwalo le go naganišiša ka seo ba se balago go be go tla ba thuša kudu tšhemong. Ge ba be ba ngwala dipuku tša Beibele, ba ile ba tsopola Mangwalo a Seheberu gantši. Le gona ge ba be ba le tšhemong, ba be ba kgothaletša batho go bala Mangwalo. (Ditiro 17:11) Ka mo go swanago, le rena re a bona gore go bala Lentšu la Modimo letšatši le letšatši le go naganišiša ka seo re se balago go bohlokwa kudu. (1 Timotheo 4:15) Se se re thuša gore re dule re ikokobeditše, ka go re’alo Jehofa o tla kgona go re bopa.

Diriša ditokišetšo tša Modimo gore o dule o le letsopa le boleta (Bona dirapa 10-13)

11, 12. Jehofa a ka diriša bjang phuthego ya Bokriste go re bopa go ya ka dinyakwa tša rena? Nea mohlala.

11 Jehofa o tseba seo yo mongwe le yo mongwe wa rena a se hlokago, ka gona o diriša phuthego ya Bokriste go re bopa. Jim, yo go boletšwego ka yena pejana, o ile a thoma go fetoša kgopolo ge mogolo yo a itšego a be a mmontšha lerato. Jim o re: “Le ka mohla mogolo yoo ga se a ka a ntshola ka seo ke se dirilego goba go  ntshwaya diphošo. Go e na le moo, ka mehla o be a nkgothatša e bile a mpontšha go tšwa pelong gore o nyaka go nthuša.” Ka morago ga dikgwedi tše tharo, mogolo yoo o ile a laletša Jim dibokeng. Jim o re phuthego e ile ya mo amogela ka borutho le gore lerato la yona le ile la mo thuša go fetoša kgopolo ya gagwe e fošagetšego. O ile a thoma go bona gore maikwelo a gagwe a be a mo lahleditše. Bagolo ba phuthegong ya gabo Jim gotee le mosadi wa gagwe ba ile ba mo kgothatša, gomme ganyenyane-ganyenyane o ile a boela a hlankela Jehofa. Le gona Jim o ile a thušwa ke go bala sehlogo se se rego “Jehofa ga a na Molato” le se se rego “Hlankelang Jehofa ka go Botega,” ka Morokaming wa November 15, 1992.

12 Ge nako e dutše e eya, Jim e ile ya ba mogolo gape. Go tloga ka nako yeo, o thušitše bana babo rena ba bangwe go rarolla mathata a go swana le ao a kilego a ba le wona le go matlafatša tumelo ya bona. O re o be a nagana gore o na le tswalano e botse le Jehofa mola go be go se bjalo. O re o a itshola ka ge a ile a dumelela boikgogomošo bo mo dira gore a šetše diphošo tša ba bangwe go e na le go šetša dilo tša bohlokwa kudu.1 Bakorinthe 10:12.

Ge re ekiša Kriste, batho ba thabela molaetša wa rena e bile ba ka fetoša tsela yeo ba re lebelelago ka yona

13. Tirelo ya tšhemo e ka re thuša go ba le dika dife, gona mafelelo e ba afe?

13 Tirelo ya tšhemo le yona e ka re bopa gomme ya re thuša go ba batho ba bakaone. Bjang? Ge re bolela ditaba tše dibotse, re swanetše go bonagatša dika tša go swana le boikokobetšo le dika tšeo di enywago ke moya wa Modimo. (Bagalatia 5:22, 23) Nagana ka dika tše dibotse tšeo tirelo ya tšhemo e go thušitšego go ba le tšona. Ge re ekiša Kriste, batho ba thabela molaetša wa rena e bile ba ka fetoša tsela yeo ba re lebelelago ka yona. Ka mohlala, Dihlatse tše pedi kua Australia di ile tša leka go boledišana le mosadi yo mongwe legaeng la gagwe, eupša mosadi yoo a di galefela le go di swara makgwakgwa. Lega go le bjalo, Dihlatse tšeo di ile tša mo theetša ka tlhompho. Ka morago, mosadi yoo o ile a itshola ka seo a se dirilego gomme a ngwalela ofisi ya lekala lengwalo. O ile a kgopela tshwarelo ka boitshwaro bja gagwe. O itše: “Ke ipona ke le setlaela ka go galefela batho ba babedi bao ba bolelago ka Lentšu la Modimo le go ba raka legaeng la ka.” Go tšwa phihlelong ye, re a bona gore go bolela le batho ka boleta tšhemong go bohlokwa. Ee, tirelong ya tšhemo re thuša batho, eupša le rena re a thušega ka gobane re kgona go kaonefatše semelo sa rena.

ŠOMIŠANA LE MODIMO GE O BOPA BANA BA GAGO

14. Batswadi ba swanetše go dira’ng ge e ba ba nyaka go atlega go bopeng bana ba bona?

14 Bana ba bantši ba banyenyane ba ikokobeditše e bile ba rata go ithuta. (Mateo 18:1-4) Ka gona ke gabohlale gore batswadi ba thuše bana ba bona go ithuta therešo le go e rata e sa le ba banyenyane. (2 Timotheo 3:14, 15) E le gore batswadi ba atlege tabeng ye, bona ka noši ba swanetše go rata therešo gomme ba diriše seo  ba ithutago sona ka Beibeleng maphelong a bona. Ge batswadi ba dira seo, go tla ba bonolo gore bana ba bona ba rate therešo. Le gona bana ba tla bona gore ge batswadi ba ba laya ke ka gobane ba a ba rata le gore Jehofa o a ba rata.

15, 16. Batswadi ba ka bontšha bjang gore ba bota Jehofa ge ngwana wa bona a kgaotšwe?

15 Le ge batswadi ba ruta bana ba bona therešo, bana ba bangwe ba tlogela go hlankela Jehofa goba ba a kgaolwa. Ge seo se direga, lapa le kwa bohloko kudu. Kgaetšedi yo mongwe mo Afrika Borwa o re: “Ge buti a be a kgaolwa, go be go le bjalo ka ge eka o hwile. Go be go le bohloko kudu!” Eupša ke’ng seo kgaetšedi yo le batswadi ba gagwe ba ilego ba se dira? Ba ile ba latela tlhahlo yeo e lego ka Beibeleng. (Bala 1 Bakorinthe 5:11, 13.) Batswadi ba gagwe ba be ba tseba gore go kwa keletšo ya Modimo go tla hola lapa ka moka. Le gona ba ile ba lemoga gore go kgaolwa ke tayo e lerato e tšwago go Jehofa. Ka gona ba be ba ikgokaganya le morwa wa bona ge feela go be go hlokagala gore ba boledišane ka ditaba tša lapa.

16 Morwa yoo wa bona o ile a ikwa bjang? Ka morago o ile a re: “Ke be ke tseba gore lapa la gešo ga se la ntlhoya, eupša le be le ekwa Jehofa le mokgatlo wa gagwe.” Le gona o itše: “Ge o gapeletšega go kgopela Jehofa gore a go thuše le go go lebalela, ke gona o bonago gore o a mo hloka.” Nagana kamoo lapa le le ilego la thaba ka gona ge morwa yo a be a boela go Jehofa! Ee, ge re dula re ekwa Modimo re tla thaba le go atlega.Diema 3:5, 6; 28:26.

Ge re ikokobeditše gomme ka mehla re ekwa Jehofa, re ba ba rategago kudu go yena

17. Ke ka baka la’ng re swanetše go dula re ekwa Jehofa, gona seo se tla re hola bjang?

17 Moporofeta Jesaya o ile a bolela e sa le pele gore Bajuda bao ba bego ba le Babilona ba be ba tla itshola gomme ba re: “Wena Jehofa, o Tatago rena. Re letsopa gomme wena o Mmopi wa rena; ka moka ga rena re modiro wa seatla sa gago.” Le gona ba be ba tla lopa Jehofa ka gore: “O se ke wa gopola diphošo tša rena ka mo go sa felego. Anke o bone hle: ka moka ga rena re setšhaba sa gago.” (Jesaya 64:8, 9) Ge re ikokobeditše gomme ka mehla re ekwa Jehofa, re ba ba rategago kudu go yena, go swana le Daniele. Jehofa o tla tšwela pele a re bopa ka Lentšu la gagwe, moya wa gagwe le mokgatlo wa gagwe e le gore nakong e tlago re tle re be “bana ba Modimo” bao ba phethagetšego.Baroma 8:21.