Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  July 2017

Tsoma Mahumo a Kgonthe

Tsoma Mahumo a Kgonthe

Itireleng bagwera ka mahumo a sa lokago.”​LUKA 16:9.

DIKOPELO: 32, 154

1, 2. Ke ka baka la’ng tshepedišong ya gona bjale ya dilo go tla dula go na le badiidi?

MAEMO a lehono a ikonomi ga a kgahliše e bile a kweša bohloko. Bafsa ba tsomana le mešomo eupša ga ba e hwetše. Batho ba bantši ba bea maphelo a bona kotsing ka go hudugela dinageng tša go huma go yo tsoma mafulo a matala. Badiidi ba tletše lefase ka moka, gaešita le dinageng tše di humilego. Bahumi ba tšwela pele ba huma le dinala, mola badiidi ba tšwela pele ba diila le go feta. Banyakišiši ba bangwe ba sa tšwa go akanyetša gore bahumi ba bangwe mo lefaseng ba na le tšhelete e ntši go feta ya batho ba tikologong ya gabo bona e kopane. Gaešita le ge seo go le thata go se kgonthišetša, ga go na yo a ka ganetšago taba ya gore batho ba dibilione ba hloka le pudi ya leleme le letala, mola batho ba bangwe tšhelete go bona e le maswika. Jesu o ile a lemoga taba yeo ge a be a re: “Le na le badiidi ka mehla.” (Mar. 14:7) Ke ka baka la’ng maemo a le ka tsela ye?

2 Jesu o be a tseba gore maemo a ikonomi a be a ka se kaonefale go fihlelela ge Mmušo wa Modimo o buša mo lefaseng. Dikgwebo tša megabaru, tšeo di swantšhetšwago ke “babapatši” bao go boletšwego ka bona go Kutollo 18:3, gotee le mekgatlo ya dipolotiki le madumedi, ke karolo ya lefase la Sathane. Le ge batho ba Modimo ba sa tšee karolo ka mo go feletšego dipolotiking le bodumeding bja maaka,  ba bantši ba bona ga go kgonege gore ba se tšee karolo ka mo go feletšego dikgwebong tša lefase le la Sathane.

3. Re tlo ahlaahla dipotšišo dife?

3 Ka ge re le Bakriste, re swanetše go hlahloba tsela yeo re ikwago ka yona ka kgwebo ka go ipotšiša dipotšišo tša go swana le tše di rego: ‘Nka diriša bjang dilo tša ka tše di bonagalago ka tsela yeo e bontšhago gore ke botegela Modimo? Nka lekanetša bjang tsela yeo ke tsenyago letsogo ka yona dikgwebong tša lefase le? Ke diphihlelo dife tšeo di bontšhago gore batho ba Modimo ba ithekgile ka yena ka mo go feletšego mehleng ye e thata?’

SESWANTŠHO SA MABAPI LE MOLAKI YO A SA LOKAGO

4, 5. (a) Molaki wa seswantšhong sa Jesu o ile a ikhwetša a le mathateng afe? (b) Jesu o neile balatedi ba gagwe keletšo efe?

4 Bala Luka 16:1-9. Seswantšho se sa Jesu sa mabapi le molaki yo a sa lokago se dira gore re nagane. Ka morago ga gore molaki yo a latofatšwe ka molato wa go senyetša mong wa gagwe thoto, o ile a diriša “bohlale bjo bo holago” go ‘itirela bagwera’ e le gore ba tle ba mo thuše mohla a rakwa mošomong. * Ke therešo gore Jesu o be a sa kgothaletše barutiwa ba gagwe gore ba dire dilo tše di sa lokago gore ba kgone go phela lefaseng le. O boletše gore mokgwa wo ke wa “bana ba tshepedišo ye ya dilo,” eupša o ile a diriša seswantšho seo go ruta thuto ya bohlokwa.

5 Jesu o be a tseba gore go swana le molaki yo a ilego a ikhwetša a le mathateng, ba bantši ba balatedi ba gagwe ba be ba tlo swanelwa ke go šoma mešomo ya boiphedišo lefaseng le la dikgwebo tšeo di tletšego boradia. Ke ka baka leo a ba eletšago ka gore: “Itireleng bagwera ka mahumo a sa lokago, e le gore ge a fela, ba [Jehofa le Jesu] le amogele mafelong a bodulo a sa felego.” Re ka ithuta’ng keletšong ye ya Jesu?

6. Re tseba bjang gore Modimo o be a se a bopela batho gore ba tle ba be le dikgwebo?

6 Le ge Jesu a se a hlalosa gore ke ka baka la eng a ile a re mahumo ‘ga se a loka,’ Beibele e bolela ka mo go kwagalago gore Modimo o be a se a bopela batho gore ba tle ba be le dikgwebo. Jehofa o ile a nea Adama le Efa dilo tše dintšintši tšeo ba bego ba di hloka gore ba phele. (Gen. 2:15, 16) Ka morago, ge moya o mokgethwa o be o šoma go batlotšwa ba phuthego ya lekgolong la pele la mengwaga, “ga go le o tee [wa bona] yo a bego a ka bolela gore selo le ge e le sefe seo a bego a na le sona e be e le sa gagwe; eupša ba be ba hlakanela dilo ka moka.” (Dit. 4:32) Moporofeta Jesaya o boletše e sa le pele ka nako yeo ka yona batho ka moka ba tlago go ipshina ka dilo tša mo lefaseng. (Jes. 25:6-9; 65:21, 22) Eupša mo nakong ye, balatedi ba Jesu ba be ba tla swanelwa ke go diriša “bohlale bjo bo holago” gore ba kgone go iphediša ka “mahumo a sa lokago” a lefase le ge ba dutše ba hlankela Modimo.

DIRIŠA MAHUMO A SA LOKAGO KA BOHLALE

7. Jesu o re neile keletšo efe go Luka 16:10-13?

7 Bala Luka 16:10-13. Molaki wa seswantšhong sa Jesu o ile a itirela bagwera e le gore a tle a ikhole. Lega go le bjalo, Jesu o kgothaleditše balatedi ba gagwe gore ba itirele bagwera legodimong e sego ka mabaka a go tlo ikhola. Ditemana tše di latelago seswantšhong se di tswalanya go diriša “mahumo a sa lokago” le go botegela Modimo. Seo Jesu a bego a se bolela mo ke gore re ka ‘itlhatsela re botega’ go Modimo ge re šetše re na le mahumo ao, goba tseleng yeo re a dirišago ka yona. Re ka dira seo bjang?

8, 9. Nea mehlala ya kamoo ba bangwe ba bontšhago gore ba botegela Modimo tseleng yeo ba dirišago mahumo a sa lokago.

8 Tsela e kgolo yeo re ka bontšhago ka yona gore re botegela Modimo ka dilo tša rena tše di bonagalago ke ka go neela ka ditšhelete tša rena go thekga modiro wa go bolela ditaba tše dibotse  lefaseng ka bophara woo Jesu a boletšego ka wona e sa le pele. (Mat. 24:14) Ngwanenyana yo mongwe kua India o be a na le lepokisana leo a bego a lahlela disente ka go lona, a bile a gana le go reka dithoye ka tšhelete yeo. Ge lepokisana leo le tletše, o ile a neela ka tšhelete yeo gore e yo šomišwa modirong wa go bolela ditaba tše dibotse. Ngwanabo rena yo mongwe le yena gona moo India yo a nago le polase ya dikhokhonate, o ile a neela ka dikhokhonate tše dintši ofising ya bofetoledi ya Malayalam. O re o neetše ka dikhokhonate tšeo e le gore bana babo rena ba se reke dikhokhonate eupša ba diriše tšhelete yeo ba bego ba tlo reka dikhokhonate ka yona go phetha mešomo e mengwe. Ruri bjo ke bohlale bjo bo holago! Bana babo rena ba bangwe le bona kua Gerika ba dula ba neela ka makhura a mohlware, tšhese le dijo tše dingwe legaeng la Bethele ya nageng yeo.

9 Ngwanabo rena wa kua Sri Lanka, yoo ga bjale a hudugetšego nageng e šele, o dumeletše bana babo rena ba kua Sri Lanka gore ba šomiše legae la gagwe go swarela diboka le dikopano le gore go dule bahlanka bao ba lego tirelong ya nako e tletšego. Ke therešo gore ngwanabo rena yo nkabe a dira tšhelete ka legae leo la gagwe, eupša boikgafo bja gagwe bo thuša bagoeledi ba lefelong leo bao ba se nago sa bona. Dinageng tšeo modiro wa rena o thibetšwego, bana babo rena ba bula magae a bona gore a šomišwe e le Diholo tša Mmušo, gomme seo se thuša babulamadibogo ba bantši bao ba se nago sa bona le batho ba bangwe gore ba kgone go ba gona dibokeng ntle le go ntšha tšhelete ya ditshenyagalelo.

10. Ke ditšhegofatšo dife tše dingwe tšeo re di hwetšago ge re neela ka dilo tša rena tše di bonagalago?

10 Mehlala yeo re sa tšwago go bolela ka yona e bontšha gore batho ba Modimo ba ‘botega le dilong tše dinyenyane,’ ke gore, tseleng yeo ba dirišago mahumo a bona ao a fetwago ke mahumo a moya ka bohlokwa. (Luka 16:10) Bagwera ba ba Jehofa ba ikwa bjang ka go dira boikgafo bjo? Ba a tseba gore go fana ka dilo tša bona tše di bonagalago ke tsela ya go hwetša mahumo a “kgonthe.” (Luka 16:11) Kgaetšedi yo a dulago a ntšha moneelo wa go thekga mediro ya Mmušo wa Modimo o hlalosa tšhegofatšo yeo a e hweditšego ka gore: “Ka ge ke neela ka dilo tša ka tše di bonagalago, ke bone mohlolo wo ke sa kago ka o bona go theoša le mengwaga. Ke hweditše gore ge ke neela kudu ka dilo tša ka tše di bonagalago, go ba bonolo gore ke dire le dilo tše dingwe. Ga ke be le bothata bja go lebalela ba bangwe, ga ke ba felele pelo e bile ga ke be le bothata bja go amogela keletšo le dilo tše di nyamišago.” Ba bantši ba hweditše gore go fana ka dilo tša bona tše di bonagalago go ba thuša go gola moyeng.​—Ps. 112:5; Die. 22:9.

11. (a) Ge re neela ka dilo tša rena tše di bonagalago ka pelo e tšhweu, re bontšha bjang gore re na le “bohlale bjo bo holago”? (b) Batho ba Modimo ba diriša meneelo bjang ka go lekalekana? (Bona seswantšho seo se lego mathomong a sehlogo.)

11 Go diriša dilo tša rena tše di bonagalago go thekga mediro ya Mmušo wa Modimo go bontšha ka tsela e nngwe gape gore re na le “bohlale bjo bo holago.” Go dira bjalo go re nea sebaka sa go thuša ba bangwe. Bao ba nago le dilo tše di bonagalago eupša ba sa kgone go tsenela tirelo ya nako e tletšego goba go ya tlhokagalong dinageng dišele, ba thabišwa ke go tseba gore meneelo yeo ba e ntšhago e thekga bao ba kgonago go dira mediro yeo. (Die. 19:17) Meneelo ya boithatelo e thuša gore go romelwe dikgatišo le go thekga modiro wa boboledi dinageng tšeo di diilago tšeo go tšona batho ba thabelago molaetša wa Beibele. Ka mengwaga e mentši, dinageng tša go swana le Congo, Madagas-car le Rwanda, gantši  bana babo rena ba ile ba swanelwa ke go kgetha magareng ga go rekela malapa a bona dijo goba go a rekela Dibeibele, moo ka dinako tše dingwe tšhelete ya go reka Dibeibele tšeo e bego e lekana le mogolo wa beke ka moka goba kgwedi. Eupša ga bjale, ka baka la meneelo ya rena le go dirišwa ga yona ka ‘go lekalekana,’ mokgatlo wa Jehofa o dirile gore go fetolelwe Dibeibele le go di nea setho se sengwe le se sengwe sa lapa gotee le barutwana ba Beibele bao ba swerwego ke tlala ya moya. (Bala 2 Bakorinthe 8:13-15.) Ka go re’alo, batho bao ba ntšhago meneelo le bao ba holwago ke yona ba kgona go ba bagwera ba Jehofa.

O SE KE WA TSENA KA MO GO FETELETŠEGO “MEDIRONG YA KGWEBO YA BOPHELO”

12. Aborahama o ile a bontšha bjang gore o be a na le tumelo go Modimo?

12 Selo se sengwe seo re ka se dirago gore Jehofa e be mogwera wa rena ke go se šunye nko ditabeng ka moka tša kgwebo tša lefase le eupša re diriše maemo a rena go tsoma mahumo a “kgonthe.” Aborahama, e lego monna wa bogologolo yo a bego a na le tumelo, o ile a kwa Modimo ka boikokobetšo gomme a tloga nageng e humilego ya Uri gore a yo dula ditenteng le go lwela go tiiša segwera sa gagwe le Jehofa. (Baheb. 11:8-10) O ile a dula a lebeletše Jehofa e le yena feela yo a ka mo neago mahumo a kgonthe, gomme a se leke go itsomela mahumo, e lego seo se bego se tla bontšha gore ga a na tumelo go Modimo. (Gen. 14:22, 23) Jesu o re kgothaleditše gore re be le tumelo ya mohuta woo ge a be a botša lesogana la mohumi gore: “Ge e ba o nyaka go ba yo a phethagetšego, sepela o yo rekiša dilo tša gago o nee badiidi gomme o tla ba le letlotlo legodimong, ke moka o tle o be molatedi wa ka.” (Mat. 19:21) Lesogana leo le be le se na tumelo ya go swana le ya Aborahama, eupša ba bangwe ba bontšhitše tumelo e matla go Modimo.

13. (a) Paulo o ile a nea Timotheo keletšo efe? (b) Rena re ka diriša bjang keletšo ya Paulo lehono?

13 Timotheo le yena o be a na le tumelo. Ka morago ga gore Paulo a mmitše gore ke “mohlabani yo mobotse wa Kriste Jesu,” o ile a re go yena: “Ga go na motho yo e rego ge a hlankela e le mohlabani a itsenya medirong ya kgwebo ya bophelo bja batho ka kakaretšo, e le gore a tle a amogelwe ke yo a mo ngwadišitšego e le mohlabani.” (2 Tim. 2:3, 4) Balatedi ba Jesu lehono, go akaretša le lešaba le legolo la batho ba ka godimo ga milione bao ba lego tirelong ya nako e tletšego, ba diriša keletšo ya Paulo go fihla moo maemo a ba dumelelago. Ge ba dutše ba lwantšha kgatelelo ya dipapatšo le moya wa go rata dilo tša lefase le, ba gopola molao wa motheo wo o rego: “Moadimi ke mohlanka wa moadimiši.” (Die. 22:7) Selo seo Sathane a se nyakago ka mahlo a mahwibidu ke go re bona re šomiša nako ya rena ka moka le matla a rena ka moka re le makgoba a tshepedišo ya gagwe ya tša kgwebo. Diphetho tše dingwe tše re ka di dirago ditabeng tša ditšhelete di ka re tlogela re le makgoba a gagwe ka mengwaga e mentši. Tšhelete e ntši yeo re ka e adimago gore re lefelele ntlo, thuto ya bana ba rena, dikoloi tša go tura gaešita le go dira manyalo a maemo di ka re bakela mathata a magolo a ditšhelete. Re bontšha gore re bohlale ge re kgetha go phela ka dilo tše sego kae gomme re fokotša dikoloto le go se rekareke dilo, ka go dira bjalo ra ba makgoba a Modimo go e na le go ba makgoba a tshepedišo ya tša kgwebo ya lefase le.—1 Tim. 6:10.

14. Ke’ng seo re swanetšego katanela go se dira? Nea mehlala.

14 Go phela ka dilo tše sego kae go bolela gore re tsebe dilo tše di tlago pele maphelong a rena. Banyalani ba bangwe ba be ba na le kgwebo ya ditšweletšwa tše itšego yeo e bego e sepela gabotse kudu. Lega go le bjalo, ka ge ba be ba nyaka go boela tirelong ya nako e tletšego ba ile ba rekiša kgwebo ya bona, seketswana sa bona le dilo tša bona tše dingwe. Ka morago ga moo, ba ile ba ithaopela go yo thuša modirong wa go aga ntlokgolo ya rena kua Warwick, New York. Tšhegofatšo e kgethegilego yeo ba bilego le yona ke ya go šoma Bethele ba na le morwedi wa bona le mokgonyana wa bona, gaešita le go šoma ka dibeke tše mmalwa le batswadi ba mokgonyana wa bona, bao le bona ba bego ba thuša gona moo Warwick. Kgaetšedi yo e lego mmulamadibogo kua Colorado, U.S.A., o ile a hwetša mošomo wa nakwana  pankeng. Bašomigotee le yena ba ile ba kgahlwa kudu ke mošomo wa gagwe moo a ilego a botšwa gore ge a ka dumela go šoma ka nako e tletšego o tla okeletšwa mogolo ka makga a mararo. Lega go le bjalo, ka ge mošomo woo o be o tlo mo šitiša go swarega kudu ka tšhemo, o ile a gana maemo ao. Ye e no ba e le mehlala e sego kae ya bahlanka ba bantši ba Jehofa bao ba ikgafago tirelong ya gagwe. Go etiša pele dilo tša Modimo ka tsela e bjalo ke bohlatse bja gore re tšeela godimo segwera sa rena le yena le mahumo a moya go feta selo le ge e le sefe seo lefase la lehono le ka re neago sona.

GE MAHUMO A KGONTHE A FELA

15. Ke mahumo afe ao a tlišago lethabo la kgonthe?

15 Ga se gore ge motho a humile o šegofatšwa ke Modimo. Jehofa o šegofatša bao ba “[humilego] medirong e mebotse.” (Bala 1 Timotheo 6:17-19.) Ka mohlala, ka morago ga gore Lucia * a kwe gore kua Albania go nyakega bagoeledi ba oketšegilego, o ile a tloga Italy gomme a hudugela Albania ka 1993 a sa šome, a tshepile Jehofa feela. O ile a ithuta Sealbania gomme o thušitše batho ba fetago ba 60 gore ba ineele go Jehofa. Gaešita le ge ba bantši ba bahlanka ba Jehofa ba sa šome ditšhemo tša go nona go swana le yeo ya Albania, re ka se tsoge re lebetše selo le ge e le sefe seo re se dirago go thuša ba bangwe go hwetša tsela e išago bophelong le go dula go yona. Bao re ba thušago le bona ba ka se tsoge ba lebetše seo.​—Mat 6:20.

16. (a) Go tlo direga’ng ka tshepedišo ye ya dilo le mahumo a yona? (b) Go tseba seo se tlago go direga nakong e tlago go swanetše go re thuša go lebelela mahumo bjang?

16 Jesu o itše: “Ge [mahumo a sa lokago] a fela,” ga se a re ‘ge a ka fela.’ (Luka 16:9) Go wa ga dipanka le ikonomi tšeo di diregago mehleng ye ya bofelo ga se selo ge di bapetšwa le seo se tlago go direga lefaseng ka moka kgauswinyane. Tshepedišo ka moka ya Sathane​—e lego dipolotiki, madumedi le dikgwebo—​, e tlo fela. Moporofeta Hesekiele le moporofeta Tsefanya ba boletše e sa le pele gore gauta le silifera, e lego dilo tšeo go tloga kgale borakgwebo ba di tšeago di le bohlokwahlokwa, di tlo hloka mohola. (Hesek. 7:19; Tsef. 1:18) O tla re’ng ge gona bjale o ka hwa o tseba gore o be o phegelela “mahumo a sa lokago” a lefase le, go e na le go phegelela mahumo a kgonthe? O tlo ikwa go swana le monna yo a ilego a šoma ka thata bophelo bja gagwe ka moka go ikgobokeletša tšhelete e ntši, eupša ka morago a hwetša gore tšhelete yeo ke ya bofora. (Die. 18:11) Ee, mafelelong mahumo a lefase le a tlo fela, ka gona o se ke wa fetwa ke sebaka sa go a dirišetša go ‘itirela segwera’ le Jehofa le Jesu. Selo le ge e le sefe seo re se dirago go thekga mediro ya Mmušo wa Jehofa, se re humiša moyeng.

17, 18. Bagwera ba Modimo ba tlo hwetša’ng nakong e tlago?

17 Ge Mmušo wa Modimo o tlile mo lefaseng, re ka se sa lefa rente le go adima ditšhelete, dijo e tlo ba tše dintši le go hwetšagala mahala e bile re ka se sa lefelela tša kalafo. Lapa la Jehofa la lefaseng le tlo ipshina ka bophelo. Gauta, silifera le maswika a mangwe a bohlokwa e tla ba e le dilo tšeo re ikgabišago ka tšona, e sego go dira kgwebo ka tšona. Ka moka ga rena re tlo hwetša dikota tša maemo a godimo le maswika mahala gore re ikagele dintlo tše dibotse. Re tlo thabela go thušana medirong yeo, gomme ga go na yo a tlo letelago gore yo mongwe a mo lefe. Letšatši le lengwe le le lengwe re tlo thabela go fana dilo tše dintši tša mo lefaseng.

18 Ye e no ba mehlala ya ditšhegofatšo tše dintšintši tšeo di tlago go thabelwa ke bao ba itirelago segwera le Jehofa le Jesu. Barapedi ba Jehofa lefaseng ka moka ba tlo thaba wa go se kgone go itshwara ge ba tla be ba ekwa Jesu a re: “Tlang, lena bao le šegofaditšwego ke Tate, jang bohwa bja Mmušo wo le o lokišeditšwego go tloga go theweng ga lefase.”​—Mat. 25:34.

^ par. 4 Jesu ga se a bolela ge e ba seo molaki yo a bego a latofatšwa ka sona e be e le therešo goba maaka. Lentšu la Segerika leo le fetoletšwego e le “latofatšwa” go Luka 16:1, le bontšha gore go ka direga gore molaki yoo o be a thomeletšwa. Lega go le bjalo, Jesu o ile a bolela ka seo molaki yoo a ilego a se dira ka morago ga go latofatšwa, ga se a bolela ka dilo tšeo di dirilego gore a rakwe mošomong.

^ par. 15 Kanegelo ya bophelo bja Lucia Moussanett e ka go Phafoga! ya July 8, 2003, matl. 28-31.