Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  July 2017

“Anke a Phethe Tšohle Tšeo o di Rerago”

“Anke a Phethe Tšohle Tšeo o di Rerago”

“Thabela Jehofa kudu, gomme yena o tla go nea tše pelo ya gago e di kgopelago.”​—PS. 37:4.

DIKOPELO: 89, 140

1. Ke phetho efe yeo bafsa ba lebeletšanego le yona, eupša ke ka baka la’ng go sa hlokagale gore ba belaele kudu? (Bona seswantšho se se lego ka mo godimo.)

LENA bafsa, ga go pelaelo gore le tla dumela gore pele le ka tšea leeto, ke gabohlale gore le tsebe moo le tlago go ya gona. Bophelo bo swana le go tšea leeto, gomme nako ya gore le tsebe moo le nyakago go ya gona ke ya ge le sa le ba bafsa. Ke therešo gore ga go bonolo go tseba dilo tšeo le nyakago go tlo di dira bophelong. Ngwanenyana yo a bitšwago Heather o re: “Go a tšhoša go tseba gore o swanetše go kgetha seo o tlago go se dira bophelong bja gago ka moka.” Eupša hloka pelaelo. Jehofa o re go batho ba gagwe: “O se ke wa lealea gobane ke Modimo wa gago. Ke tla go matlafatša. Ruri ke tla go thuša.”​—Jes. 41:10.

2. O tseba bjang gore Jehofa o nyaka gore o tle o be le bokamoso bjo bo kgahlišago?

2 Jehofa o nyaka gore o dire diphetho tše dibotse gore o tle o be le bokamoso bjo bo kgahlišago. (Mmo. 12:1; Mat. 6:20) O nyaka gore o thabe. Dilo tšeo a di bopilego, medumo le tatso yeo a re filego yona di hlatsela seo. Le gona nagana ka tsela yeo a re hlokomelago ka yona le go re ruta e le gore re ipshine ka bophelo. Go bao ba ganago keletšo ya gagwe, Jehofa o re go bona: “[Le kgethile] dilo tšeo di sa nkgahlego.  . . Bonang! Bahlanka ba ka ba tlo thaba, eupša lena le tlo hlabja ke dihlong. Bonang! Bahlanka ba ka ba tlo goeletša ka lethabo ka baka la boemo bjo bobotse bja pelo.” (Jes. 65:12-14)  Ka gona ge re dira diphetho tše dibotse maphelong a rena, re thabiša Jehofa.​—Die 27:11.

DIKGETHO TŠEO DI TLAGO GO GO THABIŠA

3. Jehofa o go kganyogela eng?

3 Jehofa o nyaka gore o kgethe eng? Jehofa o bopile batho gore ba hwetše lethabo ka go mo tseba le ka go mo hlankela ka potego. (Ps. 128:1; Mat. 5:3) Ga re swane le diphoofolo, tšeo di no phelelago go ja, go nwa le go tswala. Jehofa o nyaka gore o hwetše lethabo dilong tšeo diphoofolo di sa kgonego go di dira. Mmopi wa gago ke “Modimo wa lerato,” e bile ke “Modimo yo a thabilego” yoo a bopilego batho ka “seswantšho sa gagwe.” (2 Bakor. 13:11; 1 Tim. 1:11; Gen. 1:27) O tlo thaba ge o ka ekiša Modimo wa rena yo lerato. Na o kile wa latswa seo se boletšwego lengwalong leo le rego: “Go na le lethabo le legolo go neeng go feta go amogeleng”? (Dit. 20:35) Yeo ke therešo e sa fetogego. Ka gona Jehofa o duma gore dilo tšeo o tlago go kgetha go di dira bophelong bja gago di tle di bontšhe gore o rata batho le Yena.​—Bala Mateo 22:36-39.

4, 5. Ke’ng seo se bego se thabiša Jesu?

4 Jesu Kriste o beetše bafsa mohlala o mobotse kudu. Ga go pelaelo gore ge e be e sa le ngwana o be a thabela go bapala. Lentšu la Modimo le re go na le “nako ya go sega . . . le nako ya go bina.” (Mmo. 3:4) Le gona Jesu o ile a ba le segwera se sebotse le Jehofa ka go ithuta Mangwalo. Ge a be a na le mengwaga e 12, barutiši ba tempeleng kua Jerusalema ba ile ba makatšwa ke “kwešišo ya gagwe le dikarabo tša gagwe.”​—Luka 2:42, 46, 47.

5 Jesu o ile a gola gomme ya ba motho yo mogolo yo a thabilego. O be a thabišwa ke’ng? O be a tseba gore gare ga dilo tše dingwe, Modimo o be a nyaka gore a ‘tsebiše badiidi ditaba tše dibotse . . . le go dira gore difofu di bone gape.’ (Luka 4:18) Ee, Jesu o be a thabišwa ke go dira dilo tšeo Jehofa a bego a mo kgopela gore a di dire. Psalme 40:8 e bolela kamoo Jesu a bego a ikwa ka gona ka gore: “Wena Modimo wa ka, ke kgahlwa ke go dira thato ya gago.” Jesu o be a thabela go ruta batho ka Tatagwe wa legodimong. (Bala Luka 10:21.) Lebakeng le lengwe ka morago ga gore Jesu a rute mosadi yo a itšego ka tsela ya maleba ya go rapela Modimo, o ile a re go barutiwa ba gagwe: “Dijo tša ka ke gore ke dire thato ya yo a nthomilego le go phetha modiro wa gagwe.” (Joh. 4:31-34) Go rata Modimo le batho go dirile gore Jesu a thabe. Le wena go dira bjalo go ka go thabiša.

6. Ke ka baka la’ng go le bohlokwa gore o boledišane le Bakriste bao ba godilego tsebong ka dilo tšeo o nyakago go di dira bophelong?

6 Bafsa ba bantši ba Bakriste ba thabile ka gobane ba hlankela e le babulamadibogo. Ke ka baka la’ng o sa boledišane le bona ka dipakane tšeo o ipeetšego tšona tirelong ya Jehofa? Beibele e re “maano a a fela ge batho ba sa ntšhetšane sa mafahleng, eupša taba e a atlega mo go nago le baeletši ba bantši.” (Die. 15:22) Batho ba bjalo bao ba ratago Jehofa ba tla go botša kamoo tirelo ya nako-e tletšego e ba holago ka gona letšatši le letšatši. Ka morago ga gore Jesu a rutwe ke Tatagwe kua legodimong, o ile a tšwela pele a ithuta dilo tše difsa le ge a be a le mo lefaseng. Ka mohlala, o ile a latswa lethabo leo le tlišwago ke go kgoma batho dipelo ka ditaba tše dibotse, le lethabo leo le tlišwago ke go dula re botega ka tlase ga teko. (Bala Jesaya 50:4; Baheb. 5:8; 12:2) Anke re boleleng ka dikarolo tše itšego tša tirelo ya nako e tletšego tšeo di ka go tlišetšago lethabo le legolo.

LEBAKA LEO BAO BA DIRAGO BATHO BARUTIWA BA THABILEGO

7. Ke ka baka la’ng bafsa ba bantši ba thabela go dira batho barutiwa?

7 Jesu o itše: ‘Eyang . . . le dire batho barutiwa . . . le ba rute.’ (Mat. 28:19, 20) Ge e ba le wena o kgetha go dira-batho ba barutiwa, o tla ba o kgetha mošomo o thabišago go feta mešomo ka moka, e lego mošomo woo o neago Modimo letago. Go swana le mošomo le ge e le ofe, go tla tšea nako gore o be le bokgoni mošomong wo. Morago bjale, ngwanabo rena yo a bitšwago Timothy, yoo a tšerego bobulamadibogo e sa le mofsa o itše: “Ke thabela go hlankela Jehofa ka nako-e tletšego ka gobane ye ke tsela yeo ke mmontšhago ka yona gore ke a mo rata. Mathomong ke be ke sa kgone go thoma dithuto tša Beibele, eupša ka morago ke ile ka hudugela tšhemong e nngwe gomme ka kgwedi e tee feela ke ge ke šetše ke na le dithuto tše mmalwa tša Beibele. Yo mongwe wa bao ke bego ke ba badiša o ile a thoma go tla dibokeng. Ka morago ga go fetša dikgwedi tše pedi Sekolong sa Beibele sa Bana Babo Rena ba Sego Lenyalong, * ke ile ka romelwa tšhemong e nngwe moo le gona ke ilego ka thoma dithuto tša Beibele tše nne. Ke thabela go ruta batho ka Modimo, ka ge ke bona gore moya o mokgethwa o ba thuša go fetoša maphelo a bona.”​—1 Bathes. 2:19.

8. Bafsa ba bangwe ba šomile bjang ka botlalo modirong wa go dira barutiwa?

8 Bafsa ba bangwe ba Bakriste ba ithutile leleme le lefsa. Ka mohlala, Jacob, wa kua Amerika Leboa, o ngwadile gore: “Ge ke be ke na le mengwaga e šupago, ba bantši ba bana bao ke bego ke tsena le bona ka klaseng ba be ba bolela se-Vietnam. Ke be ke nyaka go ba botša ka Jehofa, ka gona ka morago ga mengwaga e itšego ke ile ka dira phetho ya go ithuta leleme leo. Gantši ke be ke ithuta leleme leo ka go bapiša Morokami wa Seisemane le wa se-Vietnam. Le gona ke ile ka nyaka bagwera phuthegong ya se-Vietnam ya kgauswi le gagešo. Ge ke be ke na le mengwaga e 18, ke ile ka thoma go bula madibogo. Ka morago, ke ile ka ya Sekolong sa Beibele sa Bana Babo Rena ba Sego Lenyalong. Thuto ya sekolong seo e nthušitše kudu kabelong yeo le lehono ke sa lego go yona ya bobulamadibogo, e bile ke mogolo a nnoši sehlopheng sa leleme leo. Batho ba bantši bao ba bolelago se-Vietnam ba makatšwa ke gore ke ithutile segagabo bona. Ge ke le tšhemong ba a nkamogela, e bile gantši ba dumela gore ke ithute Beibele le bona. Ba bangwe ba ile ba gatela pele gomme ga bjale ba kolobeditšwe.”​—Bapiša le Ditiro 2:7, 8.

9. Mošomo wa go dira batho barutiwa o re ruta eng?

9 Go dira batho barutiwa go go ruta go šomišana gabotse le batho ba bangwe, go kgona go boledišana le bona, go ba le sebete le go ba šedi. (Die. 21:5; 2 Tim. 2:24) Eupša sa go thabiša kudu ka mošomo wo ke gore o go thuša go tseba gabotse Mangwalo ao a thekgago ditumelo tša rena. Le gona o go ruta go šomišana gabotse le Jehofa.​—1 Bakor. 3:9.

10. O ka hwetša lethabo bjang modirong wa go dira batho barutiwa gaešita le tšhemong e thata?

10 O ka ipshina ka go dira batho barutiwa gaešita le ge batho ba bantši ba tšhemong ya lena ba sa thabele. Go dira batho barutiwa ga se mošomo wa motho o tee. Phuthego ka moka e a thušana go tsomeng batho bao ba thabelago. Gaešita le ge ngwanabo rena o tee goba kgaetšedi e ka ba yena a badišago motho go fihlela e eba morutiwa, ka moka ga rena re ka thabišwa ke seo ka gobane re tšere karolo go tsomeng motho yoo. Ka mohlala, Brandon o feditše mengwaga e senyane e le mmulamadibogo tšhemong e thata. O re: “Ke thabela go botša batho ditaba tše dibotse ka gobane Jehofa o re kgopetše go dira seo. Ke thomile go bula madibogo gateetee ka morago ga go fetša sekolo. Ke thabela go kgothatša bafsa ba phuthegong ya gešo le go ba bona ba gatela pele moyeng. Ka morago ga gore ke ye Sekolong sa Beibele sa Bana Babo Rena ba Sego Lenyalong, ke ile ka romelwa tšhemong e nngwe. Ke therešo gore ga sa nka ka badiša motho go fihlela a kolobetšwa, eupša bangwe ba kgonne go dira bjalo. Ke thabišwa ke gore ke kgethile go tšea karolo ka botlalo mošomong wa go dira-batho barutiwa go tloga bofseng.”​—Mmo. 11:6

MOO DIKGETHO TŠA GAGO DI KA GO LEBIŠAGO GONA

11. Bafsa ba bantši ba thabela mohuta ofe wa tirelo e kgethwa?

11 Go na le dibaka tše dintši tša go hlankela Jehofa. Ka mohlala, bafsa  ba bantši ba ithaopetše go šoma medirong ya go aga mafelo a rena a borapedi. Go sa nyakega Diholo tša Mmušo tše makgolokgolo. Go aga diholo tšeo go thabiša Modimo gomme le wena go ka go thabiša. Go swana le mehuteng e mengwe ya tirelo e kgethwa, go šoma gotee le bana babo rena go thabiša kudu. Le gona go thuša medirong ya go aga mafelo a rena a borapedi go go ruta dilo tše dintši, go go ruta go latela melao ya tšhireletšego, go šoma ka thata le go kwa bao ba etelelago pele.

Bao ba tsenelago tirelo ya nako e tletšego ba letetšwe ke ditšhegofatšo tše dintši (Bona Dirapa 11-13)

12. Go ba mmulamadibogo go ka go bulela dibaka tše dingwe bjang?

12 Ngwanabo rena yo a bitšwago Kevin o re: “Go tloga ke sa le mošemanyana, ke be ke ipotša gore ka letšatši le lengwe ke tlo hlankela Jehofa ka nako-e tletšego. Ka gona, ge ke be ke na le mengwaga e 19, ke ile ka tšea bobulamadibogo. Ke be ke iphediša ka go šoma-ka nakwana le ngwanabo rena yo a bego a aga. Ke ile ka ithuta go tsenya tlhaka, mafasetere le mabati. Ka morago, ke ile ka fetša mengwaga e mebedi ke thuša modirong wa tlhakodišo ka morago ga gore ledimo le senye tikologo e itšego. Re be re aga lefsa Diholo tša Mmušo le dintlo tša bana babo rena. Ge ke be ke ekwa gore Afrika Borwa go nyakega matsogo modirong wa go aga, ke ile ka tsenya kgopelo gomme ka bitšwa gore ke tlo thuša. Mo Afrika, re aga Holo ya Mmušo ka morago ga dibeke tše dingwe le tše dingwe tše sego kae. Sehlopha seo ke šomago le sona se bjalo ka lapa lešo. Re dula gotee, re ithuta Beibele gotee e bile re šoma gotee. Le gona beke e nngwe le e nngwe ke ipshina ka go šoma tšhemo le bana babo rena bao re tla bego re ba agela holo. Dikgetho tšeo ke di dirilego ke sa le mošemanyana di ntlišetša lethabo ka ditsela tše ke sa kago ka di nagana.”

13. Ke ka baka la’ng bafsa ba thabišwa ke go hlankela Bethele?

13 Ba bangwe bao ba kgethilego go hlankela Jehofa ka nako e tletšego ga bjale ba Bethele. Go šoma Bethele go thabiša kudu ka gobane dilo ka moka tšeo o di dirago moo o di direla Jehofa. Ditho tša lapa la Bethele di re thuša go hwetša dijo tša moya. Dustin,  yoo e lego setho sa lapa la Bethele, o re: “Ke kgethile go hlankela Jehofa ka nako-e tletšego ke sa na le mengwaga e senyane, gomme ge ke fetša sekolo ka thoma go bula madibogo. Ka morago ga ngwaga le seripa ke le mmulamadibogo, ke ile ka bitšwa gore ke tle Bethele, moo ke ithutilego go šoma ka metšhene ya go gatiša gomme ka morago ka šoma ka dikhomphutha. Mo Bethele, ke kgona go kwešiša ka botlalo kamoo modiro-wa go dira barutiwa o gotšego ka gona lefaseng ka moka. Ke thabela go hlankela Bethele ka gobane mošomo wo re o dirago mo o thuša batho gore ba tsebe Jehofa.”

WENA O KGETHA GO DIRA ENG KA BOPHELO BJA GAGO?

14. Ke’ng seo se ka go thušago gore o tsenele tirelo ya nako e tletšego?

14 O ka dira’ng gore le wena o tsenele tirelo ya nako e tletšego? Go feta dilo tšohle, go ba le dika tša moya go tla go thuša go hlankela Jehofa ka botlalo. Ka gona ithute Lentšu la Modimo ka mafolofolo, naganišiša kudu ka seo le se bolelago gomme o nyake dibaka tša go bontšha tumelo ya gago dibokeng. Ge o sa dutše o tsena sekolo, katanela go ba le bokgoni bja go bolela ditaba tše dibotse. Ithute go tshwenyega ka batho ba bangwe ka go ba botšiša ka bohlale seo ba se naganago le ka go theetša dikarabo tša bona ka kelohloko. Le gona ithaopele go dira mešongwana e itšego ka phuthegong, go swana le go thuša go hlwekiša Holo ya Mmušo le go e boloka e le boemong bjo bobotse. Jehofa o thabela go šomiša batho bao ba ikokobeditšego, bao ba ratago go ithaopa. (Bala Psalme 110:3; Dit. 6:1-3) Moapostola Paulo o ile a re Timotheo a šome le yena tirelong ya boromiwa ka gobane Timotheo “o be a bolelwa-gabotse-ke bana babo.”​—Dit. 16:1-5.

15. O ka dira’ng gore o tle o kgone go iphediša tirelong ya nako e tletšego?

15 Gantši bao ba lego tirelong ya nako e tletšego ba swanetše go šoma gore ba kgone go iphediša. (Dit. 18:2, 3) Mohlomongwe o ka ithutela mošomo wa nakwana wo o hwetšagalago gabonolo tikologong ya geno. Ge o dutše o rulaganya maemo a gago, boledišana le molebeledi wa lena wa tikologo le babulamadibogo ba tikologong ya geno. Ba botšiše gore ke mešomo efe ya boiphedišo yeo e swanetšego babulamadibogo. Le gona, go etša ge Beibele e bolela, “lahlela Jehofa mediro ya gago gomme merero ya gago e tla tia.”​—Die. 16:3; 20:18.

16. Go hlankela Jehofa ka nako e tletšego o sa le yo mofsa go tla go thuša bjang nakong e tlago?

16 Kgodišega gore Jehofa o nyaka gore o “swarelele ka go tia” bokamosong bjo bo thabišago. (Bala 1 Timotheo 6:18, 19.) Tirelo ya nako e tletšego e dira gore o tsebane le bahlanka ba bangwe ba Jehofa bao le bona ba lego tirelong ya nako e tletšego, e bile e go thuša go tia tumelong. Le gona ba bantši ba hweditše gore go hlankela Jehofa ka nako e tletšego e sa le ba bafsa go ba thušitše go ba le manyalo a thabišago. Gantši bao e bilego babulamadibogo pele ba ka tsena lenyalong ba kgonne go tšwela pele ka bobulamadibogo le ka morago ga lenyalo.​—Baroma 16:3, 4.

17, 18. Ke ka baka la’ng dilo tšeo o kgethago go tlo di dira bophelong di swanetše go tšwa pelong?

17 Dilo tšeo o kgethago go tlo di dira bophelong di swanetše go tšwa pelong. Psalme 20:4 e bolela ka Jehofa gore: “Anke a go nee kganyogo ya pelo ya gago, anke a phethe tšohle tšeo o di rerago.” Ka gona wena mofsa, nagana ka seo o nyakago go se dira ka bophelo bja gago. Nagana ka seo Jehofa a se dirago mehleng ya rena le kamoo o ka thušago ka gona tirelong ya gagwe. Ka morago ga go dira bjalo, kgetha go dira seo se tlago go mo thabiša.

18 Go hlankela Jehofa ka nako e tletšego go tla go thabiša kudu ka gobane ke tsela e di phalago tšohle ya go mo tumiša. Ee, “thabela Jehofa kudu, gomme yena o tla go nea tše pelo ya gago e di kgopelago.”​—Ps. 37:4.

^ par. 7 Sekolo se se tšeetšwe legato ke Sekolo sa Baebangedi ba Mmušo.