Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  January 2017

O ka Kgona go Dula o Ipoeditše ge go le Thata

O ka Kgona go Dula o Ipoeditše ge go le Thata

‘Eba le boipoetšo ge o sepela le Modimo wa gago.’MIKA 6:8.

DIKOPELO: 48, 95

1-3. Moporofeta yo a tšwago Juda o ile a palelwa ke go dira eng, gona mafelelo e bile afe? (Bona seswantšho se se lego ka mo godimo.)

NAKONG e itšego ge go be go buša Kgoši Jeroboama, Jehofa o ile a roma moporofeta yo a bego a etšwa Juda gore a iše molaetša wa kahlolo go kgoši ye ya Isiraele ya mohlanogi. Moporofeta yoo yo a ikokobeditšego o ile a iša molaetša woo, gomme Jehofa a mo šireletša ge Jeroboama a be a galefile.1 Dikg. 13:1-10.

2 Ge moporofeta yoo a boela gae, o ile a gahlana le mokgalabje yo mongwe yo a bego a etšwa Bethele. Mokgalabje yoo o be a ipitša moporofeta wa Jehofa. O ile a fora moporofeta yo a bego a etšwa go Kgoši Jeroboama gore a se theetše ditaelo tša Jehofa tša gore ‘a se ke a ja senkgwa goba a nwa meetse moo Isiraele,’ le gore ‘a se ke a boela morago ka tsela yeo a tlilego ka yona.’ Seo se ile sa nyamiša Jehofa. Ka morago ga gore moporofeta yoo a je le go nwa, o ile a wela tsela. Eupša ge a le tseleng, tau e ile ya mo hlasela gomme ya mmolaya.1 Dikg. 13:11-24.

3 Go tlile bjang gore moporofeta yo a bego a na le boipoetšo a kgethe go theetša maaka a mokgalabje yoo? Beibele ga e re botše. Eupša go ka direga gore o ile a lebala gore o be a swanetše ‘go ba le boipoetšo ge a sepela le Modimo.’ (Bala Mika 6:8.) Ka Beibeleng,  go sepela le Modimo go bolela go mmota, go thekga bogoši bja gagwe le go mo dumelela a go hlahla. Motho yo a nago le boipoetšo o lemoga gore o swanetše go dula a boledišana le Tatagwe wa legodimong yo lerato le yo matlaohle. Moporofeta yoo nkabe a ile a botšiša Jehofa mabapi le ditaelo tšeo a bego a mo neile tšona, eupša Beibele ga e bolele gore ke ka baka la eng a se a dira bjalo. Ka dinako tše dingwe, le rena re ka swanelwa ke go dira diphetho tše thata, eupša ra hwetša gore ga go na tlhahlo e lebanyago yeo e ka re thušago. Maemong a bjalo, re swanetše go ba le boipoetšo gomme re kgopele Jehofa gore a re hlahle. Go dira bjalo go tla re thuša gore re se dire diphošo tše dikgolo.

4. Re tlo ithuta’ng sehlogong se?

4 Sehlogong se se fetilego, re ithutile gore ke ka baka la eng boipoetšo bo le bohlokwa go Bakriste le gore ba ka bo bontšha bjang. Lega go le bjalo, ke maemo afe ao a ka bontšhago ge e ba re na le boipoetšo goba go se bjalo? Le gona re ka dira’ng gore re be le seka se, e le gore re dule re ipoeditše ge go le thata? E le gore re arabe dipotšišo tše, re tlo ahlaahla dilo tše tharo tšeo di ka bontšhago ge e ba re na le boipoetšo goba go se bjalo, e bile re tlo ithuta kamoo re ka swaraganago le maemo ao ka bohlale.Die. 11:2.

GE MAEMO A RENA A FETOGA

5, 6. Barasilai o ile a bontšha boipoetšo bjang?

5 Selo seo se ka bontšhago ge e ba re na le boipoetšo goba go se bjalo ke ge maemo goba dikabelo tša rena di fetoga. Barasilai wa mengwaga e 80 o swanetše go ba a ile a thaba kudu ge Dafida a be a mo kgopela gore a tle a dule ka mošate. Ge Barasilai a be a ka dumela go dula ka mošate, o be a tlo ipshina ka go phela le kgoši Dafida. Lega go le bjalo, Barasilai o ile a gana tokelo yeo. Ka baka la’ng? O ile a botša Dafida gore ka ge a be a šetše a tšofetše, o be a sa nyake go ba morwalo go kgoši. Ka gona Barasilai o ile a kgopela gore Kimehama, yoo go ka diregago gore e be e le yo mongwe wa barwa ba gagwe, e be yena a yo dulago ka mošate.2 Sam. 19:31-37.

6 Boipoetšo bo thušitše Barasilai go dira phetho yeo e bontšhago tekatekano. Ga se a gana go dula ka mošate feela ka gobane a ikwa a ka se kgone go šoma goba feela ka gobane a nyaka go ipshina ka bophelo a sa dire selo. Go e na le moo, o ile a amogela gore maemo a gagwe a fetogile le gore go na le dilo tšeo a se sa kgonago go di dira. O be a sa nyake go ikimetša ka mešomo yeo a bego a tseba gore a ka se kgone go e dira. (Bala Bagalatia 6:4, 5.) Ge e ba re rata maemo, botumo goba go retwa, seo se ka dira gore re thome go ikgantšha, go phadišana gomme sa feleletša ka manyami. (Bagal. 5:26) Go fapana le moo, boipoetšo bo re thuša gore re diriše bokgoni bja rena go tumiša Jehofa le go dira sohle seo re ka se kgonago go thuša ba bangwe, go e na le go nyaka go retwa.1 Bakor. 10:31.

7, 8. Boipoetšo bo ka re thuša bjang go phema go ithekga ka tlhaologanyo ya rena?

7 Gantši ge re hwetša ditokelo tše di oketšegilego, re hwetša le matla a go laola ba bangwe, gomme seo se ka re bakela bothata. Re ka thoma go ikgantšha. Ka morago ga gore Nehemia a kwe ka mathata a batho bao ba bego ba le Jerusalema, o ile a rapela Jehofa go tšwa pelong. (Neh. 1:4, 11) Jehofa o ile a šegofatša Nehemia ge Kgoši Arithasasitha a be a dira gore Nehemia e be mmuši wa seleteng sa Juda. Eupša le ge Nehemia a be a na le maemo a phagamego, mahumo le matla a go laola, ga se a ka a ithekga ka bokgoni goba phihlelo ya gagwe. O ile a tšwela pele a sepela le Modimo. O ile a dula a tsoma tlhahlo ya Jehofa ka go bala Molao wa Gagwe. (Neh. 8:1, 8, 9) Nehemia ga se a ka a gatelela batho ba Modimo, go e na le moo, o ile a ba thuša ka dilo tša gagwe.Neh. 5:14-19.

 8 Mohlala wa Nehemia o re ruta gore boipoetšo bo ka re thuša go se ithekge ka tlhaologanyo ya rena ge re newa kabelo e mpsha goba re hwetša ditokelo tše di oketšegilego. Ge mogolo a ithekga ka phihlelo ya gagwe, a ka thoma go dira dilo tša phuthego ntle le go rapela Jehofa pele. Ba bangwe ba ka dira phetho pele, ke moka ka morago ya ba gona ba rapelago Jehofa gore a šegofatše phetho yeo. Eupša na seo ke go bontšha boipoetšo? Motho yo a nago le boipoetšo ga a lebale gore Jehofa o tla pele bophelong bja gagwe e bile o tseba moo a felelago gona dilong tša Modimo. Selo sa bohlokwa kudu ga se bokgoni bja rena, kudukudu ge re lebeletšane le mathata. Ge re lebeletšane le mathata, re swanetše go itlhokomela gore re se ithekge ka tlhaologanyo ya rena. (Bala Diema 3:5, 6.) Ka ge re le ditho tša lapa la Modimo, re swanetše go tshwenyega ka mešomo yeo re e neilwego ka phuthegong, go e na le go tshwenyega ka go hwetša maemo goba ditokelo tše di oketšegilego.1 Tim. 3:15.

GE RE SOLWA GOBA RE RETWA

9, 10. Boipoetšo bo ka re thuša bjang ge re solwa go sa hlokagale?

9 Go ka ba thata go laola maikwelo a rena ge re solwa go sa hlokagale. Hanna le Penina ba be ba nyetšwe ke monna o tee. Ka gona Hanna o be a lla ka mehla ka gobane Penina o be a dula a mo kwera. Monna yoo o be a rata Hanna kudu, eupša Hanna e be e le moopa. Ka morago ge Hanna a be a rapela Jehofa a le taberenakeleng, ka phošo Moperisita yo Mogolo e lego Eli o ile a latofatša Hanna ka gore o tagilwe. Nagana feela! Eupša go sa šetšwe seo, boipoetšo bo ile bja thuša Hanna go laola maikwelo a gagwe gomme a araba Eli ka tlhompho. Thapelo ya gagwe e kgomago pelo e ngwadilwe ka Beibeleng. Thapelong yeo, Hanna o ile a tumiša Jehofa, a mo leboga le go bontšha tumelo go yena.1 Sam. 1:5-7, 12-16; 2:1-10.

10 Le gona boipoetšo bo ka re thuša go “tšwela pele [re] fenya bobe ka botse.” (Baroma 12:21) Batho ba babe ba lefase le la Sathane ba re thatafaletša bophelo, e bile re swanetše go lwa  ka thata gore re se ke ra fetelwa ke mekgwa ya bona e mebe. (Ps. 37:1) Ge re ka kgopišwa ke ngwanabo rena goba kgaetšedi, re ka kwa bohloko le go feta. Motho yo a nago le boipoetšo o tla ekiša Jesu. Beibele e re “ge [Jesu] a be a rogwa gabohloko, ga se a ka a ithogela . . . , eupša o ile a ikgafela yo a ahlolago ka go loka.” (1 Pet. 2:23) Jesu o be a tseba gore tefetšo ke ya Jehofa. (Baroma 12:19) Ka mo go swanago, Bakriste ba eletšwa gore ba ikokobetše gomme ba se ke ba ‘lefeletša bobe ka bobe.’1 Pet. 3:8, 9.

11, 12. (a) Boipoetšo bo ka re thuša bjang ge re retwa ka mo go feteletšego? (b) Boipoetšo bo ka re thuša bjang go kgetha diaparo le go itokiša gotee le ditabeng tša boitshwaro?

11 Go retwa ka mo go feteletšego go ka bontšha ge e ba re na le boipoetšo goba go se bjalo. Nagana kamoo Esitere a ilego a arabela ka gona ge bophelo bja gagwe bo be bo fetoga a sa letela. E be e le yo mobotse kudu gomme o ile a newa ditlolo tša maemo gore a ipotsefatše ka tšona ngwaga ka moka. O be a phela le dikgarebe tše dintši tšeo di bego di etšwa dinageng ka moka tšeo di bego di laolwa ke Mmušo wa Peresia, tšeo ka moka di bego di nyaka go nyalwa ke kgoši. Lega go le bjalo, Esitere o ile a dula a ikokobeditše e bile a hlompha. Gaešita le ka morago ga gore kgoši e mo kgethe gore e be mosadi wa yona, ga se a ka a thoma go ikgantšha goba go se sa ipoetša.Esitere 2:9, 12, 15, 17.

Na tsela yeo re aparago ka yona le go itokiša e bontšha gore re hlompha Jehofa le batho ba bangwe, goba e bontšha gore ga re na boipoetšo? (Bona serapa 12)

12 Boipoetšo bo re thuša gore re dule re apara gabotse, re itokiša gabotse, re itshwara gabotse le go itlhompha. E le gore batho ba re rate, ga se ra swanela go ikgantšha goba go rata go bonwa, eupša re swanetše go bontšha “moya wo o homotšego le o boleta.” (Bala 1 Petro 3:3, 4; Jer. 9:23, 24) Ge e ba re thoma go ikgantšha ka pelong, seo se tla thoma go bonagala ditirong tša rena. Ka mohlala, ditiro tša rena di ka bontšha gore re ikgantšha ka ditokelo tšeo re nago le tšona, tsebo yeo re nago le yona, goba segwera seo re nago le sona le bana babo rena bao ba tumilego ka mokgatlong. Goba re ka botša ba bangwe gore selo se itšego se kgonegile ka baka la rena e le gore go retwe rena feela, mola selo seo se kgonegile ka baka la thušo ya ba bangwe. Le tabeng ye, Jesu o re beetše mohlala o mobotse. Dilo tše dintši tšeo a bego a di bolela o be a di tsopola go tšwa Mangwalong a Seheberu. O ile a dira bjalo ka boipoetšo e le gore a bontšhe batheetši ba gagwe gore seo a bego a se ruta se be se etšwa go Jehofa, e sego go yena.Joh. 8:28.

GE RE SA TSEBE DITLALEMESO

13, 14. Boipoetšo bo ka re thuša bjang go dira diphetho tše dibotse?

13 Selo se sengwe seo se ka bontšhago ge e ba re na le boipoetšo goba go se bjalo ke ge go dirwa diphetho. Ge moapostola Paulo a be a dula kua Kesarea, moporofeta Agabuse o ile a mmotša gore ge a ka ya Jerusalema a ka golegwa. O ile a mmotša gore le go bolawa a ka bolawa. Bana babo rena ba moo ba ile ba lopa Paulo gore a se ke a ya Jerusalema ka ge ba be ba boifa gore o tla bolawa. Lega go le bjalo, Paulo o ile a se dumelelane le bona. Ga se gore o be a ipota kudu, e bile ga se a ka a dumelela letšhogo le mo palediša go ya Jerusalema. Paulo o be a bota Jehofa kudu, ka gona o ile a botša bana babo rena bao gore o ikemišeditše go ya gohle mo Jehofa a mo romago gona. Ge bana babo rena bao ba ekwa seo, ba ile ba bontšha boipoetšo gomme ba se sa ganetša phetho ya Paulo ya go ya Jerusalema.Dit. 21:10-14.

14 Le gona boipoetšo bo ka re thuša go dira diphetho tše dibotse le ge re sa tsebe ditlalemeso. Ka mohlala, ge re ka tsenela tirelo e itšego ya nako e tletšego, go tla direga’ng ka rena ge re ka babja? Re tla dira’ng ge batswadi ba rena bao ba tšofetšego ba hloka thušo? Re tlo itlhokomela bjang ge re tšofetše? Le ge re ka rapela goba ra dira nyakišišo, re ka se tsoge re  hweditše karabo e lebanyago ya dipotšišo tše. (Mmo. 8:16, 17) Go bota ga rena Jehofa go tla re thuša go amogela gore go na le dilo tšeo re ka se kgonego go di dira. Ka morago ga gore re dire nyakišišo, re botšiše ba bangwe le go kgopela tlhahlo ya Jehofa, re swanetše go latela tlhahlo ya moya o mokgethwa. (Bala Mmoledi 11:4-6.) Ge re dira maiteko a bjalo, Jehofa o tla kgona go re šegofatša gomme a re thuša go dira diphetho tše dibotse.Die. 16:3, 9.

KAMOO RE KA BAGO LE BOIPOETŠO

15. Go naganišiša ka Jehofa go tla re thuša bjang go dula re ikokobeditše?

15 Ka ge boipoetšo bo re thuša dikarolong tše dintši, re ka dira’ng gore re be le bjona? Anke re boleleng ka dilo tše nne tšeo di ka re thušago go ba le bjona. Sa pele, re tla ba le boipoetšo le go boifa Jehofa ge re ka naganišiša ka bogolo bja gagwe le dika tša gagwe tše di kgahlišago. (Jes. 8:13) Gopola gore re sepela le Modimo Ramatlaohle, e sego morongwa goba motho. Go lemoga seo go tla re tutueletša gore re “[ikokobetše] tlase ga seatla se matla sa Modimo.”1 Pet. 5:6.

16. Go naganišiša kamoo Jehofa a re ratago ka gona go re thuša bjang gore re be le boipoetšo?

16 Sa bobedi, go naganišiša kamoo Jehofa a re ratago ka gona go tla re thuša go ba le boipoetšo. Moapostola Paulo o ngwadile gore Jehofa o rwešitše dikarolo tša mmele tše di nyatšegago “kgodišo e kgolo.” (1 Bakor. 12:23, 24) Ka mo go swanago, Jehofa o na le taba le yo mongwe le yo mongwe wa rena, go sa šetšwe mafokodi a rena. Ga a re bapetše le ba bangwe, goba go re lahla ge re mo direla diphošo. Ka ge Jehofa a re rata, re ikwa re le bohlokwa go yena go sa šetšwe gore re na le ditokelo dife.

17. Go lebelela dilo tše dibotse go ba bangwe go tla re hola bjang?

17 Sa boraro, ge re ka lebelela dilo tše dibotse go ba bangwe go etša Modimo, re tla leboga kudu bonyenyane bjo re bo dirago tirelong ya gagwe. Go e na le go nyaka go retwa goba gore ba bangwe ba kwe ka rena, re tla bontšha boipoetšo ka go tsoma keletšo ya ba bangwe le go amogela ditšhišinyo tša bona. (Die. 13:10) Re tla thaba le ba bangwe ge ba hwetša ditokelo. E bile re tla tumiša Jehofa ge re bona kamoo a šegofatšago ‘mokgatlo ka moka wa bana babo rena lefaseng.’1 Pet. 5:9.

18. Re ka tlwaetša bjang matswalo a rena gore re itshware ka tsela yeo e kgahlišago Modimo?

18 Sa bone, ge re tlwaetša matswalo a rena ka melao ya motheo ya Beibele re tla kgona go dula re itshwere gabotse. Re tla ba le kahlolo e botse ge ka boipoetšo re ithuta go lebelela dilo go swana le Jehofa. Re ka tlwaetša matswalo a rena ganyenyane-ganyenyane ka go ithuta ka mehla, go rapela le go diriša seo re ithutago sona. (1 Tim. 1:5) Re tla ithuta go etiša ba bangwe pele. Ge re ka dira maiteko, Jehofa o tshepiša gore o tla ‘fetša go tlwaetšwa ga rena,’ gomme a re thuša go ba le boipoetšo le dika tše dingwe tšeo di mo kgahlišago.1 Pet. 5:10.

19. Ke’ng seo se tla re thušago go dula re na le boipoetšo?

19 Gopola seo se diragaletšego moporofeta wa go tšwa Juda. O ile a hwa le go lahlegelwa ke tswalano e botse le Jehofa ka baka la tiro e tee feela ya go bontšha go se be le boipoetšo. Lega go le bjalo, go a kgonega gore re dule re na le boipoetšo le ge go le thata. Bahlanka ba Jehofa ba mehleng ya bogologolo le ba lehono ba bontšhitše gore seo se a kgonega. Ge re dutše re sepela le Jehofa, re tla bontšha boipoetšo le go feta. (Die. 8:13) Go sa šetšwe ditokelo tšeo re nago le tšona, go sepela le Jehofa ke tokelo e kgahlišago kudu le ya go di phala ka moka. Thabela tokelo yeo gomme o tšwele pele o dira sohle se o ka se kgonago go sepela le Jehofa ka boipoetšo ka mo go sa felego.