Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  January 2017

Na go Ipoetša go sa le Bohlokwa

Na go Ipoetša go sa le Bohlokwa

“Bohlale ke bja baipoetši.”—DIE. 11:2.

DIKOPELO: 38, 69

1, 2. Go tlile bjang gore monna yo a bego a na le boipoetšo a se sa amogelwa ke Modimo? (Bona seswantšho se se lego ka mo godimo.)

GE Kgoši Saulo wa Isiraele ya bogologolo a be a thoma go buša, o be a na le boipoetšo e bile a hlomphega. (1 Sam. 9:1, 2, 21; 10:20-24) Eupša kapejana ka morago ga gore a be kgoši, o ile a thoma go ikgodiša gomme a dira dilo tšeo a bego a se na tshwanelo ya go di dira. Ge moporofeta wa Modimo e lego Samuele a be a sa fihle kua Giligala ka nako yeo a bego a kwane le Saulo gore o tla fihla ka yona, Saulo o ile a fela pelo. Ka nako yeo, Bafilisita ba be ba itokišeletša go lwa le Baisiraele, gomme Baisiraele bona ba be ba thoma go tlogela Saulo. Saulo a ka no ba a ile a ipotša gore: ‘Ke swanetše go dira se sengwe—le gona ke swanetše go se dira kapejana.’ Ka gona o ile a direla Modimo sehlabelo, e lego selo seo a bego a se na tshwanelo ya go se dira. Jehofa ga se a ka a kgahlwa ke seo.1 Sam. 13:5-9.

2 Ge Samuele a fihla kua Giligala, o ile a kgalemela Saulo. Go e na le gore Saulo a amogele phošollo, o ile a ipeela mabaka, a leka go bea batho ba bangwe molato gomme a nyenyefatša seo a se dirilego. (1 Sam. 13:10-14) Ka morago ga moo, Saulo o ile a thoma go dira dilo tše dingwe tšeo di ilego tša dira gore a se sa ba kgoši, gomme  se sebe le go feta, a se sa amogelwa ke Jehofa. (1 Sam. 15:22, 23) Le ge Saulo a thomile a dira dilo gabotse, bophelo bja gagwe bo ile bja feleletša ka masetlapelo.1 Sam. 31:1-6.

3. (a) Batho ba bantši ba nagana eng ka boipoetšo? (b) Re tlo araba dipotšišo dife?

3 Lefaseng le la phadišano, batho ba bantši ba nagana gore ba swanetše go phala ba bangwe e le gore ba tle ba atlege. Seo se ka dira gore ba se be le boipoetšo le gatee. Ka mohlala, monna yo mongwe wa go tuma yo e lego sebapadi sa dimubi, yo a ilego a fetoga radipolotiki, o kile a re: “Ga ke na taba le boipoetšo, e bile ga ke nagane gore ke tla tsoga ke bile le taba le bjona.” Eupša ke ka baka la eng go sa dutše go le bohlokwa gore batho ba be le boipoetšo? Boipoetšo ke’ng, gona ke’ng seo bo sego sona? Gona re ka dula bjang re na le boipoetšo ge go le thata goba ge batho ba bangwe ba re gatelela? Sehlogong se, re tlo araba dipotšišo tše pedi tša mathomo. Potšišo ya boraro e tlo arabja sehlogong se se latelago.

KE KA BAKA LA ENG BOIPOETŠO BO LE BOHLOKWA?

4. O ka hlalosa bjang motho wa go ikgodiša?

4 Beibele e bontšha phapano magareng ga boipoetšo le boikgodišo. (Bala Diema 11:2.) Dafida o ile a bona go le bohlokwa gore a kgopele Jehofa gore a ‘mo thibele go dira ditiro tša go ikgodiša.’ (Ps. 19:13) “Ditiro tša go ikgodiša” ke’ng? Ke ge motho a dira selo ka lepotlapotla goba ka lenyatšo, le ge selo seo a se na tshwanelo ya go se dira. Ka baka la sebe sa Adama, ka moka ga rena re fela re ikgodiša. Eupša bjalo ka ge re bone go tšwa mohlaleng wa Kgoši Saulo, ge e ba re eba le mokgwa wa go gapeletša dilo, re tla fapana le Modimo. Ge Psalme 119:21 e bolela ka Jehofa e re: “[Jehofa] o kgalemetše baikgodiši.” Ke ka baka la’ng a dira bjalo?

5. Ke ka baka la’ng go ikgodiša go le kotsi?

5 Go ikgodiša ga go swane le go dira phošo. Go ikgodiša go kotsi kudu. Sa pele, ge re ikgodiša, re bontšha gore ga re nyake Jehofa e eba Mmuši wa rena. Sa bobedi, ge e ba re dira dilo tšeo re se nago tshwanelo ya go di dira, re tlo lwa le batho ba bangwe. (Die. 13:10) Sa boraro, ge re ka lemoga gore re dirile dilo ka boikgodišo, re tlo swaba goba ra ikwa re nyatšega. (Luka 14:8, 9) Go ikgodiša go feleletša ka manyami. Go etša ge Beibele e bolela, ka mehla go dira dilo ka boipoetšo go a hola.

KE ENG SEO GO IPOETŠA GO SE AKARETŠAGO?

6, 7. Boikokobetšo ke’ng, gona bo tswalana bjang le boipoetšo?

6 Boipoetšo bo tswalana kudu le boikokobetšo. Ka Beibeleng, boikokobetšo bo bolela go se ikgodiše goba go se ikgantšhe. Bo hlaloswa e le go ikokobetša monaganong. (Bafil. 2:3) Le gona gantši motho yo a nago le boikokobetšo o na le boipoetšo, o tseba dilo tšeo a ka kgonago go di dira le tšeo a ka di fihlelelago, o kgona go amogela diphošo tša gagwe, ditšhišinyo tša batho ba bangwe le dikgopolo tše difsa. Jehofa o kwana kudu le batho bao ba ikokobeditšego.

7 Ka Beibeleng, boipoetšo le bjona bo bolela go tseba seo re kgonago go se dira le seo re sa kgonego go se dira. Lelemeng la mathomong, tlhaloso ya lentšu le e bontšha gore go tseba maemo a rena go tla re thuša go phedišana le ba bangwe gabotse.

8. Re ka bona ka’ng gore re a ikgodiša?

8 Ke’ng se se ka dirago gore re thome go ikgodiša? Ela hloko maswao a latelago a temošo. Re ka ipona re le bohlokwa kudu goba ra tšea ditokelo tša rena di phala tša ba bangwe. (Baroma 12:16) Re ka ba re dira dilo tše itšego feela gore re bonwe ke batho. (1 Tim. 2:9, 10) Goba re ka ba re nyaka gore go lle seeta sa rena feela ka gobane re na le maemo a itšego, re tlwaelane le  batho ba go tuma ka mokgatlong goba re bona eka dipono tša rena ka mehla di nepagetše. (1 Bakor. 4:6) Gantši ge re dira dilo ka tsela ye, re ka palelwa ke go bona gore re a ikgodiša.

9. Ke’ng seo se dirilego gore batho ba bangwe ba feleletše ba ikgodiša? Nea mohlala wa ka Beibeleng.

9 Yo mongwe le yo mongwe wa rena a ka ikgodiša ge e ba a itumelela gore a fenywe ka nakwana ke dikganyogo tša nama. Go rata maemo, mona le kgalefo e sa laolegego di dirile gore batho ba bantši ba feleletše ba ikgodiša. Batho ba ka Beibeleng ba go swana le Abesalomo, Usia le Nebukadinetsara ba ile ba ineela medirong ya nama gomme Jehofa a ba otla ka baka la go ikgodiša ga bona.2 Sam. 15:1-6; 18:9-17; 2 Dikor. 26:16-21; Dan. 5:18-21.

10. Ke ka baka la’ng re swanetše go phema go ahlola ba bangwe? Nea mohlala wa ka Beibeleng.

10 Lega go le bjalo, go na le dilo tše dingwe tšeo di ka dirago gore re ikgodiše. Ka mohlala, ela hloko seo se boletšwego dipegong tše di lego go Genesi 20:2-7 le Mateo 26:31-35. Na ditiro tša Abimeleke le Petro tšeo di bonagalago e le tša boikgodišo di be di šušumetšwa ke dikganyogo tša sebe? Goba na batho ba ba be ba sa tsebe seo ba se dirago, goba na ba be ba sa itebetše? Ka ge re sa kgone go tseba seo se lego ka pelong ya motho, re bontšha bohlale le lerato ge re phema go kitimela go ahlola ba bangwe.Bala Jakobo 4:12.

TSEBA MO O FELELAGO GONA

11. Boipoetšo bo tswalana bjang le go tseba maemo a rena ka mokgatlong wa Jehofa?

11 E le gore re be le boipoetšo, selo sa pelepele seo re swanetšego go se dira ke go tseba maemo a rena ka mokgatlong wa Jehofa. Ka ge Jehofa e le Modimo wa thulaganyo, o nea yo mongwe le yo mongwe wa rena maemo goba kabelo yeo re swanetšego go e phetha ka ntlong ya gagwe. Dikabelo tša rena ka phuthegong ga di swane, eupša ka moka ga rena re a hlokana. Ka baka la botho bja gagwe bjo bogolo, Jehofa o file yo mongwe le yo mongwe wa rena dimpho tše itšego, bokgoni goba ditalente. Re ka diriša dilo tše go mo tumiša le go thuša ba bangwe. (Baroma 12:4-8) Jehofa o re neile bolaki gomme o letetše gore re mo tumiše, re botege le go šoma ka thata tirelong ya gagwe.Bala 1 Petro 4:10.

Re ka ithuta’ng mohlaleng wa Jesu ge re newa kabelo e mpsha? (Bona dirapa 12-14)

12, 13. Ke ka baka la’ng re sa swanela go makala ge maemo a rena a dula a fetoga ka mokgatlong wa Modimo?

12 Lega go le bjalo, maemo a rena a dula a fetoga ka mokgatlong wa Modimo. Nagana ka mohlala wa Jesu. Mathomong o be a dula le Jehofa feela legodimong. (Die. 8:22) Ke moka o ile a mo thuša go bopa dibopiwa tše dingwe tša moya, legohle gomme mafelelong ba bopa batho. (Bakol. 1:16) Ka morago ga moo, Jesu o ile a newa kabelo e mpsha mo lefaseng, mathomong e le lesea leo le sa kgonego go dira selo ke moka ka morago e le motho yo mogolo. (Bafil. 2:7) Ka morago ga go hwa lehu la sehlabelo, Jesu o ile a boela legodimong e le sebopiwa sa moya gore a tle a be Kgoši ya Mmušo wa Modimo ka 1914. (Baheb. 2:9) Eupša yeo e be e se kabelo ya gagwe ya mafelelo. Ka morago ga Pušo ya gagwe ya Nywaga e Sekete, Jesu o tlo bušetša Mmušo wa gagwe go Jehofa gore “Modimo e be dilo tšohle go yo mongwe le yo mongwe.”1 Bakor. 15:28.

13 Le rena re ka letela gore dikabelo tša rena di fetoge nako le nako, gantši ka baka la diphetho tšeo re di dirago. Ka mohlala, na o be o se lenyalong, gomme wa tsena lenyalong? Na gona bjale o na le bana? Na ka morago o ile wa nolofatša bophelo bja gago gore o tsenele tirelo ya nako e tletšego? E nngwe le e nngwe ya diphetho tšeo e ile ya tla le ditokelo tše itšego le boikarabelo. Maemo a rena ao a fetofetogago a ka dira gore re šome kudu tirelong ya Jehofa goba a lekanyetša tirelo ya rena. Na o mofsa  goba o motho yo mogolo? Na o phetše gabotse mmeleng goba o a fokola? Jehofa o dula a hlahloba kamoo a ka dirišago yo mongwe le yo mongwe wa rena ka tsela e botse kudu tirelong ya gagwe. O letetše gore re dire seo re ka se kgonago, e bile o thabišwa kudu ke seo.Baheb. 6:10.

14. Boipoetšo bo ka re thuša bjang go hwetša lethabo le kgotsofalo kabelong le ge e le efe?

14 Jesu o ile a thabela dikabelo tša gagwe ka moka, le rena re ka thabela tša rena. (Die. 8:30, 31) Motho yo a nago le boipoetšo ga a ngongorege ka dikabelo goba boikarabelo bjo a nago le bjona ka phuthegong. Ga a lwele go hwetša ditokelo tše dingwe goba go hlobaetšwa ke ge ba bangwe ba fihlelela dilo tše itšego. Go e na le moo, o tshwenyega ka go diriša matla a gagwe gore a ipshine ka kabelo yeo a nago le yona gona bjale, ka gore o e lebelela e etšwa go Jehofa. Ka nako e swanago, o hlompha dikabelo tšeo Jehofa a di filego ba bangwe. Boipoetšo bo re thuša go hlompha ba bangwe le go ba thekga ka lethabo.Baroma 12:10.

SEO BOIPOETŠO E SEGO SONA

15. Gideone o re beetše mohlala ofe wa boipoetšo?

15 Gideoni o re beetše mohlala o mobotse kudu wa boipoetšo. Ge morongwa wa Jehofa a be a tšwelela go yena ka lekga la mathomo, kapejana Gideoni o ile a inyatša gomme a nyatša le seo a bego a se dira. (Baa. 6:15) Ka morago ga gore Gideoni a amogele kabelo yeo e tšwago go Jehofa, o ile a kgonthišetša gore o kwešiša gabotse seo se bego se letetšwe go yena, e bile a kgopela Jehofa gore a mo hlahle. (Baa. 6:36-40) Gideoni o be a na le sebete e bile a sa boife  selo. E bile o be a dira dilo ka temogo le ka bohlale. (Baa. 6:11, 27) Ga se a amogela kabelo yeo e tšwago go Jehofa go no re a be le maemo. Go e na le moo, ka morago ga gore a phethe kabelo yeo, o ile a boela boemong bja gagwe bja peleng ntle le bothata.Baa. 8:22, 23, 29.

16, 17. Ke’ng seo motho yo a nago le boipoetšo a sa se lebalego ge a nagana ka go dira tšwelopele ka mokgatlong wa Jehofa?

16 Go ipoetša ga go bolele gore re se ke ra katanela ditokelo tše di oketšegilego ka mokgatlong wa Jehofa goba go di amogela. Mangwalo a kgothaletša yo mongwe le yo mongwe wa rena gore a dire tšwelopele. (1 Tim. 4:13-15) Lega go le bjalo, na ka mehla se se bolela gore re nyake kabelo e mpsha? Ga go bjalo. Jehofa a ka re šegofatša gore re dire tšwelopele ka mokgatlong wa gagwe go sa šetšwe gore re hlankela maemong afe. Re ka tšwela pele re kaonefatša bokgoni bjoo Modimo a re neilego bjona gomme ra ntšha ka ga tšhwene medirong e mebotse.

17 Pele motho yo a nago le boipoetšo a ka amogela kabelo e mpsha, o tla thoma pele ka go nyaka go tseba seo se letetšwego go yena. Ka morago ga moo, o tla hlahloba maemo a gagwe go tšwa pelong. Ka mohlala, na o tla kgona go phetha mediro e oketšegilego goba maikarabelo a oketšegilego a sa hlokomologe mešomo e mengwe ya bohlokwa? Na e mengwe ya mešomo yeo a e dirago gona bjale e ka newa ba bangwe e le gore yena a tle a kgone go phetha kabelo yeo e mpsha? Ge e ba karabo e le aowa go e nngwe ya dipotšišo tše goba ka bobedi bja tšona, go ra gore kabelo yeo a ka se e kgone gona bjale gomme e ka newa motho yo mongwe yo a ka e kgonago. Go itlhahloba ka thapelo le ka mo go tseneletšego go tla re thuša go se gapeletše go dira dilo tšeo re ka se di kgonego. Boipoetšo bo ka re thuša go gana dikabelo tšeo re ka se di kgonego.

18. (a) Ke’ng seo boipoetšo bo tlago go re thuša go se dira ge re newa ditokelo goba kabelo e mpsha? (b) Lengwalo la Baroma 12:3 le thuša bjang motho yo a ipoeditšego?

18 Ge re amogela kabelo e mpsha, mohlala wa Gideoni o re gopotša gore re ka se kgone go phetha kabelo yeo ka ntle le tlhahlo ya Jehofa le tšhegofatšo ya gagwe. Le gona gopola gore re boditšwe gore ‘re be le boipoetšo ge re sepela le Modimo wa rena.’ (Mika 6:8) Ka gona, nako le nako ge re newa kabelo e mpsha goba ditokelo, re swanetše go rapela Jehofa le go naganišiša ka selo le ge le sefe seo a re botšago sona ka Beibeleng le ka mokgatlo wa gagwe. Re swanetše go ithuta go ekiša tsela ya Jehofa ya go dira dilo. Anke re gopoleng gore Jehofa ke yena a re ‘godišago’ ka baka la boikokobetšo bja gagwe. Ga a re godiše ka gobane re na le bokgoni bjo itšego. (Ps. 18:35) Ka baka leo, ge re ka sepela le Modimo ka boipoetšo, re tla se ikgopole kudu goba go inyatša kudu.—Bala Baroma 12:3.

19. Ke ka baka la’ng re swanetše go ba le boipoetšo?

19 Motho yo a ipoeditšego o nea Jehofa kgodišo, ka ge Jehofa e le Mmopi wa rena le Mmuši wa Legohle. (Kut. 4:11) Boipoetšo bo re thuša go kgotsofalela maemo a rena ka mokgatlong wa Modimo le go ntšha ka ga tšhwene medirong e mebotse. Boipoetšo bo re thibela go dira dilo tšeo re se nago tshwanelo ya go di dira, e bile bo dira gore batho ba Jehofa ba dule ba na le botee. Boipoetšo bo re thuša go etiša ba bangwe pele go e na le go nagana ka rena feela, e bile bo re thuša go ba le temogo, ka go re’alo ra phema go dira diphošo tše dikgolo. Ka baka la mabaka a, batho ka moka ba Jehofa ba swanetše go ba le boipoetšo, e bile Jehofa o kwana kudu le bao ba bo bontšhago. Eupša go thwe’ng ge maemo a le thata? Sehlogo se se latelago se tlo re bontšha kamoo re ka dulago re ipoeditše maemong a thata.