Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) JANUARY 2017

Diriša Gabotse Tokologo Yeo Modimo a go Neilego Yona

Diriša Gabotse Tokologo Yeo Modimo a go Neilego Yona

“Moo moya wa Jehofa o lego gona, go na le tokologo.”2 BAKOR. 3:17.

DIKOPELO: 62, 65

1, 2. (a)  Ke’ng seo batho ba se bolelago ka taba ya tokologo ya go itirela diphetho? (b) Beibele yona e re’ng ka tokologo ya rena ya go itirela diphetho, gona re tlo araba dipotšišo dife?

GE MOSADI yo mongwe a be a swanetše go dira phetho, o ile a botša mogwera wa gagwe a re: “O se ke wa nkiša kua le kua; e no mpotša gore ke dire eng. O tla ba o mphokoleditše mošomo.” Mosadi yoo o be a nyaka go direlwa diphetho gomme a sa nyake go diriša mpho yeo Mmopi wa rena a mo neilego yona ya go itirela diphetho. Go thwe’ng ka wena? Na o rata go itirela diphetho, goba o rata gore ba bangwe ba go direle tšona? Wena o re’ng ka taba ya gore Jehofa o re neile tokologo ya go itirela diphetho?

2 Batho ba ngangišane kudu ka taba ye ka mengwaga e mentši. Ba bangwe ba re ga go na selo seo go thwego ke tokologo ya go itirela diphetho, ba re Modimo o šetše a phethile gore re tlo feleletša kae. Ba bangwe ba re ge motho a kgona go itirela boithatelo ke gona ge a na le tokologo ya kgonthe. Lega go le bjalo, gore re kwešiše taba ye gabotse, re swanetše go kwa seo Lentšu la Modimo e lego Beibele le re botšago sona. Ka baka la’ng? Ka gobane Lentšu la Modimo le re botša gore Jehofa o re bopile re na le tokologo ya go itirela diphetho, ke gore, bokgoni bja go dira seo re se nyakago. (Bala Joshua 24:15.) Le gona Beibele e araba dipotšišo tša go swana le gore: Re swanetše go diriša bjang tokologo ya rena ya go itirela diphetho? Na go na le dilo tšeo  re sa swanelago go di dira? Tsela yeo re dirišago tokologo ya rena ya go itirela diphetho e bontšha bjang gore re rata Jehofa? Re ka bontšha bjang gore re hlompha diphetho tša batho ba bangwe?

RE KA ITHUTA ENG GO JEHOFA LE JESU TABENG YE?

3. Jehofa o re beela mohlala bjang tseleng yeo a dirišago tokologo ya gagwe ka yona?

3 Jehofa o na le tokologo e feletšego, eupša re swanetše go ekiša tsela yeo a dirišago tokologo yeo ka yona. Ka mohlala, o ile a kgetha setšhaba sa Isiraele gore e be batho bao ba bitšwago ka leina la gagwe, yona “thoto ya gagwe e kgethegilego.” (Doit. 7:6-8) Ga se gore Jehofa o be a itirela boithatelo. O be a phethagatša seo a bego a se tshepišitše mogwera wa gagwe e lego Aborahama mengwageng e makgolo e fetilego. (Gen. 22:15-18) Go oketša moo, ka mehla Jehofa o diriša tokologo ya gagwe ka lerato le ka toka. Mohlala wa seo ke wa ge a be a laya Baisiraele, bao ba bego ba dula ba hlanogela borapedi bja gagwe. Ge ba be ba itshola go tšwa pelong, Jehofa o be a ba bontšha lerato le go ba gaugela, a re: “Ke tla alafa go hloka potego ga bona. Ke tla ba rata ka la ka ka gobane bogale bja ka bo mo gometše.” (Hos. 14:4) Ruri Jehofa o diriša tokologo ya gagwe go hola ba bangwe!

4, 5. (a) Modimo o neile mang pele tokologo ya go itirela diphetho, gona motho yoo o ile a diriša tokologo yeo bjang? (b) Ke potšišo efe yeo yo mongwe le yo mongwe wa rena a swanetšego go ipotšiša yona?

4 Ge Jehofa a be a thoma go bopa dilo, ka lerato o ile a nea dibopiwa tša gagwe tokologo ya go itirela diphetho. Sebopiwa sa mathomo seo a ilego a se nea tokologo ya go itirela diphetho ke Morwa wa gagwe wa leitšibulo, yena “seswantšho sa Modimo yo a sa bonagalego.” (Bakol. 1:15) Gaešita le pele ga ge Jesu a ka tla lefaseng, o ile a kgetha go dula a botegela Tatagwe gomme a se šale Sathane morago ge a be a fetoga lerabele. Ka morago ge Jesu a be a le mo lefaseng, o ile a diriša tokologo yeo ya go itirela diphetho go ganetša diteko tša Lenaba le le legolo. (Mat. 4:10) Thapelong e tseneletšego yeo a e rapetšego bošegong bja pele ga lehu la gagwe, Jesu o ile a bontšha gore o tla dula a dira thato ya Modimo. O itše: “Tate, ge e ba o rata, tloša senwelo se go nna. Lega go le bjalo, go se phethege thato ya ka eupša go phethege ya gago.” (Luka 22:42) Eka re ka ekiša Jesu gomme ra diriša tokologo ya rena go tumiša Jehofa le go dira thato ya gagwe. Na ruri re ka kgona go dira seo?

5 Ee, re ka kgona go ekiša mohlala wa Jesu, ka gobane le rena re dirilwe ka seswantšho sa Modimo. (Gen. 1:26) Eupša rena go na le mo re felelago gona. Ga re na tokologo e feletšego go swana le Jehofa. Lentšu la Modimo le re botša gore go na le dilo tšeo re sa swanelago go di dira le gore re swanetše go latela melao yeo Jehofa a re beetšego yona. Go oketša moo, basadi ba swanetše go ikokobeletša banna ba bona gomme bana ba kwe batswadi ba bona. (Baef. 5:22; 6:1) Go tseba gore go na le dilo tšeo re sa swanelago go di dira go kgoma bjang tsela yeo re dirišago tokologo ya rena ya go itirela diphetho? Go tseba karabo ya potšišo ye go tla re thuša go hwetša bophelo bjo bo sa felego.

RE KA KGETHA GO DIRIŠA TOKOLOGO YA RENA GABOTSE GOBA GAMPE

6. Nea mohlala wo o bontšhago bohlokwa bja gore re beelwe dithibelo le ge re na le tokologo ya go itirela diphetho.

6 Na motho a ka bolela gore o na le tokologo mola a beetšwe melao yeo a swanetšego go phela ka yona? Ee! Ke ka baka la’ng re re’alo? Ke ka gobane dithibelo tšeo re di beetšwego di ka re šireletša. Ka mohlala, re ka kgetha go ya motseng o itšego wa kgole ka koloi. Eupša na re be re tla thabela go sepela ka tsela yeo e se nago melao ya tsela, yeo go yona mootledi yo mongwe le yo mongwe a ikgethelago lebelo leo a kitimago ka lona goba a no ikgethelago gore o otlela ka lehlakoreng lefe la tsela? Ruri re be re ka se thabele go sepela ka tsela yeo. Dithibelo di bohlokwa e le gore batho ka moka ba thabele tokologo yeo ba  nago le yona. Anke re ahlaahleng mehlala e itšego ya ka Beibeleng yeo e re thušago go bona bohlokwa bja go diriša tokologo ya rena gabotse re dutše re latela melao ya Jehofa.

7. (a) Adama o be a fapana bjang le diphoofolo tša tšhemong ya Edene? (b) Hlalosa boemo bjoo go bjona Adama a ilego a diriša tokologo ya gagwe ya go itirela diphetho.

7 Ge Modimo a be a bopa motho wa mathomo e lego Adama, o ile a mo nea mpho yeo a e neilego dibopiwa tša gagwe tša legodimong, e lego tokologo ya go itirela diphetho. Se se ile sa dira gore Adama a se swane le diphoofolo, ka gore tšona di laolwa ke tlhago. Nagana ka boemo bjo bo latelago bjoo go bjona Adama a ilego a diriša tokologo ya gagwe gabotse. Jehofa o bopile diphoofolo pele a ka bopa batho. Lega go le bjalo, go e na le gore Jehofa a nee diphoofolo tšeo maina, o ile a nea Adama tokelo yeo. Beibele e re Jehofa o ile “a di tliša go motho gore a bone kamoo a tlago go bitša e nngwe le e nngwe ya tšona ka gona.” Ka morago ga gore Adama a lebeledišiše phoofolo e nngwe le e nngwe le go e kgethela leina, Jehofa ga se a ka a fetoša maina ao Adama a bego a a kgethile. Go e na le moo, “leina le ge e le lefe leo [Adama] a bego a tla bitša sephedi se sengwe le se sengwe ka lona, e be e tla ba leina la sona.”Gen. 2:19.

8. Adama o dirišitše bjang gampe tokologo ya gagwe ya go itirela diphetho, gona ditlamorago e bile dife?

8 Ka maswabi, Adama o ile a se kgotsofalele kabelo yeo Modimo a bego a mo neile yona ya go lema tšhemo ya Edene le go e hlokomela. O ile a se kgotsofalele tokologo e kgolo yeo Modimo a bego a mo neile yona ya gore: “Tswalang le ate le tlale lefase le be le le fenye, le buše dihlapi . . . , dinonyana . . .  le sephedi se sengwe le se sengwe se se gagabago lefaseng.” (Gen. 1:28) Go e na le moo, Adama o ile a kgetha go tshela molao wa Modimo ka go ja seenywa sa sehlare sa gare ga tšhemo. Ka ge Adama a ile a diriša tokologo ya gagwe gampe, o tlišeditše batho masetlapelo le ditlaišego. (Baroma 5:12) Ka ge re bona ditlamorago tše mpe tša diphetho tša Adama, re swanetše go diriša tokologo ya rena gabotse le go se tshele melao ya Jehofa.

9. Jehofa o ile a nea Baisiraele kgetho efe, gona ba ile ba arabela bjang?

9 Ka baka la go se kwe, Adama le Efa ba fetišeditše go se phethagale le lehu baneng ba bona. Lega go le bjalo, bana bao ba ile ba dula ba na le tokologo ya go itirela diphetho. Se re se bona tseleng yeo Modimo a bego a dirišana le setšhaba sa Isiraele. Jehofa o ile a diriša mohlanka wa gagwe e lego Moshe gore a nee Baisiraele kgetho ya go amogela tokelo ya go ba thoto ya Gagwe e kgethegilego goba go e gana. (Ek. 19:3-6) Baisiraele ba ile ba arabela bjang? Ba ile ba kgetha go dira dilo ka moka tšeo Modimo a bego a di nyaka go bona gore e be setšhaba sa gagwe gomme ba araba ka lentšu letee ba re: “Re ikemišeditše go dira tšohle tšeo Jehofa a di boletšego.” (Ek. 19:8) Ka maswabi, ge nako e dutše e eya setšhaba sa Isiraele se ile sa diriša tokologo ya sona gampe gomme sa hlanogela Jehofa. Anke re se ekišeng Baisiraele gomme ka mehla re dirišeng tokologo ya rena gabotse ka go tšwela pele re rata Jehofa le go phela ka melao ya gagwe ya go loka.1 Bakor. 10:11.

10. Ke mehlala efe yeo e bontšhago gore go a kgonega gore batho ba sa phethagalago ba diriše gabotse tokologo ya bona ya go itirela diphetho? (Bona seswantšho seo se lego mathomong a sehlogo.)

10 Go Baheberu kgaolo 11, re hwetša bahlanka ba Modimo ba 16 bao ba ilego ba diriša gabotse tokologo ya bona ya go itirela diphetho, go sa šetšwe dithibelo tšeo Jehofa a re beetšego tšona. Ka baka leo, Jehofa o ile a ba šegofatša kudu e bile o tlo ba nea bophelo bjo bo sa felego. Ka mohlala, Noa o ile a bontšha tumelo e tiilego gomme a kwa taelo ya Jehofa ya gore a age areka e le gore a phološe yena le lapa la gagwe gotee le rena. (Baheb. 11:7) Aborahama le Sara ga se ba ka ba ganelela ge Modimo a be a re ba ye nageng ya kholofetšo. Ge ba be ba thomile leeto leo le letelele, ba ile ba ba le “sebaka sa go boela morago” motseng wa gabo bona wa maemo wa Uri. Lega  go le bjalo, ka tumelo ba ile ba dula ba nagana ka nako ya ge ‘Modimo a tla be a phethagatša dikholofetšo tša gagwe;’ ka go re’alo ba be “ba phegelela lefelo le lekaone.” (Baheb. 11:8, 13, 15, 16) Moshe o ile a se iše felo ka mahumo a Egipita, “a kgetha go swarwa gampe le setšhaba sa Modimo go e na le go thabela boipshino bja nakwana bja sebe.” (Baheb. 11:24-26) Eka re ka ekiša tumelo ya batho ba bjalo ba bogologolo ka go diriša gabotse tokologo ya rena ya go itirela diphetho le go e dirišetša go dira thato ya Modimo.

11. (a) E nngwe ya ditšhegofatšo tša go ba le tokologo ya go itirela diphetho ke efe? (b) Ke’ng seo se go thušago gore o diriše gabotse tokologo ya gago ya go itirela diphetho?

11 Le ge go ka ba bonolo gore motho yo mongwe a re direle diphetho, seo se tla dira gore re se hwetše e nngwe ya ditšhegofatšo tša go itirela diphetho. Tšhegofatšo yeo e hlalositšwe go Doiteronomio 30:19, 20. (Bala.) Temana 19 e hlalosa kgetho yeo Jehofa a ilego a e nea Baisiraele. Temana 20 e re botša gore o ile a ba nea sebaka sa gore ba mmontšhe seo se lego ka dipelong tša bona. Le rena re ka kgetha go hlankela Jehofa. Ke’ng seo se ka go thušago gore o diriše gabotse tokologo ya gago ya go itirela diphetho? Ke go nyaka go bontšha Modimo gore o a mo rata le go nyaka go mo tumiša!

O SE KE WA DIRIŠA TOKOLOGO YA GAGO GAMPE

12. Ke’ng seo le ka mohla re sa swanelago go se dira ka tokologo yeo Modimo a re neilego yona?

12 A re re o neile mogwera wa gago mpho ya go tura. O ka ikwa bjang ge o ka hwetša gore o e lahlile, goba se sebe le go feta, o gobaditše motho yo mongwe ka yona? Ruri o tla nyama! Bjale nagana kamoo Jehofa a ikwago ka gona ge a bona batho ba bantši ba diriša gampe tokologo yeo a ba neilego yona, e bile ba e diriša go gobatša ba bangwe. Beibele e boletše e sa le pele gore “mehleng ya bofelo” batho e be e tla ba bao ‘ba sa lebogego.’ (2 Tim. 3:1, 2) Anke re se ke ra diriša gampe mpho ye yeo Jehofa a re neilego yona goba ra bapala ka yona. Lega go le bjalo, re ka phema bjang go diriša gampe tokologo ya rena ya go itirela diphetho?

13. Ke’ng seo se ka re thušago go phema go diriša tokologo ya rena gampe?

13 Ka moka ga rena re na le tokologo ya go ikgethela bagwera, diaparo le boithabišo. Eupša ge re ka kgetha go dira seo se ratwago ke dipelo tša rena, goba ra ekiša mekgwa ya lefase le, tokologo yeo re nago le yona e ka fetoga “selo sa go bipa go dirwa ga bobe.” (Bala 1 Petro 2:16.) Go e na le gore re diriše tokologo ya rena “e le sebaka sa go phethagatša dikganyogo tša nama,” re  nyaka go dira diphetho tšeo di tlago go re thuša go kwa keletšo yeo e rego: “Dirang dilo tšohle gore le tagafatše Modimo.”Bagal. 5:13; 1 Bakor. 10:31.

14. Ke selo sefe se sengwe seo se ka re thušago go diriša tokologo ya rena gabotse?

14 Selo se sengwe seo se ka re thušago go se diriše tokologo ya rena gampe ke go bota Jehofa le go mo dumelela gore a re hlahle ka melao ya gagwe yeo e re šireletšago. Ke yena a nnoši ‘Yo a re rutago gore re holege, le Yoo a re sepedišago tseleng yeo re swanetšego go sepela ka yona.’ (Jes. 48:17) Re swanetše go amogela gore “tsela ya motho ga e matleng a gagwe. Ga go matleng a motho yo a sepelago gore a laole dikgato tša gagwe.” (Jer. 10:23) Anke le ka mohla re se ke ra tanywa ke molaba wa go itshepa, ra swana le Adama le Baisiraele ba marabele. Go e na le moo, anke re ‘boteng Jehofa ka dipelo tša rena ka moka.’Die. 3:5.

HLOMPHA TOKOLOGO YA BA BANGWE

15. Re ithuta’ng molaong wa motheo wo o lego go Bagalatia 6:5?

15 Selo se sengwe seo re sa swanelago go se dira ke go nyatša tshwanelo ya batho ba bangwe ya go itirela diphetho. Ka baka la’ng? Ka gobane yo mongwe le yo mongwe wa rena o na le tokologo ya go itirela diphetho, e bile ga go kgonege gore Bakriste ba babedi ba dire diphetho tše di swanago tlwaa! Seo ke therešo gaešita le ditabeng tša boitshwaro le tseleng yeo re hlankelago Jehofa ka yona. Gopola molao wa motheo wo o lego go Bagalatia 6:5. (Bala.) Ge re gopola gore Mokriste yo mongwe le yo mongwe o tla “rwala morwalo wa gagwe,” re tla hlompha taba ya gore motho yo mongwe le yo mongwe o na le tokologo ya go itirela diphetho.

Ge re dira diphetho, re se ke ra gapeletša ba bangwe go re ekiša (Bona serapa 15)

16, 17. (a) Taba ya gore motho yo mongwe le yo mongwe o na le tokologo ya go itirela diphetho e ile ya baka bothata bofe kua Korinthe? (b) Paulo o ile a lokiša bjang bothata bjo, gona se se re ruta’ng ka tshwanelo ya ba bangwe ya go itirela diphetho?

16 Nagana ka mohlala wo wa ka Beibeleng wo o bontšhago lebaka leo re swanetšego go hlompha tokologo ya bana babo rena ya go itirela diphetho ditabeng tšeo di ithekgilego ka letswalo. Bakriste ba kua Korinthe ba ile ba lwa ka gore ba bangwe ba be ba eja nama yeo e bego e hlabetšwe medingwana, yeo e bego e rekišwa mebarakeng. Ba bangwe ba be ba re: ‘Ka ge modingwana e se selo, ga se bothata ge re eja nama yeo e hlabetšwego medingwana.’ Eupša ba bangwe bao ba kilego ba rapela medingwana yeo, ba be ba nagana gore go ja nama yeo go be go swana le go rapela medingwana yeo. (1 Bakor. 8:4, 7) Taba ye e be e le e kgolo, ka ge e nyakile go aroganya phuthego. Paulo o ile a thuša bjang Bakriste ba Korinthe gore ba lebelele taba ye ka tsela ya Jehofa?

17 Sa pele, Paulo o ile a gopotša Bakriste bao ka moka gore dijo di ka se ba batametše go Modimo. (1 Bakor. 8:8) Ke moka o ile a ba lemoša gore ba se ke ba dumelela “tshwanelo ya bona ya go ikgethela” e fetoga “tšhitišo go bao ba [bego ba fokola].” (1 Bakor. 8:9) Ka morago, o ile a laela bao ba bego ba na le matswalo a go fokola gore ba se ke ba ahlola bao ba bego ba eja nama yeo. (1 Bakor. 10:25, 29, 30) Ka gona tabeng ye ya bohlokwa ya mabapi le go hlankela Jehofa, Mokriste yo mongwe le yo mongwe o be a swanetše go itirela phetho go ya ka letswalo la gagwe. Ka baka leo, le rena re swanetše go hlompha tshwanelo ya bana babo rena ya go itirela diphetho ditabeng tšeo di sa rego selo.1 Bakor. 10:32, 33.

18. O tlo bontšha bjang gore o leboga mpho yeo Modimo a go neilego yona ya go itirela diphetho?

18 Jehofa o re neile mpho ya go itirela diphetho le tokologo ya kgonthe. (2 Bakor. 3:17) Re leboga mpho yeo ka gobane e re dumelela go dira diphetho tšeo di bontšhago kamoo re ratago Jehofa ka gona. Eka re ka tšwela pele re leboga Jehofa bakeng sa mpho ye ka go e diriša gabotse le go hlompha kamoo ba bangwe ba kgethago go e diriša ka gona.