Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  January 2017

Na o be o Tseba?

Na o be o Tseba?

Batho ba bogologolo ba be ba sepetša mollo bjang go tloga lefelong le lengwe go ya go le lengwe?

PEGO ya Beibele yeo e lego go Genesi 22:6 e re ge Aborahama a be a yo dira sehlabelo nageng ya kgole, o ile “a tšea dikgong tša sebego sa go fišwa a di rweša Isaka morwa wa gagwe, yena ka diatla tša gagwe a swara mollo le thipa ya go hlaba diphoofolo, gomme bobedi bja bona ba sepela gotee.”

Ga go na mo Beibele e re botšago kamoo batho ba bogologolo ba bego ba gotša mollo ka gona. Yona tabeng ye, mongwadi yo mongwe o dumela gore mehleng yeo go be go sa “kgonege gore motho a sepele leeto le letelele a swere mollo wo o tukago,” e lego leeto leo Aborahama le Isaka ba le sepetšego.” Ka baka leo, go ka direga gore Aborahama o be a swere selo seo a bego a ka gotša mollo ka sona.

Lega go le bjalo, ba bangwe ba re go gotša mollo mehleng yeo go be go se bonolo. Ba re ge go be go kgonega, batho ba be ba kgopela legala leo le tukago go baagišani gomme ba gotša mollo ka lona, go e na le gore ba thome mollo ka bobona. Ka baka leo, ditsebi tše dintši tša Beibele di dumela gore seo Aborahama a bego a se swere e be e le sebjana—mohlomongwe pitša yeo e nago le mokgoko wa ketane—seo se bego se na le magala a go tuka goba malahla ao a tšerwego mollong wa bošegong bjo bo fetilego. (Jes. 30:14) Magala a go tuka ao a bego a sepetšwa ka tsela ye a be a ka dirišwa go gotša mollo lefelong le ge e le lefe go dirišwa bjang goba mašaša.