Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  January 2017

Ba Ile ba Ikgafa ka go Rata

Ba Ile ba Ikgafa ka go Rata

GARE ga Dihlatse tša Jehofa tše mafolofolo tšeo di hlankelago dinageng tšeo go tšona go nyakegago bagoeledi ba oketšegilego ba Mmušo, go na le dikgaetšedi tše dintši tšeo di sa nyalwago. Tše dingwe tša dikgaetšedi tše di hlanketše dinageng dišele ka mengwaga e mentši. Di thušitšwe ke’ng gore di yo hlankela dinageng dišele? Di ithutile’ng ka go hlankela dinageng dišele? Go diragetše’ng ka tšona? Re boledišane le tše mmalwa tša dikgaetšedi tše tšeo di nago le phihlelo. Ge e ba o le kgaetšedi yo a sa nyalwago gomme o nyaka go ipshina ka tirelo, re kgodišegile gore o tla holwa ke seo ba se boletšego. Ge e le gabotse, batho ka moka ba Modimo ba ka holwa ke mohlala wa dikgaetšedi tše.

GO FENYA DIPELAELO

Anita

Ge e ba o le mmulamadibogo yo a sego lenyalong, na o ipotšiša gore o tla kgona go hlankela nageng e šele? Anita, yo ga bjale a lego mengwageng ya magareng ga bo-70, o kile a nagana gore a ka se kgone. O goletše Engelane moo a ilego a thoma go bula madibogo a na le mengwaga e 18. Anita o re: “Ke be ke rata go ruta batho ka Jehofa, eupša ke be ke sa nagane gore nka kgona go hlankela nageng e šele. Ke be ke se ka ithuta leleme lešele e bile ke sa nagane gore nka tsoga ke ithutile leleme lešele. Ka gona, ge ke be ke hwetša taletšo ya go ba gona Sekolong sa Gilead, ke ile ka ikwa ke tšhogile. Ke ile ka makatšwa ke gore motho yo a sego bohlokwa go swana le nna o laleditšwe Sekolong se. Eupša ke ile ka ipotša gore: ‘Ge e ba Jehofa a bona gore ke tla kgona go yo hlankela nageng e nngwe, gona ke tla leka.’ Seo se diregile mengwageng ya ka godimo ga e 50 e fetilego. Go tloga ka yona nako yeo, ke hlanketše ke le moromiwa Japane.” Anita o oketša ka gore: “Ka dinako tše dingwe, ke botša dikgaetšedi tše difsa ka bose bja go ba mmulamadibogo nageng e šele. Seo se nthabišago ke gore ga bjale ba bantši ba bafsa bao ba hlankela dinageng dišele.”

GO BA LE SEBETE

Dikgaetšedi tše dintši tšeo di ilego tša hlankela dinageng dišele, mathomong di ile tša dikadika go ya dinageng tšeo. Di thušitšwe ke’ng go ya dinageng tšeo?

Maureen

Maureen, yoo a lego mengwageng ya magareng ga bo-60, o re: “Ge ke be ke gola, ke be ke nyaka go phela bophelo bjo bo thabišago, bja go thuša batho ba bangwe.” Ge Maureen a be a na le mengwaga e 20, o ile a hudugela nageng ya Canada kua Quebec, moo go bego go nyakega babulamadibogo ba bantši. Maureen o re: “Ka morago, ke ile ka laletšwa go ba gona Sekolong sa Gilead, eupša ke be ke tšhaba go ya nageng yeo ke sa e tsebego ntle le bagwera ba ka.” O oketša ka gore: “E bile ka ge tate a be a babja, ke be ke sa nyake gore mma a šale a mo hlokometše a nnoši. Ke ile ka fetša mašego a  mantši ke llela Jehofa gore a nthuše mathateng a. Ge ke be ke botša batswadi ba ka ka dilo tšeo di ntshwenyago, ba ile ba nkgothaletša gore ke amogele taletšo ya go ba gona Sekolong sa Gilead. Le gona phuthego ya gešo e ile ya thuša batswadi ba ka kudu. Go bona kamoo Jehofa a bego a hlokomela lapa la gešo go ile gwa nkgodiša gore le nna o tla ntlhokomela. Ka yona nako yeo, ke ile ka dira phetho ya go sepela.” Go tloga ka 1979, Maureen e bile moromiwa kua West Africa ka mengwaga ya ka godimo ga e 30. Le lehono, Maureen o sa hlankela e le mmulamadibogo yo a kgethegilego a dutše a hlokometše mmagwe kua Canada. Ge a lebelela morago mengwageng yeo a hlanketšego nageng e šele o re: “Ka mehla Jehofa o be a nnea seo ke bego ke se hloka, le ka nako yeo ke bego ke se hloka ka yona.”

Wendy

Wendy, yoo a lego mengwageng ya magareng ga bo-60, o thomile go bula madibogo e sa le mofsa kua Australia. O gopola ka gore: “Ke be ke na le dihlong, e bile ke thatafalelwa ke go boledišana le batho bao ke sa ba tsebego. Eupša bobulamadibogo bo ile ba nthuta go boledišana le batho ba mehuta ka moka, ka gona ke ile ka se sa ba le dihlong. Ge nako e dutše e eya, ke ile ka ba le sebete. Bobulamadibogo bo be bo nthuta go ithekga ka Jehofa, ka gona ke ile ka ikwa ke nyaka go yo hlankela nageng e šele. Le gona kgaetšedi yo mongwe yo a sa nyalwago le yo e kilego ya ba moromiwa ka mengwaga ya ka godimo ga e 30 kua Japane, o ile a nkgopela gore ke yo šoma tšhemo le yena kua Japane ka dikgwedi tše tharo. Go šoma le yena go ile gwa dira gore ke fetše le pelo gore ke yo hlankela nageng e šele.” Magareng ga bo-1980, Wendy o ile a hudugela Vanuatu, e lego sehlakahlaka sa bokgole bja dikhilomithara tše 1 770 ka bohlabela bja Australia.

Wendy o sa dula Vanuatu, eupša ga bjale o hlankela ofising ya bofetoledi. Wendy o re: “Ke a thaba ge ke bona dihlopha le diphuthego di hlongwa mafelong ao a lego lekatana. Go tseba gore le nna ke bile le karolo modirong wa Jehofa dihlakahlakeng tše go nthabiša le go feta.”

Kumiko (gare)

Kgaetšedi Kumiko, yoo a lego mengwageng ya magareng ga bo-60, e be e le mmulamadibogo wa ka mehla kua Japane ge mmulamadibogogotee le yena a be a šišinya gore ba hudugele Nepal. Kumiko o re: “Kgaetšedi yoo o be a dula a nkgopela gore re ye Nepal, eupša nna ke be ke gana. Ke be ke tšwafišwa ke go ithuta leleme le lefsa le go tlwaela lefelo le lefsa. Le gona bothata bjo bongwe ke gore ke be ke se na tšhelete ya go hudugela nageng e nngwe. Ge ke sa dutše ke naganišiša ka mathata a, ke ile ka gobala kotsing ya sethuthuthu gomme ka išwa sepetlele. Ge ke le sepetlele, ke ile ka tshwenyega ka gore: ‘Go tla direga’ng ka nna? Nka babja kudu gomme ka lahlegelwa ke sebaka sa go hlankela nageng e šele. Na nka leka go hlankela nageng e šele ka ngwaga feela?’ Ke ile ka rapela Jehofa go tšwa pelong gore a  nthuše go yo hlankela nageng e šele.” Ka morago ga gore Kumiko a tšwe sepetlele, o ile a etela Nepal, gomme ge nako e dutše e eya, yena le mmulamadibogogotee le yena ba ile ba hudugela Nepal.

Ge Kumiko a lebelela morago mengwageng e ka bago e lesome a hlankela Nepal o re: “Mathata ao nkilego ka tshwenyega ka ona ga se ka bona le mo a feletšego gona. Ke thabišwa ke gore ke ile ka dira phetho ya go yo hlankela mo go nyakegago bagoeledi ba oketšegilego ba Mmušo. Gantši ge ke ithuta Beibele le malapa a itšego, baagišani ba bona ba e ka bago ba bahlano goba ba tshela ba a tla gomme ba theetša. Gaešita le bana ba nkgopela gore ke ba nee pampišana yeo e rutago Beibele. Ruri go a thabiša go bolela ditaba tše dibotse bathong ba bao ba arabelago gabotse.”

GO LEBELETŠANA LE MATHATA

Dikgaetšedi tšeo di sa nyalwago tšeo re boledišanego le tšona di ile tša ba le mathata. Di fetile bjang go ona?

Diane

Diane, yo a tšwago Canada, o re: “Mathomong ke be ke thatafalelwa ke go dula kgole le lapa la gešo.” Ga bjale Diane o mengwageng ya bo-60, gomme o bile moromiwa kua Ivory Coast (yeo ga bjale e bitšwago Côte d’Ivoire) ka mengwaga e 20. Diane o re: “Ke ile ka kgopela Jehofa gore a nthuše go rata batho ba moo ke tla bego ke šoma gona. Yo mongwe wa bahlahli ba ka ba Sekolong sa Gilead, e lego Ngwanabo rena Jack Redford, o ile a re botša gore mathomong re ka na ra nyamišwa, goba gaešita le go tšhošwa ke bophelo bja dinageng tšeo re bego re yo hlankela go tšona, kudukudu tšeo di diilago kudu. Eupša Ngwanabo rena Jack Redford o ile a re: ‘Le se ke la lebelela bodiidi bja moo, eupša le lebelele difahlego tša batho ba tšhemong ya moo. Lebelelang kamoo ba arabelago ka gona ge ba ekwa therešo ya Beibele.’ Ke ile ka dira sona seo, gomme ga ke itshole le gatee! Ge re be re botša batho ba moo molaetša o kgothatšago wa Mmušo, ke be ke bona difahlego tša bona di thaba!” Diane o thušitšwe ke’ng gape gore a se ke a tšhaba go hlankela nageng e šele? O re: “Ke ile ka gwerana le barutwana ba ka ba Beibele le go thabela go bona ba fetoga bahlanka ba botegago ba Jehofa. Seo se ile sa dira gore ke ikwe ke le gae. Bjalo ka ge Jesu a boletše, ke ile ka ba le bomma, botate, bana bešo le dikgaetšedi ba moya.”Mar. 10:29, 30.

Anne, yo a lego mengwageng ya bo-40, o hlankela nageng e itšego kua Asia moo modiro wa rena o thibetšwego. Anne o re: “Go theoša le mengwaga ge ke be ke hlankela dinageng tše di fapafapanego, ke be ke dula le dikgaetšedi tšeo di godišitšwego ka tsela ya go se swane le ya ka le tšeo di bego di na le dimelo tša go se swane le tša ka. Seo se ile sa dira gore re fele re kgopišana le go se kwane. Ge seo se direga, ke be ke leka go gwerana le bona gore ke ba kwešiše gakaone. Le gona ke ile ka lwela go ba rata kudu le go phedišana le bona  gabotse. Ke thabišwa ke gore maiteko ao ke a dirilego a ile a tiiša segwera sa rena le go nthuša go kgotlelela go hlankela nageng e šele.”

Ute

Ka 1993, kgaetšedi Ute yo a tšwago Jeremane, yoo ga bjale a lego mengwageng ya bo-50, o ile a abelwa go yo hlankela e le moromiwa kua Madagascar. Ute o re : “Mathomong ke be ke thatafalelwa ke go ithuta leleme la moo, go tlwaela phišo, go boifa go tsenwa ke bolwetši bja malaria le dikhunkhwane tšeo di bakago malwetši. Eupša ke ile ka hwetša thušo. Dikgaetšedi tša moo, bana ba bona le barutwana ba ka ba Beibele ba ile ba se mphelele pelo gomme ba nthuša go ithuta leleme la moo. Moromiwagotee le nna o be a ntlhokomela ge ke babja. Eupša yo a ilego a nthuša kudu ke Jehofa. Ka mehla ke be ke mmotša dilo tšeo di ntshwenyago. Ka morago ga go rapela, ke be ke letela karabo ka go se fele pelo—ka dinako tše dingwe o be a nkaraba ka morago ga matšatši a sego kae, goba dikgwedikgwedi. Jehofa o ile a ntharollela mathata a ka ka moka.” Ga bjale Ute o na le mengwaga e 23 a hlankela kua Madagascar.

JEHOFA O ŠEGOFADITŠE DIKGAETŠEDI TŠE

Go swana le bana babo rena ba bangwe bao ba lego tlhokagalong, dikgaetšedi tše di sa nyalwago tšeo di hlankelago dinageng dišele gantši di bolela gore go hlankela dinageng dišele go dirile gore Jehofa a di šegofatše kudu. Tše dingwe tša ditšhegofatšo tšeo ke dife?

Heidi

Heidi, yo a tšwago Jeremane, yoo ga bjale a lego mengwageng ya bo-70, o be a dutše a hlankela e le moromiwa kua Ivory Coast (ga bjale ke Côte d’Ivoire) ga e sa le go tloga ka 1968. Heidi o re: “Tšhegofatšo e kgolo kudu yeo ke e hweditšego ke go bona batho bao ke ba badišitšego ba sepela therešong. Ba bangwe ba bao ke ba badišitšego le bona ga bjale ke babulamadibogo le bagolo ba phuthego. Ba bantši ba bona ba mpitša mmago bona goba koko wa bona. Yo mongwe wa bagolo bao, mosadi wa gagwe le bana ba gagwe ba ntšea ke le setho sa lapa la bona. Ruri Jehofa o nneile morwa, ngwetši le ditlogolo tše tharo!”3 Joh. 4.

Karen (gare)

Karen, yo a tšwago Canada, yoo ga bjale a lego mengwageng ya bo-70, o hlanketše kua West Africa ka mengwaga e fetago e 20. O re: “Go ba moromiwa go nthutile go ba le boikgafo, go rata batho le go se fele pelo. Le gona, go šoma le batho ba merafo e sa swanego go nthušitše go ba le monagano o bulegilego. Ke ithutile gore go na le ditsela tša go se swane tša go dira dilo. Le gona Jehofa o ntšhegofaditše ka go ba le bagwera lefaseng ka moka! Le ge maphelo a rena le dikabelo tša rena di fetogile, segwera sa rena sona ga se sa fetoga.”

Margaret, yo a tšwago Engelane, yoo ga bjale a lego mengwageng ya bo-70, o hlanketše e le moromiwa kua Laos. O re: “Go hlankela nageng e šele go dirile gore ke bone kamoo Jehofa a gogelago batho ba merafo le ditšo ka moka ka mokgatlong wa gagwe. Seo se tiišitše tumelo ya ka kudu. Le gona se nkgodišitše le go feta gore Jehofa o hlahla mokgatlo wa gagwe le gore morero wa gagwe o tla phethagala.”

Ruri dikgaetšedi tše di sa nyalwago tšeo di hlankelago dinageng dišele di itiretše leina le lebotse tirelong ya Jehofa. Ruri re swanetše go di reta! (Baa. 11:40) Sa go kgahliša ke gore palo ya dikgaetšedi tše e a oketšega. (Ps. 68:11) Na o ka fetoša maemo a gago e le gore o ekiše dikgaetšedi tše di fišegago tšeo re boletšego ka tšona sehlogong se? Ge o ka dira bjalo, ‘o tla latswa le go bona gore Jehofa o lokile.’Ps. 34:8.