Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) JANUARY 2016

“Re tla Sepela le Lena”

“Re tla Sepela le Lena”

“Re tla sepela le lena ka gobane re kwele gore Modimo o na le lena.”—SAKARIA 8:23.

DIKOPELO: 65, 122

1, 2. (a) Ke’ng seo Jehofa a boletšego gore se be se tlo direga mehleng yeno? (b) Re tlo araba dipotšišo dife sehlogong se? (Bona seswantšho se se lego ka mo godimo.)

JEHOFA o boletše gore mehleng ye ya rena, “batho ba lesome bao ba tšwago bathong ba maleme ka moka ba tla itshwarelela morumong wa seaparo sa Mojuda, ba re: ‘Re tla sepela le lena ka gobane re kwele gore Modimo o na le lena.’” (Sakaria 8:23) “Mojuda” yo o swantšhetša bao Modimo a ba tloditšego ka moya o mokgethwa. Le gona ba bitšwa gore ke “Isiraele ya Modimo.” (Bagalatia 6:16) ‘Batho bao ba lesome’ ba swantšhetša bao ba nago le kholofelo ya go tlo phela mo lefaseng ka mo go sa felego. Ba a tseba gore Jehofa o šegofaditše sehlopha se sa batlotšwa e bile ba bona e le tokelo e kgolo go mo hlankela gotee le bona.

2 Go swana le moporofeta Sakaria, Jesu o itše batho ba Modimo ba be ba tla ba le botee. O hlalositše bao ba tlago go phela legodimong e le “mohlatswana” gomme bao ba tlago go phela mo lefaseng e le “dinku tše dingwe.” Eupša Jesu o boletše gore batho bao ka moka e be e tla ba “mohlape o tee” gomme  ba mo latela, yena “modiši o tee.” (Luka 12:32; Johane 10:16) Ka ge batho ba e le dihlopha tše pedi, ba bangwe ba ka ipotšiša gore: (1) Na dinku tše dingwe di swanetše go tseba maina a batlotšwa ka moka lehono? (2) Batlotšwa ba swanetše go itebelela bjang? (3) Ge motho yo a itšego phuthegong ya gešo a thoma go ja senkgwa le go nwa beine Segopotšong, ke swanetše go mo swara bjang? (4) Na ke swanetše go tshwenyega ge ke bona palo ya bao ba jago senkgwa le go nwa beine Segopotšong e oketšega? Sehlogo se se tlo araba dipotšišo tše.

NA LEHONO RE SWANETŠE GO TSEBA MAINA A BATLOTŠWA KA MOKA?

3. Ke ka baka la’ng re ka se kgodišege gore ke bomang bao e tla bago karolo ya ba 144 000?

3 Na dinku tše dingwe di swanetše go tseba maina a batlotšwa ka moka bao ba sa lego mo lefaseng lehono? Aowa. Ka baka la’ng? Ka gobane ga go kgonege go tseba ge e ba ruri ba tla hwetša moputso wa bona. [1] (Bona tlhaloso.) Gaešita le ge Modimo a ba kgethile gore ba ye legodimong, ba tla hwetša moputso woo ge feela ba ka dula ba botega. Sathane o tseba seo gabotse, gomme o diriša “baporofeta ba maaka” go leka go ba ‘timetša.’ (Mateo 24:24) Batlotšwa ba ka se ipotše gore ba tla hwetša moputso wa bona go fihlela Jehofa a ba kgonthišetša gore o ba ahlotše ba botega. Jehofa ke yena a dirago phetho ya makgaolakgang, goba go ba swaya la mafelelo, e ka ba pele ga ge ba ehwa goba pejana ga ge ‘masetlapelo a magolo’ a ka thoma.—Kutollo 2:10; 7:3, 14.

Moetapele wa rena ke Jesu, le gona re swanetše go latela yena feela

4. Ge e ba go sa kgonege gore re tsebe maina a batlotšwa ka moka bao ba lego mo lefaseng lehono, re ka “sepela” le bona bjang?

4 Bjale ge e ba go sa kgonege gore re tsebe maina a batlotšwa ka moka bao ba sa lego mo lefaseng lehono, dinku tše dingwe di ka “sepela” le bona bjang? Beibele e re “batho ba lesome” ba tla “itshwarelela morumong wa seaparo sa Mojuda, ba re: ‘Re tla sepela le lena ka gobane re kwele gore Modimo o na le lena.’” Temana ya lengwalo le e bolela ka Mojuda o tee. Eupša lentšu “lena” le šupa go batho ba bantši. Se se bolela gore Mojuda yo go bolelwago ka yena ga se motho o tee, eupša o swantšhetša sehlopha ka moka sa batlotšwa. Dinku tše dingwe di tseba seo gabotse, gomme di hlankela Jehofa di le ngatana e tee le sehlopha se. Ga go nyakege gore di tsebe maina a setho se sengwe le se sengwe sa batlotšwa le go se latela. Moetapele wa rena ke Jesu, le gona Beibele e re re swanetše go latela yena feela.—Mateo 23:10.

BATLOTŠWA BA SWANETŠE GO ITEBELELA BJANG?

5. Ke temošo efe yeo batlotšwa ba swanetšego go naganišiša ka yona ka mo go tseneletšego, gona ka baka la’ng?

5 Batlotšwa ba swanetše go naganišiša ka mo go tseneletšego ka temošo yeo e lego go 1 Bakorinthe 11:27-29. (Bala.) Motlotšwa a ka ja bjang senkgwa le go nwa beine Segopotšong “a sa swanela”? Ge e ba a se na tswalano e botse le Jehofa e bile a sa botege, ge a eja senkgwa seo le go nwa beine, o bontšha  gore ga a hlomphe Modimo. (Baheberu 6:4-6; 10:26-29) Temošo ye e matla e gopotša batlotšwa gore ba swanetše go dula ba botega ge e ba ba nyaka go hwetša “moputso wa pitšo ya godimo ya Modimo ka Kriste Jesu.”—Bafilipi 3:13-16.

6. Batlotšwa ba swanetše go itebelela bjang?

6 Paulo o boditše Bakriste ba tloditšwego gore: “Nna mogolegwa Moreneng ke le lopa gore le sepele ka mo go swanelago pitšo yeo le biditšwego ka yona.” Ba swanetše go dira seo bjang? Paulo o itše: “Ka boikokobetšo bjo bo feletšego le boleta, ka go se fele pelo, ka go kgotlelelana ka lerato, le leka ka matla go boloka botee bja moya setlemong se se tlemaganyago sa khutšo.” (Baefeso 4:1-3) Moya wa Jehofa o mokgethwa o thuša bahlanka ba gagwe go ikokobetša, e sego go ikgantšha. (Bakolose 3:12) Ka gona batlotšwa ga ba itebelele ba le bohlokwa go feta batho ba bangwe. Ba a tseba gore ga se gore Jehofa o nea batlotšwa moya o montši o mokgethwa go feta bahlanka ba bangwe ba gagwe. E bile ga ba ipotše gore ba kwešiša ditherešo tša Beibele kudu go feta ba bangwe. Le gona ba ka se botše motho yo mongwe gore o tloditšwe le gore a thome go ja senkgwa le go nwa beine Segopotšong. Go e na le moo, ba ikokobeditše e bile ba a tseba gore ke Jehofa feela a kgethago motho gore a tlo phela legodimong.

7, 8. Ke’ng seo batlotšwa ba sa se letelago go rena, gona ka baka la’ng?

7 Gaešta le ge batlotšwa ba tšea e le tokelo e kgolo go biletšwa legodimong, ga se ba letela gore re ba sware ka tsela e kgethegilego. (Baefeso 1:18, 19; bala Bafilipi 2:2, 3.) Le gona ba a tseba gore ge Jehofa a be a ba tlotša, ga se a tsebiša batho ba bangwe ka seo. Ka gona motlotšwa ga a makale ge e ba ba bangwe ba sa dumele di tloga fase gore o tloditšwe. O a tseba gore Beibele e re re se ke ra kitimela go dumela motho yo a rego Modimo o mo neile maikarabelo a kgethegilego. (Kutollo 2:2) Ka ge motho yo a tloditšwego a sa letela go swarwa ka tsela e kgethegilego, a ka se tšame a botša batho bao a kopanago le bona gore yena o tloditšwe. Ge e le gabotse, a ka no se botše motho le ge e le ofe ka seo. Le gona a ka se ikgantšhe ka dilo tše di kgahlišago tšeo a tlago go di dira legodimong.—1 Bakorinthe 1:28, 29; bala 1 Bakorinthe 4:6-8.

8 Batlotšwa ga ba nagane gore ba swanetše go fetša nako ba na le batlotšwagotee le bona feela, bjalo ka ge eka ke sehlopha sa mokgatlo o itšego. Ga ba leke go hwetša batlotšwa ba bangwe e le gore ba ka boledišana kamoo go ba motlotšwa go lego ka gona goba go ipopa dihlotswana gore ba ithute Beibele. (Bagalatia 1:15-17) Ge ba ka dira bjalo, phuthego e ka se be le botee. Ba tla ba ba lwantšhana le moya o mokgethwa, woo o thušago batho ba Modimo go ba le khutšo le botee.—Bala Baroma 16:17, 18.

O SWANETŠE GO SWARA BATLOTŠWA BJANG?

9. Ke ka baka la’ng o swanetše go ba šedi tseleng yeo o swarago bao ba jago senkgwa le go nwa beine Segopotšong? (Bona lepokisi le le rego, “ Lerato ‘ga le Dire tša go Leša Dihlong.’”)

9 O swanetše go swara bjang bana babo rena le dikgaetšedi bao ba tloditšwego? Jesu o boditše barutiwa ba gagwe gore: ‘Ka moka ga lena le bana ba motho.’ O tšwetše pele ka gore: “Mang le mang yo a ikgodišago o tla kokobetšwa gomme mang le mang yo a ikokobetšago  o tla godišwa.” (Mateo 23:8-12) Ka gona ke phošo go swara motho ka tsela e kgethegilego kudu, gaešita le ge e le ngwanabo Kriste yo a tloditšwego. Ge Beibele e bolela ka bagolo, e re re ekiše tumelo ya bona, eupša ga go na mo e re botšago gore re dire motho le ge e le ofe moetapele wa rena. (Baheberu 13:7) Ke therešo gore Beibele e re ba bangwe ba “swanelwa ke kgodišo yeo e lego gabedi.” Eupša seo ke ka gobane ba re ‘okametše gabotse’ le go “[šoma] ka thata go boleleng le go ruteng,” e sego ka gobane e le batlotšwa. (1 Timotheo 5:17) Ge e ba re swara batlotšwa ka tsela e kgethegilego kudu le go ba tumiša, re tla ba leša dihlong. Se sebe le go feta ke gore re tla dira gore ba thome go ikgantšha. (Baroma 12:3) Ga go le o tee wa rena yo a nyakago go dira selo le ge e le sefe seo se ka dirago gore yo mongwe wa bana babo Kriste a dire phošo e bjalo e kgolo!—Luka 17:2.

O swanetše go swara bjang motho yo a jago senkgwa le go nwa beine Segopotšong? (Bona dirapa 9-11)

10. O ka bontšha bjang gore o hlompha Bakriste ba tloditšwego?

10 Re ka bontšha bjang gore re hlompha bao Jehofa a ba tloditšego ka moya wa gagwe? Ka go se ba botšiše gore ba tloditšwe bjang. Ye ga se taba ya rena, e bile ga re na tshwanelo ya go tseba ka yona. (1 Bathesalonika 4:11; 2 Bathesalonika 3:11) Le gona ga se ra swanela go nagana gore balekane ba bona, batswadi ba bona goba ditho tše dingwe tša malapa a bona le tšona di tloditšwe. Tokelo ye ga se bohwa bjoo motho a bo newago ke lapa la gabo. (1 Bathesalonika 2:12) Le gona re swanetše go phema go botšiša dipotšišo tšeo di ka kgopišago ba bangwe. Ka mohlala, re ka se botšiše mosadi wa ngwanabo rena wa motlotšwa gore o ikwa bjang ka go tlo phela ka mo go sa felego mo lefaseng monna wa gagwe a le legodimong. Go ba gona, re ka tloga re kgodišega gore lefaseng le lefsa, Jehofa o tla “kgotsofatša kganyogo ya sephedi se sengwe le se sengwe.”—Psalme 145:16.

11. Re itšhireletša bjang ge re phema go reta batho ka mo go feteletšego?

11 Ge re sa sware batlotšwa eka ba bohlokwa go feta batho ba bangwe, re a itšhireletša. Bjang? Beibele e re botša gore go ka ba go na le “bana babo rena ba maaka” ka phuthegong bao ba ka bolelago gore ke bona batlotšwa. (Bagalatia 2:4, 5; 1 Johane 2:19) Le gona batlotšwa ba bangwe ba ka palelwa ke go dula ba botega. (Mateo 25:10-12; 2 Petro 2:20, 21) Ka gona ge re ka phema go reta batho ka mo go feteletšego, re ka se ba latele, gaešita le ge batho bao e le batlotšwa goba ba tsebega kudu goba ba hlanketše Jehofa ka nywaga e mentši. Ke moka ge ba ka wa therešong goba ba tlogela phuthego, re ka se fokole tumelong goba ra tlogela go hlankela Jehofa.—Juda 16.

NA RE SWANETŠE GO TSHWENYEGA GE PALO YA BATLOTŠWA E OKETŠEGA?

12, 13. Ke ka baka la’ng re sa swanela go tshwenyega ka palo ya bao ba jago senkgwa le go nwa beine Segopotšong?

12 Ka nywaga e mentši, palo ya bao ba jago senkgwa le go nwa beine Segopotšong e be e dutše e fokotšega. Eupša morago bjale, palo yeo e oketšega ngwaga o mongwe le o mongwe. Na seo se swanetše go re tshwenya? Aowa. Anke re boneng gore ke ka baka la eng re sa swanela go tshwenyega.

13 “Jehofa o tseba ba gagwe.” (2 Timotheo 2:19) Ka go se swane le Jehofa, bana babo rena bao ba balago batho bao ba jago senkgwa le go nwa beine Segopotšong ga ba  tsebe bao e lego batlotšwa ba kgonthe. Ka gona palo yeo ba e hwetšago e akaretša batho bao ba naganago gore ba tloditšwe mola go se bjalo. Ka mohlala, ba bangwe bao ba bego ba eja senkgwa le go nwa beine ba ile ba kgaotša go dira bjalo. Ba bangwe ba ka ba ba be ba na le mathata a monagano gomme ba nagana gore ba yo buša le Kriste legodimong. Ka gona ga re tsebe tlwaa palo ya batlotšwa bao ba sa lego mo lefaseng.

14. Beibele e re’ng ka palo ya batlotšwa bao ba tla bego ba le mo lefaseng ge masetlapelo a magolo a thoma?

14 Go tla ba go na le batlotšwa dikarolong tše dintši tša lefase ge Jesu a tlo ba tšea gore ba ye legodimong. Beibele e re Jesu “o tla roma barongwa ba gagwe ka modumo o mogolo wa phalafala gomme ba tla kgoboketša bakgethwa ba gagwe go tšwa mathokong a mane, go tloga pheletšong e nngwe ya magodimo go ya go e nngwe.” (Mateo 24:31) Le gona Beibele e bontšha gore mehleng ya bofelo go tla ba go sa na le palo e nyenyane ya batlotšwa mo lefaseng. (Kutollo 12:17) Eupša ga e re botše gore go tla ba go šetše ba bakae ge masetlapelo a magolo a thoma.

15, 16. Ke’ng seo re swanetšego go se kwešiša ka batho ba 144 000 bao Jehofa a ba kgethago?

15 Jehofa ke yena a dirago phetho ya gore o kgetha batlotšwa neng. (Baroma 8:28-30) Jehofa o thomile go kgetha batlotšwa ka morago ga ge Jesu a tsošitšwe bahung. Go bonagala Bakriste ka moka ba therešo ba lekgolong la pele la nywaga ba be ba tloditšwe. Nywaga e makgolo ka morago ga moo, ba bantši ba bao ba bego ba ipolela gore ke Bakriste e be e se balatedi ba kgonthe ba Kriste. Lega go le bjalo, yona nywageng  yeo, Jehofa o ile a tlotša batho ba sego kae bao e bego e le Bakriste ba therešo. Ba be ba swana le korong yeo Jesu a boletšego gore e tla mela gare ga mefoka. (Mateo 13:24-30) Mehleng ye ya bofelo, Jehofa o tšwetše pele a kgetha batho bao e tlago go ba karolo ya ba 144 000. [2] (Bona tlhaloso.) Ka gona ge e ba Modimo a ka kgetha go tlotša batho ba bangwe go šetše nako e nyenyane gore bofelo bo thome, ruri re ka se nagane gore o dira phošo. (Jesaya 45:9; Daniele 4:35; bala Baroma 9:11, 16.) [3] (Bona tlhaloso.) Re swanetše go itlhokomela gore re se ke ra arabela go swana le bašomi bao ba ilego ba ngongorega ge mong wa bona a be a nea bašomi bao ba thomilego go šoma ka iri ya mafelelo moputso wa go lekana le wa bona.—Bala Mateo 20:8-15.

16 Ga se bohle bao ba nago le kholofelo ya go yo phela legodimong e lego karolo ya “mohlanka yo a botegago le wa temogo.” (Mateo 24:45-47) Go fo swana le lekgolong la pele la nywaga, lehono Jehofa le Jesu ba diriša batho ba sego kae feela go fepa, goba go ruta batho ba bantši. Lekgolong la pele la nywaga, ke Bakriste ba sego kae feela ba tloditšwego bao ba ilego ba dirišwa go ngwala Mangwalo a Bakriste a Segerika. Le lehono, ke Bakriste ba sego kae feela ba tloditšwego bao ba neilwego boikarabelo bja go nea batho ba Modimo ‘dijo ka nako e swanetšego.’

17. O ithutile’ng sehlogong se?

17 Re ithutile’ng sehlogong se? Re ithutile gore Jehofa o kgethile go nea ba bantši ba batho ba gagwe kholofelo ya go tlo phela mo lefaseng ka mo go sa felego le go nea ba bangwe kholofelo ya go yo buša le Jesu legodimong. Jehofa o putsa bahlanka ba gagwe ka moka, e lego “Mojuda” le “batho ba lesome,” e bile o nyaka gore ba phele ka melao e swanago le go dula ba botega. Ka moka ga bona ba swanetše go dula ba ikokobeditše. Ka moka ga bona ba swanetše go mo hlankela gotee le go ba le botee. Ka moka ga bona ba swanetše go boloka khutšo ka phuthegong. Ge re dutše re batamela kgauswiuswi le bofelo, anke re tšweleng pele re hlankela Jehofa le go latela Kriste re le mohlape o tee.

^ [1] (serapa 3) Go ya ka Psalme 87:5, 6, nakong e tlago, go ka direga gore Modimo a tle a re botše maina a batho ka moka bao ba tla bego ba buša le Jesu legodimong.—Baroma 8:19.

^ [2] (serapa 15) Le ge Ditiro 2:33 e bontšha gore Jesu o kgatha tema ge motho a tlotšwa, fela Jehofa ke yena a kgethago motho yoo.

^ [3] (serapa 15) E le gore o tsebe ka mo go oketšegilego ka taba ye, bala “Dipotšišo tše Tšwago go Babadi” ka Morokaming wa May 1, 2007, matlakala 30-31.