Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  January 2016

Go Šoma Gotee le Modimo go a re Thabiša

Go Šoma Gotee le Modimo go a re Thabiša

“Re šoma gotee le yena, gape re le lopa gore le se ke la amogela botho bjo bogolo bja Modimo gomme la lahlegelwa ke morero wa bjona.”—2 BAKORINTHE 6:1.

DIKOPELO: 75, 74

1. Gaešita le ge Jehofa e le Yo a Phagamego, o laleditše batho ba bangwe gore ba dire’ng?

JEHOFA ke Yo a Phagamego. O bopile dilo ka moka, le gona o na le bohlale le matla tšeo di sa lekanywego le selo. Ka morago ga gore Jehofa a thuše Jobo go kwešiša se, Jobo o ile a re go yena: “Bjale ke tsebile gore o kgona go dira dilo ka moka, le gona ga go na kgopolo e sa fihlelelegego go wena.” (Jobo 42:2) Jehofa a ka dira selo le ge e le sefe seo a se nyakago ntle le thušo ya motho. Eupša o bontšha lerato ka go laletša ba bangwe gore ba šome gotee le yena go phethagatša morero wa gagwe.

2. Jehofa o ile a laletša Jesu go dira modiro ofe o bohlokwa?

2 Modimo o bopile Morwa wa gagwe, e lego Jesu, pele a ka bopa batho ba bangwe le dilo tše dingwe ka moka. Ke moka, Jehofa o ile a dumelela Morwa yo wa gagwe gore a mo thuše go bopa dilo tše dingwe ka moka. (Johane 1:1-3, 18) Moapostola  Paulo o ile a ngwala ka Jesu gore: “Dilo tše dingwe ka moka tše di lego magodimong le lefaseng di hlodilwe ka yena, dilo tše di bonagalago le dilo tše di sa bonagalego, go sa šetšwe gore ke didulo tša bogoši goba borena goba mebušo goba balaodi. Dilo tše dingwe ka moka di hlodilwe ka yena gomme di hloletšwe yena.” (Bakolose 1:15-17) Ka gona Jehofa ga se a nea Morwa wa gagwe modiro o bohlokwa feela eupša o ile a ba a botša ba bangwe ka wona. A tokelo e kgolo gakaakang!

3. Jehofa o ile a laletša Adama go dira’ng, gona ka baka la’ng?

3 Le gona Jehofa o laleditše batho go šoma gotee le yena. Ka mohlala, o ile a dumelela Adama go nea diphoofolo maina. (Genesi 2:19, 20) Akanya kamoo Adama a bego a thabile ka gona ge a be a dira modiro wo! O ile a ithuta sebopego sa phoofolo e nngwe le e nngwe ka kelohloko le kamoo e bego e dira dilo ka gona, ke moka a e nea leina le le e swanetšego. Jehofa o be a bopile diphoofolo tšeo ka moka, ka gona o be a ka di nea maina ka boyena. Lega go le bjalo, o ile a bontšha Adama kamoo a mo ratago ka gona ka go mo dumelela go di nea maina. Le gona Modimo o ile a nea Adama mošomo wa go dira lefase ka moka gore e be paradeise. (Genesi 1:27, 28) Eupša mafelelong Adama o ile a kgetha go tlogela go šoma le Modimo, gomme seo se ile sa tlišetša yena le ditlogolo tša gagwe ka moka masetlapelo.—Genesi 3:17-19, 23.

4. Batho ba bangwe ba ile ba šoma bjang le Modimo go phethagatša thato ya gagwe?

4 Ka morago, Modimo o ile a laletša batho ba bangwe gore ba šome le yena. Noa o ile a aga areka yeo e ilego ya dira gore yena le lapa la gagwe ba phologe Meetsefula. Moshe o ile a lokolla setšhaba sa Isiraele Egipita. Joshua o ile a iša Baisiraele Nageng ya Kholofetšo. Solomone o ile a aga tempele Jerusalema. Maria o ile a ba mmago Jesu. Batho ba ka moka bao ba botegago le ba bangwe ba bantši ba ile ba šoma le Jehofa go phethagatša thato ya gagwe.

5. Re ka kgatha tema modirong ofe, le gona na Jehofa o be a hloka thušo ya rena? (Bona seswantšho seo se lego mathomong a sehlogo.)

5 Lehono, Jehofa o re laletša gore re dire sohle seo re ka se kgonago go thekga Mmušo wa gagwe. Re na le ditsela tše dintši tša go hlankela Modimo. Le gona gaešita le ge ka moka ga rena re ka se kgone go mo hlankela ka tsela e swanago, ka moka ga rena re ka bolela ditaba tše dibotse tša Mmušo. Ga se gore Jehofa o be a hloka thušo ya rena. A ka ba a ile a bolela le batho ka go lebanya a le legodimong. Jesu o boletše gore Jehofa o be a ka dira gore maswika a botše ba bangwe ka Kgoši ya Mmušo wa Gagwe. (Luka 19:37-40) Eupša Jehofa o re dumelela go ba “bašomigotee” le yena. (1 Bakorinthe 3:9) Moapostola Paulo o ngwadile gore: “Re šoma gotee le yena, gape re le lopa gore le se ke la amogela botho bjo bogolo bja Modimo gomme la lahlegelwa ke morero wa bjona.” (2 Bakorinthe 6:1) Ke tokelo e kgolo gore Modimo a re laletše go šoma le yena. Anke re boneng mabaka a mangwe ao ka ona go šoma le Modimo go re thabišago.

GO ŠOMA LE MODIMO GO A RE THABIŠA

6. Morwa wa mathomo wa Modimo o ile a hlalosa bjang kamoo a bego a ikwa ka gona ka go šoma le Tatagwe?

6 Go šoma le Modimo go be go dutše go thabiša bahlanka ba gagwe. Pele Morwa wa mathomo wa Modimo a ka tla lefaseng, o ile  a re: “Jehofa o mpopile ke le mathomo a tsela ya gagwe, . . . ke be ke le hleng ga gagwe ke le mošomi yo a nago le bokgoni, a nthata kudu letšatši le letšatši, ke dula ke thabile pele ga gagwe ka mehla.” (Diema 8:22, 30) Ge Jesu a be a šoma le Tatagwe, o be a thabile ka gobane o be a kgona go dira dilo tše dintši gomme a tseba gore Jehofa o a mo rata. Eupša go thwe’ng ka rena?

Ga go na selo se se thabišago kudu go phala go ruta motho therešo (Bona serapa 7)

7. Ke ka baka la’ng modiro wa boboledi o re thabiša?

7 Jesu o boletše gore re a thaba ge re nea le ge re amogela. (Ditiro 20:35) Re ile ra thaba kudu ge re be re amogela therešo, eupša ke ka baka la’ng re thaba ge re e botša ba bangwe? Lebaka ke gore go a thabiša go ba bona ba thaba e le ka kgonthe ge ba kwešiša seo Beibele e se rutago gomme ba thoma go ba le tswalano le Modimo. Re a thaba ge re ba bona ba fetoša tsela ya bona ya go nagana le tsela ya bona ya bophelo. Modiro wa boboledi ke modiro o bohlokwa kudu le o kgotsofatšago kudu go feta modiro le ge e le ofe wo re ka o dirago. O dira gore bao e bago bagwera ba Modimo ba tle ba hwetše bophelo bjo bo sa felego.—2 Bakorinthe 5:20.

8. Ba bangwe ba boletše’ng ka lethabo leo le tlišwago ke go šoma le Jehofa?

8 Ge re thuša ba bangwe go ithuta ka Modimo, re tseba gore re a mo thabiša le gore o tšeela godimo maiteko a rena a go mo hlankela. Seo le sona se a re thabiša. (Bala 1 Bakorinthe 15:58.) Marco, yo a dulago Italy, o re: “Ga go na selo seo se nthabišago go feta go tseba gore ke nea Jehofa sohle seo nka se kgonago go e na le go se nea motho yoo kgauswinyane a tlago go lebala seo ke se dirilego.” Ka mo go swanago, Franco, yo le yena a hlankelago kua Italy, o re: “Ka Lentšu la gagwe le ditokišetšo tša gagwe tša moya, Jehofa o re gopotša letšatši le letšatši gore o a re rata le gore dilo ka moka tšeo re mo direlago tšona di bohlokwa go yena, gaešita le ge rena re bona eka ga re dire selo. Ke ka baka leo ke thabelago go šoma gotee  le Modimo gomme seo se dira gore bophelo bja ka bo be le morero.”

GO ŠOMA LE MODIMO GO RE BATAMETŠA KGAUSWI LE YENA LE BA BANGWE

9. Jehofa le Jesu ba na le tswalano ya mohuta mang, gona go tlile bjang gore ba be le yona?

9 Ge re šoma gotee le bao re ba ratago, re batamela kgauswi le bona. Re tseba ka mo go oketšegilego ka semelo sa bona le dika tša bona. Re tseba dipakane tša bona le kamoo ba lekago go di fihlelela. Jesu o šomile le Jehofa mo e ka bago ka nywaga e dibilione. Ba ratana kudu moo go se nago selo seo se ka senyago tswalano ya bona. Jesu o hlalošitše kamoo ba nago le tswalano ya kgauswi ka gona ge a be a re: “Nna le Tate re batee.” (Johane 10:30) Ba tloga ba le boteeng, gomme ba dirišana gabotse kudu.

Modiro wa boboledi o matlafatša tumelo ya rena ka gobane o re gopotša dikholofetšo tša Modimo le ditekanyetšo tša gagwe tše lerato

10. Ke ka baka la’ng modiro wa boboledi o re batametša kgauswi le Modimo le ba bangwe?

10 Jesu o ile a kgopela Jehofa gore a šireletše barutiwa ba gagwe. Ka baka la’ng? O rapetše ka gore: “E le gore e be batee go etša ge re le batee.” (Johane 17:11) Ge re phela ka ditekanyetšo tša Modimo e bile re tšea karolo modirong wa boboledi, re kwešiša dika tša gagwe tše di kgahlišago gakaone. Re ithuta lebaka leo e lego gabohlale go mmota le go latela ditaelo tša gagwe. Le gona ge re batamela kgauswi le Modimo, le yena o a re batamela. (Bala Jakobo 4:8.) Re batamela kgauswi le bana babo rena le dikgaetšedi ka gobane re na le mathata a swanago le a bona, lethabo le le swanago le la bona le dipakane tše di swanago le tša bona. Re šoma gotee, re thaba gotee e bile re kgotlelela gotee. Octavia, yo a dulago Brithania, o re: “Go šoma le Jehofa go mpatametša kgauswi le ba bangwe.” O re seo ke ka gobane bagwera ba gagwe ba na le “pakane e swanago” le ya gagwe. Ga go pelaelo gore le rena re ikwa ka tsela e swanago. Ge re bona maiteko ao bana babo rena ba a dirago go kgahliša Jehofa, seo se re batametša kgauswi le bona.

11. Ke ka baka la’ng lefaseng le lefsa re tlo batamela kgauswiuswi le Jehofa le bana babo rena?

11 Re rata Modimo le bana babo rena kudu gona bjale, eupša re tlo ba rata le go feta lefaseng le lefsa. Nagana ka mešomo ka moka e thabišago yeo re tlago go e dira nakong e tlago! Re tlo amogela bao ba tsošitšwego bahung gomme ra ba ruta ka Jehofa. Le gona re tlo šoma go fetoša lefase gore e be paradeise. Ruri re tlo thabela go šoma gotee gomme ganyenyane-ganyenyane ra phethagala ge Kriste a tla be a buša. Batho ka moka ba tla batamelana kudu le go batamela Jehofa, yoo a tlago go “kgotsofatša kganyogo ya sephedi se sengwe le se sengwe” e le ka kgonthe.—Psalme 145:16.

GO ŠOMA LE MODIMO GO A RE ŠIRELETŠA

12. Modiro wa boboledi o re šireletša bjang?

12 Re swanetše go šireletša tswalano ya rena le Jehofa. Re phela lefaseng la Sathane e bile ga se ra phethagala, ka gona go bonolo  gore re thome go nagana le go dira dilo go swana le batho ba lefase. Seo se swana le go rutha ka nokeng yeo meetse a yona a go gogelago moo o sa nyakego go ya gona. E le gore o a lwantšhe, o swanetše go diriša matla a gago ka moka. Ka mo go swanago, re swanetše go šoma ka thata go phema go tutuetšwa ke lefase la Sathane. Ka gona go dira boboledi go re šireletša bjang? Ge re botša ba bangwe ka Jehofa le Beibele, re nagana kudu ka dilo tše bohlokwa le tše dibotse, e sego dilo tšeo di tlago go fokodiša tumelo ya rena. (Bafilipi 4:8) Modiro wa boboledi o matlafatša tumelo ya rena ka gobane o re gopotša dikholofetšo tša Modimo le ditekanyetšo tša gagwe tše lerato. Le gona o re thuša go dula re na le dika tšeo re di hlokago go itšhireletša go Sathane le lefase la gagwe.—Bala Baefeso 6:14-17.

Ge re dula re swaregile ka modiro wa Jehofa, ga re be le nako ya go hlwa re belaela ka mathata a rena

13. Hlatse e nngwe ya Australia e ikwa bjang ka boboledi?

13 Ge re dula re swaregile ka boboledi, re ithuta e bile re thuša ba bangwe ka phuthegong, re a itšhireletša ka gobane ga re be le nako ya go hlwa re belaela ka mathata a rena. Joel, yo a dulago Australia, o re: “Modiro wa boboledi o nthuša gore ke dule ke lebelela dilo ka tsela ya kgonthe. O nkgopotša ka ditlhohlo tšeo batho ba lebeletšanago le tšona le mehola yeo ke bilego le yona ka go diriša melao ya motheo ya Beibele bophelong bja ka. Modiro wa boboledi o nthuša go leka go dula ke ikokobeditše; o nnea sebaka sa go ithekga ka Jehofa le bana bešo le dikgaetšedi.”

14. Ke ka baka la’ng go kgotlelela ga rena modirong wa boboledi e le bohlatse bja gore moya wa Modimo o na le rena?

14 Le gona boboledi bo re nea kgodišego e oketšegilego ya gore moya wa Modimo o na le rena. Ka mohlala: A re re o neilwe mošomo wa go tšama o nea batho borotho magaeng a bona. Ga o gole e bile o swanetše go lefelela ditshenyagalelo tša gago. Le gona, batho ba bantši ga ba nyake borotho bjoo, e bile ba bangwe ba go hloile ka gobane o ba tlišetša bjona. Na o tla kgotlelela mošomong woo? O ka felelwa ke matla gomme mohlomongwe wa o tlogela. Lega go le bjalo, ba bantši ba rena re tšwela pele re dira modiro wa boboledi ngwaga le ngwaga, gaešita le ge re swanelwa ke go diriša nako ya rena le tšhelete e bile batho ba re kwera goba ba re galefela. Se se hlatsela gore moya wa Modimo o a re thuša.

GO ŠOMA LE MODIMO GO BONTŠHA GORE RE A MO RATA LE GO RATA BA BANGWE

15. Go bolela ka ditaba tše dibotse go tswalana bjang le morero wa Modimo ka batho?

15 Modiro wa boboledi o tswalana bjang le morero wa Jehofa ka batho? Morero wa Modimo e be e le gore batho ba phele ka mo go sa felego, gomme morero woo ga se wa fetoga ge Adama a be a dira sebe. (Jesaya 55:11) Modimo o dirile tokišetšo ya gore re lokollwe sebeng le lehung. Bjang? Jesu o ile a tla lefaseng gomme a gafa bophelo bja gagwe gore e be sehlabelo. Eupša gore batho ba holege sehlabelong sa gagwe, ba swanetše go  kwa Modimo. Ka gona Jesu o ile a ruta batho seo Modimo a se nyakago go bona, gomme a laela barutiwa ba gagwe gore le bona ba rute ba bangwe. Ge re dira boboledi gomme re thuša ba bangwe go ba bagwera ba Modimo lehono, re šoma le Modimo ka go lebanya tokišetšong ya gagwe e lerato ya go phološa batho sebeng le lehung.

16. Modiro wa boboledi o tswalana bjang le ditaelo tše dikgolokgolo tša Modimo?

16 Ge re thuša ba bangwe go hwetša tsela yeo e išago bophelong bjo bo sa felego, re bontšha gore re a ba rata le gore re rata Jehofa. “Thato ya gagwe [ke] gore mehuta yohle ya batho e phološwe gomme e fihle tsebong e nepagetšego ya therešo.” (1 Timotheo 2:4) Ge Mofarisei yo mongwe a be a botšiša Jesu gore taelo e kgolokgolo ya Modimo ke efe, Jesu o ile a re: “‘O rate Jehofa Modimo wa gago ka pelo ya gago ka moka, ka moya wa gago ka moka le ka monagano wa gago ka moka.’ Ye ke taelo e kgolokgolo le ya pele. Ya bobedi ya go swana le yona ke ye: ‘O rate moagišani wa gago ka mokgwa wo o ithatago ka wona.’” (Mateo 22:37-39) Ge re bolela ditaba tše dibotse, re bontšha gore re kwa ditaelo tše.—Bala Ditiro 10:42.

17. O ikwa bjang ka tokelo ya go bolela ditaba tše dibotse?

17 Ruri re šegofaditšwe! Jehofa o re neile modiro wo o re thabišago, wo o re batametšago kgauswi le yena le bana babo rena le woo o šireletšago tswalano ya rena le yena. Le gona modiro wo o re nea sebaka sa go bontšha gore re rata Modimo le ba bangwe. Jehofa o na le bahlanka ba dimilione lefaseng ka bophara bao maemo a bona a sa swanego. Eupša go sa šetšwe gore re bafsa goba re ba bagolo, re bahumi goba badiidi, re na le matla goba re a fokola, re dira sohle seo re ka se kgonago go botša ba bangwe ka tumelo ya rena. Re ikwa go swana le Chantel wa kua Fora, yo a rego: “Motho yo matla kudu legohleng, Mmopi wa dilo ka moka, Modimo yo a thabilego, o re go nna: ‘Eya o yo bolela le batho! Eya o mpolelele le bona go tšwa pelong. Ke tla go nea matla a ka, Lentšu la ka e lego Beibele, thekgo e tšwago legodimong, bašomigotee le wena lefaseng, tlhahlo ya ka mehla le ditaelo tša maleba ka nako e swanetšego.’ A tokelo e kgolo gakaakang go dira seo Jehofa a re kgopelago gore re se dire le go šoma gotee le Modimo wa rena!”