Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  February 2018

 KANEGELO YA BOPHELO

Dilo Tšohle di a Kgonega go Jehofa

Dilo Tšohle di a Kgonega go Jehofa

“LEHU le ka se sa ba gona, gaešita le bahu ba tlo tsošwa.” Ge mosadi wa ka a be a le ka peseng o ile a utswa ka tsebe mantšu a, ao mosadi yo mongwe a bego a a botša motho yo a itšego. Mosadi wa ka o ile a nyaka go kwa ka mo go oketšegilego le go ithuta dilo tše dingwe tše dintši. Gateetee ka morago ga gore pese yeo e eme e le gore banamedi ba fologe, mosadi wa ka o ile a kitimela mosadi yoo a boletšego mantšu ao. Leina la mosadi yoo e be e le Apun Mambetsadykova, gomme e be e le Hlatse ya Jehofa. Mehleng yeo go bolela le Dihlatse tša Jehofa go be go bea bophelo bja gago kotsing, eupša dilo tšeo re ilego ra ithuta tšona go Apun di ile tša fetoša maphelo a rena.

GO ŠOMA KA MASA GO FIHLA LETŠATŠI LE DIKELA

Ke belegwe ka 1937 polaseng yeo e bego e laolwa ke sehlopha, yeo e lego kgauswi le toropo ya Tokmok, kua Kyrgyzstan. Ka gešo re Makyrgyz, e bile re bolela Sekyrgyz. Batswadi ba ka ba be ba šoma polaseng ya kolkhoz go tloga ka masa go ba go fihla ge le dikela. Batho bao ba bego ba šoma polaseng ba be ba newa dijo ka mehla gomme ba patelwa ka tšhelete gatee feela ka ngwaga. Mma o be a thatafalelwa ke go hlokomela nna le ngwana wa gešo. Ka morago ga mengwaga e mehlano feela ke le sekolong, le nna ke ile ka thoma go šoma ka mehla polaseng.

Dithaba tša Teskey Ala-Too

Tikologong yeo re bego re dula go yona, batho ba bantši ba be ba diila, ka gona e le gore motho a kgone go iphediša, o be a swanetše go šoma ka thata mošomo o lapišago. Ka ge ke be ke sa le ngwana, ke be ke sa ipotšiše gore gore’ng re phela le gore nakong e tlago bophelo bo tlo ba bjang. Ke be ke sa nagane gore ditherešo tše di kgahlišago ka Jehofa Modimo di be di tlo fetoša bophelo bja ka. Ruri ge o ka kwa kamoo molaetša wa Modimo o fihlilego ka gona mo Kyrgyzstan le gore go tlile bjang gore batho ba bantši ba o kwe, o tlo šala o ahlame! Taba ye e thomile seleteng sa gešo, ka leboa la Kyrgyzstan.

BAO E BEGO E LE MATHOPŠA BA TLIŠA THEREŠO KYRGYZSTAN

Kua Kyrgyzstan, batho ba thomile go tseba therešo ka Jehofa Modimo ka bo-1950. Batho ba moo ba be ba  rutilwe dikgopolo tše itšego tša mabapi le kamoo ba swanetšego go phela ka gona (ideology), eupša ga bjale re be re swanetše go ba ruta therešo ka Modimo. Ka baka la’ng? Mathomong, Kyrgyzstan e be e laolwa ke Union of Soviet Socialist Republics (USSR). Ka tlase ga mmušo wa USSR, Dihlatse tša Jehofa di be di sa tsenatsene ditabeng tša dipolotiki. (Joh. 18:36) Lega go le bjalo, di ile tša tlaišwa ka ge go be go thwe ke manaba a mmušo wa Makomanisi. Eupša thuto ya ideology, e be e ka se thibele Lentšu la Modimo gore le fihle dipelong tša batho ba ba botegago. Ruri e nngwe ya dithuto tše bohlokwa yeo ke ithutilego yona bophelong bja ka ke gore go Jehofa “dilo tšohle di a kgonega.”​—Mar. 10:27.

Emil Yantzen

Go tlaišwa ga Dihlatse tša Jehofa go ile gwa dira gore go be le Dihlatse tše dintši tša Jehofa kua Kyrgyzstan. Ke ka baka la’ng go ile gwa ba bjalo? USSR e be e be e akaretša selete sa Siberia, e lego moo manaba a mmušo a bego a išwa gona. Ge manaba ao a be a lokollwa, batho ba bantši ba ile ba ya Kyrgyzstan, gomme ba bangwe ba bona ba be ba šetše ba tseba therešo ka Modimo. Yo mongwe wa batho bao e be e le Emil Yantzen, yoo a belegetšwego Kyrgyzstan ka 1919. Emil o be a rometšwe kampeng ya tlaišo gomme a kopana le Dihlatse tša Jehofa gona moo. O ile a amogela therešo gomme a boela gae ka 1956. Emil o ile a dula kgauswi le toropo ya Sokuluk, e lego seleteng sa gešo. Sokuluk ke moo phuthego ya mathomo e ilego ya thoma gona ka 1958 kua Kyrgyzstan.

Victor Vinter

Moo e ka bago ka morago ga ngwaga, Victor Vinter o ile a hudugela Sokuluk. Ngwanabo rena yo, yo a botegago o ile a tlaišwa ka makga a mmalwa. O ile a golelwa ka mengwaga e meraro ka ge a be a sa tšee karolo dipolotiking, gomme ka morago a fetša mengwaga e mengwe e lesome kgolegong le e mehlano a le bokgobeng. Lega go le bjalo, go tlaišwa moo ga se gwa ka gwa mo dira gore a se bolele ka borapedi bja therešo.

THEREŠO E BATAMELA KGAUSWI LE MOTSE WA GEŠO

Eduard Varter

Ka 1963, go be go na le Dihlatse tša Jehofa tšeo e ka bago tše 160 kua Kyrgyzstan, tše dintši tša tšona di etšwa Jeremane, Ukraine le Russia. Gare ga bana babo rena ba, go be go na le Eduard Varter, yo a bego a thopilwe gomme a kolobeditšwe kua Jeremane ka 1924. Ka 1940, Manazi a be a mo rometše kampeng ya tlaišo, gomme ka morago ga mengwaga e sego kae, Makomanisi a USSR a ile a mo romela bokgobeng. Ka 1961, ngwanabo rena yo yo a botegago o ile a hudugela toropong ya Kant, yeo e lego kgauswi le motse wa gešo.

Elizabeth Fot; Aksamai Sultanalieva

Elizabeth Fot, yo e lego mohlanka yo a botegago wa Jehofa le yena o be a dula Kant. O be a iphediša ka go roka. Ka ge a be a kgona go roka, dingaka le barutiši ba be reka diaparo go yena. Yo mongwe wa batho bao ba bego ba rata go mo rekela e be e le Aksamai Sultanalieva, e lego mosadi yo a bego a nyetšwe ke mohlankedi wa mmušo. Aksamai o ile a tla go Elizabeth go tlo reka diaparo, eupša o ile a botšiša Elizabeth dipotšišo tše dintši mabapi le morero wa bophelo le boemo bja bahu. Elizabeth o ile a araba dipotšišo tša gagwe ka moka a diriša Beibele. Mafelelong, Aksamai o ile a ba mmoledi wa ditaba tše dibotse yo mafolofolo.

Nikolai Chimpoesh

Mo e ka bago ka nako yeo, Nikolai Chimpoesh, yo a tšwago Moldova, o ile a kgethwa go ba molebeledi wa tikologo gomme a hlankela tirelong yeo moo e nyakilego e eba mengwaga e 30. Nikolai o be a sa no etela diphuthego feela, eupša o be a rulaganya le gore go dirwe dikopi tša dikgatišo gomme di romelwe batho. Baemedi ba mmušo ba ile ba lemoga seo a bego a se dira. Eupša Eduard Varter o ile a eletša Nikolai ka gore: “Ge bahlankedi ba mmušo ba go botšiša ka seo o se dirago, ba botše o sa bontšhe go tšhoga gore re hwetša dikgatišo tša rena go tšwa ntlongkgolo ya rena kua Brooklyn. Ge o bolela le mohlankedi wa KGB o mo lebelele ka mahlong. O se ke wa boifa selo.”​—Mat. 10:19.

 Kapejana ka morago ga gore Eduard Varter le Nikolai ba boledišane ka taba ye, Nikolai o ile a išwa ntlongkgolo ya KGB kua Kant. Ka morago o hlalosa seo se ilego sa direga, o re: “Mohlankedi wa KGB o ile a mpotšiša gore re tšea kae dikgatišo tša rena. Ke ile ka mmotša gore re di tšea Brooklyn. O ile a hloka molomo. O ile a ntlogela gore ke sepele gomme a se sa mpitša gape.” Dihlatse tša Jehofa tša go swana le tše tšeo di bego di na le sebete, di ile tša tšwela pele di bolela ditaba tše dibotse ka šedi seleteng sa gešo sa leboa la Kyrgyzstan. Ge mafelelong molaetša wa Jehofa o fihla lapeng la ka ka 1981, mosadi wa ka ke yena a o kwelego pele.

MOSADI WA KA O LEMOGA THEREŠO KA PELAPELA

Mosadi wa ka Mairambubu o tšwa Naryn, e lego seleteng se sengwe sa Kyrgyzstan. Letšatšing le lengwe ka August 1974, o ile a etela ga moratho wa ka, gomme ra thoma go tsebana. Ke ile ka mo rata di sa tloga fase. Re ile ra nyalana lona letšatšing leo re kopanego ka lona.

Apun Mambetsadykova

Ka January 1981 ge mosadi wa ka a be a nametše pese a eya mmarakeng, o ile a utswa ka tsebe poledišano yeo e lego mathomong a sehlogo se. Mosadi wa ka o be a nyaka go tseba ka mo go oketšegilego, ka gona o ile a botšiša mosadi yoo gore ke yena mang le gore o dula kae. Mosadi yoo o ile a mmotša gore ke yena Apun, eupša o be a le šedi ka gore gaešita le ka bo-1980, modiro wa Dihlatse tša Jehofa o be o sa thibetšwe. Apun o ile a kgopela aterese ya rena go e na le gore a fe mosadi wa ka aterese ya gagwe. Mosadi wa ka o ile a boa gae a thabile.

O ile a re: “Ke kwele ditaba tše dibotse. Mosadi yo mongwe o mpoditše gore kgauswinyane batho ba ka se sa hwa. E bile o itše le diphoofolo tša naga di tlo phela le batho.” Eupša nna ke ile ka kwa eka taba ye ke nonwane. Ke moka ka re: “E re re mo emele re tle re kwe ditaba ka botlalo.”

Apun o ile a re etela ka morago ga dikgwedi tše tharo. Ke moka ka morago ga moo dikgaetšedi tše dingwe di ile tša re etela gomme ra thoma go tsebana le Dihlatse tša Jehofa tša mathomo tša Makyrgyz. Dikgaetšedi tše di ile tša re ruta ditherešo tše di kgahlišago ka Jehofa le morero wa gagwe ka batho. Di ile tša re balela puku ya From Paradise Lost to Paradise Regained. * Le gona ka ge go be go na le kopi e tee ya puku ye ka leleme la Setokmok, re ile ra e ikopollela yona ka letsogo.

Dilo tše dingwe tša mathomo tšeo re ithutilego tšona e be e le boporofeta bjo bo lego go Genesi 3:15. Boporofeta bjo bo tlo phethagatšwa ke Jesu ka ge e le Kgoši yeo e kgethilwego ke Modimo. Wo ke molaetša o bohlokwa woo motho yo mongwe le yo mongwe a swanetšego go o kwa! Ke ka baka leo re swanetšego go tsebiša batho ditaba tše dibotse tša Mmušo. (Mat. 24:14) Go se go ye kae, Beibele e ile ya thoma go fetoša maphelo a rena.

 RE ILE RA SWARA DIBOKA LE GO KOLOBETŠWA LE GE RE BE RE BE THIBETŠWE

Ngwanabo rena yo mongwe wa kua Tokmok o ile a re mema lenyalong. Lenyalong leo, nna le mosadi wa ka re ile ra lemoga gore Dihlatse tša Jehofa di be di itshwere gabotse go fapana le batho ba bangwe. Go be go se na bjala e bile dilo di dirwa ka thulaganyo. Ruri lenyalo leo le be le fapane le manyalo a mangwe ao re kilego ra ya go ona ka gobane manyalong ao gantši batho ba be ba enwa bjala, ba sa bontšhe mekgwa e mebotse e bile ba rogana.

Re ile ra ba ra ya dibokeng tša Bokriste kua Tokmok. Diboka tšeo di be di swarelwa sethokgweng ge boemo bja leratadima bo be bo dumela. Bana babo rena le dikgaetšedi ba be ba tseba gore maphodisa a be a ba beile leihlo, ka gona bana babo rena le bona ba ile ba dula ba ntšhitše mahlo dinameng. Marega re be re swarela diboka ka ntlong. Maphodisa a ile a tla gantšinyana ka ntlong yeo re bego re swarela diboka go yona gomme a re botšiša gore re dira eng. Ge nna le mosadi wa ka re be re kolobetšwa ka July 1982 Nokeng ya Chüy, re ile ra swanelwa ke go ba šedi. (Mat. 10:16) Bana babo rena ba ile ba tla ka dihlopha tše dinyenyane sethokgweng gomme ba kgobokana. Re ile ra opela kopelo ya Mmušo gomme ra theetša polelo ya kolobetšo.

RE ILE RA HWETŠA SEBAKA SA GO OKETŠA TIRELO YA RENA

Ka 1987, ngwanabo rena yo mongwe o ile a nkgopela gore ke etele motho yo mongwe yo a bego a thabela, yoo a bego a dula toropong ya Balykchy. Go tloga mo re bego re dula gona go fihla moo a bego a dula gona go be go tšea diiri tše nne ka terene. Ka morago ga gore re boele Balykchy ka makga a mmalwa, re ile ra bona gore batho ba bantši ba moo ba a thabela. Se e be e le sebaka se sebotse sa gore re oketše tirelo ya rena.

Nna le mosadi re be re eya Balykchy gantši. Re be re dula moo mafelobekeng a mantši, re eya tšhemong, e bile re swara diboka tša Bokriste. Batho ba bantši ba ile ba rata dikgatišo tša rena. Re be re rwala dikgatišo go tloga Tokmok ka lesaka leo le bego le dirišwa go rwala ditapola. Kgwedi e nngwe le e nngwe re be re rwala masaka a mabedi ao a bego a tletše dikgatišo eupša dikgatišo tšeo di be di sa lekane batho. Re be re botša banamedi ba terene ditaba tše dibotse ge re be re eya Balykchy le ge re boa.

Ka 1995 go ile gwa hlongwa phuthego kua Balykchy. E be e le mengwaga e seswai ka morago ga gore re etele Balykchy ka lekga la mathomo. Ka nako yeo, go tloga Tokmok le go ya Balykchy go be go tura kudu. Ka ge re be re se na tšhelete e ntši go ya moo, re ile ra kgona bjang? Ngwanabo rena yo mongwe o be a dula a re fa tšhelete ya go patela maeto ao. Jehofa o ile a bona gore re be re nyaka go oketša tirelo ya rena, gomme a re bulela “mašoba a legodimo.” (Mal. 3:10) Ruri dilo tšohle di a kgonega go Jehofa!

GO GODIŠA BANA LE GO YA LE BONA TŠHEMONG

Ka 1992, ke ile ka kgethwa gore ke hlankele ke le mogolo. Ke bile mogolo wa mathomo wa Mokyrgyz nageng ya Kyrgyzstan. Phuthegong ya gabo rena ya kua Tokmok, go ile gwa bulega dibaka tše dingwe tša tirelo. Re be re badiša bafsa ba bantši ba Makyrgyz bao ba bego ba tsena dikholetšheng. Ga bjale yo mongwe wa bafsa bao re bego re bala le bona o hlankela Komiting ya Lekala, gomme ba bangwe ba babedi ke babulamadibogo ba kgethegilego. Le gona re be re thuša batho ba ba bantši bao ba bego ba etla dibokeng tša rena. Mathomong a bo-1990, re be re na le dikgatišo tša Serussia e bile diboka tša rena di swarwa ka Serussia. Eupša go be go na le batho ba bantši bao ba bego ba bolela Sekyrgyz. Ka gona  ke be ke ba tolokela, gomme seo se be se ba thuša gore ba kwešiše seo se bego se bolelwa.

Ka 1989, ge ke be ke na le mosadi wa ka le bana ba rena ba seswai

Nna le mosadi wa ka re be re swaregile ka go hlokomela lapa la rena leo le bego le gola kudu. Re be re eya le bana ba rena tšhemong le dibokeng. Morwedi wa rena e lego Gulsayra, yoo ka nako yeo a bego a na le mengwaga e 12, o be a rata go botša batho bao ba bego ba feta ka tsela ka Modimo. Bana ba rena ba be ba rata go swara Mangwalo a Beibele ka hlogo. Seo se ile sa thuša bana ba rena le ditlogolo tša rena go tšea karolo kutšwanyana medirong ya phuthego. Gare ga bana ba 9 le ditlogolo tše 11, ba 16 ba hlankela Jehofa goba ba ya dibokeng ka mehla le batswadi ba bona.

DIPHETOGO TŠE DI KGAHLIŠAGO

Bana babo rena le dikgaetšedi bao ba ilego ba thoma modiro wo ka 1950 ba tlo makala ge ba ka bona diphetogo tše di lego gona. Re thomile go ipshina ka go ba le tokologo ya go bolela ditaba tše dibotse le go bokana gotee le bana babo rena re le ba bantši go tloga ka 1990.

Ge ke be ke na le mosadi wa ka re bolela ditaba tše dibotse

Ka 1991, nna le mosadi wa ka re ile ra ya kopanong e kgolo la mathomothomo kua Alma-Ata, yeo e tsebjago e le Almaty, kua Kazakhstan. Le gona ka 1993 bana babo rena ba Kyrgyzstan ba ile ba swarela kopano ya selete Setediamong sa Spartak kua Bishkek ka lekga la mathomo. Bagoeledi ba ile ba fetša beke ka moka ba hlwekiša setediamo seo pele ga kopano. Molaodi wa setediamo seo o ile a thaba kudu moo a ilego a re dumelela go šomiša setediamo seo mahala.

Ka 1994 go ile gwa direga selo se sengwe se se thabišago kudu. Kgatišo ya rena ya mathomo e ile ya gatišwa ka leleme la Sekyrgyz. Ga bjale go na le sehlopha seo se fetolelago dikgatišo ka Sekyrgyz ofising ya lekala ya Bishkek. Ka 1998, modiro wa Dihlatse tša Jehofa o ile wa ngwadišwa semmušo kua Kyrgyzstan. Mokgatlo wa rena mo Kyrgyzstan o gotše kudu, gomme ga bjale go na le bagoeledi ba fetago 5 000. Lehono, re na le diphuthego tše 83 le dihlopha tše 25 tša se-China, Seisemane, Sekyrgyz, Serussia, Polelo ya Diatla ya Russia, Seturky, Seuighur le Seuzbek. Bana babo rena ba ka moka le dikgaetšedi bao ba tšwago ditšong tše di fapafapanego ba hlankela Jehofa ka botee. Jehofa ke yena a dirilego gore diphetogo tše di kgonege.

Le gona Jehofa o ile a nthuša go fetoša bophelo bja ka. Ke goletše lapeng leo le diilago kudu e bile ke tsene sekolo mengwaga e mehlano feela. Lega go le bjalo, Jehofa o ile a nnea tokelo ya go hlankela ke le mogolo le go ruta batho bao ba bego ba rutegile go mpheta therešo ya Beibele. Ruri Jehofa o dira gore dilo tšeo gantši di sa kgonegego di kgonege. Phihlelo ya ka e ntutuetša go tšwela pele ke botegela Jehofa, yoo Beibele e bolelago ka yena gore “dilo tšohle di a kgonega” go yena.​—Mat. 19:26.

^ par. 21 E gatišitšwe ke Dihlatse tša Jehofa eupša gona bjale ga e sa gatišwa.