Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) FEBRUARY 2017

Topollo—‘Mpho e Phethagetšego’ e Tšwago go Tate

Topollo—‘Mpho e Phethagetšego’ e Tšwago go Tate

“Mpho e nngwe le e nngwe e botse le neo e nngwe le e nngwe e phethagetšego e tšwa  . . . go Tate.”—JAK. 1:17.

DIKOPELO: 148, 109

1. Mpho ya Modimo ya topollo e dira gore re tle re hwetše ditšhegofatšo dife?

SEHLABELO sa Jesu Kriste se dirile gore re hwetše ditšhegofatšo tše dintši kudu. Topollo e nea bana ka moka ba go loka ba Adama sebaka sa gore mafelelong e tle e be karolo ya lapa la Modimo. Le gona topollo e re nea sebaka sa go tlo phela ka mo go sa felego ka lethabo. Lega go le bjalo, sehlabelo sa Kriste ga se fo nea batho bao ba kwago sebaka sa go tlo thabela bokamoso bjo bobotse. Taba ya gore Jesu o ile a re hwela a dutše a kgomaretše toko ya Jehofa e rarolla taba ya bohlokwa yeo e kgomago dibopiwa ka moka.Baheb. 1:8, 9.

2. (a) Ke ditaba dife thapelong ya Jesu tšeo di kgomago dibopiwa ka moka? (Bona seswantšho se se lego ka mo godimo.) (b) Re tlo ahlaahla’ng sehlogong se?

2 Mengwaga e mebedi pele Jesu a ka hwa lehu la sehlabelo le go lefa topollo, o ile a ruta barutiwa ba gagwe go rapela ka tsela ye: “Tatago rena wa magodimong, leina la gago a le kgethagatšwe. Mmušo wa gago a o tle. Thato ya gago a e direge le mo lefaseng  bjalo ka ge e direga legodimong.” (Mat. 6:9, 10) E le gore re leboge topollo kudu, anke re ahlaahleng kamoo topollo e tswalanago ka gona le go kgethagatšwa ga leina la Modimo, go buša ga Mmušo wa Modimo le go phethagatšwa ga morero wa Gagwe.

“LEINA LA GAGO A LE KGETHAGATŠWE”

3. Leina la Jehofa le akaretša’ng, gona Sathane o ile a senya leina leo le lekgethwa bjang?

3 Thapelong ya gagwe ya mohlala, selo sa pele seo Jesu a itšego barutiwa ba gagwe ba se rapelele ke go kgethagatšwa ga leina la Modimo. Leina la Jehofa le bontšha gore ke yo mogolo kudu, o phagame kudu le gore ke yo mokgethwa. Thapelong e nngwe, Jesu o ile a bolela ka Jehofa gore ke “Tate yo Mokgethwa.” (Joh. 17:11) Ka ge Jehofa e le yo mokgethwa, melao le melao ya gagwe ka moka ya motheo ke e mekgethwa. Go sa šetšwe se, kua serapeng sa Edene, Sathane ka boradia o ile a re Modimo ga a na tshwanelo ya go beela batho melao. Ka go bolela maaka ka Jehofa, Sathane o ile a senya leina la Modimo le lekgethwa.Gen. 3:1-5.

4. Jesu o ile a dira’ng go kgethagatša leina la Modimo?

4 Ka go se swane le Sathane, Jesu o be a rata leina la Jehofa kudu. (Joh. 17:25, 26) Jesu o dirile mo gontši gore leina la Modimo le kgethagatšwe. (Bala Psalme 40:8-10.) Taba ya gore Jesu o ile a kgona go dula a ekwa Jehofa ge a be a le mo lefaseng, e bontšha gore Jehofa o na le tshwanelo ya go beela batho melao. Le ge Sathane a ile a dira gore Jesu a bolawe gasehlogo, Jesu o ile a dula a botegela Tatagwe wa legodimong ka mo go feletšego. Ka go dula a botega, Jesu o ile a hlatsela gore motho yo a phethagetšego a ka kgona go dula a ekwa melao ya Modimo ya go loka.

5. Re ka dira’ng gore leina la Modimo le kgethagatšwe?

5 Rena re ka bontšha bjang gore re rata leina la Jehofa? Re ka bontšha se ka boitshwaro bja rena. Jehofa o nyaka gore re be ba bakgethwa. (Bala 1 Petro 1:15, 16.) Se se bolela gore re hlankele Jehofa a nnoši le go mo kwa ka dipelo tša rena ka moka. Le ge re tlaišwa, re dira sohle seo re se kgonago gore re phele ka melao ya gagwe ya go loka. Ge re itshwara gabotse, re dumelela seetša sa rena se bonega, ka go re’alo ra dira gore batho ba rete Jehofa. (Mat. 5:14-16) Ka ge re le batho ba bakgethwa, re bontšha ka tsela yeo re phelago ka yona gore melao ya Jehofa e lokile le gore Sathane o na le maaka. Ka ge ka moka ga rena re dira diphošo, re swanetše go itshola go tšwa pelong ge re senyeditše Jehofa gomme re tlogele go dira dilo tšeo di mo senyago leina.Ps. 79:9.

6. Gaešita le ge re sa phethagala, ke ka baka la’ng Jehofa a ka re lebelela re lokile?

6 Ka baka la sehlabelo sa Kriste, Jehofa o lebalela dibe tša bao ba bontšhago tumelo. Ke feela bao ba ineetšego go yena bao a ba amogelago e le barapedi ba gagwe. Jehofa o boletše gore Bakriste ba tloditšwego ke barwa ba gagwe bao ba lokilego. Le gona o boletše gore Bakriste ba lokilego bao e lego “dinku tše dingwe” ke bagwera ba gagwe. (Joh. 10:16; Baroma 5:1, 2; Jak. 2:21-25) Ka gona gaešita le gona bjale, topollo e dira gore Tatago rena wa legodimong a re lebelele re lokile le go bona re swanelega go thuša go kgethagatša leina la gagwe.

“MMUŠO WA GAGO A O TLE”

7. Topollo e dirile gore re tle re hwetše ditšhegofatšo dife?

7 Thapelong ya gagwe ya mohlala, selo sa bobedi seo Jesu a itšego re se rapelele ke gore: “Mmušo wa gago a o tle.” Topollo e tswalana bjang le Mmušo wa Modimo? Topollo e dirile gore batho ba 144 000 ba tle ba kgone go hlankela le Kriste e le dikgoši le baperisita kua legodimong. (Kut. 5:9, 10; 14:1) Jesu le batho bao ba 144 000, bao ka moka ba bopago Mmušo wa Modimo, ba tla diriša mehola ya topollo  ka mengwaga e sekete go thuša batho bao ba kwago Modimo. Lefase le tla ba paradeise, gomme batho ka moka bao ba botegago ba tla dirwa gore ba phethagale, gomme karolo ya lapa la Modimo ya legodimong ya kopana sa ruri le karolo ya lefaseng. (Kut. 5:13; 20:6) Jesu o tlo pšhatla hlogo ya noga gomme a fediša batho ka moka ba babe le ditlamorago tša borabele bja Sathane.Gen. 3:15.

8. (a) Jesu o ile a thuša bjang barutiwa ba gagwe go bona gore Mmušo wa Modimo o bohlokwa? (b) Re bontšha bjang gore re thekga Mmušo wa Modimo lehono?

8 Ge Jesu a be a le mo lefaseng, o ile a thuša barutiwa ba gagwe gore ba bone gore Mmušo wa Modimo o bohlokwa. Gateetee ka morago ga gore a kolobetšwe, o ile a bolela “ditaba tše dibotse tša Mmušo wa Modimo” kgole le kgauswi. (Luka 4:43) Ge Jesu a be a boela legodimong, o ile a laela barutiwa ba gagwe gore e be dihlatse tša gagwe “go fihla karolong ya kgole ya lefase.” (Dit. 1:6-8) Modiro wa rena wa go bolela ditaba tše dibotse tša Mmušo, o nea batho lefaseng ka moka sebaka sa go ithuta ka topollo e le gore ba tle ba phele ka tlase ga Mmušo wa Modimo. Lehono, re bontšha gore re thekga Mmušo wa Modimo ka go thuša bana babo Kriste mo lefaseng go tšwetša pele taelo ya Jesu ya gore ditaba tše dibotse tša Mmušo di bolelwe lefaseng ka moka.Mat. 24:14; 25:40.

“THATO YA GAGO A E DIREGE”

9. Ke ka baka la’ng re ka kgodišega gore Jehofa o tla phethagatša morero wa gagwe ka batho?

9 Sa boraro, Jesu o be a era gore’ng ge a be a re: “Thato ya gago a e direge”? Jehofa ke Mmopi. Ge a bolela gore selo se itšego se direge, go yena go ba bjalo ka ge eka se šetše se diragetše. (Jes. 55:11) A ka se dumelele borabele bja Sathane gore bo senyetše sa ruri morero wa Gagwe ka batho. E be e le morero wa Jehofa go tloga mathomong gore lefase le tlale ka bana ba phethagetšego ba Adama le Efa. (Gen. 1:28) Ge nkabe Adama le Efa ba ile ba hwa ba se na bana, morero wa Modimo wa gore ba tlatše lefase ka bana ba bona o be o ka se phethagale. Ka baka leo, ka morago ga gore Adama le Efa ba dire sebe, Jehofa o ile a ba dumelela gore ba be le bana. Ka baka la topollo, Jehofa o fa batho ka moka bao ba bontšhago tumelo go yena sebaka sa gore ba tle ba phethagale gomme ba phele ka mo go sa felego. Jehofa o rata batho, ka gona thato ya gagwe ke gore batho bao ba mo kwago ba tle ba phele ka tsela yeo a e rerilego go tloga mathomong.

10. Topollo e hola bjang batho bao ba hwilego?

10 Go thwe’ng ka batho ba dimilione bao ba hwilego ba sa tsebe Jehofa le go mo hlankela? Topollo e dirile gore Modimo a tle a tsoše batho bao ba hwilego. Tatago rena yo lerato wa legodimong o tlo ba tsoša gomme a ba nea sebaka sa go ithuta ka morero wa gagwe le go hwetša bophelo bjo bo sa felego. (Dit. 24:15) Jehofa o nyaka gore batho ba phele, e sego gore ba hwe. Ka ge e le Mothopo wa bophelo, e ba Tatago motho yo mongwe le yo mongwe yo a tsogilego bahung. (Ps. 36:9) Ka gona ga go makatše ge Jesu a itše re rapele ka gore: “Tatago rena wa magodimong.” (Mat. 6:9) Jehofa o file Jesu karolo e bohlokwa ya gore a tle a tsoše bahu. (Joh. 6:40, 44) Paradeiseng, Jesu o tla phethagatša seo a se boletšego ge a be a re ke yena “tsogo le bophelo.”Joh. 11:25.

11. Thato ya Modimo ke efe ka “lešaba le legolo”?

11 Jehofa ga a amogele batho ba sego kae feela ka lapeng la gagwe, ka gobane Jesu o itše: “Mang le mang yo a dirago thato ya Modimo, yena yo ke ngwanešo le kgaetšedi ya ka le mma.” (Mar. 3:35) Thato ya Modimo ke gore “lešaba le legolo” leo le sa balegego leo le tšwago ditšhabeng tšohle, melokong yohle le  malemeng ohle le be barapedi ba gagwe. Bao ba bontšhago tumelo topollong ya Kriste e bile ba dira thato ya Modimo ba ka ba gare ga bao ba goeletšago ka gore: “Phološo e tšwa go Modimo wa rena yo a dutšego sedulong sa bogoši, le go Kwana.”—Kut. 7:9, 10.

12. Thapelo ya mohlala e re thuša bjang go bona morero wa Jehofa bakeng sa batho bao ba mo kwago?

12 Re kgona go bona morero wa Jehofa ka batho bao ba mo kwago dikgopelong tšeo Jesu a boletšego ka tšona thapelong ya gagwe ya mohlala. Ka go dumelelana le thapelo ye, re nyaka go dira sohle seo re ka se kgonago go kgethagatša leina la Jehofa, goba go se le šilafatše. (Jes. 8:13) Leina la Jesu le bolela gore “Jehofa ke Phološo.” Ka gona, ka ge Jehofa a tlo re phološa ka baka la topollo, seo se dira gore leina la gagwe le godišwe le go retwa. Ge Mmušo wa Modimo o buša, Modimo o tla diriša mehola ya topollo go šegofatša batho bao ba mo kwago. Ruri thapelo ya Jesu ya mohlala e re kgonthišetša gore ga go na selo seo se ka thibelago thato ya Modimo gore e direge.—Ps. 135:6; Jes. 46:9, 10.

BONTŠHA GORE O LEBOGA TOPOLLO

13. Re bontšha eng ge re kolobetšwa?

13 Tsela e nngwe e bohlokwa yeo ka yona re bontšhago gore re leboga topollo ke ka go neela maphelo a rena go Jehofa ka go dumela sehlabelong sa topollo gomme ra kolobetšwa. Ge re kolobetšwa, re bontšha gore “re ba Jehofa.” (Baroma 14:8) Kolobetšo e bontšha gore re kgopela Modimo gore a re nee letswalo le lebotse. (1 Pet. 3:21) Jehofa o araba kgopelo yeo ka go diriša madi a Kriste a sehlabelo go re hlwekiša. Re tloga re kgodišegile gore o tla re fa dilo ka moka tšeo a re tshepišitšego tšona.Baroma 8:32.

Re bontšha ka ditsela dife gore re leboga topollo? (Bona serapa 13 le 14)

14. Ke ka baka la’ng re laelwa gore re rate moagišani wa rena?

14 Re ka bontšha bjang gape gore re leboga  topollo? Ka ge Jehofa a dira dilo ka moka ka lerato, thato ya gagwe ke gore barapedi ba gagwe ka moka ba bontšhe lerato go feta dilo ka moka. (1 Joh. 4:8-11) Re bontšha gore re nyaka go ba “barwa ba Tatago [rena] yo a lego magodimong” ka go rata moagišani wa rena. (Mat. 5:43-48) Taelo ya gore re rate moagišani wa rena e bohlokwa kudu ka gore ke taelo e kgolo ya bobedi Molaong wa Jehofa. (Mat. 22:37-40) Tsela e nngwe ya bohlokwa yeo re bontšhago ka yona gore re rata moagišani ke ka go kwa taelo ya gore re bolele ditaba tše dibotse tša Mmušo wa Modimo. Ge re rata batho ba bangwe, re bonagatša letago la Modimo. Ge e le gabotse, ge re ekwa taelo ya gore re rate ba bangwe, kudukudu bana babo rena, ke gona re ka bolelago gore re rata Modimo.1 Joh. 4:12, 20.

TOPOLLO E RE TLIŠETŠA “DINAKO TŠA GO LAPOLOŠA” TŠE DI TŠWAGO GO JEHOFA

15. (a) Jehofa o re nea ditšhegofatšo dife gona bjale? (b) Ke ditšhegofatšo dife tšeo a tlago go re nea tšona nakong e tlago?

15 Jehofa o tla re lebalela dibe tša rena sa ruri ge feela re bontšha tumelo go topollo. Lentšu la Modimo le re kgonthišetša gore dibe tša rena di ka ‘phumolwa.’ (Bala Ditiro 3:19-21.) Ka ge re ithutile pejana, topollo e dirile gore Jehofa a amogele bahlanka ba gagwe bao ba tloditšwego ka moya e le bana ba gagwe. (Baroma 8:15-17) Go rena ba “dinku tše dingwe,” go bjalo ka ge eka Jehofa o ngwadile lengwalo la semolao la gore a re amogele re le bana ba gagwe. Ge re tla be re phethagetše gomme re kgonne go fenya teko ya mafelelo ya Sathane, Jehofa o tla thabela go saena lengwalo leo ka tsela ya seswantšhetšo, gomme a re amogela semolao re le bana ba gagwe bao ba rategago ba mo lefaseng. (Baroma 8:20, 21; Kut. 20:7-9) Jehofa o tla rata bana bao ba gagwe ba bohlokwa ka mo go sa felego. Mehola ya topollo le yona ke ya ka mo go sa felego. (Baheb. 9:12) Mpho ye e tla dula e le bohlokwa. Ga go na motho goba selo le ge e le sefe seo se ka re amogago yona.

16. Topollo e re hotše bjang?

16 Diabolo a ka se tsoge a kgonne go thibela bao ba itsholago ka pelo ka moka gore mafelelong e be karolo ya lapa la Jehofa. Jesu o ile a tla mo lefaseng gomme a hwa “gatee ya ba moka.” Ka go re’alo, o lefile topollo sa ruri. (Baheb. 9:24-26) Ka ge Adama a ile a re aroganya le Modimo, topollo e dira gore Modimo a re amogele. Ka baka la sehlabelo sa Kriste, ga re sa le bokgobeng bja lefase le leo le laolwago ke Sathane, e bile ga re sa boifa lehu.Baheb. 2:14, 15.

17. Taba ya gore Jehofa o a go rata e bolela’ng go wena?

17 Modimo a ka se tsoge a fetošitše dilo tšeo a re tshepišitšego tšona. Go fo swana le ge melao yeo a e beetšego tlhago ya gagwe e ka se tsoge e fetogile, le yena a ka se tsoge a fetogile. O tla re direla dilo ka moka tšeo a re tshepišitšego tšona. (Mal. 3:6) Jehofa ga a fo re nea mpho ya bophelo. Eupša gape o re bontšha lerato. “Re a tseba gomme re dumela lerato le Modimo a nago le lona go rena. Modimo ke lerato.” (1 Joh. 4:16) Lefase ka moka le tla dirwa paradeise e botse, gomme yo mongwe le yo mongwe mo lefaseng o tla bonagatša lerato la Modimo. Eka re ka goeletša gotee le dibopiwa tša Modimo tše di botegago tša legodimong ge di re: “Anke tšhegofatšo le letago le bohlale le tebogo le kgodišo le matla le bokgoni e be tša Modimo wa rena go iša mehleng ya neng le neng. Amene.”Kut. 7:12.