Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) FEBRUARY 2017

Dipotšišo tše di Tšwago go Babadi

Dipotšišo tše di Tšwago go Babadi

Moapostola Paulo o ngwadile gore Jehofa “a ka se le lese le lekwa go feta kamoo le ka kgonago go kgotlelela ka gona.” (1 Bakor. 10:13) Na se se bolela gore Jehofa o lebelela e sa le pele diteko tšeo re ka kgonago go di kgotlelela gomme a di dumelela di re wela?

Ge nkabe seo se be se le bjalo, go be go tla ba le mathatanyana. Nagana ka mohlala šo: Ngwanabo rena yo mongwe yoo ngwana wa gagwe a ilego a ipolaya o kile a botšiša gore: ‘Na Jehofa o ile a bona e sa le pele gore nna le mosadi wa ka re ka kgona go kgotlelela go ipolaya ga morwa wa rena? Na morwa wa rena o ipolaile ka baka la gore Modimo a bone e sa le pele gore re tla kgona go kgotlelela?’ Na go na le lebaka le le kwagalago la go dumela gore Jehofa o laola ka go lebanya dilo tšeo di re diragalelago bophelong?

Go lebeledišiša ka kelohloko mantšu a Paulo ao a begilwego go 1 Bakorinthe 10:13 go re thuša go fihlelela phetho e latelago: Ga go na lebaka la Mangwalo la go dumela gore Jehofa o lebelela e sa le pele diteko tšeo re ka kgonago go di kgotlelela, gomme ka morago ga moo a re kgethela diteko tšeo di tlago go re wela go ithekgile ka phetho yeo a e fihleletšego ka rena. Anke re ahlaahleng mabaka a mane ao a dirago gore re phethe ka tsela yeo.

Sa pele, Jehofa o file batho tokologo ya go itirela diphetho. O nyaka gore re ikgethele tsela yeo re nyakago go phela ka yona. (Doit. 30:19, 20; Josh. 24:15) Ge re ka kgetha tsela e nepagetšego, re ka letela Jehofa gore a hlahle dikgato tša rena. (Die. 16:9) Eupša ge re ka kgetha tsela e mpe, re tla buna seo re se bjetšego. (Bagal. 6:7) Ge nkabe e le gore Jehofa o re kgethela diteko tšeo di re welago, na o be a tla be a sa re amoge tokologo yeo a re filego yona ya go itirela diphetho?

Sa bobedi, Jehofa ga a re šireletše go “nako le ditiragalo tšeo di sa letelwago.” (Mmo. 9:11) Dikotsi tše šoro—mohlomongwe tšeo di feleletšago ka masetlapelo—di ka re wela ka gobane re le lefelong le le fošagetšego ka nako e fošagetšego. Jesu o ile a bolela ka batho ba 18 bao ba ilego ba welwa ke tora gomme ba hwa, gomme a bontšha gore kotsi yeo ga se ya bakwa ke Modimo. (Luka 13:1-5) Ruri ga go kwagale go bolela gore Modimo o šetše a rulagantše gore ke mang a tlago go phela goba ke mang a tlago go bolawa ke ditiragalo tše di sa letelwago!

Sa boraro, yo mongwe le yo mongwe wa rena o swanetše go bontšha gore o botegela Modimo goba o thekga Sathane. Gopola gore Sathane o boletše gampe ka potego ya bahlanka ka moka ba  Jehofa. O boletše gore re ka se dule re botegela Jehofa ge re welwa ke diteko. (Jobo 1:9-11; 2:4; Kut. 12:10) Ge nkabe Jehofa a re kgethela diteko tšeo re ka di kgotlelelago, gona Sathane o be a tla be a bolela therešo ge a re re hlankela Jehofa ka gobane a re šegofatša.

Sa bone, ga go hlokagale gore Jehofa a tsebe e sa le pele selo se sengwe le se sengwe seo se re diragalelago. Ge nkabe Modimo a re kgethela diteko e sa le pele, seo se be se tla bolela gore o tseba se sengwe le se sengwe ka bokamoso bja rena. Eupša Mangwalo ga a thekge taba yeo. Ke therešo gore Modimo o kgona go tseba bokamoso e sa le pele. (Jes. 46:10) Eupša Beibele e bontšha gore o kgetha dilo tšeo a nyakago go di tseba e sa le pele ka bokamoso. (Gen. 18:20, 21; 22:12) Ka gona o dira seo a dutše a hlompha tokologo ya rena ya go itirela diphetho. Seo ga se re makatše ka gobane Jehofa ke Modimo yo a hlomphago tokologo ya rena le yo a dulago a bontšha dika tša gagwe ka tsela e phethagetšego.Doit. 32:4; 2 Bakor. 3:17.

Ka gona, re swanetše go kwešiša bjang mantšu a Paulo ao a rego: “Modimo . . . a ka se le lese le lekwa go feta kamoo le ka kgonago go kgotlelela ka gona”? Mo Paulo o hlalosa seo Jehofa a se dirago ge re wetšwe ke diteko, e sego pele di re wela. Mantšu a moapostola Paulo a re kgonthišetša gore go sa šetšwe diteko tšeo di ka re welago, Jehofa o tla re thekga ge e ba re ithekga ka yena. (Ps. 55:22) Mantšu a Paulo ao a kgothatšago a theilwe ditherešong tše pedi.

Therešo ya pele ke gore diteko tšeo di re welago ke tše di “tlwaelegilego bathong.” Diteko tšeo di re welago di wela batho ka moka. Eupša re ka kgona go di kgotlelela—ge feela re ithekga ka Modimo. (1 Pet. 5:8, 9) Tabeng yeo go bolelwago ka yona go 1 Bakorinthe 10:13, Paulo o šupa go diteko tšeo di ilego tša wela Baisiraele lešokeng. (1 Bakor. 10:6-11) Diteko ka moka tšeo di bego di ba wela di be di tlwaelegile, ka gona ga go na Moisiraele yo a botegago yo a bego a ka palelwa ke go di kgotlelela. Ke ka baka leo Paulo a boletšego ka makga a mane gore “ba bangwe ba bona” ba ile ba se kwe Modimo. Ka manyami, Baisiraele ba bangwe ba ile ba ineela dikganyogong tše di fošagetšego ka baka la go se ithekge ka Modimo.

Therešo ya bobedi ke gore “Modimo o a botega.” Tsela yeo Modimo a dirišanago le batho ba gagwe e bontšha gore o rata “bao ba mo ratago le bao ba bolokago ditaelo tša gagwe.” (Doit. 7:9) Le gona Modimo o bontšhitše gantši gore o dula a phethagatša dikholofetšo tša gagwe. (Josh. 23:14) Ka baka leo, bao ba mo ratago le go mo kwa ba ka kgodišega gore o tla phethagatša dikholofetšo tše di latelago tše pedi ge ba wetšwe ke diteko: (1) A ka se ba dumelele ba lekwa go fihlela ba se sa kgona go kgotlelela, e bile (2) ‘o tla ba bulela tsela ya go tšwa.’

Jehofa o re “[homotša] ditlaišegong tša rena tšohle”

Jehofa o bulela bjang batho bao ba ithekgago ka yena tsela ya go tšwa molekong? Ke therešo gore ge nkabe e le thato ya gagwe o be a ka fo tloša moleko woo. Eupša gopola mantšu a Paulo ge a be a re: “[Jehofa] o tla bula tsela ya go tšwa e le gore le kgone go kgotlelela.” Ka gona, gantši Jehofa o re bulela “tsela ya go tšwa” ka go re nea thušo yeo re e hlokago gore re kgone go kgotlelela diteko. Ela hloko tše dingwe tša ditsela tšeo Jehofa a re bulelago tsela ya go tšwa molekong:

  • O re “[homotša] ditlaišegong tša rena tšohle.” (2 Bakor. 1:3, 4) Jehofa a ka re nea khutšo ya monagano, a re fodiša dipelo le go re matlafatša a diriša Lentšu la Gagwe, moya wa gagwe o mokgethwa le dijo tša moya tšeo re di newago ke mohlanka yo a botegago.Mat. 24:45; Joh. 14:16, Baroma. 15:4

  • A ka re hlahla ka moya o mokgethwa. (Joh. 14:26) Ge re welwa ke diteko, moya o mokgethwa o ka re thuša go gopola dipego tša Beibele le melao ya motheo ke moka ra lemoga seo re ka se dirago.

  • A ka diriša barongwa ba gagwe go re thuša.Baheb. 1:14.

  • A ka diriša barapedigotee le rena bao ba ka re ‘matlafatšago’ ka mantšu a bona le ka ditiro.Bakol. 4:11.

Ka gona, re ka phetha ka gore’ng ka mantšu a Paulo ao a lego go 1 Bakorinthe 10:13? Re phetha ka gore Jehofa ga a re kgethele diteko tšeo di re welago. Eupša ge diteko di re wela, re ka kgodišega ka taba še: Ge e ba re ithekga ka Jehofa ka mo go feletšego, a ka se tsoge a dumeletše gore re lekwe go fihlela re se sa kgona go kgotlelela; o tla dula a re bulela tsela ya go tšwa e le gore re kgone go kgotlelela. Ruri seo se a kgothatša!