Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) FEBRUARY 2017

Morero wa Jehofa o tlo Phethagala!

Morero wa Jehofa o tlo Phethagala!

“Ke o boletše, ke tla o phethagatša. Ke o hlamile, e bile ke tla o phetha.”JES. 46:11.

DIKOPELO: 147, 149

1, 2. (a) Ke’ng seo Jehofa a re utolletšego sona? (b) Re hwetša kgonthišetšo efe go Jesaya 46:10, 11 le 55:11?

BEIBELE e thoma ka mantšu a bonolo eupša e le a matla ao a rego: “Mathomong Modimo o hlodile magodimo le lefase.” (Gen. 1:1) Ke therešo gore re kwešiša ganyenyane dilo tše dintši tšeo Modimo a di bopilego, tše bjalo ka sebakabaka, seetša le matlakgogedi, e bile re bone feela karolo e nyenyane ya legohle. (Mmo. 3:11) Lega go le bjalo, Jehofa o re utolletše morero wa gagwe ka lefase le ka batho. Jehofa o be a bopile lefase gore e be legae la batho bao a ba dirilego ka seswantšho sa gagwe. (Gen. 1:26) E be e tla ba bana ba gagwe, gomme Yena ya ba Tatago bona.

2 Ka ge go hlalositšwe kgaolong ya boraro ya Genesi, morero wa Jehofa o ile wa šitišwa. (Gen. 3:1-7) Lega go le bjalo, ga se gore bothata bjoo bo be bo ka se rarollege. Ga go na motho yo a ka paledišago Jehofa go phetha morero wa gagwe. (Jes. 46:10, 11; 55:11) Ka baka leo, re ka kgodišega gore morero wa mathomong wa Jehofa o tla phethagala ka nako e swanetšego!

3. (a) Ke ditherešo dife tša bohlokwa tšeo di re thušago go kwešiša seo Beibele e se rutago? (b) Ke ka baka la’ng re ahlaahla dithuto tše gona bjale? (c) Re tlo ahlaahla dipotšišo dife?

3 Ga go pelaelo gore re tseba seo Beibele e se rutago ka morero wa  Modimo ka lefase le batho gaešita le ka karolo e bohlokwa yeo Jesu Kriste a e kgathago go phethagatšweng ga morero wa Modimo. Tše ke ditherešo tše bohlokwa kudu e bile ke tše dingwe tša ditherešo tšeo re ithutilego tšona la mathomo ka Lentšung la Modimo ge re be re thoma go badišwa. Le rena re nyaka go thuša batho ba lokilego go tseba dithuto tše tše bohlokwa. Gona bjale ge re dutše re ithuta sehlogo se re le phuthego, re šoma ka matla go laletša batho ba bantši ka mo go kgonegago gore ba tle Segopotšong sa lehu la Kriste. (Luka 22:19, 20) Bao ba tlago go tla Segopotšong ba tlo ithuta dilo tše dintši ka morero wa Modimo. Ka ge go šetše matšatši a sego kae pele Segopotšo se fihla, re swanetše go nagana ka dipotšišo tšeo di tla thušago barutwana ba rena ba Beibele le batho ba bangwe ba dipelo tše dibotse gore ba tle tiragalong ye e bohlokwa. Sehlogong se, re tlo ahlaahla dipotšišo tše tharo tše di rego: Morero wa Modimo ka lefase le batho e be e le ofe? Ka ge morero woo o se wa phethagala, go senyegile kae? Gona ke ka baka la’ng sehlabelo sa Jesu sa topollo se be se nyakega gore morero wa Modimo o phethagale?

MORERO WA MMOPI KA BATHO E BE E LE OFE?

4. Tlholo e re ruta’ng ka Jehofa?

4 Jehofa ke Mmopi yo a makatšago. Selo se sengwe le se sengwe seo a se bopago e ba sa maemo a godimo kudu. (Gen. 1:31; Jer. 10:12) Re ka ithuta’ng tlholong ya gagwe e botse le yeo e rulagantšwego ka tsela e makatšago? Ge re lebelela tlholo, re kgahlwa kudu ke tsela yeo dilo ka moka tšeo Jehofa a di bopilego—tše dikgolo le tše dinyenyane—di phethagatšago morero o bohlokwa. Ke mang yo a sa makatšwego ke magodimo ao a tletšego dinaledi bošego, go kgahliša ga maphoto a magolo a lewatle, goba bobotse bja diphororo? Re kgahlwa kudu ke tlholo ye ya Modimo ka gore o re bopile re na le bokgoni bja go thabela dilo tše dibotse.Bala Psalme 19:1; 104:24.

5. Ke’ng seo Jehofa a se dirilego go kgonthišetša gore tlholo ka moka e a dirišana?

5 Go etša ge re bona tlholong, Jehofa ka lerato o beetše selo se sengwe le se sengwe mellwane. O beetše tlhago melao gomme rena a re nea melao ya boitshwaro go kgonthišetša gore dilo ka moka di sepela ka thulaganyo. (Ps. 19:7-9) Ke ka baka leo dilo ka moka legohleng di nago le lefelo la tšona le go šoma ka go dumelelana le morero wa Modimo. Jehofa o beetše tlholo ya gagwe ka moka melao gore e dirišane. Ka mohlala, matlakgogedi a dira gore sebakabaka se dule se le kgauswi le lefase, a dira gore maphoto a mawatle a se ke a tshela mollwane, e bile a thuša gore re kgone go phela gabotse mo lefaseng. Tlholo ka moka, go akaretša le batho, e latela melao yeo Modimo a e beetšego yona. Go molaleng gore tsela yeo tlholo e rulagantšwego ka yona e bontšha gore Modimo o na le morero ka lefase le ka batho. Ge re le tšhemong, na re ka thuša batho go tseba Modimo yo a hlodilego dilo tše tšeo di makatšago?Kut. 4:11.

6, 7. Tše dingwe tša dilo tšeo Modimo a bego a di neile Adama le Efa ke dife?

6 Morero wa Jehofa wa mathomong e be e le gore batho ba phele ka mo go sa felego mo lefaseng. (Gen. 1:28; Ps. 37:29) O ile a nea Adama le Efa dilo tše dintši tšeo di bego di ba thuša go thabela bophelo. (Bala Jakobo 1:17.) Jehofa o ile a ba nea tokologo ya go itirela diphetho, bokgoni bja go nagana, bja go rata le bja go thabela segwera. Mmopi o ile a botša Adama seo a swanetšego go se dira go bontšha gore o a kwa. Le gona Adama o ile a ithuta kamoo a ka itlhokomelago le go hlokomela diphoofolo le lefase. (Gen. 2:15-17, 19, 20) Go oketša moo, Jehofa o ile a bopa Adama le Efa ba na le bokgoni bja go kwa tatso, go kgoma, go bona, go kwa medumo le go dupa. Ka gona ba be ba ka thabela go phela legaeng la bona le lebotse la Paradeise. Banyalani ba ba mathomo ba be ba tlo ipshina ka mošomo o thabišago le bophelo bjo bo kgotsofatšago  bja sa ruri.

7 Ke’ng se sengwe gape seo e bego e le morero wa Modimo? Modimo o be a bopile Adama le Efa ba na le bokgoni bja go ba le bana ba ba phethagetšego. Modimo o be a rerile gore bana ba Adama le Efa le bona ba tle ba be le bana, go ba go fihlela ge batho ba tletše lefaseng. O be a nyaka gore Adama le Efa le batswadi ba bangwe ka morago ga bona ba rate bana ba bona, go swana le ge Yena a ile a rata bana gagwe ba pele bao ba bego ba phethagetše. Lefase le dilo ka moka tšeo di lego go lona le be le swanetše go ba legae la bona la sa ruri.Ps. 115:16.

GO SENYEGILE KAE?

8. Ke ka baka la’ng Jehofa a ile a nea Adama le Efa molao wo o lego go Genesi 2:16, 17?

8 Morero wa Modimo o ile wa šitišwa di sa tloga fase. Go diragetše’ng? Jehofa o ile a nea Adama le Efa molao o bonolo wo o bego o tla bontšha ge e ba ba mo kwa. O ile a re: “O ka ja wa ba wa kgotsofala ka se se tšwago sehlareng se sengwe le se sengwe sa mo serapeng. Eupša ge e le sehlare sa go tseba botse le bobe o se ke wa ja tša sona, gobane mohlang o ka jago tša sona o tla hwa lehu.” (Gen. 2:16, 17) Adama le Efa ba be ba kwešiša molao wo gabotse; e bile go be go se boima gore ba o latele. Ba be ba se na lebaka la gore ba se ke ba o latela ka gore Modimo o be a ba neile dijo tše dintši.

9, 10. (a) Sathane o ile a bolela maaka afe ka Jehofa? (b) Adama le Efa ba ile ba dira phetho efe? (Bona seswantšho seo se lego mathomong a sehlogo.)

9 Sathane Diabolo o ile a diriša noga go fora Efa gore a se kwe Tatagwe e lego Jehofa. (Bala Genesi 3:1-5; Kut. 12:9) Sathane o ile a tsoša mmudubudu ka taba ya gore Modimo o be a sa dumelela batho bao a ba bopilego gore ba je dienywa tša “sehlareng se sengwe le se sengwe sa serapeng [sa Edene].” Go be go le bjalo ka ge eka o re go Efa: ‘O nyaka go mpotša gore Modimo ga a nyake o dira seo o se ratago?’ Ka morago Sathane o ile a bolela maaka a matala a re: “Le ka se hwe lehu.” Ke moka a leka go kgodiša Efa gore ga go hlokagale gore a kwe Modimo, a re go yena: “Modimo o tseba gore ka lona letšatši leo le tlago go ja tša sona, mahlo a lena a tla bulega.” Sathane o be a bolela gore Jehofa o be a sa nyake gore ba je dienywa tša sehlare seo ka gore di be di tla ba hlalefiša. Go oketša moo, Sathane o ile a bolela maaka ka go tshepiša Efa gore: “[Le tla] swana le Modimo, la tseba botse le bobe.”

10 Ga bjale Adama le Efa ba be ba swanetše go dira phetho. Na ba be ba tla kwa Jehofa, goba na ba be ba tla kwa noga? Ba ile ba kgetha go se kwe Modimo. Ka go dira bjalo, ba ile ba kgetha go ema le Sathane. Ba ile ba gana Jehofa gore e be Tatago bona gomme ba se kwe molao wa gagwe wo o bego o ba šireletša.Gen. 3:6-13.

11. Ke ka baka la’ng Jehofa a sa kwane le borabele?

11 Ka go se kwe Jehofa, Adama le Efa ba ile ba lahlegelwa ke tokelo ya go ba bao ba phethagetšego. Go oketša moo, go rabela ga bona go feleleditše ka gore ba ikaroganye le Jehofa ka gore ‘mahlo a Jehofa a sekile kudu moo a ka se kego a lebelela bobe.’ Ka baka leo, o “palelwa ke go bogela bokgopo,” goba go bo kgotlelela. (Habak. 1:13) Ge nkabe a bo kgotleletše, dilo ka moka tše di phelago legodimong le lefaseng di be di tla ba kotsing. Ka godimo ga tšohle, ge nkabe Modimo a ile a se dire selo ka sebe seo se dirilwego kua tšhemong ya Edene, dibopiwa tše dingwe tša gagwe di be di tla ipotšiša gore ke Modimo wa mohuta mang. Eupša Jehofa o botegela ditekanyetšo tša gagwe; ka mehla o phetha seo a se boletšego. (Ps. 119:142) Ka gona taba ya gore Adama le Efa ba be ba na le tokologo ya go itirela diphetho e be e sa re gore ba tshele molao wa Modimo. Adama le Efa ba ile ba hwa ka baka la go se kwe Jehofa gomme ba boela mmung woo ba bego ba bopilwe ka wona.Gen. 3:19.

12. Go ile gwa direga’ng ka bana ba Adama?

 12 Ge Adama le Efa ba be ba eja seenywa sa sehlare sa gare ga tšhemo, ba ile ba ithaka ka lapeng la Modimo la legohle. Modimo o ile a ba raka tšhemong ya Edene, gomme gwa se sa kgonega gore ba boele go yona. (Gen. 3:23, 24) Ka ge Jehofa e le Modimo wa toka, o ile a dira gore ba bune ditlamorago tša phetho ya bona. (Bala Doiteronomio 32:4, 5.) Go tloga ka nako yeo, go be go se sa na motho mo lefaseng yo a bego a ka bonagatša dika tša Modimo ka mo go phethagetšego. Ga se feela gore Adama o lahlile bokamoso bjo bobotse, eupša gape o fetišeditše go se phethagale, sebe le lehu baneng ba gagwe. (Baroma 5:12) O dirile gore re fetwe ke bophelo bjo bo sa felego. Go feta moo, Adama le Efa ba be ba ka se sa kgona go ba le bana ba ba phethagetšego; e bile le bana ba bona ba be ba ka se tsoge ba bile le bana ba ba phethagetšego. Ka morago ga gore Sathane Diabolo a dire gore Adama le Efa ba hlanogele Modimo, o ile a tšwela pele a lahletša batho.Joh. 8:44.

TOPOLLO E RAROLLA MATHATA

13. Ke’ng seo Jehofa a se kganyogelago batho?

13 Jehofa o tla dula a re rata. Go sa šetšwe go se kwe ga Adama le Efa, o nyaka gore batho e be bagwera ba gagwe. Ga a nyake gore motho le ge e le ofe a hwe. (2 Pet. 3:9) Ka gona gateetee ka morago ga borabele bja Adama le Efa, Jehofa o ile a rulaganya gore batho e tle e be bagwera ba gagwe gape, mola ka nako e swanago a kgomaretše ditekanyetšo tša gagwe tša go loka. O ile a dira seo bjang?

14. (a) Go ya ka Johane 3:16, ke tokišetšo efe yeo Modimo a e dirilego go phološa batho sebeng le lehung? (b) Ke potšišo efe yeo re ka e ahlaahlago le batho bao ba thabelago?

14 Bala Johane 3:16. Ba bantši ba batho bao re ba laletšago Segopotšong ba tseba temana ye ka hlogo. Eupša potšišo ke gore: Sehlabelo sa Jesu se dira bjang gore re tle re hwetše bophelo bjo bo sa felego? Re hwetša sebaka sa go thuša batho bao ba tsomago therešo go tseba karabo ya potšišo yeo e bohlokwa nakong ya ge re laletša batho Segopotšong, letšatšing la Segopotšo le ka morago ge re etela batho bao ba bego ba tlile Segopotšong. Batho bao ba ka thabišwa ke go tseba gore topollo e bontšha gore Jehofa o a re rata le gore o bohlale. Ke ditaba dife tša mabapi le topollo tšeo re ka ba thušago go di kwešiša?

15. Ke’ng se se dirilego gore Jesu a se swane le Adama?

15 Jehofa o neetše ka motho yo a phethagetšego yo a bego a tla re lopolla. Motho yoo yo a phethagetšego o be a tla swanelwa ke gore a botegele Jehofa gomme a ikemišetše go neela ka bophelo bja gagwe gore batho ba phološwe. (Baroma 5:17-19) Jehofa o ile a dira gore morwa yoo wa gagwe wa mathomo a tle a belegwe mo lefaseng e le motho. (Joh. 1:14) Ka gona Jesu o ile a ba motho yo a phethagetšego, go no swana le Adama. Eupša ka go se swane le Adama, Jesu o ile a phela ka go dumelelana le ditekanyetšo tšeo Jehofa a bego a di beetše motho yo a phethagetšego. Gaešita le ge Jesu a ile a lekwa o šoro, ga se a ka a dira sebe goba a roba molao le ge e le ofe wa Modimo.

16. Ke ka baka la’ng topollo e le mpho e bohlokwa kudu?

16 Ka ge Jesu a be a phethagetše, o be a ka phološa batho sebeng le lehung ka go ba hwela. O be a swana le Adama pele a ka dira sebe. O be a phethagetše, a botega e bile a ekwa Modimo. (1 Tim. 2:6) Jesu o ile a hwa lehu la sehlabelo e le gore batho “ba bantši” ba tle ba hwetše bophelo bjo bo sa felego—e lego banna, basadi le bana. (Mat. 20:28) Ruri topollo ke yona feela e dirago gore morero wa mathomong wa Modimo o phethagale. (2 Bakor. 1:19, 20) Topollo e dira gore batho ka moka ba ba botegago ba tle ba hwetše bophelo bjo bo sa felego.

 JEHOFA O DIRILE GORE RE BOELANE LE YENA

17. Ke’ng seo topollo e dirago gore se kgonege?

17 Jehofa o dirile boikgafo bjo bogolo ka go re nea morwa wa gagwe gore a tle a re hwele. (1 Pet. 1:19) O rata batho kudu moo a ilego a dira gore Morwa wa gagwe yo a tswetšwego a nnoši a re hwele. (1 Joh. 4:9, 10) Ka mantšu a mangwe, re ka re Jesu o tšere legato la tatago rena wa pele e lego Adama. (1 Bakor. 15:45) Ka go dira bjalo, Jesu ga a re thuše feela go tlo hwetša bophelo bjo bo sa felego; eupša o re nea le sebaka sa gore mafelelong re tle re boele ka lapeng la Modimo. Ka baka la sehlabelo sa Jesu, Jehofa o kgona go amogela batho ka lapeng la gagwe ntle le gore a tshele ditekanyetšo tša gagwe tša go loka. Na ga re thabe ge re nagana ka nako yeo Jehofa a tla dirago gore batho ka moka ba botegago ba phethagale? Ka nako yeo, go tla ba le botee bjo bo feletšego magareng ga karolo ya legodimong ya lapa la gagwe le karolo ya lefaseng ya lapa la gagwe. Le gona re tla ba bana ba Modimo ka kgopolo e feletšego.Baroma 8:21.

18. Ke neng moo Jehofa a tlago go ba “tšohle go yo mongwe le yo mongwe”?

18 Borabele bja Sathane ga se bja thibela Jehofa go rata batho, e bile bo ka se thibele batho ba sa phethagalago gore ba botegele Jehofa. Jehofa o tlo diriša topollo go thuša bana ba gagwe ka moka gore e be ba lokilego. Nagana kamoo bophelo bo tla bago ka gona ge motho yo mongwe le yo mongwe “yo a lemogago Morwa” le go “dumela go yena” a hwetša bophelo bjo bo sa felego! (Joh. 6:40) Ka ge Jehofa a re rata e bile a le bohlale, o tlo dira gore re phethagale, ka go dumelelana le morero wa gagwe wa mathomong. Ka gona Jehofa, yena Tatago rena, o tla ba “tšohle go yo mongwe le yo mongwe.”1 Bakor. 15:28.

19. (a) Ke’ng seo re tlago go se dira ge e ba re leboga topollo? (Bona lepokisi le le rego, “ A re Tšweleng Pele re Tsoma ba ba Swanelegago.”) (b) Sehlogong se se latelago, re tlo ahlaahla’ng gape mabapi le topollo?

19 Ge e ba re leboga topollo, re tla dira sohle seo re ka se kgonago go botša batho ba bangwe gore le bona ba ka holwa ke mpho ye e kgolo. Ba swanetše go tseba gore ka lerato Jehofa o diriša topollo go thuša batho ka moka gore ba tle ba hwetše bophelo bjo bo sa felego. Eupša topollo ga se ya dira feela gore re tle re hwetše bophelo bjo bo sa felego. Sehlogo se se latelago se tlo bontšha gape kamoo sehlabelo sa Jesu se rarollago mmudubudu woo Sathane a o tsošitšego kua tšhemong ya Edene.