Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) FEBRUARY 2017

Babulamadibogo ba babedi e lego George Rollston le Arthur Willis ba tšhela meetse koloing ya bona.—Northern Territory, ka 1933

 GO TŠWA BOBOLOKELONG BJA RENA

“Ga go na Tsela Yeo e sa Sepelegego Goba e Telele”

“Ga go na Tsela Yeo e sa Sepelegego Goba e Telele”

KA MARCH 26, 1937, banna ba babedi bao ba bego ba lapile ba be ba otlela koloi ya bona yeo e tletšego marole ba lebile motseng wa Sydney, kua Australia. Ga e sa le ba tloga motseng wa gabo bona, ba be ba sepetše dikhilomithara tše di fetago tše 19 300 go phatša tše dingwe tša dilete tšeo di lego thoko le tšeo di sa sepelegego kontinenteng yeo. Banna ba ba be ba se leetong la go tšama ba boga naga goba go tsoma dilo tše itšego. Arthur Willis le Bill Newlands e be e no ba bangwe ba babulamadibogo ba fišegago bao ba bego ba nyaka go bolela ditaba tše dibotse tša Mmušo wa Modimo metseng e mentši ya kgole le ditoropo ya kua Australia.

Go fihla mafelelong a bo-1920, Barutwana ba Beibele * ba sego kae kua Australia ba be ba boletše ditaba tše dibotse metseng ya kgauswi le lewatle le ditoropong tša moo. Kgojana le lewatle la Australia go be go na le metsana yeo e phatlaletšego, yeo e bego e le tikologong ya bogolo bjo bo fetago seripagare sa naga ya United States. Lega go le bjalo, bana babo rena bao ba babedi ba be ba tseba gore balatedi ba Jesu ba be ba swanetše go nea bohlatse ka yena “go fihla karolong ya kgole ya lefase,” go akaretša le metseng ya kgole le ditoropo ya Australia. (Dit. 1:8) Eupša ba be ba tla phetha bjang modiro o mo kaakaa? Ka ge ba be ba na le tumelo ya gore Jehofa o tla šegofatša maiteko a bona, ba ile ba ikemišetša go dira sohle seo ba ka se kgonago.

BABULAMADIBOGO BA BULA DIKGORO

Ka 1929, bana babo rena ba diphuthegong tša kua Queensland le ka Bodikela bja Australia ba ile ba itlhamela mohuta o itšego wa dikoloi e le gore ba kgone go fihla metseng ya kgole le ditoropo. Dikoloi tše di be di dirišwa ke babulamadibogo ba matšato le ba go šoma ka thata, bao ba bego ba ka kgona go phela maemong a thata gomme ba ka kgona go lokiša dikoloi tšeo ge di senyegile. Babulamadibogo bao ba ile ba fihla metseng e mentši yeo batho ba gona ba sa kago ba kwa molaetša wa Beibele.

Babulamadibogo bao ba bego ba sa kgone go reka dikoloi ba be ba diriša dipaesekela. Ka mohlala, ka 1932, Bennett Brickell, yo a bego a na le mengwaga e 23, o ile a tloga Rockhampton, kua Queensland gomme a tšea leeto la dikgwedi tše hlano a tšama a bolela ditaba tše dibotse metseng yeo e lego kgole le ditoropo karolong ya ka leboa nageng yeo. Paesekela ya gagwe e be e mo imela ka gobane o be a laišitše mapai, diaparo, dijo le dipuku tše dintši. Ge ditaere tša paesekela ya gagwe di be di fela, o be a no tšwela pele ka leeto, a kgodišegile gore Jehofa o tla mo thuša. Mafelelong o ile a kgorometša paesekela ya gagwe dikhilomithara tše 320 a phatša ditikologong tšeo batho ba ilego ba bolawa ke lenyora. Mengwageng e fetago e 30 e latetšego, Ngwanabo rena Brickell o ile a sepela dikhilomithara tše makgolo kua  Australia a diriša paesekela, sethuthuthu le koloi. Ke yena wa mathomo wa go botša Maaborigine ditaba tše dibotse kua Australia gomme a thuša go hloma diphuthego tše difsa. E bile o ile a tuma le go hlomphiwa metsaneng ka moka ya moo.

GO FENYA MATHATA

Australia ke e nngwe ya dinaga tšeo di nago le badudi ba sego kae lefaseng, kudukudu metseng ya yona yeo e lego kgole le ditoropo. Ke ka baka leo batho ba Jehofa ba dirago maiteko a go botša batho ba ditikologong tšeo tša kgole ditaba tše dibotse.

Babulamadibogo ba babedi e lego Stuart Keltie le William Torrington ba ile ba dira maiteko ao. Ka 1933, ba ile ba phatša Leganata la Simpson, e lego leganata leo le tletšego mekgobo e mentši ya santa, e le gore ba yo bolela ditaba tše dibotse toropong ya Alice Springs, ka garegare ga kontinente ye. Koloi ya bona e ile ya senyega gomme ba swanelwa ke gore ba e tlogele. Ngwanabo rena Keltie, yoo a bego a na le leoto la maitirelo la kota, o ile a tšwela pele ka leeto la bona la go yo bolela ditaba tše dibotse, eupša lebakeng le a diriša kamela! Maiteko a babulamadibogo ba a ile a ba le mafelelo a mabotse ge ba be ba kopana le molaodi wa hotele seteišeneng sa terene sa William Creek. Molaodi yoo wa hotele, yo a bitšwago Charles Bernhardt, ka morago o ile a amogela therešo, a rekiša hotele ya gagwe gomme a bula madibogo a nnoši ka mengwaga e 15 dikarolong tše dingwe tša kgole tša Australia tšeo di bego di diila.

Arthur Willis o itokišeletša go yo bolela ditaba tše dibotse metseng ya kgole le ditoropo kua Australia.—Perth, Western Australia, ka 1936

Ka ge babulamadibogo ba e be e le bona ba mathomo ba go iša ditaba tše dibotse metseng ye, ba be ba swanetše go ba le sebete le matla a go kgotlelela mathata a mantši ao ba bego ba lebeletšana le ona. Ge Arthur Willis le Bill Newlands bao go boletšwego ka bona mathomong a sehlogo se ba dutše ba bolela ditaba tše dibotse metseng ya kgole le ditoropo kua Australia, lebakeng le lengwe ba ile ba fetša dibeke tše pedi go sepela dikhilomithara tše 32 leganateng ka gobane dipula tše matla di be di dirile gore leganata leo le tlale ka maraga. Ka dinako tše dingwe, ba be ba elela kudumela e bile ba goga ka kgara letšatšing le le fišago tšhiritšhiri ge ba dutše ba kgorometša koloi ya bona mekgobong e megolo ya disanta. Ba be ba phatša mafelong ao a tletšego maswika e bile ba tshela dinoka tšeo di tletšego santa. Ge koloi ya bona e senyega, ka ge seo se be se direga gantši, ba be ba sepela matšatši a mantši ka dipaesekela goba ka maoto go yo reka diphatse tša koloi toropong ya kgauswi, ke moka ba di letele ka dibekebeke. Go sa šetšwe mathata ao, ba be ba dula ba thabile. Ka morago, Arthur Willis o ile a bolela ka boripana taba yeo e kilego ya bolelwa ka makasineng wa The Golden Age gomme a re: “Go dihlatse tša Jehofa, ga go na tsela yeo e sa sepelegego goba e telele.”

Charles Harris, yo a bilego mmulamadibogo ka nako e telele, o hlalositše gore go bolela ditaba tše dibotse metseng yeo ya kgole le ditoropo le ya go hlaka go mmatameditše kgauswi le Jehofa. O okeditše ka gore: “Bophelo bo bose ge o se na dilo tše dintši. Ge e ba Jesu a be a ikemišeditše go robala hlageng, gona le rena re swanetše go dira bjalo ge e ba kabelo ya rena e nyaka re dira bjalo.” Se ke sona seo babulamadibogo ba bantši ba se dirilego. Ka baka la maiteko a bona ba sa lape, ditaba tše dibotse di ile tša fihla kgole le kgauswi kontinenteng ya Australia, gomme ba thuša batho ba bantši kudu go thekga Mmušo wa Modimo.

^ par. 4 Barutwana ba Beibele ba ile ba bitšwa Dihlatse tša Jehofa ka 1931.Jes. 43:10.