Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) FEBRUARY 2016

Bontšha Gore o Botegela Jehofa

Bontšha Gore o Botegela Jehofa

“Jehofa e tla ba hlatse ya ka le ya gago le ya bana ba ka le bana ba gago go iša mehleng ya neng le neng.”—1 SAMUELE 20:42.

DIKOPELO: 125, 62

1, 2. Ke ka baka la’ng segwera sa Jonathane le Dafida e le mohlala o mogolo wa potego?

JONATHANE o swanetše go ba a ile a makatšwa kudu ke sebete sa lesogana leo le bitšwago Dafida. Dafida o be a bolaile senatla se se bitšwago Goliata gomme a tliša ‘hlogo ya Mofilisita yoo’ go tatago Jonathane e lego Kgoši Saulo wa Isiraele. (1 Samuele 17:57) Jonathane o be a sa belaele gore Modimo o be a thekga Dafida, gomme go tloga ka yona nako yeo, Jonathane le Dafida e ile ya ba bagwera ba bagolo. Ba ile ba holofetšana gore ba tla dula ba botegelana. (1 Samuele 18:1-3) Bophelong bja gagwe ka moka, Jonathane o ile a botegela Dafida.

2 Jonathane o ile a dula a botegela Dafida gaešita le ge Jehofa a be a kgethile Dafida gore e tle e be kgoši e latelago ya Isiraele legatong la gagwe. Le gona ge Saulo a be a nyaka go bolaya Dafida, Jonathane o ile a tshwenyega ka mogwera yo wa gagwe. O be a tseba gore Dafida o lešokeng kua Horeshe, ka gona a ya moo go yo mo kgothatša gore a dule a ithekgile ka Jehofa. Jonathane o ile a re go Dafida: “O se ke wa boifa; Saulo tate a ka se go dire selo gomme wena o tla ba kgoši ya Isiraele, wa ba yo bohlokwa  go mpheta; Saulo tate le yena o tseba seo.”—1 Samuele 23:16, 17.

3. Ke’ng se se bego se le bohlokwa kudu go Jonathane go feta go botegela Dafida, gona re tseba seo bjang? (Bona seswantšho seo se lego mathomong a sehlogo.)

3 Gantši re hlompha batho ba go botega. Eupša na re hlompha Jonathane feela ka gobane a be a botegela Dafida? Aowa, selo se segolo bophelong bja Jonathane e be e le go botegela Modimo. Ge e le gabotse, seo ke sona se dirilego gore a botegele Dafida le go se mo jele mona, gaešita le ge Dafida e be e tlo ba kgoši legatong la gagwe. Jonathane o ile a ba a thuša Dafida go ithekga ka Jehofa. Banna ba ba ile ba dula ba botegela Jehofa le go botegelana. Ba ile ba phelela mantšu a bona ao a rego: “Jehofa e tla ba hlatse ya ka le ya gago le ya bana ba ka le bana ba gago go iša mehleng ya neng le neng.”—1 Samuele 20:42.

4. (a) Ke’ng se se tlago go re thabiša e le ka kgonthe le go re kgotsofatša? (b) Re tlo ahlaahla’ng sehlogong se?

4 Le rena re swanetše go botegela ditho tša malapa a rena, bagwera le bana babo rena le dikgaetšedi ka phuthegong. (1 Bathesalonika 2:10, 11) Eupša go feta tšohle, re swanetše go botegela Jehofa. Ke Yena a re neilego bophelo! (Kutollo 4:11) Ge re mmotegela, re thaba e le ka kgonthe le go kgotsofala. Eupša re a tseba gore re swanetše go botegela Modimo le dinakong tše thata. Sehlogong se, re tlo ahlaahla kamoo mohlala wa Jonathane o ka re thušago go dula re botegela Jehofa maemong a latelago a mane: (1) ge re nagana gore motho yo a itšego yo a re okametšego ga a swanelwe ke tlhompho ya rena, (2) ge re tlamegile go kgetha yo re swanetšego go mmotegela, (3) ge ngwanabo rena yo a etelelago pele ka phuthegong a sa re kwešiše goba a re swara makgwakgwa le (4) ge re thatafalelwa ke go phetha seo re se holofeditšego.

GE RE NAGANA GORE MOTHO YO A ITŠEGO YO A RE OKAMETŠEGO GA A SWANELWE KE TLHOMPHO YA RENA

5. Ke ka baka la’ng setšhaba sa Isiraele se be se thatafalelwa ke go botegela Modimo ge Saulo e be e le kgoši?

5 Jonathane le setšhaba sa Isiraele ba be ba le maemong a thata. Tatago Jonathane e lego Kgoši Saulo, o be a se sa kwa Jehofa, gomme Jehofa a mo lahla. (1 Samuele 15:17-23) Lega go le bjalo, Modimo o ile a mo dumelela gore a tšwele pele a buša ka nywaga e mentši. Ka gona setšhaba se be se thatafalelwa ke go botegela Modimo ge kgoši yeo e bego e beilwe “sedulong sa bogoši sa Jehofa” e be e dira dilo tše mpe kudu.—1 Dikoronika 29:23.

6. Ke’ng se se bontšhago gore Jonathane o ile a dula a botegela Jehofa?

6 Jonathane o ile a dula a botegela Jehofa. Nagana ka seo a ilego a se dira ka moragonyana ga gore Saulo a thome go se sa kwa Modimo. (1 Samuele 13:13, 14) Ka nako yeo, madira a mantšintši a Bafilisita a ile a tla go hlasela Isiraele ka dikoloi tša ntwa tše 30 000. Saulo o be a na le mašole a 600 feela, le gona ke yena le Jonathane feela ba bego ba swere dibetša. Eupša Jonathane o be a sa boife. O ile a gopola mantšu a moporofeta Samuele ao a rego: “Jehofa a ka se lahle batho ba gagwe ka baka la leina la gagwe le legolo.” (1 Samuele 12:22) Jonathane o ile a bolela le lešole le lengwe a re: “Ga go seo se ka paledišago Jehofa gore a phološe batho ka batho ba bantši goba ka ba sego kae.” Ka gona yena le lešole leo ba ile ba ya ba hlasela sehlopha se itšego sa Bafilisita gomme ba bolaya batho ba e ka bago ba 20. Jonathane o be a na le tumelo go Jehofa, gomme Jehofa o ile a mo šegofatša. Jehofa o ile a dira gore go be le  tšhišinyego ya lefase gomme Bafilisita ba tšhoga, ba thoma go bolayana ke moka Baisiraele ba fenya.—1 Samuele 13:5, 15, 22; 14:1, 2, 6, 14, 15, 20.

7. Jonathane o ile a swara tatagwe bjang?

7 Gaešita le ge Saulo a ile a tšwela pele a sa kwe Jehofa, Jonathane o ile a tšwela pele a ekwa tatagwe dilong tšeo di bego di sa thulane le melao ya Jehofa. Ka mohlala, ba ile ba ya ntweng mmogo go yo lwela setšhaba sa Jehofa.—1 Samuele 31:1, 2.

8, 9. Re bontšha bjang gore re botegela Modimo ge re hlompha bao ba nago le matla a bolaodi?

8 Go swana le Jonathane, re ka botegela Jehofa ka go kwa babuši dilong tšeo di sa thulanego le melao ya Jehofa. Jehofa o dumelela ‘balaodi ba ba bagolo’ go re buša, gomme o nyaka gore re ba hlomphe. (Bala Baroma 13:1, 2.) Ke ka baka leo re swanetšego go hlompha mohlankedi le ge e le ofe wa mmušo gaešita le ge a sa botege gomme re nagana gore ga a swanelwe ke tlhompho ya rena. Ge e le gabotse, re swanetše go hlompha bohle bao Jehofa a ba neilego matla a bolaodi.—1 Bakorinthe 11:3; Baheberu 13:17.

Tsela e nngwe yeo ka yona re botegelago Jehofa ke ka go hlompha balekane ba rena ba lenyalo gaešita le ge ba sa hlankele Jehofa (Bona serapa 9)

9 Olga, e lego kgaetšedi yo a dulago Amerika Borwa, o ile a botegela Jehofa ka go hlompha monna wa gagwe yo a bego a mo swara gampe. [1] (Bona tlhaloso.) Ka dinako tše dingwe monna yoo o be a gana go mmolediša goba a mo hlaba ka mantšu feela ka gobane Olga e le Hlatse ya Jehofa. O ile a ba a  botša Olga gore o tlo mo tlogela gomme a sepela le bana. Eupša Olga ga se a ka a “bušetša bobe ka bobe.” O ile a dira sohle se a ka se kgonago go ba mosadi wa go loka. O be a apeela monna wa gagwe, a mo hlatswetša diaparo e bile a hlokomela ditho tše dingwe tša lapeng labo. (Baroma 12:17) Le gona ge a be a kgona, o be a sepela le monna wa gagwe ge a etela ba gabo le bagwera. Ka mohlala, nakong e nngwe ge monna wa gagwe a be a eya motseng o mongwe go yo boloka tatagwe, Olga o ile a lokišeletša dilo ka moka tša leeto. Ke moka moo polokong, o ile a letela monna wa gagwe ka ntle ga kereke. Ka morago ga nywaga e mentši, monna wa Olga o ile a thoma go mo swara gabotse ka gobane Olga o ile a dula a mo hlompha le go se mo felele pelo. Gona bjale monna wa gagwe o mo kgothaletša go ya dibokeng e bile o a mo felegetša. Ka dinako tše dingwe o ba gona dibokeng.—1 Petro 3:1.

GE RE TLAMEGILE GO KGETHA YO RE SWANETŠEGO GO MMOTEGELA

10. Jonathane o ile a tseba bjang yo a bego a swanetše go mmotegela?

10 Ge Saulo a be a re o tlo bolaya Dafida, Jonathane o ile a swanelwa ke go dira phetho e thata kudu. O be a nyaka go botegela tatagwe, mola ka lehlakoreng le lengwe a be a nyaka go botegela Dafida. Jonathane o be a tseba gore Modimo o thekga Dafida e sego Saulo, ka gona o ile a kgetha go botegela Dafida. O ile a sebela Dafida gore a utame ke moka a botša Saulo lebaka leo a sa swanelago go bolaya Dafida.—Bala 1 Samuele 19:1-6.

11, 12. Go rata Modimo go re thuša bjang go kgetha go botegela yena?

11 Alice, e lego kgaetšedi wa kua Australia, o ile a swanelwa ke go dira phetho ya gore o tla botegela mang. Ge a be a thoma go ithuta Beibele, o be a botša ba gabo dilo tšeo a bego a ithuta tšona. O ile a ba botša le gore a ka se sa keteka Keresemose le bona gomme a ba hlalosetša mabaka. Mathomong, lapa la gabo le ile la nyamišwa ke seo, eupša ka morago la mo galefela kudu. Ba be ba nagana gore Alice ga a sa na taba le bona. Ke moka mmagwe o ile a mmotša gore ga a sa nyaka go mmona. Alice o re: “Ke ile ka gakanega le go kwa bohloko kudu ka gobane ke be ke rata lapa lešo kudu. Lega go le bjalo, ke be ke feditše le pelo gore Jehofa le Morwa wa gagwe ba tla pele bophelong bja ka, ke moka kopanong ya tikologo e latetšego ka kolobetšwa.”—Mateo 10:37.

12 Ga se ra swanela go dumelela go botegela selo le ge e le sefe, e ka ba sehlopha se itšego sa dipapadi, sekolo, goba naga, di eba bohlokwa kudu go rena go feta go botegela Jehofa. Ka mohlala, Henry o be a thabela go bapala chess le sehlopha sa sekolong gomme a nyaka go thopela sekolo sa gabo sefoka diphadišanong. Eupša ka ge a be a bapala chess mafelobekeng a mangwe le a mangwe, o be a sa be le nako e lekanego ya go ya tšhemong goba dibokeng. Henry o re o be a šetše a botegela sekolo kudu go feta go botegela Modimo. Ka gona o ile a dira phetho ya go tlogela go bapala chess sekolong.—Mateo 6:33.

13. Go botegela Modimo go ka re thuša bjang go lebeletšana le mathata a lapa?

13 Ka dinako tše dingwe go ka ba thata go botegela ditho tša lapa ka nako e tee. Ka mohlala, Ken o re: “Ke be ke nyaka go dula ke etela mma wa ka yo a bego a tšofetše le go fela ke mmitša gore a tlo dula le rena. Eupša mma le mosadi wa ka ba be ba sa kwane.” Ken o tšwela pele ka gore: “Ke be nka se thabiše  yo mongwe gomme ka nyamiša yo mongwe.” Ken o ile a nagana ka seo Beibele e se bolelago gomme a lemoga gore boemong bjo o swanetše go kgahliša mosadi wa gagwe le go mmotegela. Ka gona o ile a tla ka tharollo yeo e ilego ya thabiša mosadi wa gagwe. Ke moka o ile a hlalosetša mosadi wa gagwe lebaka leo a swanetšego go hlokomela mmagwe. Le gona o ile a hlalosetša mmagwe lebaka leo a swanetšego go hlompha mosadi wa gagwe.—Bala Genesi 2:24; 1 Bakorinthe 13:4, 5.

GE NGWANABO RENA YO A ETELELAGO PELE A SA RE KWEŠIŠE GOBA A RE SWARA MAKGWAKGWA

14. Ke ka tsela efe Saulo a ilego a swara Jonathane gampe?

14 Le gona re ka botegela Jehofa ge ngwanabo rena yo a etelelago pele ka phuthegong a re swara makgwakgwa. Kgoši Saulo o be a kgethilwe ke Modimo gore e be kgoši, eupša o be a swara morwa wa gagwe gampe. O be a sa kwešiše gore go reng Jonathane a be a rata Dafida. Ka gona ge Jonathane a be a leka go thuša Dafida, Saulo o ile a galefa kudu, gomme a hlabiša morwa yo wa gagwe dihlong gare ga batho ba bantši. Eupša Jonathane o ile a tšwela pele a hlompha tatagwe. Ka nako e swanago, o ile a dula a botegela Jehofa le Dafida, yoo Modimo a bego a mo kgethile gore e tle e be kgoši e latelago ya Isiraele.—1 Samuele 20:30-41.

15. Ge ngwanabo rena a ka re swara gampe, re swanetše go arabela bjang?

15 Ka phuthegong lehono, bana babo rena bao ba eteletšego pele ba leka go swara batho ka moka gabotse. Eupša bana babo rena  ba ga se ba phethagala. Ka baka leo, go ka direga gore ba se kwešiše gore go reng re dirile selo se itšego. (1 Samuele 1:13-17) Ka gona ge ba ka re swara gampe goba ba se re kwešiše, anke rena re duleng re botegela Jehofa.

GE RE THATAFALELWA KE GO PHETHA SEO RE SE HOLOFEDITŠEGO

16. Ke maemong afe moo re swanetšego go botegela Modimo le go se be le boithati?

16 Saulo o be a nyaka gore Jonathane e tle e be kgoši ya Isiraele go e na le gore e be Dafida. (1 Samuele 20:31) Eupša Jonathane o be a rata Jehofa e bile a mmotegela. Ka gona go e na le gore a be le boithati, o ile a ba mogwera wa gagwe gomme a phetha seo a mo holofeditšego sona. Ge e le gabotse, motho le ge e le ofe yo a ratago Jehofa le go mmotegela, le ge a ka “ikana ka tše di ka mmakelago mathata, ga a fetoge.” (Psalme 15:4) Ka ge re botegela Modimo, re tla phethagatša dikholofetšo tša rena. Ka mohlala, ge re ka dira tumelelano ya kgwebo le motho yo a itšego, re tla phethagatša dikholofetšo tša rena, gaešita le ge go ka ba thata. Le gona ge e ba re na le mathata lenyalong, re tla bontšha gore re rata Jehofa ka go dula re botegela balekane ba rena.—Bala Maleaki 2:13-16.

Ge re ka tsenela tša kgwebo, re tla phethagatša dikholofetšo tša rena ka gobane re botegela Modimo (Bona serapa 16)

17. Sehlogo se se go thušitše bjang?

17 Re nyaka go swana le Jonathane, re botegele Jehofa gaešita le maemong a thata. Ka gona anke re duleng re botegela bana babo rena le dikgaetšedi ge ba re nyamiša. Ka go re’alo re tla thabiša pelo ya Jehofa gomme le rena ra thaba kudu. (Diema 27:11) Re ka kgodišega gore o tla dula a re direla dilo tše dibotse le go re hlokomela. Sehlogong se se latelago, re tlo bona seo re ka ithutago sona bathong ba itšego ba mehleng ya Dafida bao ba bego ba botega le bao ba bego ba sa botege.

^ [1] (serapa 9) Maina a mangwe a fetotšwe.