Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  December 2017

Na o a Gopola?

Na o a Gopola?

Na o badile ka kelohloko ditokollo tša morago bjale tša Morokami? Bona ge e ba o ka kgona go araba dipotšišo tše di latelago:

E le gore batswadi ba bafaladi ba thuše bana ba bona go gola moyeng, ke ka baka la eng ba swanetšego go naganišiša ka taba ya leleme?

Ga go pelaelo gore bana ba gago ba tla ithuta leleme la nageng yeo le hudugetšego go yona sekolong le setšhabeng. E ka ba mo go holago gore ngwana a tsebe maleme a mmalwa. Batswadi ba swanetše go naganišiša ka taba ya gore ke phuthego ya leleme lefe yeo bana ba bona ba ka kgonago go kwešiša therešo le go gatela pele moyeng. E ka ba phuthego ya leleme la moo ba hudugetšego gona, goba ya leleme la gabo bona. Batswadi ba Bakriste ba etiša pele tswalano ya bana ba bona le Jehofa go feta selo le ge e le sefe seo bona ba se ratago.​—w17.05, matl. 9-11.

Ge Jesu a be a botšiša Petro gore: “Na o nthata go feta tše?” o be a šupa eng ge a be a re “tše”? (Joh. 21:15)

Go bonagala Jesu a be a bolela ka dihlapi tšeo di bego di le kgauswi le bona, goba a bolela ka kgwebo ya go rea dihlapi. Ka morago ga lehu la Jesu, Petro o ile a boela mošomong wa gagwe wa go rea dihlapi. Bakriste ga se ba swanela go etiša mešomo ya bona pele maphelong a bona.​—w17.05, matl. 22-23.

Ke ka baka la’ng Aborahama a ile a kgopela mosadi wa gagwe gore a bolele gore ke kgaetšedi ya gagwe? (Gen. 12:10-13)

Ge e le gabotse, Sara e be e le kgaetšedi ya Aborahama ka motswadi o tee. Ge nkabe Sara a ile a bolela gore ke mosadi wa gagwe, Aborahama nkabe a ile a bolawa, ka go re’alo a se tšweletše peu yeo Modimo a bego a mo holofeditše yona.​—wp17.3, matl. 14-15.

Elias Hutter o ile a diriša mokgwa ofe go thuša bao ba nyakago go ithuta Seheberu?

O be a nyaka gore barutwana ba gagwe ba tsebe phapano magareng ga modu wa mantšu a Seheberu ao a lego ka Beibeleng gotee le dihlogwana tša mantšu le meselana ya ona. Ka baka la seo, o ile a ngwala modu wa lentšu le lengwe le lengwe ka mongwalo o moso, eupša go dihlogwana tša mantšu le meselana ya ona o ile a se diriše mongwalo o moso. Beibele ya New World Translation of the Holy Scriptures—With References e diriša mokgwa o swanago mengwalong ya yona ya ka tlase.​—wp17.4, matl. 11-12.

Ke dilo dife tšeo Mokriste a swanetšego go nagana ka tšona pele a ka ba le sethunya gore a itšhireletše bathong ba bangwe?

Tše dingwe tša tšona ke gore Modimo o lebelela bophelo e le bjo bo kgethwa. Jesu ga se a kgothaletša balatedi ba gagwe gore ba be le ditšhoša e le gore ba itšhireletše. (Luka 22:36, 38) Re swanetše go tšea ditšhoša tša rena re di dire megoma. Bophelo bo bohlokwa kudu go feta dilo tše di bonagalago. Re hlompha matswalo a batho ba bangwe e bile re nyaka go ba beela mohlala. (2 Bakor. 4:2)​—w17.07, matl. 31-32.

Ke ka baka la’ng pego ya Mateo le ya Luka tšeo di bolelago ka bophelo bja Jesu bja mathomong di fapana?

Mateo o bolela kudu ka ditiragalo tša mabapi le Josefa. O re botša ka tsela yeo Josefa a ilego a arabela ka yona ge a be a ekwa gore Maria o imile. Le gona o re botša le ka toro yeo go yona morongwa a mmotšago gore a tšhabele Egipita gomme ka morago a boele nageng ya Isiraele. Luka yena o bolela kudu ka Maria. Ka mohlala, o re botša ka nako ya ge Maria a be a etela Elisabetha le ka tsela yeo a ilego a itshwara ka yona ge Jesu yo e bego e sa le mošemane a be a šetše tempeleng.​—w17.08, letl. 32.

Beibele e ile ya dula e le gona gaešita le ge e fetile maemong afe?

Ge nako e dutše eya mantšu le dipolelwana tšeo di dirišitšwego ka Beibele di ile tša fetoga. Maemo a dipolotiki a be a gapeletša batho go bolela leleme le tee. Batho ba be ba ganetšwa go fetolela Beibele ka maleme ao a bego a bolelwa ke batho ba bantši.​—w17.09, matl. 19-21.

Na o na le Morongwa yo a go Šireletšago?

Aowa. Jesu o boletše ka barongwa bao ba hlokomelago barutiwa ba gagwe gore ba bona sefahlego sa Modimo. (Mat. 18:10) O be a bolela gore barongwa ba kgahlegela barutiwa ba gagwe, e sego gore barongwa ba šireletša yo mongwe le yo mongwe wa bona ka mohlolo.​—wp17.5, letl. 5.

Lerato la maemo a godimo ke la mohuta mang?

Lerato leo le theilwego melaong ya motheo a·gaʹpe ke la maemo a godimo. Ga se la go no bolela gore o rata motho yo a itšego, eupša le bontšhwa ka ditiro tšeo di se nago boithati.​—w17.10, letl. 7.