Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) DECEMBER 2016

Na o a Gopola?

Na o a Gopola?

Na o badile ka kelohloko ditokollo tša morago bjale tša Morokami? Bona ge e ba o ka kgona go araba dipotšišo tše di latelago:

Keletšong yeo e lego go Mateo 18:15-17, Jesu o be a bolela ka sebe sa mohuta ofe?

O be a bolela ka mathata ao a ka lokišwago ke batho bao ba kgopišanego. Eupša sebe seo ke se segolo kudu moo motho yo a ganago go itshola a ka kgaolwago. Ka mohlala, sebe seo se ka akaretša go senya motho leina, goba boradia.w16.05, matl. 7, 8.

O ka dira’ng gore o holege kudu ge o bala Beibele?

O ka dira dilo tše di latelago: Bala Beibele ka monagano o bulegilego gomme o tsome dithuto tšeo o ka di dirišago; ipotšiše dipotšišo tša go swana le gore: ‘Nka diriša bjang seo ke ithutilego sona go thuša ba bangwe?’; le gona diriša didirišwa tšeo o nago le tšona go dira nyakišišo ka seo o sa tšwago go se bala.w16.05, matl. 28-31.

Na go fošagetše gore Mokriste a lle ge a hwetšwe, gaešita le ge a dumela gore Jehofa o tlo tsoša bahu?

Go dumela gore Jehofa o tlo tsoša bahu ga go fediše bohloko bja ge re hwetšwe. Aborahama o ile a llela Sara ge a be a hwile. (Gen. 23:2) Ge nako e dutše e eya, bohloko bja go hwelwa bo tla kaonefala.wp16.3, letl. 4.

Go Hesekiele kgaolo 9, monna yo a swerego enke ya bangwaledi le banna ba tshelelago bao ba swerego dibetša ba swantšhetša bomang?

Ba swantšhetša madira a legodimong ao a ilego a tšea karolo go fedišweng ga Jerusalema, ao gape a tlago go tšea karolo ge lefase le kgopo la Sathane le fedišwa ka Haramagedone. Phethagalong ya mehleng yeno ya boporofeta bjo, monna yo a swerego enke ya bangwaledi o swantšhetša Jesu Kriste. Ke yena a swayago batho bao ba tlago go phologa.w16.06, matl. 31-32.

Beibele e phologile dikotsi dife?

E phologile (1) kotsi ya go bola ka baka la dilo tšeo e bego e ngwaletšwe go tšona, dilo tša go swana le phaphirase le matlalo a go ngwalela; (2) e phologile go ganetšwa ke baetapele ba dipolotiki le ba bodumedi bao ba lekilego go e fediša; le gona (3) e phologile maiteko a go fetošwa ga molaetša wa yona.wp16.4, matl. 4-7.

Mokriste a ka nolofatša bophelo bja gagwe ka ditsela dife?

Tseba dilo tšeo o tlogago o di hloka, gomme o pheme go reka dilo tšeo o sa di hlokego. Eba le lenaneo le lebotse la go diriša tšhelete. Fokotša dilo tšeo o sa di šomišego, gomme o lefe dikoloto ka moka tšeo o nago le tšona. Šoma diiri tše sego kae mošomong wa boiphedišo, gomme o nagane kamoo o ka oketšago tirelo ya gago go Jehofa.w16.07, letl. 10.

Ke’ng seo Beibele e rego se bohlokwa go feta gauta goba silifera?

Jobo 28:12, 15 e bontšha gore bohlale bjo bo tšwago go Modimo bo bohlokwa go phala gauta goba silifera. Ge o dutše o tsoma bohlale bjoo, lwela go dula o ikokobeditše le go tia tumelong.w16.08, matl. 18-19.

Na lehono ke phošo gore ngwanabo rena a be le ditedu?

Ditšong tše dingwe, ditedu tšeo di kotilwego gabotse di ka amogelega e bile di ka no se kgopiše batho bao re ba botšago molaetša wa Mmušo wa Modimo. Lega go le bjalo, bana babo rena ba bangwe ba ka kgetha go se be le ditedu. (1 Bakor. 8:9) Ditšong tše dingwe le mafelong a mangwe, motho yo a nago le ditedu o lebelelwa a sa swanelwe ke go ba Hlatse ya Jehofa.w16.09, letl. 21.

Ke ka baka la’ng re ka kgolwa pego ya Beibele ya gore Dafida o ile a lwa le Goliata?

Go thwe Goliata o be a feta motho yo moteleletelele mo lefaseng ka disenthimithara tše e ka bago tše 15. Dafida o phetše e le ka kgonthe, ka ge seo se kgonthišetšwa ke mongwalokgwaro wa bogologolo woo o bolelago ka ntlo ya Dafida gotee le seo Jesu a se boletšego. E bile histori e kgonthišeditše mafelo ao Dafida le Goliata ba bego ba dula go ona.wp16.5, letl. 13.

Phapano ke efe magareng ga tsebo, kwešišo le bohlale?

Motho o ba le tsebo ka morago ga gore a ithute. Ke moka o ba le kwešišo ka morago ga gore a bone kamoo tsebo yeo a nago le yona e šomago ka gona. Mafelelong, o bontšha bohlale ge a kopanya tsebo yeo le kwešišo gomme a di šomiša.w16.10, letl. 18.