Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) DECEMBER 2016

Modimo o le Lokolotše ka Botho bja Gagwe bjo Bogolo

Modimo o le Lokolotše ka Botho bja Gagwe bjo Bogolo

“Sebe ga se sa swanela go le buša, ka ge . . . le le tlase ga botho bjo bogolo bja Modimo.”—BAROMA 6:14.

DIKOPELO: 2, 61

1, 2. Ke ka baka la’ng Dihlatse tša Jehofa di rata lengwalo la Baroma 5:12?

A RE re o nyaka go ngwala lelokelelo la Mangwalo ao Dihlatse tša Jehofa di a tsebago gabotse le go a šomiša gantši. Na lengwalo la Baroma 5:12 le be le tla tšwelela mathomong a lelokelelo la gago? Nagana gore ke gakae o diriša mantšu a lengwalo le ao a rego: “Go etša ge ka motho o tee sebe se tsene lefaseng gomme lehu la tsena ka sebe, ka go re’alo lehu le aparetše batho bohle gobane bohle ba dirile sebe.”

2 Lengwalo leo le tšwelela gantši ka pukung ya Ke Eng Seo ge e le Gabotse Beibele e se Rutago? Ge o ithuta puku ye le bana ba gago goba le batho ba bangwe, ga go pelaelo gore o tla bala Baroma 5:12 ge o ahlaahla le bona morero wa Modimo ka lefase, topollo le boemo bja bahu—go kgaolo 3, 5 le 6. Eupša na o kile wa ipotšiša gore Baroma 5:12 e kgoma bjang tswalano ya gago le Jehofa, ditiro tša gago le bokamoso bja gago?

3. Ke’ng seo ka moka ga rena re swanetšego go se amogela?

3 Ka moka ga rena re swanetše go amogela gore re badiradibe. Re dira diphošo letšatši le letšatši. Lega go le bjalo, re kgothatšwa ke gore Modimo o a tseba gore re lerole, e bile o ikemišeditše go re gaugela  ge re sentše. (Ps. 103:13, 14) Thapelong ya gagwe ya mohlala, Jesu o boletše gore re kgopele Modimo gore a “re lebalele dibe tša rena.” (Luka 11:2-4) Ka baka leo, ga re na lebaka la go ikopiša hlogo ka diphošo tšeo Modimo a re lebaletšego tšona. Lega go le bjalo, re sa dutše re ka holwa ke go nagana ka seo a ka se dirago—le seo a se dirilego—go re lebalela.

MODIMO O RE LEBALETŠE KA BAKA LA BOTHO BJA GAGWE BJO BOGOLO

4, 5. (a) Ke’ng seo se re thušago go kwešiša Baroma 5:12? (b) ‘Botho bjo bogolo’ bjo go boletšwego ka bjona go Baroma 3:24 ke’ng?

4 Re hwetša ditaba tša bohlokwa dikgaolong tša kgauswi le mantšu a moapostola Paulo ao a lego go Baroma 5:12, kudukudu go kgaolo 6. Dikgaolo tšeo di tlo re thuša go kwešiša kamoo Jehofa a ka re lebalelago ka gona. Go kgaolo 3, re bala gore: “Bohle ba dirile sebe gomme . . . go bjalo ka ge eka ke mpho e sa lefelelwego gore go bolelwe gore ba lokile ka botho bja gagwe bjo bogolo ka go lokollwa ka topollo yeo e lefilwego ke Kriste Jesu.” (Baroma 3:23, 24) Paulo o be a era go re’ng ge a be a re ‘botho bjo bogolo’? O dirišitše lentšu la Segerika, leo go ya ka puku e nngwe ya go hlalosa mantšu, le nago le mogopolo wa “go direlwa selo se itšego mahala, ntle le go lefišwa.” Ee, botho bja Jehofa ga bo re swanele.

5 Seithuti sa Beibele e lego John Parkhurst se itše: “Ge [polelwana ye ya Segerika] e šupa go Modimo goba Kriste, gantši e bolela ka kgaugelo yeo ba re bontšhitšego yona mahala goba botho bjo ba re bontšhitšego bjona ka go re lopolla sebeng le go re phološa.” Ka go re’alo, polelwana yeo e rego ‘botho bjo bogolo,’ e fetoletšwe gabotse ka go Phetolelo ya Lefase le Lefsa. Eupša Modimo o re bontšhitše bjang botho bja gagwe bogolo? Gona botho bjoo bo kgoma bjang kholofelo ya gago ka bokamoso le tswalano ya gago le yena? Anke re boneng.

6. Batho ba ka holwa bjang ke botho bjo bogolo bja Modimo?

6 Adama ke “motho o tee” yoo sebe le lehu di ‘tsenego lefaseng ka yena.’ Ka baka leo, “ka karogo ya motho o tee, lehu le bušitše e le kgoši.” Paulo o okeditše ka gore “boati [bja] botho bjo bogolo bja Modimo” bo tlile “ka motho o tee, e lego Jesu Kriste.” (Baroma 5:12, 15, 17) Botho bjoo bo hotše batho ka moka. Beibele e re “ka go kwa ga motho o tee [e lego Jesu] ba bantši ba tla dirwa ba lokilego.” Ge e le gabotse, botho bjo bogolo bja Modimo bo ka dira gore re tle re hwetše “bophelong bjo bo sa felego.”Baroma 5:19, 21.

7. Ke ka baka la’ng topollo e le mpho e botho e tšwago go Modimo le yeo e sa re swanelago?

7 Jehofa o be a sa gapeletšege go romela Morwa wa gagwe lefaseng gore a tlo re hwela. Go oketša moo, ka ge re sa phethagala e bile re le badiradibe, gabotse ga re swanelwe ke topollo yeo Modimo le Jesu ba re neilego yona gore re kgone go lebalelwa dibe. Ka baka leo, Modimo o re bontšhitše botho bjo bogolo kudu ka go re lebalela dibe le go re nea kholofelo ya go tlo phela ka mo go sa felego. Ka gona re swanetše go leboga ka dipelo ka moka mpho ye ya botho bjo bogolo gomme re nagane ka yona maphelong a rena a letšatši le letšatši.

GO LEBOGA BOTHO BJO BOGOLO BJA MODIMO

8. Ba bangwe ba ka ba le pono efe e fošagetšego ka go dira sebe?

8 Ka ge re le bana ba Adama bao ba sa phethagalago, re dira diphošo, re dira dilo tše mpe, re dira dibe. Lega go le bjalo, re tla ba re dira phošo e kgolo kudu ge re ka bapala ka botho bjo bogolo bja Modimo, go swana le go ipotša gore: ‘Le ge nka dira sebe, ga go hlokagale gore ke tshwenyege ka seo. Akere Jehofa o tla ntebalela.’ Ka maswabi, Bakriste ba bangwe ba ile ba nagana dilo tše bjalo gaešita le ge baapostola ba bangwe ba be ba sa phela. (Bala Juda 4.) Go ka direga gore rena re se bolele mantšu a bjalo;  eupša re ka ba re na le dikgopolo tše bjalo, goba di ka bjalwa ka megopolong ya rena gomme tša thoma go mela.

9, 10. Paulo le ba bangwe ba ile ba lokollwa bjang sebeng le lehung?

9 Paulo o kgalemetše ka matla bao ba ipotšago gore: ‘Modimo o a kwešiša. A ka se nkotle ka dibe tša ka goba ditiro tša ka.’ Ke ka baka la’ng Paulo a kgalemetše dikgopolo tše bjalo? Go etša ge a ngwadile, lebaka ke gore Bakriste ba “hwile mabapi le sebe.” (Bala Baroma 6:1, 2.) Gaešita le ge ba be ba sa dutše ba phela mo lefaseng , ke ka baka la’ng go be go ka thwe ba be ba “hwile mabapi le sebe”?

10 Jehofa o dirišitše topollo go Paulo le go Bakriste ba bangwe ba mehleng ya gagwe. Ka baka leo, o ile a ba lebalela dibe tša bona, a ba tlotša ka moya o mokgethwa gomme a ba bitša gore e tle e be barwa ba gagwe ba moya. Ka go re’alo, ba ile ba ba le kholofelo ya go yo phela legodimong. Ge ba be ba ka botega go fihlela lehung, ba be ba tla phela legodimong gomme ba buša le Kriste. Lega go le bjalo, Paulo o be a ka bolela ka Bakriste bao gore ba “hwile mabapi le sebe” gaešita le ge ba be ba sa phela mo lefaseng e bile ba hlankela Modimo. Paulo o ile a diriša mohlala wa Jesu, yoo a ilego a hwa e le motho ke moka a tsošetšwa legodimong e le sebopiwa sa moya seo se sa hwego. Lehu le be le se sa na matla go Jesu. Go be go le bjalo le ka Bakriste ba tloditšwego, bao ba bego ba ka itebelela ba “hwile e le ka kgonthe mabapi le sebe, eupša [ba] phela mabapi le Modimo ka Kriste Jesu.” (Baroma 6:9, 11) Tsela yeo ba phelago ka yona e be e fetogile. Ba be ba se sa laolwa ke dikganyogo tša bona tša sebe. Go be go le bjalo ka ge eka ba hwile tseleng ya bona ya pele ya bophelo.

11. Ke ka kgopolo efe rena bao re tlago go phela ka mo go sa felego Paradeiseng re ‘hwilego mabapi le sebe’?

11 Go thwe’ng ka rena? Pele re eba Dihlatse tša Jehofa, re be re dira dibe, mohlomongwe re sa tsebe gore dibe tšeo ke tše dikgolo gakaakang mahlong a Modimo. Re be re le “bahlanka ba go se hlweke le go hloka molao.” Go ka bolelwa gore re be re “le bahlanka ba sebe.” (Baroma 6:19, 20) Eupša re ile ra ithuta therešo ya Beibele, ra dira diphetogo maphelong a rena, ra ineela go Modimo, gomme ra kolobetšwa. Ga e sa le go tloga ka nako yeo, re be re dutše re katanela go ‘kwa go tšwa pelong’ dithuto tša Modimo le ditekanyetšo tša gagwe. Ka mantšu a mangwe, re “lokolotšwe sebeng” gomme re “bahlanka ba toko.” (Baroma 6:17, 18) Ka gona le rena go ka bolelwa ka rena gore re “hwile mabapi le sebe.”

12. Yo mongwe le yo mongwe wa rena o na le kgetho efe?

12 Bjale nagana mantšu a a latelago a Paulo a lebišitšwe le go wena: “Le se ke la dumelela sebe se tšwela pele se buša e le kgoši mebeleng ya lena e hwago e le gore le kwe dikganyogo tša yona.” (Baroma 6:12) Re ka “dumelela sebe se tšwela pele se [re] buša” ka go dira selo se sengwe le se sengwe seo mebele ya rena ya sebe e rego re se dire. Ka ge re ka “dumelela” sebe se re buša goba ra se ganetša, potšišo ke gore: Wena o kgetha’ng? Ipotšiše gore: ‘Na ka dinako tše dingwe ke dumelela mmele wa ka wo o sa phethagalago goba monagano o ntiriša dilo tše di fošagetšego? Goba na ke hwile ge e le mabapi le sebe? Na ke phelela Modimo ka go ekiša Kriste Jesu?’ Re tla kgona go araba dipotšišo tše ka ee, ge e ba re leboga botho bjo bogolo bjo Modimo a re bontšhitšego bjona ka go re lebalela dibe tša rena.

NTWA YEO O KA E FENYAGO

13. Ke bohlatse bofe bjo bo bontšhago gore re ka kgona go se sa dira dibe?

13 Batho ba Jehofa ba lahlile mekgwa goba ‘dienywa tšeo ba bego ba di buna’ pele ba ka tseba Modimo le go mo rata gotee le go mo hlankela. Tsela yeo ba bego ba phela ka yona kgale e ka ba e be e akaretša “dilo tšeo bjale di [ba] hlabišago dihlong” tšeo mafelelo a tšona e lego lehu. (Baroma 6:21) Ga bjale ba fetogile. Go bile bjalo ka  Bakriste ba bantši ba kua Korinthe bao Paulo a ilego a ba ngwalela lengwalo. Ba bangwe ba bona e be e le barapedi ba medimo ya diswantšho, dihlotlolo, banna ba ba robalago le banna, mahodu, matagwa gotee le dilo tše dingwe tša go swana le tše. Lega go le bjalo, ba ile ba ‘hlatswiwa ba hlweka’ gomme ba ‘kgethagatšwa.’ (1 Bakor. 6:9-11) Le gona go bonala Bakriste ba bangwe phuthegong ya Roma le bona ba kile ba phela ka tsela yeo. Modimo o ile a botša Paulo gore a ba ngwalele gore: “Le se ke la tšwela pele le gafela ditho tša lena sebeng e le dibetša tša go se loke, eupša ikgafeleng Modimo le le bao ba phelago go tšwa bahung, le ditho tša lena le di gafele Modimo e le dibetša tša toko.” (Baroma 6:13) Paulo o be a kgodišegile gore Bakriste bao ba be ba ka dula ba hlwekile moyeng gomme ba tšwela pele ba holwa ke botho bjo bogolo bja Modimo.

14, 15. Ke’ng seo re swanetšego go ipotšiša sona ka go “[kwa] go tšwa pelong”?

14 Go bjalo le lehono. Bana babo rena ba bangwe le dikgaetšedi ba kile ba phela go swana le Bakriste ba kua Korinthe. Eupša le bona ba fetogile. Ba lahlile mekgwa ya kgale gomme ba ‘hlatswitšwe ba hlweka.’ Gaešita le ge go ka ba go le bjalo le ka wena, gona bjale Modimo o go lebelela bjang? Ka ge ga bjale Modimo a go bontšha botho bja gagwe bjo bogolo le go go lebalela dibe, na o feditše le pelo gore o ka se sa “gafela ditho tša [gago] sebeng”? Na o tla ‘ikgafela Modimo o le yo a phelago go tšwa bahung’?

15 E le gore re dire seo, re swanetše go phema go dira dibe tše dikgolo tšeo ba bangwe kua Korinthe ba kilego ba di dira. Ge re ka dira bjalo, re tla kgona go bolela gore re amogetše botho bjo bogolo bja Modimo le gore ‘sebe ga se sa re buša.’ Eupša na re bile re ikemišeditše go “[kwa] go tšwa pelong,” ka go dira sohle se re ka se kgonago go phema go dira dibe tšeo ba bangwe ba naganago gore ga se tše dikgolo?Baroma 6:14, 17.

16. Re tseba bjang gore go ba Mokriste ga se go fo phema go dira dibe tše dikgolo?

16 Nagana ka moapostola Paulo. Re ka kgodišega gore o be a sa dire dibe tše dikgolo tšeo go boletšwego ka tšona go 1 Bakorinthe 6:9-11. Lega go le bjalo, Paulo o ile a ipobola gore o na le sebe. O ngwadile gore: “Nna ke wa nama, ke rekišitšwe gore ke be mohlanka wa sebe. Gobane ga ke kwešiše seo ke se dirago. Gobane seo ke se dumago, ga ke se dire tlwaelo; eupša seo ke se hloilego ke sona seo ke se dirago.” (Baroma 7:14, 15) Se se bontšha gore go na le dilo tše dingwe tšeo Paulo a bego a di lebelela e le dibe, gomme le tšona o be a di lwantšha. (Bala Baroma 7:21-23.) Eka le rena re ka ekiša Paulo, ge re dutše re lwela go “[kwa] go tšwa pelong.”

17. Ke ka baka la’ng o nyaka go botega?

17 Ka mohlala, nagana ka taba ya go botega. Jehofa o letetše gore Mokriste yo mongwe le yo mongwe a botege. (Bala Diema 14:5; Baefeso 4:25.) Sathane ke “tatago maaka.” Le gona Ananiase le mosadi wa gagwe ba ile ba hwa ka baka la go bolela maaka. Ga re nyake go ekiša batho bao—ka gona ga re bolele maaka. (Joh. 8:44; Dit. 5:1-11) Eupša na go botega go felela moo? Ge e le gabotse, go botega ga rena go swanetše go bontšha gore re tloga re leboga botho bjo bogolo bja Modimo.

18, 19. Ke ka baka la’ng go botega e se feela go phema go bolela maaka a matala?

18 Maaka ke go bolela selo seo e sego therešo. Lega go le bjalo, Jehofa ga a no nyaka gore batho ba gagwe ba se bolele maaka a matala. O ile a botša Baisiraele ba bogologolo gore: “Le be ba bakgethwa, ka gobane nna Jehofa Modimo wa lena ke yo mokgethwa.” Ke moka o ile a ba nea mehlala ya go ba yo mokgethwa ka go bolela gore: “Le se ke la utswa, le se ke la bolela maaka, gomme yo mongwe le yo mongwe wa lena a se ke a radia motho wa gabo.” (Lef. 19:2, 11) Ka maswabi, motho yo a ipoditšego gore a ka  se tsoge a boletše maaka a matala a ka bolela maaka a manyenyane, a fora ba bangwe le go ba radia.

Na o feditše le pelo gore o tla phema go bolela maaka goba go fora ba bangwe? (Bona serapa 19)

19 Ka mohlala, monna a ka botša mohiri wa gagwe goba mošomigotee gore ka moswana a ka se kgone go tla mošomong, goba gore o swanetše go tšhaiša ka pela ka gobane ngaka e mmiditše. Ge e le gabotse, o ka hwetša gore ga a ye ngakeng ka gobane e mmiditše, eupša o no feta a tšea dihlare goba o no feta a lefa ngaka. Morero wa gagwe o mogolo wa go se ye mošomong ke gore a kgone go ya mabakeng a gagwe goba go iša lapa la gagwe maikhutšong. A ka no ba a boletše therešo ge a be a re o ya ngakeng, eupša na o boletše therešo e feletšego? Goba na o ka re o boletše maaka? Le wena o ka no ba o tseba maemo a mangwe ao go wona motho a ka bolelago maaka ka boomo. Mohlomongwe ba bangwe ba dira se gore ba se ke ba otlwa goba gore ba ikhole ka ba bangwe. Gaešita le ge motho a ka ba a se a bolela maaka a matala, re re’ng ka taelo ya Modimo yeo e rego: “Le se ke la bolela maaka”? Le gona nagana ka Baroma 6:19, yeo e rego: “Gafang ditho tša lena e le bahlanka ba toko yeo e lebišago bokgethweng.”

20, 21. Botho bjo bogolo bjo Modimo a re bontšhitšego bjona bo swanetše go re tutueletša go dira’ng?

20 Tabakgolo mo ga se go fo phema bohlotlolo, botagwa goba dibe tše dingwe tšeo Bakorinthe ba bangwe ba kilego ba di dira. Go leboga botho bjo bogolo bja Modimo go bolela se se fetago seo. Go amogela botho bja Modimo ga go bolele go fo phema boitshwaro bjo bobe bja thobalano, eupša gape go bolela go lwantšha mokgwa le ge e le ofe wa boithabišo bja ditšhila. Go gafa ditho tša rena e le bahlanka ba toko go ka se re thuše feela gore re se be matagwa, eupša gape go tla re thuša go phema go nwa go fihlela re eba kgauswi le go tagwa. Re swanetše go lwa ka matla gore re fenye mekgwa yeo e mebe; e bile ke ntwa yeo re ka e fenyago.

21 Morero wa rena e swanetše go ba go phema go dira dibe tše dikgolo gotee le dibe tše dinyenyane. Ke therešo gore re ka se kgone go dira bjalo ka mo go phethagetšego. Eupša re swanetše go lwa ka matla, go etša ge Paulo a dirile. O eleditše bana babo gore: “Le se ke la dumelela sebe se tšwela pele se buša e le kgoši mebeleng ya lena e hwago e le gore le kwe dikganyogo tša yona.” (Baroma 6:12; 7:18-20) Ge re dutše re lwantšha mehuta ka moka ya dibe, re bontšha gore re leboga kudu botho bjo bogolo bja Modimo bjoo a re bontšhitšego bjona ka Kriste.

22. Bao ba tlago go tšwela pele ba leboga botho bjo bogolo bja Modimo ba tlo hwetša’ng?

22 Ka baka la botho bja gagwe bjo bogolo, Modimo o re lebaletše dibe tša rena, e bile o tla tšwela pele a re lebalela. E le go mo leboga, anke re tšweleng pele re lwantšha mokgwa le ge e le ofe wa go dira dibe tšeo ba bangwe ba ka di lebelelago e le tše dinyenyane. Ge re ka dira bjalo, Paulo o boletše moputso woo re tlago go o hwetša ge a be a re: “Ka ge bjale le ile la lokollwa sebeng eupša la ba bahlanka ba Modimo, le buna dienywa tša lena ka tsela ya bokgethwa gomme mafelelong le tla buna bophelo bjo bo sa felego.”Baroma 6:22.