Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  December 2016

 PHIHLELO

Ke Bile Dilo Tšohle go Batho ba Mehuta ka Moka

Ke Bile Dilo Tšohle go Batho ba Mehuta ka Moka

“Ge o ka kolobetšwa, ke tlo go tlogela!” Ka 1941, tate o ile a tšhošetša mma ka mantšu ao. Go sa šetšwe tšhošetšo yeo, mma o ile a dira phetho ya go kolobetšwa e le go bontšha gore o ineetše go Jehofa Modimo. Ka morago ga seo, tate o ile a phetha seo a se boletšego gomme a mo tlogela. Ka nako yeo ke be ke na le mengwaga e seswai.

KA NAKO yeo ke be ke šetše ke rata go ithuta Beibele. Mma o be a na le dikgatišo tše di bolelago ka Beibele gomme ke ile ka kgahlwa ke dikagare tša tšona, kudukudu diswantšho. Tate o be a sa nyake mma a boledišana le nna ka seo a bego a ithuta sona. Eupša ke be ke nyaka go tseba e bile ke botšiša dipotšišo, ka gona mma o be a ithuta le nna ge tate a se gona ka gae. Mafelelong le nna ke ile ka dira phetho ya gore ke ineele go Jehofa. Ke ile ka kolobetšwa ka 1943 ke na le mengwaga e lesome, toropong ya Blackpool, kua Engelane.

GO THOMA GO HLANKELA JEHOFA

Go tloga ka yona nako yeo, nna le mma re ile ra ya tšhemong ka mehla re le mmogo. Re be re diriša dikeramafomo go botša batho molaetša wa Beibele. Dikeramafomo tšeo e be e le tše dikgolo e bile di imela dikhilograma tše 4,5. Nagana mošemanyana wa mengwaga e lesome a rwele selo sa mohuta woo se boima!

Ge ke na le mengwaga e 14, ke be ke nyaka go ba mmulamadibogo. Mma o ile a re ke thome pele ka go bolela le mohlanka wa bana babo rena (ga bjale o bitšwa molebeledi wa tikologo). Mohlanka  yoo o ile a nkgothaletša go hwetša mošomo gore ke kgone go itlhokomela ge ke le tirelong ya bobulamadibogo. Ke ile ka dira bjalo. Ka morago ga go šoma mengwaga e mebedi, ke ile ka botša molebeledi yo mongwe wa tikologo gore ke nyaka go ba mmulamadibogo. O ile a re: “O sa emetše eng, dira bjalo!”

Ka gona, ka April 1949, nna le mma re ile ra fana ka thoto ya ntlong yeo re bego re e hirile gomme ra hudugela Middleton, kgauswi le Manchester. Ge re le moo, re ile ra thoma go bula madibogo. Ka morago ga dikgwedi tše nne, ke ile ka kgetha ngwanabo rena yo mongwe gore a bule madibogo le nna. Ofisi ya lekala e ile ya re kgopela go ya phuthegong e mpsha yeo e bego e sa tšwa go hlongwa kua Irlam. Mma o ile a bula madibogo phuthegong e nngwe le kgaetšedi yo mongwe.

Le ge ke be ke na le mengwaga e 17 feela, nna le ngwanabo rena yo ke bego ke bula madibogo le yena, re ile ra newa boikarabelo bja go swara diboka ka ge go be go na le bana babo rena ba sego kae ba swanelegago phuthegong yeo e mpsha. Ka morago, ke ile ka kgopelwa go ya phuthegong ya Buxton, yeo e bego e na le bagoeledi ba sego kae e bile e hloka thušo. Ka mehla ke be ke lebelela dikabelo tšeo di ntlwaeletša dikabelo tša nakong e tlago.

Ge re be re laletša batho go tlo kwa polelo ya phatlalatša kua Rochester, New York, ka 1953

Ka 1951, ke ile ka tlatša fomo ya go ya Sekolong sa Beibele sa Watchtower sa Gilead. Eupša ka December 1952, ke ile ka laelwa  gore ke tsenele tirelo ya bošole. Ke ile ka kgopela gore ke se be lešole ka baka la mošomo wa ka wa go ruta batho ka Beibele, eupša kgoro ya tsheko ya gana seo gomme ya nkahlolela dikgwedi tše tshela kgolegong. Ge ke le kgolegong, ke ile ka amogela taletšo ya go ba gona klaseng ya bo-22 ya Gilead. Ka gona ka July 1953, ke ile ka namela sekepe seo se bitšwago Georgic, ka ya New York.

Ge ke fihla New York, ke ile ka kgona go ba gona kopanong ya 1953 ya sehlogo se se rego, Mokgatlo wa Lefase le Lefsa. Go tloga moo ke ile ka tšea leeto ka terene ka ya South Lansing, New York, moo sekolo se bego se tla swarelwa gona. Ka ge ke be ke sa tšwa kgolegong, ke be ke se na tšhelete. Ge ke fologa terene, ke ile ka namela pese yeo e yago South Lansing, ka gona ka swanelwa ke go kgopela monamedi yo mongwe disente tše 25.

GO ABELWA GO YA NAGENG E ŠELE

Sekolo sa Gilead se ile sa re nea tlwaetšo e botse kudu e le gore re “[be] dilo tšohle go batho ba mehuta ka moka” modirong wa boromiwa. (1 Bakor. 9:22) Ba bararo ba rena, e lego nna, Paul Bruun le Raymond Leach, re ile ra abelwa go ya Philippines. Re ile ra swanelwa ke go letela di-visa tša rena ka dikgwedi tše mmalwa. Ka morago ga moo, re ile ra fetša matšatši a 47 re sesa ka sekepe ka lewatleng, ra feta lebopo la Rotterdam, Lewatle la Mediterranean, Suez Canal, Lewatle la India, Malaysia le Hong Kong! Mafelelong re ile ra fihla Manila ka November 19, 1954.

Nna le moromiwagotee le nna e lego Raymond Leach re ile ra sepela matšatši a 47 ka sekepe re eya Philippines

Re ile ra swanelwa ke go thoma go tlwaela batho, naga le go ithuta leleme le lefsa. Eupša mathomong ka boraro bja rena re ile ra abelwa phuthegong ya Quezon City, moo badudi ba bantši ba bego ba bolela Seisemane. Ka baka leo, go ile gwa feta dikgwedi tše tshelelago re tseba mantšu a sego kae feela a Setagalog. Kabelo ya rena e latetšego e ile ya re rarollela bothata bjoo.

Ka letšatši le lengwe ka May 1955, ge re fihla gae re etšwa tšhemong, nna le ngwanabo rena Leach re ile ra hwetša mangwalo ka phaphošing ya rena. Mangwalo ao a ile a re botša gore re abetšwe go ba balebeledi ba tikologo. Ke be ke na le mengwaga e 22 feela, eupša kabelo yeo e ile ya nnea sebaka sa go “[ba] dilo tšohle go batho ba mehuta ka moka” ka ditsela tše difsa.

Ge ke be ke nea polelo ya phatlalatša kopanong ya tikologo ya maleme a fapafapanego a Philippines

Ka mohlala, ke ile ka nea polelo ya phatlalatša ya mathomo ke le molebeledi wa tikologo ka pele ga lebenkele. Go se go ye kae, ke ile ka lemoga gore mehleng yeo e be e le setlwaedi moo Philippines gore polelo ya phatlalatša e newe mafelong a batho bohle! Ge ke dutše ke etela diphuthego tša tikologong yeo ke e abetšwego, ke be ke nea dipolelo tša phatlalatša mafelong a batho bohle, marekišetšong, pele ga diholo tša mmasepala, mafelong a go bapalela basketball, diphakeng gomme gantši ke di nea dikhoneng tša diterata tša toropong. Lebakeng le lengwe ge re be re le Motseng o Mogolo wa San Pablo, pula ya matlorotloro e ile ya mpalediša go nea polelo borekišetšong, ka gona ka boledišana le bana babo rena ba moo bao ba bego ba etelela pele phuthego gore ke nee polelo yeo Holong ya Mmušo. Ka morago ga polelo, bana babo rena bao ba ile ba mpotšiša ge e ba seboka seo se ka begwa e le sa phatlalatša ka ge se sa swarelwa lefelong la batho bohle!

Ka mehla re be re hwetša marobalo magaeng a bana babo rena. Le ge magae a bona e be e le a maemo a tlasana, a be a dula a hlwekile. Ke be ke robala legogweng lebatong la mapolanka. Go be go se na lefelo la go hlapela la maleba, ka gona ke ile ka ithuta go hlapela molaleng. Ge ke be ke eya dihlakahlakeng tše dingwe, ke be ke namela dikoloi tše di bitšwago jeepney le pese, gomme gantši ke sepela ka sekepe. Ga sa nka ka ba le koloi mengwageng yeo ka moka.

Go šoma tšhemo le go etela diphuthego go nthušitše go ithuta Setagalog. Ga sa nka ka tsena klase ya go ithutela leleme le, ke ithutile lona ka  go no theetša bana bešo tšhemong le dibokeng. Bana bešo ba ile ba nthuša go ithuta leleme leo, ka gona ke leboga gore ga se ba mphelela pelo le gore ba be ba mphošolla ka botho.

Ge nako e dutše e eya, dikabelo tše difsa di ile tša nthuša go dira diphetogo tše dintši. Ka 1956, ge ngwanabo rena Nathan Knorr a be a etetše Philippines, ke ile ka newa kabelo ya go šoma ka batho kopanong ya selete e kgolokgolo. Ke be ke sa tsebe selo ka kabelo yeo, eupša bana babo rena ba bangwe ba ile ba nthuša. Pele ngwaga o fela, go ile gwa rulaganywa kopano e nngwe ya selete e kgolokgolo gomme gwa tla Ngwanabo rena Frederick Franz yo a tšwago ntlongkgolo. Ka ge ke be ke le molebeledi wa kopano, ke ile ka ithuta go tlwaela ditšo tša batho ba bangwe go Ngwanabo rena Franz. Bana babo rena ba moo ba ile ba kgahlwa ke go bona Ngwanabo rena Franz a nea polelo ya phatlalatša a apere barong Tagalog, e lego moaparo wa setšo sa batho ba Phillipines.

Ke ile ka swanelwa ke go dira diphetogo tše dingwe ge ke be ke abelwa go ba molebeledi wa selete. Ka nako yeo, re be re bontšha batho filimi ya The Happiness of the New World Society mo e nyakilego go ba ka mehla mafelong a batho bohle. Ka dinako tše dingwe re be re tshwenywa ke dikhunkhwane. Di be di gogwa ke lebone la projector e bile di tsena le ka mo gare ga yona. E be e le mošomo o boima go hlwekiša projector ka gare. Go be go se bonolo go rulaganya gore batho ba tle ba  bogele filimi yeo, eupša go be go thabiša go ba bona ba etla go tlo e bona gomme ba ithuta gore mokgatlo wa Jehofa o bopša ke meraforafo.

Baruti ba Khatolika ba be ba gatelela baetapele ba setšhaba gore ba se re nee tumelelo ya go swara dikopano. Ka dinako tše dingwe ba be ba šitiša lenaneo la kopano ka go letša ditšhipi tša dikereke tša bona nako le nako ge dipolelo di newa kgauswi le dikereke tša bona. Lega go le bjalo, mošomo o ile wa tšwela pele gomme lehono batho ba bantši ba moo ke Dihlatse tša Jehofa.

DIKABELO LE DIPHETOGO TŠE DI OKETŠEGILEGO

Ka 1959, ke ile ka hwetša lengwalo leo le rego ke laletšwa go tlo hlankela ofising ya lekala. Ke ile ka ithuta dilo tše dintši. Ge nako e dutše e eya, ke ile ka newa kabelo ya go etela makala gore ke yo kgothatša bana bešo ba dinageng tše dingwe. Go le lengwe la maeto ao, ke ile ka kopana le Janet Dumond, yo e bego e le moromiwa kua Thailand. Re ile ra ngwalelana mangwalo gantši gomme mafelelong ra nyalana. Re thabetše go hlankela Jehofa ka mengwaga e 51 re le banyalani.

Ke na le Janet go se sengwe sa dihlakahlaka tše dintši tša Philippines

Ka kakaretšo, ke etetše batho ba Jehofa ba dinageng tše 33. Ruri ke leboga gore dikabelo tša ka tša mathomong di nthušitše go lebeletšana le ditlhohlo tša moswananoši tša go dirišana le batho ba mehutahuta! Maeto ao a mputše mahlo gomme a nthuša go bona gore Modimo o rata batho ba mehuta ka moka.—Dit. 10:34, 35.

Re kgonthišetša gore re ya tšhemong ka mehla

RE SA DIRA DIPHETOGO

Ruri go a thabiša go šoma gotee le bana bešo mo Philippines! Ga bjale palo ya bagoeledi e oketšegile ga lesome go feta ge ke be ke sa fihla nageng ye. Nna le Janet re sa hlankela ofising ya lekala ya Philippines yeo e lego Motseng wa Quezon. Gaešita le ge go fetile mengwaga e fetago e 60 ke le kabelong ye ya nageng e šele, ke sa dutše ke swanetše go latela diphetogo tšeo di dirwago ka mokgatlong wa Jehofa. Diphetogo tšeo mokgatlo o di dirago gona bjale di nyaka gore re dule re fetofetoga le maemo tirelong ya rena go Modimo le ge re dirišana le bana babo rena.

Re dula re thabišwa ke go bona Dihlatse tša Jehofa di oketšega

Re lwele ka matla go amogela kabelo e nngwe le e nngwe yeo e lego thato ya Jehofa, gomme seo se re tlišeditše lethabo le legolo. Le gona re lekile go dira diphetogo tše di nyakegago le go hlankela bana babo rena gabotse. Ee, ge feela Jehofa a sa re dumelela, re ikemišeditše go “[ba] dilo tšohle go batho ba mehuta ka moka.”

Re sa hlankela ofising ya lekala yeo e lego Motseng wa Quezon