Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) DECEMBER 2016

Jehofa o Putsa Bao ba mo Tsomago ka Phišego

Jehofa o Putsa Bao ba mo Tsomago ka Phišego

“Yo a batamelago Modimo o swanetše go dumela gore o gona le gore e ba moputsi wa bao ba mo tsomago ka phišego.”BAHEB. 11:6.

DIKOPELO: 85, 134

1, 2. (a) Lerato le tumelo di tswalana bjang? (b) Re tlo ahlaahla dipotšišo dife?

RE RATA Jehofa ka “gobane o re ratile pele.” (1 Joh. 4:19) Jehofa o gatile mogato wa pele gore a šegofatše bahlanka ba gagwe ba ba botegago e le go bontšha gore o a ba rata. Ge re rata Modimo kudu, re ba le tumelo e tiilego ya gore o putsa bao a ba ratago, e sego go no dumela gore o gona.Bala Baheberu 11:6.

2 Taba ya gore Jehofa ke moputsi e hlalosa seo a lego sona le seo a se dirago. Tumelo ya rena e tla ba e se ya felela ge e ba re sa kgodišege gore Modimo o tlo putsa bao ba mo tsomago ka phišego, ka gobane “tumelo ke tebelelo e kgonthišeditšwego ya seo se holofetšwego.” (Baheb. 11:1) Ee, tumelo e akaretša go kgodišega gore Modimo o tlo re tlišetša ditšhegofatšo tšeo a re tshepišitšego tšona. Lega go le bjalo, go tseba gore Modimo o tlo re putsa go re hola bjang? Jehofa o ile a putsa bjang bahlanka ba gagwe ba nakong e fetilego le ba mehleng yeno? Anke re boneng.

JEHOFA O HOLOFEDITŠE GORE O TLO RE ŠEGOFATŠA

3. Ke’ng seo Jehofa a re holofetšago sona go Maleaki 3:10?

3 Jehofa Modimo o dirile keno ya gore o tlo putsa bahlanka ba gagwe ba ba botegago, ka gona o re laletša gore re katanele go hwetša  ditšhegofatšo tša gagwe. Re bala gore: “‘Hle, ntekeng, . . . ’ o re’alo Jehofa wa madira, ‘le bone ge nka se le bulele mašoba a legodimo gomme ka le tšhollela tšhegofatšo ka boati.’” (Mal. 3:10) Re bontšha tebogo e tseneletšego ge re dira seo Jehofa a re kgopelago sona.

4. Ke ka baka la’ng re ka bota mantšu a Jesu ao a lego go Mateo 6:33?

4 Jesu o ile a kgonthišetša barutiwa ba gagwe gore ge ba ka etiša Mmušo pele, Modimo o tla ba thekga. (Bala Mateo 6:33.) Lebaka la gore Jesu a kgodišege ka tsela yeo ke ka gobane o be a tseba gore ka mehla Jehofa o phethagatša dikholofetšo tša gagwe. Jesu o be a tseba gore dikholofetšo tša Modimo ga di ke di pala. (Jes. 55:11) Ka gona le rena re ka kgodišega gore ge e ba re bontšha tumelo e tiilego go Jehofa, o tla phethagatša kholofetšo ya gagwe yeo e rego: “Le ka mohla nka se ke ka go tlogela le ge e le go go lahla.” (Baheb. 13:5) Mantšu a a tswalana le seo Jesu a se boletšego ge a be a re Modimo o tla re thekga ge re ka tsoma Mmušo pele le toko ya Modimo.

Jesu o ile a botša barutiwa ba gagwe gore ba be ba tlo putswa ka baka la boikgafo bja bona (Bona serapa 5)

5. Ke ka baka la’ng karabo yeo Jesu a e neilego Petro e tiiša tumelo ya rena?

5 Moapostola Petro o kile a botšiša Jesu gore: “Re tlogetše dilo ka moka gomme ra go latela; gabotsebotse re tla hwetša’ng?” (Mat. 19:27) Go e na le gore Jesu a omanye Petro ka ge a botšišitše potšišo yeo, o ile a botša barutiwa ba gagwe gore ba be ba tla hwetša moputso ka baka la boikgafo bja bona. Baapostola ba gagwe bao ba botegago le ba bangwe ba be ba tlo buša le yena legodimong. Eupša le gona bjale go na le meputso. Jesu o itše: “Yo mongwe le yo mongwe yo a tlogetšego dintlo goba bana babo goba dikgaetšedi goba tate goba mma goba  bana goba mašemo ka baka la leina la ka, o tla okeletšwa kudu e bile o tla ja bohwa bja bophelo bjo bo sa felego.” (Mat. 19:29) Barutiwa ba gagwe ba be ba tlo hwetša ditšhegofatšo tše di fetago kgole boikgafo le ge e le bofe bjo ba bego ba ka bo dira. Na botate, bomma, bana babo rena, dikgaetšedi le bana ba moya ga ba bohlokwa go feta selo le ge e le sefe seo re se tlogetšego ka baka la Mmušo wa Modimo?

‘TSHETLEDI YA MAPHELO A RENA’

6. Ke ka baka la’ng Jehofa a holofetša barapedi ba gagwe moputso?

6 Barapedi ba Jehofa ba kgona go kgotlelela diteko ka gobane o ba holofeditše moputso. Ka ntle le go thabela ditšhegofatšo tša moya gona bjale, bahlanka ba botegago ba Jehofa ba lebeletše pele ditšhegofatšong tše dintši le go feta tša nakong e tlago. (1 Tim. 4:8) Ee, go kgodišega ga rena gore Jehofa “e ba moputsi wa bao ba mo tsomago ka phišego” go tla re thuša go dula re tiile tumelong.Baheb. 11:6.

7. Ke ka tsela efe kholofelo yeo re nago le yona e swanago le tshetledi?

7 Thutong ya gagwe ya Thabeng, Jesu o itše: “Thabang le hlalaleng ka ge moputso wa lena e le o mogolo magodimong, gobane ba tlaišitše baporofeta ba pele ga lena ka tsela yeo.” (Mat. 5:12) Ka ntle le bao ba tlago go hwetša moputso wa go yo phela legodimong, ruri go tlo phela ka mo go sa felego lefaseng la paradeise go dira gore re ‘thabe le go hlalala!’ (Ps. 37:11; Luka 18:30) Go sa šetšwe gore re tlo phela legodimong goba lefaseng, kholofelo yeo re nago le yona e ka ba “bjalo ka tshetledi ya sekepe ya maphelo a rena, e kgonthišeditšwego le e tiilego.” (Baheb. 6:17-20) Go fo swana le ge tshetledi e dira gore sekepe se se ke sa šišinyega nakong ya ledimo, taba ya gore Jehofa o tlo re putsa e ka re thuša go dula re sa šišinyege maikwelong, monaganong le moyeng. E ka re thuša go ba le matla a go kgotlelela mathata.

8. Dilo tšeo Modimo a re holofeditšego tšona di re thuša bjang go se belaele kudu?

8 Dilo tšeo Modimo a re holofeditšego tšona ka Beibeleng di re thuša go se belaele kudu ka mathata a lehono. Dilo tšeo di ba bjalo ka sehlare sa moya seo se fodišago dipelo tša rena tšeo di tshwenyegilego. Ruri go a kgothatša gore re ka ‘lahlela maima a rena go Jehofa,’ re tseba gore ‘o tla re thekga’! (Ps. 55:22) Re ka kgodišega ka mo go feletšego gore Modimo o tlo “dira go feta kudu ka kua ga tšohle tšeo re di kgopelago goba re di naganago.” (Baef. 3:20) Nagana feela—Modimo ga a tlo no re šegofatša kudu, eupša o tlo re šegofatša go feta ka mo re naganago.

9. Re swanetše go dira’ng gore Jehofa a tle a re šegofatše?

9 E le gore Jehofa a tle a re putse, re swanetše go ba le tumelo e feletšego go yena gomme re kwe ditaelo tša gagwe. Moshe o ile a botša setšhaba sa Isiraele gore: “Jehofa o tla go šegofatša nageng yeo yena Jehofa Modimo wa gago a go neago yona e le bohwa gore o e tšee e be ya gago, ge feela o ka theetša lentšu la Jehofa Modimo wa gago gore o ele hloko go phetha ditaelo tše ka moka tšeo ke go laelago tšona lehono. Ka gobane Jehofa Modimo wa gago o tla go šegofatša feela bjalo ka ge a go holofeditše.” (Doit. 15:4-6) Na o kgodišegile ka mo go feletšego gore Jehofa o tla go šegofatša ge e ba o tšwela pele o mo hlankela ka potego? Ruri o na le lebaka le le kwagalago la go kgodišega.

JEHOFA E BE E LE MOPUTSI WA BONA

10, 11. Jehofa o ile a putsa Josefa bjang?

10 Beibele e ngwaletšwe go hola rena. E na le dipego tše dintši tša kamoo Modimo a ilego a putsa bahlanka ba gagwe bao ba botegago. (Baroma 15:4) Mohlala o mobotse wa seo ke wa Josefa. Ka baka la maanomabe a bana babo le boradia bja mosadi wa mong wa gagwe, Josefa o ile a ikhwetša a le kgolegong ya Egipita. Na Modimo  o ile a lebala ka yena? Le gatee! “Jehofa [o ile] a dula a na le Josefa gomme a se kgaotše go mmontšha botho . . . Jehofa o be a na le Josefa e bile Jehofa o be a mo atlegiša go tšeo a bego a di dira.” (Gen. 39:21-23) Josefa o ile a letela Modimo ka go se fele pelo gore a mo thuše dinakong tšeo tše thata.

11 Ka morago ga mengwaga e mentši, Farao o ile a lokolla Josefa kgolegong ke moka a mo dira mmuši wa bobedi wa Egipita. (Gen. 41:1, 37-43) Ka morago ga gore a be le barwa ba babedi, “Josefa [o ile] a reela leitšibulo la gagwe leina a re ke Manase, ka gobane ge a tsopolwa o itše: ‘Modimo o ntebaditše mathata a ka ka moka le ntlo ka moka ya tate.’ Wa bobedi o mo reetše leina la Efuraime, ka gobane ge a tsopolwa o itše: ‘Modimo o nkatišitše nageng ya mohlako wa ka.’” (Gen. 41:51, 52) Ka ge Josefa a ile a dula a botegela Modimo, o ile a putswa ka ditšhegofatšo tšeo di ilego tša dira gore Baisiraele le Baegipita ba dule ba phela. Seo re ithutago sona mo ke gore Josefa o ile a lemoga gore ke Jehofa yo a bego a mo putsa le go mo šegofatša.Gen. 45:5-9.

12. Jesu o thušitšwe ke’ng go dula a botega le ge a be a lekwa?

12 Ka mo go swanago, Jesu Kriste le yena o ile a dula a ekwa Modimo gaešita le ge a be a lebane le diteko tše di fapafapanego tša tumelo, e bile Modimo o ile a mo putsa. O ile a thušwa ke’ng go kgotlelela? Lentšu la Modimo le hlalosa gore: “Ka baka la lethabo leo le bego le beilwe pele ga gagwe o ile a kgotlelela kota ya tlhokofatšo, a se be le taba le go hlabišwa dihlong.” (Baheb. 12:2) Ee, Jesu o ile a thabišwa kudu ke gore o kgonne go kgethagatša leina la Modimo. Go feta moo, Tatagwe o ile a mo putsa ka go mo amogela le go mo fa ditokelo tše dintši. Beibele e re o “[dutše] ka letsogong la le letona la sedulo sa bogoši sa Modimo.” Le gona pego e nngwe e re: “Modimo o mo phagamišeditše boemong bja godimo gomme ka botho a mo nea leina leo le lego ka godimo ga leina le ge e le lefe le lengwe.”Bafil. 2:9.

JEHOFA GA A LEBALE SEO RE SE DIRAGO

13, 14. Jehofa o ikwa bjang ka seo re mo direlago sona?

13 Re ka kgodišega gore Jehofa o leboga maiteko ka moka ao re a dirago go mo hlankela. O kwešiša matshwenyego a rena le dilo tšeo re di tšhogago. O re kwela bohloko ge re na le mathata a ditšhelete goba ge bolwetši goba maikwelo a rena di re šitiša go mo hlankela. E bile re ka kgodišega gore Jehofa o bona seo bahlanka ba gagwe ba se dirago gore ba dule ba mmotegela.Bala Baheberu 6:10, 11.

14 Le gona dula o gopola gore re ka batamela “Mokwi wa thapelo” re kgodišegile gore o tla theetša dithapelo tša rena. (Ps. 65:2) “Tate wa dikgaugelo le Modimo wa khomotšo yohle” o tla re thekga moyeng le maikwelong, mohlomongwe a diriša barapedigotee le rena. (2 Bakor. 1:3) Jehofa o a thaba ge re thuša ba bangwe. Beibele e re: “Yo a šetšago mmotlana o adima Jehofa gomme Modimo o tla mmušetša.” (Die. 19:17; Mat. 6:3, 4) Ka gona, ge re thuša batho bao ba nago le mathata, Jehofa o lebelela seo e le go Mo adima selo se itšego. O holofetša gore o tla re putsa bakeng sa seo.

MEPUTSO YA GONA BJALE LE YA NAKONG E TLAGO

15. O lebeletše pele go tlo hwetša moputso ofe? (Bona seswantšho seo se lego mathomong a sehlogo.)

15 Bakriste bao ba tloditšwego ka moya o mokgethwa ba kgothatšwa ke gore ba tlo hwetša “mphapahlogo wa toko, woo Morena, yena moahlodi wa go loka, a tlago go [ba fa] wona e le moputso letšatšing leo.” (2 Tim. 4:7, 8) Lega go le bjalo, ga se gore Modimo o go hloile ge o sa ye legodimong. Batho ba dimilione bao e lego “dinku tše dingwe” tša Jesu ba letetše ka tetelokgolo  moputso wa go phela ka mo go sa felego paradeiseng mo lefaseng. Ka nako yeo, “ba tla thaba kudu ka baka la go ata ga khutšo.”Joh. 10:16; Ps. 37:11.

16. 1 Johane 3:19, 20 e re homotša bjang?

16 Ka dinako tše dingwe, re ka nagana gore ga re dire selo tirelong ya Jehofa, goba ra ipotšiša ge e ba a thabišwa ke maiteko a rena. Le gona re ka ipotšiša ge e ba re swanelega go hwetša moputso le ge e le ofe. Lega go le bjalo, anke re se ke ra lebala gore “Modimo ke yo mogolo go feta dipelo tša rena gomme o tseba dilo tšohle.” (Bala 1 Johane 3:19, 20.) O tla re putsa ge re dira selo se sengwe le se sengwe ka pelo ka moka tirelong ya gagwe e kgethwa. Le gona o tla re šegofatša ge re dira selo le ge e le sefe ka tumelo le ka lerato, le ge rena re bona okare ga re dire selo.Mar. 12:41-44.

17. Tše dingwe tša ditšhegofatšo tšeo re di thabelago gona bjale ke dife?

17 Gaešita le mehleng ye ya bofelo bja tshepedišo e kgopo ya Sathane, Jehofa o šegofatša batho ba gagwe. O kgonthišetša gore barapedi ba therešo ba a atlega tirelong ya gagwe, ka go re fepa ka tsela e sa bapišwego le selo. (Jes. 54:13) Go etša ge Jesu a holofeditše, Jehofa o re putsa gona bjale ka go re dumelela go ba karolo ya lapa la bana babo rena le dikgaetšedi ba moya bao ba nago le lerato, e lego lapa le legolo la ditšhabatšhaba. (Mar. 10:29, 30) Go oketša moo, Modimo o putsa bao ba mo tsomago ka phišego ka go ba nea khutšo e sa bapišwego le selo ya monagano, kgotsofalo le lethabo.Bafil. 4:4-7.

18, 19. Bahlanka ba Jehofa ba ikwa bjang ka meputso yeo a ba neago yona?

18 Bahlanka ba Jehofa lefaseng ka moka ba ka bolela ba tiišitše gore Jehofa o ba putsa ka tsela e makatšago. Ka mohlala, kgaetšedi yo a bitšwago Bianca, wa kua Jeremane o re: “Ke hloka mantšu a go leboga Jehofa ka ge a nthuša go se belaele kudu le go nthekga letšatši le letšatši. Lefase le hlakahlakane e bile le mpefala le go feta. Eupša ge ke dutše ke šoma kgauswi le Jehofa, ke ikwa ke šireletšegile ka diatleng tša gagwe. Nako le nako ge ke ikgafa tirelong ya gagwe, o mputsa kudu.”

19 Goba nagana ka mohlala wa kgaetšedi Paula yo a dulago Canada. O na le mengwaga e 70 gomme o goga ga boima ka baka la bolwetši bja mokokotlo. O re: “Le ge ke sa kgone go sepela, seo ga se re gore ke se ke ka bolela le batho ka Beibele. Ke diriša mekgwa e fapafapanego ya go nea bohlatse, go swana le go nea bohlatse ka founo le go nea bohlatse bjo bo sa rulaganyetšwago. E le gore ke ikgothatše, ke dula ke swere pukwana yeo ke ngwadilego ditemana tša Beibele le dintlha tše di tšwago ka dikgatišong tša rena tšeo ke di balago nako le nako. Ke e bitša ‘Pukwana Yeo e Mmatlafatšago.’ Re ka se dule re nyamile ge e ba re naganišiša ka dikholofetšo tša Jehofa. Jehofa o dula a ikemišeditše go re thuša, go sa šetšwe maemo a rena.” Maemo a gago a ka ba a fapane le a Bianca goba Paula. Lega go le bjalo, o ka nagana ka ditsela tšeo Jehofa a go putsitšego ka tšona goba a putsitšego batho bao o ba tsebago. Ruri o tla kgothatšega ge o ka naganišiša ka tsela yeo Jehofa a go putsago ka yona gona bjale, le kamoo a tlago go go putsa ka gona nakong e tlago!

20. Ke’ng seo re tlago go se hwetša ge e ba re tšwela pele re hlankela Jehofa ka moya ka moka?

20 Le ka mohla o se ke wa lebala gore ge o rapela Jehofa go tšwa pelong e bile o bolela le yena ka tokologo ya polelo, ‘o tla go lefa ka moputso o mogolo.’ O ka kgodišega gore ‘ka morago ga ge o dirile thato ya Modimo, o tla amogela seo a re holofeditšego sona.’ (Baheb. 10:35, 36) Ka gona anke ga bjale re tšweleng pele re tiiša tumelo ya rena le go hlankela Jehofa ka moya ka moka. Seo re ka kgona go se dira, ka ge re tseba gore Jehofa o tla re putsa.Bala Bakolose 3:23, 24.