Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) DECEMBER 2016

‘Go Bea Monagano Dilong tša Moya go Bolela Bophelo le Khutšo’

‘Go Bea Monagano Dilong tša Moya go Bolela Bophelo le Khutšo’

“Bao ba dumelelanago le moya ba [bea menagano ya bona] dilong tša moya.”BAROMA 8:5.

DIKOPELO: 57, 52

1, 2. Ke ka baka la’ng lengwalo la Baroma kgaolo 8 le le bohlokwa go Bakriste ba tloditšwego?

NAKONG ya segopotšo sa ngwaga le ngwaga sa lehu la Jesu, na o kile wa bala Baroma 8:15-17? Mohlomongwe. Lengwalo le le hlalosa kamoo Bakriste ba tsebago ka gona gore ba tloditšwe—moya o mokgethwa o hlatselana le moya wa bona gore ke batlotšwa. E bile temana ya mathomo kgaolong yeo e bolela ka “bao ba lego boteeng le Kriste Jesu.” Eupša na Baroma kgaolo 8 e bolela ka batlotšwa feela? Goba na e bolela le ka Bakriste bao ba nago le kholofelo ya go tlo phela mo lefaseng?

2 Baroma kgaolo 8 e ngwaletšwe ka mo go kgethegilego Bakriste ba tloditšwego. Ba amogela “moya” e le bao ba ‘letilego ka phišego go amogelwa e le barwa le go lokollwa mebeleng ya bona ya nama ka topollo.’ (Baroma 8:23) Ee, moputso wa bona ke go yo ba barwa ba Modimo kua legodimong. Seo se a kgonega ka gobane ba ile ba kolobetšwa, Modimo a diriša sehlabelo sa topollo go bona, a ba lebalela dibe tša bona gomme a bolela gore ba lokile e le barwa ba gagwe ba moya.Baroma 3:23-26; 4:25; 8:30.

3. Ke ka baka la’ng re phetha ka gore Baroma kgaolo 8 e bohlokwa le go bao ba tlago go phela mo lefaseng?

3 Lega go le bjalo, Baroma kgaolo 8 e bohlokwa le go bao ba nago  le kholofelo ya go tlo phela mo lefaseng ka gobane ka kgopolo e itšego Modimo o ba lebelela e le baloki. Re hwetša bohlatse bja seo mantšung ao Paulo a a ngwadilego pejana lengwalong le. Go kgaolo 4, o boletše ka Aborahama. Monna yoo wa tumelo o phetše mehleng ya pele ga ge Jehofa a ka nea Baisiraele Molao, le pele Jesu a ka hwela dibe tša rena. Lega go le bjalo, Jehofa o ile a bona tumelo e matla ya Aborahama gomme a mmitša moloki. (Bala Baroma 4:20-22.) Ka tsela e swanago, le lehono Jehofa a ka lebelela Bakriste ba botegago bao ba tlago go phela ka mo go sa felego mo lefaseng e le baloki. Ka go re’alo, le bona ba ka holwa ke keletšo yeo e lego go Baroma kgaolo 8 yeo e ngwaletšwego baloki.

4. Lengwalo la Baroma 8:21 le swanetše go re tutueletša go ipotšiša potšišo efe?

4 Go Baroma 8:21, re hwetša kgonthišetšo ya gore lefase le lefsa le tseleng. Temana ye e re holofetša gore “tlholo ka boyona le yona e [tlo lokollwa] bokgobeng bja tshenyego gomme e be le tokologo ya letago ya bana ba Modimo.” Ka gona re swanetše go ipotšiša ge e ba re tla ba re le gona ka nako yeo gomme ra hwetša moputso woo. Na o kgodišegile gore o tlo o hwetša? Baroma kgaolo 8 e re nea keletšo yeo e tlago go re thuša go hwetša moputso woo.

“GO BEA MONAGANO GO TŠA NAMA”

5. Go Baroma 8:4-13, Paulo o boletše ka taba efe ya bohlokwa?

5 Bala Baroma 8:4-13. Baroma kgaolo 8 e bolela ka phapano magareng ga bao ba sepelago “ka go dumelelana le nama” le bao ba sepelago “ka go dumelelana le moya.” Batho ba bangwe ba ka nagana gore phapano ye ke ya magareng ga batho ba lefase le Dihlatse tša Jehofa, le magareng ga Bakriste le bao e sego Bakriste. Eupša lengwalo le Paulo o le ngwaletše “bao ba lego Roma e le baratiwa ba Modimo bao ba biditšwego gore e be bakgethwa.” (Baroma 1:7) Ka baka leo, Paulo o be a bontšha phapano magareng ga Bakriste bao ba bego ba sepela ka go dumelelana le nama le Bakriste bao ba bego ba sepela ka go dumelelana le moya. Phapano yeo e be e le efe?

6, 7. (a) Beibele e diriša lentšu “nama” ka ditsela dife tše dingwe? (b) Go Baroma 8:4-13, Paulo o dirišitše lentšu “nama” ka kgopolo efe?

6 Sa pele, nagana ka lentšu “nama.” Paulo o be a bolela ka’ng? Beibele e diriša lentšu “nama” ka ditsela tše di fapafapanego. Ka dinako tše dingwe, lentšu leo le šupa go nama ya mebele ya  rena. (Baroma 2:28; 1 Bakor. 15:39, 50) Le gona le ka šupa go ba leloko. Paulo o be a lebelela Bajuda e le “metswalo ya [gagwe] ka nama.”Baroma 1:3; 9:3.

7 Lega go le bjalo, seo Paulo a se ngwadilego go kgaolo 7 se re thuša go kwešiša “nama” yeo go bolelwago ka yona go Baroma 8:4-13. O tswalantše go “phela ka go dumelelana le nama” le “dikganyogo tša sebe” tšeo ka nako yeo di bego “di šoma dithong tša [bona].” (Baroma 7:5) Se se re thuša go kwešiša seo se bolelwago ke polelwana yeo e rego “bao ba [phelago] ka go dumelelana le nama,” bao Paulo a itšego “ba bea menagano ya bona dilong tša nama.” Paulo o be a bolela ka batho bao ba laolwago ke dikganyogo le dikgopolo tše mpe. Ge e le gabotse, ba ke bao ba šalago dikganyogo tša bona morago, e ka ba dikganyogo tša thobalano goba tše dingwe.

8. Ke ka baka la’ng go be go swanetše gore gaešita le Bakriste ba tloditšwego ba lemošwe ka kotsi ya go sepela “ka go dumelelana le nama”?

8 Eupša o ka ipotšiša gore ke ka baka la eng Paulo a ka botša Bakriste ba tloditšwego tsebe-go-kwa ka kotsi ya go phela “ka go dumelelana le nama.” Le gona na kotsi e swanago e ka wela Bakriste lehono, bao Modimo a ba amogetšego e le bagwera ba gagwe le go ba lebelela e le baloki? Ka maswabi, Mokriste le ge e le ofe a ka thoma go sepela ka go dumelelana le dikganyogo tša nama. Ka mohlala, Paulo o ngwadile gore ba bangwe ba bana babo rena kua Roma e be e le makgoba “a dimpa tša bona.” Go ka direga gore ba be ba rata thobalano ka mo go feteletšego, dijo, dino goba dilo tše dingwe. Ba bangwe ba bona ba be ba ‘fapoša bao ba se nago molato.’ (Baroma 16:17, 18; Bafil. 3:18, 19; Juda 4, 8, 12) Le gona gopola gore ka nako e itšego, ngwanabo rena yo mongwe kua Korinthe o be a “dula le mosadi wa tatagwe.” (1 Bakor. 5:1) Ka gona ga go makatše ge Modimo a ile a diriša Paulo go lemoša Bakriste ka kotsi ya “go bea monagano go tša nama.”Baroma 8:5, 6.

9. Temošo ya Paulo yeo e lego go Baroma 8:6 ga e bolele ka eng?

9 Temošo yeo e sa šoma le lehono. Ka morago ga gore Mokriste a hlankele Modimo ka mengwaga e mentši, a ka thoma go bea monagano wa gagwe dilong tša nama. Se ga se bolele ka Mokriste yo a felago a nagana ka dijo, mošomo, boitapološo, goba gaešita le go nyala goba go nyalwa. Tše ke dilo tšeo bahlanka ba bantši ba Modimo ba di dirago. Jesu o be a thabela dijo,  e bile o ile a fepa mašaba. O be a tseba bohlokwa bja go itapološa. E bile Paulo o ngwadile ka kganyogo ya maleba ya go ba le thobalano lenyalong.

Na dilo tše o ratago go bolela ka tšona di bontšha gore o nagana ka dilo tša moya goba tša nama? (Bona serapa 10 le 11)

10. Go Baroma 8:5, 6, polelwana yeo e rego “go bea monagano go tša nama” e bolela’ng?

10 Ka gona, ke’ng seo Paulo a bego a se bolela mabapi le “go bea monagano go tša nama”? Lentšu la Segerika leo Paulo a le dirišitšego le bolela “go bea monagano goba pelo selong se itšego, go nagana kudu ka selo goba go nwelela go sona.” Bao ba dirago dilo ka go dumelelana le nama ba dumelela go se phethagale ga rena go laola tsela yeo ba phelago ka yona. Seithuti se sengwe sa Beibele se boletše ka lentšu leo le lego go Baroma 8:5 gore: “Ba dula ba nagana ka dilo tša nama, ba dula ba bolela ka tšona, ba a di dira, ba itheta ka tšona e bile ba di rata kudu.”

11. Ke dilo tša mohuta ofe tšeo re ka naganago ka tšona ge re ipotšiša gore, ‘Ke dilo dife tšeo ke di ratago kudu bophelong?’

11 Bakriste ba kua Roma ba be ba swanetše go itlhahloba gomme ba ipotšiše gore ba etiša eng pele maphelong a bona. Na go ka direga gore ba be ba etiša ‘dilo tša nama’ pele, goba ba tshwenyega kudu ka tšona? Le rena re swanetše go ipotšiša potšišo e swanago. Ke dilo dife tšeo re di ratago kudu, dilo tšeo re di bolelago di utolla’ng ka rena? Ke dilo dife tšeo re di kitimišago maphelong a rena? Ba bangwe ba ka hwetša gore ba swaregile ka go hwetša mabjala a monate, go kgabiša magae a bona, go hwetša diaparo tše mpsha tše di lego fešeneng, go dira tšhelete, go rulaganya maeto le dilo tše dingwe. Ga se gore dilo tše di fošagetše; di ka natefiša bophelo. Ka mohlala, nakong e nngwe Jesu o ile a dira beine, gomme Paulo o ile a botša Timotheo gore a nwe “beine e nyenyane.” (1 Tim. 5:23; Joh. 2:3-11) Eupša na Jesu le Paulo ‘ba be ba dula ba bolela ka dilo tše le go di rata kudu’? Na ba be ba phelela tšona, ‘ba dula ba bolela’ ka tšona? Aowa. Go thwe’ng ka wena? Ke dilo dife tšeo o di ratago kudu bophelong bja gago?

12, 13. Ke ka baka la’ng re swanetše go šetša dilo tšeo re naganago ka tšona?

12 Re swanetše go itlhahloba. Ka baka la’ng? Ka baka la seo Paulo a se ngwadilego. O itše: “Go bea monagano go tša nama go bolela lehu.” (Baroma 8:6) Taba ye ga se papadi—re ka hwa moyeng gona bjale gomme ra tla ra hwa e le ka kgonthe nakong e tlago. Lega go le bjalo, Paulo o be a sa re gore motho yo a thomilego go “bea monagano go tša nama” go fedile ka yena. Motho yoo o sa dutše a ka fetoga. Nagana ka monna yo a gobogilego wa kua Korinthe yoo a bego a phela ka go dumelelana le “nama” gomme ka morago a kgaolwa. O be a sa dutše a ka lahla mekgwa ya gagwe e mebe, e bile o ile a dira bjalo. O ile a kgaotša go sepela ka go dumelelana le nama gomme a boela tseleng.2 Bakor. 2:6-8.

13 Ge e ba monna yoo a ile a kgona go lahla mekgwa ya gagwe e mebe, go ra gore le lehono Mokriste yo a arogilego a ka fetoga, kudukudu ge e ba a se a hlwa a nwelela mekgweng e mebe go swana le monna yoo wa Korinthe. Ka gona, temošo ya Paulo ya mabapi le seo se ka diragalelago motho yo a ‘beago monagano dilong tša nama,’ e swanetše go re tsoša borokong gomme re dire diphetogo tše di nyakegago!

“GO BEA MONAGANO GO TŠA MOYA”

14, 15. (a) Ke’ng seo re ka se dirago go e na le go ‘bea menagano ya rena go tša nama’? (b) Ke’ng seo “go bea monagano go tša moya” go sa se bolelego?

14 Ka morago ga gore moapostola Paulo a re lemoše ka kotsi ya “go bea monagano go tša nama,” o boletše ka kholofetšo e kgahlišago yeo e rego: “Go bea monagano go tša moya go bolela bophelo le khutšo.” A moputso o kgahlišago gakaakaang—bophelo le khutšo! Re ka hwetša bjang moputso wo?

15 “Go bea monagano go tša moya” ga go bolele  gore motho a itire moloki. Ga se gore o swanetše go hlwa a bolela ka Beibele feela, go rata Modimo goba kholofelo ya gagwe ka bokamoso. Gopola gore Paulo le Bakriste ba bangwe bao ba bego ba botegela Modimo lekgolong la pele la nywaga ba be ba phela go swana le batho ba bangwe. Ba be ba eja dijo e bile ba enwa dino. Ba bantši ba be ba le lenyalong gomme ba na le malapa, e bile ba šoma mešomo ya boiphedišo.Mar. 6:3; 1 Bathes. 2:9.

16. Le ge Paulo a be a phela go swana le batho ba bangwe, o be a swaregile ka eng bophelong bja gagwe?

16 Lega go le bjalo, bahlanka bao ba Modimo ga se ba ka ba dumelela dilo tšeo di etla pele maphelong a bona. Ka morago ga gore Beibele e bontšhe gore Paulo o be a šoma go dira ditente, e re botša ka mošomo o mogolo wo a bego a swaregile ka wona, e lego go bolela ditaba tše dibotse ka mehla le go dira barutiwa. (Bala Ditiro 18:2-4; 20:20, 21, 34, 35.) Ye ke mešomo yeo a ilego a kgothaletša bana babo le dikgaetšedi ba kua Roma go e dira. Ee, bophelong bja gagwe ka moka, Paulo o be a swaregile ka dilo tša moya le go hlankela Modimo. Bakriste ba Roma ba be ba swanetše go mo ekiša, gomme le rena re swanetše go dira bjalo.Baroma 15:15, 16.

17. Ge re ka ‘bea menagano ya rena dilong tša moya,’ re tla ba le bophelo bja mohuta mang?

17 Mafelelo e tla ba afe ge re ka etiša pele go hlankela Modimo? Baroma 8:6 e araba ka mo go kwagalago ka gore: “Go bea monagano go tša moya go bolela bophelo le khutšo.” Se se ra gore re dumelele menagano ya rena gore e hlahlwe ke moya o mokgethwa, gomme re nagane go swana le Modimo. Ge re ka dula re nagana ka dilo tša “moya,” re tla thaba kudu, gomme mafelelong ra hwetša bophelo bjo bo sa felego, e ka ba legodimong goba mo lefaseng.

18. Ke ka tsela efe “go bea monagano go tša moya” go dirago gore re be le khutšo?

18 Nagana ka kholofetšo yeo e rego “go bea monagano go tša moya go bolela . . . khutšo.” Batho ba bantši ba nyakana le khutšo ya monagano mosegare le bošego. Ge ba dutše ba nyakana le yona, rena re na le yona. Leswao le lengwe la gore re na le khutšo e bjalo ke ge re phedišana ka khutšo le ditho tša malapa a rena le tša phuthego. Re a tseba gore rena gotee le bana babo rena ga se ra phethagala. Ka baka leo, re tlo fela re kgopišana, gomme ge seo se direga, re rutilwe gore re latele keletšo ya Jesu yeo e rego: “Dira khutšo le ngwaneno.” (Mat. 5:24) Se go tla ba bonolo go se dira ge e ba re gopola gore ngwanabo rena yoo goba kgaetšedi le yena o hlankela “Modimo yo a neago khutšo.”Baroma 15:33; 16:20.

19. “Go bea monagano go tša moya” go tla re thuša go ba le khutšo efe ya moswananoši?

19 Le gona go na le khutšo e nngwe yeo e sa bapišwego le selo. Ge re ‘bea menagano ya rena go tša moya,’ re ba le khutšo le Mmopi wa rena. Jesaya o ngwadile mantšu ao a bego a šoma mehleng ya gagwe eupša e le ao a phethagalago ka tsela e kgolo lehono, a re: “[Wena Jehofa] ba monagano o tsepamego o tla ba šireletša ka khutšo ya neng le neng, ka gobane motho a go botile.”Jes. 26:3; bala Baroma 5:1.

20. Ke ka baka la’ng o leboga keletšo yeo e lego go Baroma kgaolo 8?

20 Ka gona, go sa šetšwe gore re batlotšwa goba gore re tlo phela ka mo go sa felego lefaseng la paradeise, re swanetše go leboga keletšo ya Modimo yeo e lego go Baroma kgaolo 8. Ruri re leboga keletšo ya gore re se ke ra etiša dilo tša “nama” pele maphelong a rena! Go e na le moo, re bona bohlale bja go phela ka go dumelelana le kholofetšo yeo e rego: ‘Go bea monagano dilong tša moya go bolela bophelo le khutšo.’ Moputso wa go dira bjalo ke wa ka mo go sa felego, ka gore Paulo o ngwadile gore: “Moputso woo sebe se o lefago ke lehu, eupša mpho yeo Modimo a e neago ke bophelo bjo bo sa felego ka Kriste Jesu Morena wa rena.”Baroma 6:23.