Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) DECEMBER 2016

Go ba yo Boleta ke Bohlale

Go ba yo Boleta ke Bohlale

Toñi, yo a šomago go hlokomela batšofadi, o ile a kokota mojakong wa ntlo e nngwe ke moka mosadi yo mongwe a bula. Mosadi yoo o ile a galefa gomme a omanya Toñi gore ga se a fihla ka nako go tlo hlokomela mmagwe yo a tšofetšego. Eupša Toñi o be a fihlile ka nako. Lega go le bjalo, Toñi ka boleta o ile a kgopela tshwarelo.

GE Toñi a boela gape ntlong yeo, mosadi yoo o ile a mo omanya gape. Toñi o ile a arabela bjang? O re: “Ke ile ka kwa bohloko. O ntlhabile ka mantšu ke se na molato.” Lega go le bjalo, Toñi o ile a kgopela tshwarelo gape gomme a botša mosadi yoo gore o kwešiša maemo a gagwe a boima.

Ge e ba o be o le Toñi, o nagana gore nkabe o ile wa arabela bjang? Na nkabe o bile boleta? Goba na nkabe o ile wa palelwa ke go itshwara? Ke therešo gore go ka no se be bonolo go dula o išitše maswafo fase maemong a go swana le ao a hlalositšwego ka mo godimo. Ge re gateletšegile goba re hlohlwa, go ba boima gore re dule re le boleta.

Lega go le bjalo, Beibele e kgothaletša Bakriste gore ba be boleta. Ge e le gabotse, Lentšu la Modimo le tswalanya seka seo le bohlale. Jakobo o botšiša gore: “Ke mang yo bohlale le yo a nago le tlhaologanyo gare ga lena? Anke ka boitshwaro bja gagwe bjo bobotse a bontšhe mediro yeo e dirwago ka boleta bjo bo tšweletšwago ke bohlale.” (Jak. 3:13) Ke ka tsela efe go ba boleta go  bontšhago gore re na le bohlale bjo bo tšwago go Modimo? Gona re ka thušwa ke eng go ba le seka se seo se enywago e ke moya wa Modimo?

MEHOLA YA GO BA BOLETA

Go ba boleta go re thuša go rarolla diphapano. “Karabo ge e le boleta e phohliša pefelo, eupša lentšu leo le hlabago le tsoša bogale.”Die. 15:1.

Go arabela ka bogale go ka mpefatša boemo ka gobane go swana le go tšhela peterole mollong. (Die. 26:21) Ka lehlakoreng le lengwe, go arabela ka boleta go ka kaonefatša boemo. Le gona go ka dira gore motho yo a re galefetšego a theoše maswafo.

Toñi o ile a bona gore taba ye ke therešo. Ge mosadi yola wa go galefa a bona gore Toñi o mo arabile ka boleta, o ile a lla. O ile a hlalosetša Toñi gore o be a imelwa ke mathata a gagwe ka noši le a lapa. Toñi o ile a diriša sebaka seo go botša mosadi yoo ka Modimo gomme thuto ya Beibele ya thoma—feela ka gobane Toñi o ile a dula a le boleta le go ba le khutšo.

Go ba boleta go dira gore re thabe. “Go thaba ba moya o boleta, ka ge ba tla ja bohwa bja lefase.”Mat. 5:5.

Ke ka baka la’ng batho ba boleta ba thabile? Batho ba bantši bao ba bego ba le bogale, ga bjale ba thabile ka gobane ba boleta. Maphelo a bona a kaonafetše, e bile ba a tseba gore ba letetšwe ke bokamoso bjo bobotse. (Bakol. 3:12) Adolfo, yo e lego molebeledi wa tikologo kua Sepania, o gopola kamoo bophelo bja gagwe bo bego bo le ka gona pele e ka ba Hlatse ya Jehofa.

Adolfo o re: “Ke be ke sa tsebe gore ke phelela eng. Ke be ke le sefelapelwana. Gaešita le bagwera ba bangwe ba ka ba be ba ntšhaba ka gore ke be ke le bogale e bile ke le šoro. Dilo di ile tša fetoga. Ka letšatši le lengwe, go ile gwa tsoga ntwa ya mahlomahubedu, ba ntlhaba ka thipa ka makga a tshela gomme ka tšwa madi a mantši moo ke nyakilego ke ehwa.”

Lega go le bjalo, ga bjale Adolfo o ruta ba bangwe go ba boleta ka mantšu a gagwe le ditiro. Batho ba bantši ba a mo rata ka gore o bonolo e bile o borutho. Adolfo o re o thabišwa ke diphetogo tšeo a kgonnego go di dira. Le gona o leboga Jehofa ka ge a mo thušitše go ba boleta.

Go ba boleta go thabiša Jehofa. “Morwa wa ka, hlalefa gomme o thabiše pelo ya ka, gore ke kgone go fetola yo a nkwerago.”Die. 27:11.

Jehofa o kwerwa ke lenaba la gagwe le legolo e lego Diabolo. Modimo o na le lebaka le le kwagalago la go galefišwa ke seo, eupša Beibele e hlalosa Jehofa e le yo a “diegago go galefa.” (Ek. 34:6) Ge re ka diega go galefa go swana le Modimo, re tla ba re bontšha gore re bohlale gomme ra thabiša Jehofa kudu.Baef. 5:1.

Batho ba lefase ba sehlogo. Re ka kopana le batho ba “go ikgantšha, ba ikgogomošago, barogaki, . . . bathomeletši, ba se nago boitshwaro [le] ba bogale.” (2 Tim. 3:2, 3) Lega go le bjalo, seo ga se sa swanela go re thibela go ba boleta. Lentšu la Modimo le re gopotša gore “bohlale bjo bo tšwago godimo . . . bo na le khutšo, bo lekalekane.” (Jak. 3:17) Ge re na le khutšo le tekatekano, re bontšha gore re na le bohlale bjo bo tšwago go Modimo. Bohlale bjo bo bjalo bo tla re thuša go arabela ka boleta ge re hlohlwa gomme bo tla re batametša kgauswiuswi le Mothopo wa Bohlale bjohle, e lego Jehofa.