Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  August 2017

Dipotšišo tše di Tšwago go Babadi

Dipotšišo tše di Tšwago go Babadi

Ke ka baka la’ng pego ya Mateo le ya Luka tšeo di bolelago ka bophelo bja Jesu bja mathomong di fapana?

Pego ya Mateo yeo e bolelago ka ditiragalo tša mabapi le matswalo a Jesu le bophelo bja gagwe bja mathomong e fapana ganyenyane le pego ya Luka ka gobane bangwadi ba Diebangedi tše ba di anega go tšwa ka mahlakoreng a mabedi a sa swanego.

Pego ya Mateo e bolela kudu ka ditiragalo tša mabapi le Josefa. E re botša ka tsela yeo Josefa a ilego a arabela ka yona ge a be a ekwa gore Maria o imile, toro yeo go yona a bonego morongwa a mo hlalosetša seo se diragaletšego Maria le ge a be a amogela taba yeo. (Mat. 1:19-25) Mateo o tšwela pele go re botša ka toro yeo go yona morongwa a botšago Josefa gore a tšhabele Egipita le ge a be a tšhabela Egipita le lapa la gagwe. O re botša le ka toro yeo go yona morongwa a mmotšago gore a boele nageng ya Isiraele, go boela ga gagwe Isiraele le ge a be a kgetha gore lapa la gagwe le dule Natsaretha. (Mat. 2:13, 14, 19-23) Dikgaolong tša mathomo tša Ebangedi ya Mateo, leina la Josefa le tšwelela ka makga a seswai, eupša la Maria le tšwelela ka makga a mane.

Ka lehlakoreng le lengwe, pego ya Luka yona e bolela kudu ka Maria. E re botša ka nako ya ge Maria a be a etelwa ke morongwa Gabariele, ge Maria a be a etela motswala wa gagwe Elisabetha le mantšu a gagwe a ge a be a reta Jehofa. (Luka 1:26-56) Le gona Luka o re botša ka mantšu ao Simeone a ilego a a botša Maria a gore Jesu o be a tlo tlaišwa ge nako e dutše e eya. Go oketša moo, pegong yeo go yona Luka a re botšago ka Josefa le Maria ba eya tempeleng ge Jesu a be a na le mengwaga e 12, o re botša ka mantšu ao Maria a ilego a a bolela, e sego a Josefa. Luka o oketša ka gore Maria o ile a kgongwa pelo ke ditiragalo tšeo ka moka. (Luka 2:19, 34, 35, 48, 51) Dikgaolong tša mathomo tša Ebangedi ya Luka, leina la Maria le tšwelela ka makga a 12, eupša la Josefa le tšwelela ka makga a mararo feela. Ka gona, Mateo o re hlalosetša kudu ka dilo tšeo Josefa a bego a tshwenyegile ka tšona le mediro ya gagwe, mola Luka a re botša ka botlalo ka Maria le dilo tšeo di mo diragaletšego.

Ka mo go swanago, mašika ao bangwadi ba Diebangedi tše tše pedi ba boletšego ka wona ga a swane. Mateo o bolela ka lešika la gabo Josefa le go bontšha gore Jesu, yoo tatagwe wa mogodiši e lego Josefa, ke mojabohwa wa bogoši bja Dafida ka molao. Ke ka baka la’ng Mateo a boletše bjalo? Ke ka gobane Josefa ke setlogolo sa Kgoši Dafida seo se tšweletšego lešikeng la morwa wa Dafida e lego Solomone. (Mat. 1:6, 16) Eupša go bonagala Luka yena a bolela ka lešika la gabo Maria le go bontšha gore Jesu ke mojabohwa wa bogoši bja Dafida ka tlhago, ka ge “[a belegwe] e le motho go tšwa peung ya Dafida.” (Baroma 1:3) Ke ka baka la’ng Luka a boletše bjalo? Ke ka gobane Maria ke setlogolo sa Kgoši Dafida seo se tšweletšego lešikeng la Morwa wa Dafida e lego Nathane. (Luka 3:31) Eupša ke ka baka la’ng Luka lešikeng la gagwe a sa bolele ka Maria gore ke morwedi wa Heli, gaešita le ge Heli e be e le tatago Maria? Ke ka gobane gantši mašika a semolao a be a bolela ka banna e sego basadi. Ka baka leo, ge Luka lešikeng la gagwe a be a bolela ka Josefa gore ke morwa wa Heli, go be go kwešišwa gore Josefa ke mokgonyana wa Heli.​—Luka 3:23.

Re kgona go bona gore mašika ao Mateo le Luka ba boletšego ka wona a tiišetša taba ya gore Jesu ke Mesia yo go boletšwego ka yena e sa le pele. Ge e le gabotse, taba ya gore lešika la gabo Jesu le be le nepagetše e be e tsebega kudu moo gaešita le Bafarisei le Basadutsei ba bego ba sa kgone go e ganetša. Lehono, mašika ao Mateo le Luka ba boletšego ka wona e sa dutše e le karolo e bohlokwa ya ditumelo tša rena le bohlatse bja gore dikholofetšo tša Modimo di a botega.