Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  August 2017

Na o tla Letela Jehofa ka go se Fele Pelo?

Na o tla Letela Jehofa ka go se Fele Pelo?

“Le lena bontšhang go se fele pelo.”​—JAK. 5:8.

DIKOPELO: 78, 139

1, 2. (a) Ke’ng se se ka dirago gore re botšiše potšišo yeo e rego: “Go fihlela neng”? (b) Ke ka baka la’ng mehlala ya bahlanka ba botegago ba mehleng e fetilego e ka re kgothatša?

“GO FIHLELA neng?” Potšišo ye e ile ya botšišwa ke baporofeta bao ba botegago e lego Jesaya le Habakuku. (Jes. 6:11; Habak. 1:2) Ge Kgoši Dafida a be a ngwala Psalme 13, le yena o ile a botšiša ka makga a mane gore: “Go fihla neng?” (Ps. 13:1, 2) Gaešita le Morena wa rena Jesu Kriste o ile a botšiša potšišo ye ge a be a dirišana le batho ba go hloka tumelo. (Mat. 17:17) Ka gona le rena ga se ra swanela go makala ge ka dinako tše dingwe re ka ikhwetša re ipotšiša yona potšišo ye.

2 Ke’ng seo se ka dirago gore re botšiše potšišo yeo e rego: “Go fihlela neng”? Ke ge e ba re swerwe ka go hloka toka, goba ge e ba re tlaišwa ke botšofadi le bolwetši, goba mathata ao a tlišwago ke go phela ‘dinakong tše di hlobaetšago’ tšeo go lego ‘thata kudu go lebeletšana le tšona.’ (2 Tim. 3:1) Goba re ka ba re sa robale ka baka la mekgwa e mebe ya batho bao re phelago le bona. Go sa šetšwe gore lebaka ke lefe, ruri go a kgothatša go tseba gore bahlanka ba Jehofa ba botegago ba nakong e fetilego ba ile ba se tšhabe go botšiša potšišo ye, yeo le rena re ka ipotšišago yona. Le gona go a kgothatša go  tseba gore Jehofa ga se a ka a ba galefela ge ba be ba e botšiša.

3. Re ka thušwa ke’ng ge re na le mathata?

3 Eupša re ka thušwa ke’ng ge re ka welwa ke mathata a go swana le ao re boletšego ka wona? Jehofa o ile a laela morutiwa Jakobo, yoo e lego ngwanabo Jesu ka motswadi o tee, go ngwala gore: “Ka gona bana bešo, le se ke la fela pelo go fihlela nakong ya go ba gona ga Morena.” (Jak. 5:7) Ee, ka moka ga rena re swanetše go se fele pelo. Eupša go nyakega’ng gore re be le seka se sa Modimo?

GO SE FELE PELO KE ENG?

4, 5. (a) Go se fele pelo go akaretša’ng? (b) Morutiwa Jakobo o hlalosa bjang se sengwe sa dika tša go se fele pelo? (Bona seswantšho seo se lego mathomong a sehlogo.)

4 Go ya ka Beibele, go se fele pelo ke seka seo se enywago ke moya o mokgethwa. Ka ge re sa phethagala, re ka se kgone go bontšha go se fele pelo ka tekanyo yeo Modimo a e nyakago ntle le thušo ya gagwe. Go se fele pelo ke mpho e tšwago go Modimo, gomme tsela e kgolo ya go bontšha gore re a mo rata ke ge re sa fele pelo. Le gona ge re sa fele pelo re bontšha gore re rata batho ba bangwe. Ge re dula re felela ba bangwe pelo, re tlo feleletša re ba hloya; eupša go se fele pelo go tla dira gore re ba rate. (1 Bakor. 13:4; Bagal. 5:22) Go se fele pelo go tswalana le dika tše dingwe tše mmalwa tša Modimo. Ka mohlala, go tswalana kudu le kgotlelelo, yeo e re thušago go dula re thabile gaešita le ge re na le mathata. (Bakol. 1:11; Jak. 1:3, 4) Le gona go se fele pelo go ka akaretša go kgotlelela go tlaišwa eupša re sa itefeletše le go dula re tiile go sa šetšwe seo se diregago. Go oketša moo, Beibele e re kgothaletša gore re be le moya wa go leta, e bile re dire seo ka go rata. Polelwana ye e hlaloswa gabotse go Jakobo 5:7, 8b (Bala), ka ge e le seka sa go se fele pelo.

5 Ke ka baka la’ng re swanetše go letela Jehofa? Jakobo o swantšha boemo bja rena le bja molemi. Le ge molemi a ka šoma ka thata gore a bjale dibjalo, a ka se kgone go laola leratadima goba go dira gore dibjalo tša gagwe di gole. Le gona a ka se kgone go dira gore nako ya go buna e fihle ka pela. O a tseba gore o swanetše go leta ka go se fele pelo “dienywa tše bohlokwa tša lefase.” Ka tsela e swanago, go na le dilo tše dintši tšeo re ka se kgonego go di laola ge re dutše re letile dikholofetšo tša Jehofa gore di phethagale. (Mar. 13:32, 33; Dit. 1:7) Go swana le molemi, re swanetše go letela Jehofa ka go se fele pelo.

6. Re ka ithuta’ng mohlaleng wa moporofeta Mika?

6 Maemo a lehono a swana le a mehleng ya moporofeta Mika. Mika o phetše mehleng ya ge go be go buša Kgoši Ahasi yo kgopo, nakong ya ge go be go tletše baradia. Ge e le gabotse, batho e be e le ‘dithakga tša go dira bobe.’ (Bala Mika 7:1-3.) Mika o ile a lemoga gore a ka se kgone go fetoša maemo ao. O ile a dira’ng? O itše: “Ge e le nna ke tla dula ke lebeletše Jehofa. Ke tla bontšha moya wa go leta Modimo yo a mphološago. Modimo wa ka o tla nkwa.” (Mika 7:7) Go swana le Mika, le rena re swanetše go ba le “moya wa go leta.”

7. Re swanetše go dira’ng ge re dutše re letetše Jehofa gore a phethagatše dikholofetšo tša gagwe?

7 Ge e ba re na le tumelo ya go swana le ya Mika, re tlo letela Jehofa ka go rata. Go leta ga rena ga go swane le ga mogolegwa yo a dutšego ka seleng gomme a letetše go tlo bolawa. Yena o gapeletšega go leta, le ge seo a se letetšego se sa mo thabiše. Rena ga re swane le mogolegwa yoo! Re thabela go leta Jehofa ka gobane re a tseba gore o tlo phethagatša kholofetšo ya gagwe ya gore o tlo re fa bophelo bjo bo sa felego ge nako ya gagwe e fihla! Ka gona re “[kgotlelela] ka mo go tletšego ka go se fele pelo le ka lethabo.” (Bakol. 1:11, 12) Ge re ka dira se se fapanego,​—ke gore, ra leta Jehofa re dutše re ngongorega gore o diega go phethagatša dikholofetšo tša gagwe,—​a ka se re amogele.​—Bakol. 3:12.

 BATHO BAO BA ILEGO BA BONTŠHA GO SE FELE PELO

8. Ke’ng seo re swanetšego go ipotšiša sona ge re dutše re naganišiša ka mehlala ya banna le basadi ba botegago ba nakong e fetilego?

8 Re tlo kgona go letela Jehofa kudu ge e ba re gopola banna le basadi ba botegago ba nakong e fetilego bao ba ilego ba letela Jehofa ka go se fele pelo gore a phethagatše dikholofetšo tša gagwe. (Baroma 15:4) Ge re dutše re naganišiša ka mehlala ya bona, re swanetše go ipotšiša gore ba ile ba leta ka nako e kaakaang, gore ke ka baka la eng ba ile ba leta ka go rata le gore ba ile ba hwetša ditšhegofatšo dife.

Aborahama o ile a swanelwa ke go leta mengwaga e mentši pele ditlogolo tša gagwe e lego Esau le Jakobo di ka belegwa (Bona serapa 9 le 10)

9, 10. Aborahama le Sara ba ile ba swanelwa ke go leta Jehofa nako e kaakaang?

9 Nagana ka mohlala wa Aborahama le Sara. Ba balwa gare ga batho bao “ka tumelo le go se fele pelo ba jago bohwa bja dikholofetšo.” Mangwalo a re “eitše ge Aborahama a bontšhitše go se fele pelo,” a hwetša kholofetšo ya gore Jehofa o tlo mo šegofatša le go atiša bana ba gagwe. (Baheb. 6:12, 15) Ke ka baka la’ng Aborahama a be a swanetše go letela Jehofa ka go se fele pelo? Lebaka ke gore go be go tlo tšea nako gore Jehofa a phethagatše kholofetšo yeo. Kgwerano yeo Jehofa a e dirilego le Aborahama e ile ya thoma go šoma ka Nisani 14, 1943 B.C.E., ge yena le Sara gotee le lapa la bona ba tshetše Noka ya Efurata gomme ba tsena Nageng ya Kholofetšo. Ke moka Aborahama o ile a swanelwa ke go leta mengwaga e 25 pele ga ge morwa wa gagwe e lego Isaka a ka belegwa ka 1918 B.C.E., le gona o ile a swanelwa gape ke go leta mengwaga e mengwe e 60 pele ga ge ditlogolo tša gagwe e lego Esau le Jakobo di ka belegwa ka 1858 B.C.E.​—Baheb. 11:9.

10 Jehofa o ile a nea Aborahama naga e kaaka’ng? Beibele e re: “Lega go le bjalo [Jehofa] ga se a ka a mo [Aborahama] nea bohwa le ge e  le bofe go yona naga yeo, aowa, ga se a mo nea le yeo e lekanago gore a ka bea lenao la gagwe go yona; eupša o ile a holofetša go mo nea yona e le bohwa gomme ka morago ga gagwe a e nee bana ba gagwe, ge a be a sešo a ba le ngwana.” (Dit. 7:5) Kholofetšo ye ya Jehofa e ile ya phethagala ka morago ga mengwaga e 430 Aborahama a tshetše Noka ya Efurata. Jehofa ga se a ka a nea Aborahama naga yeo, eupša o ile a e nea ditlogolo tša gagwe tšeo e bego e šetše e le setšhaba.​—Ek. 12:40-42; Bagal. 3:17.

11. Ke ka baka la’ng Aborahama a ile a leta Jehofa ka go rata, gona o tlo thabela ditšhegofatšo dife ka baka la go se fele pelo ga gagwe?

11 Aborahama o ile a leta Jehofa ka go rata le ka go se fele pelo ka baka la gore o be a na le tumelo. (Bala Baheberu 11:8-12.) Le ge a se a ka a bona dilo tšeo Modimo a bego a mo holofeditše tšona di phethagala mehleng ya gagwe, o ile a dula a letile ka lethabo. Eupša nagana ka tsela yeo Aborahama a tlago go thaba ka yona ge a tla be a tsošwa bahung lefaseng la Paradeise! O tlo makala kudu ge a bona gore ditaba tša bophelo bja gagwe le bja bana ba gagwe di begilwe ka dipukung tše dintši tša Beibele. * Nagana kamoo a tlago go thaba ka gona ge a tlo tseba gore o kgathile tema e kgolo kudu go phethagaleng ga morero wa Jehofa wa mabapi le peu yeo e bego e holofeditšwe! Ruri o tlo thabišwa ke go tseba gore ga se a letela Jehofa mahala.

12, 13. Ke ka baka la’ng go be go nyakega gore Josefa a se fele pelo, gona o ile a dira seo ka moya ofe?

12 Setlogolo sa Aborahama e lego Josefa le sona se ile sa leta Jehofa ka go rata. Josefa o ile a swarwa gampe kudu. Sa pele, bana babo ba ile ba mo rekiša bokgobeng ge a be a na le mengwaga e ka bago e 17. Ke moka o ile a latofatšwa ka gore o lekile go kata mosadi wa mong wa gagwe gomme a feleletša a lahletšwe kgolegong. (Gen. 39:11-20; Ps. 105:17, 18) Josefa o ile a welwa ke mathata a gaešita le ge a be a dira dilo tše di lokilego. Eupša ka morago ga mengwaga e 13, dilo di ile tša fetoga. O ile a ntšhwa kgolegong gomme a newa maemo a bobedi a go hlomphega kua Egipita.​—Gen. 41:14, 37-43; Dit. 7:9, 10.

13 Na Josefa o ile a galefela Jehofa ka ge a ile a swarwa gampe? Na o ile a se sa mo tshepa? Aowa. Ke’ng seo se thušitšego Josefa gore a lete Jehofa ka go se fele pelo? O thušitšwe ke go ba le tumelo go Jehofa. O ile a bona gore Jehofa ke yena a mo thušago mathateng a gagwe. Seo se bonagetše gabotse mantšung ao a ilego a a botša bana babo, ao a rego: “Le se ke la tšhoga. A le ra gore nka ipea maemong a Modimo? Ge e le lena le be le nnaganetše bobe. Eupša kamoo go bonagalago ka gona lehono le, Modimo o be a naganne se se holago e le gore ke phološe maphelo a mantši.” (Gen. 50:19, 20) Mafelelong, Josefa o ile a lemoga gore ga se a letela Jehofa mahala.

14, 15. (a) Dafida o ile a bontšha go se fele pelo ka tsela efe e kgahlišago? (b) Dafida o thušitšwe ke’ng go leta Jehofa ka go se fele pelo?

14 Kgoši Dafida le yena o ile a swarwa ka go hloka toka ka makga a mantši. Le ge Jehofa a ile a mo kgetha e sa le yo monyenyane gore e tle e be kgoši ya nakong e tlago ya Isiraele, o ile a swanelwa ke go leta mengwaga e ka bago e 15 pele a ka thoma go buša. (2 Sam. 2:3, 4) Nakong ya ge a sa letile, Kgoši Saulo yo a sa botegego o ile a mo tsoma bošego le mosegare, a nyaka go mmolaya. * Seo se ile sa dira gore Dafida a dule a tšhaba, ka dinako tše dingwe a tšhabela nageng e šele gomme ka dinako tše dingwe a tšhabela maweng a lešokeng. Le ge mafelelong Saulo a ile a bolawa  ntweng, Dafida o ile a swanelwa ke go leta mengwaga e mengwe e ka bago e šupa pele a ka buša setšhaba ka moka sa Isiraele.​—2 Sam. 5:4, 5.

15 Ke ka baka la’ng Dafida a ile a leta Jehofa ka go se fele pelo le ka go rata? O re nea karabo psalmeng yona yeo a ilego a botšiša Jehofa ka makga a mane gore: “Go fihla neng?” O itše: “Ge e le nna ke botile botho bja gago; anke pelo ya ka e thabele phološo ya gago. Ke tla opelela Jehofa, gobane o mputsitše.” (Ps. 13:5, 6) Dafida o be a botile Jehofa gore o tla mmontšha botho. O ile a letela Jehofa ka lethabo gore e be yena a mo phološago, le gona o ile a naganišiša ka dilo tše dibotse tšeo Jehofa a ilego a mo direla tšona. Ee, Dafida o ile a lemoga gore ga se a letela Jehofa mahala.

Jehofa ga a fele pelo, ke ka baka leo a nyakago gore le rena re se ke ra fela pelo

16, 17. Jehofa Modimo le Jesu Kriste ba re beetše mohlala ofe o mobotse tabeng ya go leta?

16 Jehofa ga a fele pelo, ke ka baka leo a nyakago gore le rena re se ke ra fela pelo. O re beetše mohlala o mogolo kudu wa go ba le moya wa go leta. (Bala 2 Petro 3:9.) Ga e sa le a letile ka go se fele pelo ka mengwaga e dikete gore maaka ao a boletšwego ka yena tšhemong ya Edene mafelelong a bonagale. O letile ka go se fele pelo nako yeo ka yona leina la gagwe le tlago go kgethagatšwa ka mo go feletšego. Ka nako yeo, bohle “bao ba dulago ba mo letetše” ba tlo hwetša ditšhegofatšo tše dintši tše di sa hlalosegego.​—Jes. 30:18.

17 Jesu le yena o ile a leta Jehofa ka go rata. Le ge a ile a dula a botega ge a be a lekwa mo lefaseng gomme a iša mohola wa sehlabelo sa gagwe go Jehofa ka ngwaga wa bo-33, o ile a swanelwa ke go leta go fihla ka 1914 pele a ka thoma go buša. (Dit. 2:33-35; Baheb. 10:12, 13) Le gona o sa tlo leta go fihla mafelelong a Pušo ya Gagwe ya Mengwaga e Sekete gore manaba a gagwe a fedišetšwe sa ruri. (1 Bakor. 15:25) O tla be a letile nako e telele kudu, eupša re kgodišegile gore o tla ba a se a letela mahala.

KE ENG SEO SE TLAGO GO RE THUŠA GO LETELA JEHOFA?

18, 19. Ke’ng seo se tlago gore thuša go letela Jehofa ka go se fele pelo?

18 Go molaleng gore yo mongwe le yo mongwe wa rena o swanetše go letela Jehofa ka go rata, a be le moya wa go leta. Eupša ke’ng seo se tlago gore thuša go dira se? Re tlo thušwa ke go rapela Modimo gore a re nee moya wa gagwe o mokgethwa. Gopola gore go se fele pelo ke seka seo se enywago ke moya o mokgethwa. (Baef. 3:16; 6:18; 1 Bathes. 5:17-19) Lopa Jehofa gore a go thuše go kgotlelela ka go se fele pelo.

19 Le gona dula o gopola seo se thušitšego Aborahama, Josefa le Dafida go letela Jehofa ka go se fele pelo gore a phethagatše dikholofetšo tša gagwe. Batho ba ba thušitšwe ke go ba le tumelo go Jehofa le go bota gore o dula a dirišana le bona gabotse. Ga se ba ka ba nagana feela ka maphelo a bona le go tshwenyega ka gore dilo di ba sepelele gabotse. Ge re dutše re naganišiša ka tsela yeo Jehofa a ilego a ba šegofatša ka yona, le rena re tla katanela go ba le moya wa go leta.

20. Ke’ng seo yo mongwe le yo mongwe wa rena a swanetšego go se dira?

20 Ka gona gaešita le ge re lekwa e bile re welwa ke mathata, re nyaka go bontšha ‘moya wa go leta.’ Ke therešo gore ka dinako tše dingwe re ka llela Jehofa ka gore: “Jehofa, go tla tšea nako e kaaka’ng?” (Jes. 6:11) Eupša ka thušo ya moya o mokgethwa, yo mongwe le yo mongwe wa rena a ka bolela mantšu a Jeremia ao a rego: “Jehofa ke kabelo ya ka, ke ka baka leo ke tla mo letago.”​—Dillo 3:21, 24.

^ par. 11 Dikgaolo tše 15 tša puku ya Genesi di bolela kudu ka Aborahama. Go oketša moo, bangwadi ba Mangwalo a Bakriste a Segerika ba bolela ka Aborahama ka makga a fetago a 70.

^ par. 14 Le ge Jehofa a ile a se sa amogela Saulo ka morago ga gore a buše mengwaga e fetago e mebedi, o ile a mo dumelela gore a tšwele pele a buša mengwaga e mengwe e 38, go fihlela a ehwa.​—1 Sam. 13:1; Dit. 13:21.