Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  August 2017

Lerato​—Seka se Bohlokwa Kudu

Lerato​—Seka se Bohlokwa Kudu

JEHOFA o ile a laela moapostola Paulo go ngwala ka dika tše senyane tšeo di tšweletšwago ke moya o mokgethwa. (Bagal. 5:22, 23) Paulo o boletše ka dika tšeo tše di kgahlišago gore di bopa seenywa setee seo se feletšego. * Seenywa se, goba dika tše tša moya o mokgethwa, se emela “semelo se sefsa.” (Bakol. 3:10) Go no swana le ge mohlare o enywa dienywa ge o hlokomelwa gabotse, le rena re tlo bonagatša seenywa seo se enywago ke moya o mokgethwa ge moya wo o šoma maphelong a rena.​—Ps. 1:1-3.

Seka sa mathomo sa bohlokwa kudu seo se enywago ke moya o mokgethwa seo Paulo a boletšego ka sona ke lerato. Seka se se bohlokwa gakaakang? Paulo o itše ge e ba a se na lerato, ‘ga a selo.’ (1 Bakor. 13:2) E le gore lerato ke’ng, gona re ka ba le lona bjang le go le bontšha letšatši le lengwe le le lengwe?

KAMOO LERATO LE BONTŠHWAGO KA GONA

Gaešita le ge re ka se kgone go hlalosa seo lerato le se bolelago, Beibele e hlalosa tsela yeo le bonagatšwago ka yona. Ka mohlala, Beibele e re lerato “ga le fele pelo e bile le botho.” Le gona e re lerato le “thaba le therešo,” e bile le “tiišetša tšohle, le dumela tšohle, le holofela tšohle, le kgotlelela tšohle.” Le gona lerato le akaretša go tshwenyega ka batho ba bangwe go tšwa pelong, go ikwa re le kgauswi le bona gotee le go ikwa re le selo setee. Ka lehlakoreng le lengwe, ge motho a se na lerato, re mmona ka go ba le mona, go ikgogomoša, go itshwara gampe, boithati, go ba bogale le go se lebalele batho ba bangwe. Go fapana le dika tše tše mpe le tšeo di se nago mohola, lerato leo re nyakago go ba le lona “ga le nyake tša go ikhola.”​—1 Bakor. 13:4-8.

LERATO LA KGONTHE LEO LE BONTŠHITŠWEGO KE JEHOFA LE JESU

“Modimo ke lerato.” Ee, Jehofa ke mothofatšo wa lerato. (1 Joh. 4:8) Mediro ya gagwe ka moka le ditiro tša gagwe di hlatsela gore o na le lerato. Tiro e kgolokgolo e lerato yeo a re bontšhitšego yona ke ge a be a romela Jesu mo lefaseng gore a tle a tlaišege le go re hwela. Moapostola Johane o itše: “Re utolletšwe lerato la Modimo ka se, gobane Modimo o rometše Morwa wa gagwe yo a tswetšwego a nnoši lefaseng gore re hwetše bophelo ka yena. Lerato le ka tsela ye, ga se gore rena re ratile Modimo, eupša yena o re ratile gomme a romela Morwa wa gagwe e le sehlabelo sa poelanyo bakeng sa dibe tša rena.” (1 Joh. 4:9, 10) Ka ge Modimo a re rata, re ka lebalelwa dibe tša rena, ra ba le kholofelo ka bokamoso le go tlo phela ka mo go sa felego.

Jesu o ile a bontšha gore o rata batho ka go dira thato ya Modimo ka go rata. Paulo o ngwadile gore: “[Jesu] o re: ‘Bona! Ke tlile go dira thato ya gago.’ . . . Ka ‘thato’ e boletšwego re kgethagaditšwe ka sebego sa mmele wa Jesu Kriste gatee ya ba moka.” (Heb. 10:9, 10) Ga go na motho yo mongwe yo a bego a ka re bontšha lerato le bjalo. Jesu o itše: “Ga go yo a nago le lerato le le fetago le, gore motho a gafe moya wa gagwe ka baka la bagwera ba gagwe.” (Joh. 15:13) Na rena batho ba sa phethagalago re ka kgona go bontšha lerato leo  Jehofa le Jesu ba re bontšhitšego lona? Ee! Anke re boneng kamoo re ka dirago seo.

‘TŠWELANG PELE LE SEPELA LERATONG’

Paulo o re eletša ka gore: “Ebang baekiši ba Modimo, le le bana ba ba rategago, le tšwele pele le sepela leratong, go etša ge Kriste le yena a le ratile gomme a ikgafela lena.” (Baef. 5:1, 2) Re bontšha gore re ‘tšwela pele re sepela leratong’ ge re bonagatša seka se dikarolong ka moka tša maphelo a rena. Re bonagatša lerato leo ka ditiro e sego ka mantšu feela. Johane o ngwadile gore: “Bana ba ba rategago, ga se ra swanela go ratana feela ka lentšu goba ka leleme, eupša a re rataneng ka tiro le ka therešo.” (1 Joh. 3:18) Ka mohlala, ge e ba ruri re rata Jehofa le moagišani, re tlo tutueletšega go bolela ‘ditaba tše dibotse tša Mmušo.’ (Mat. 24:14; Luka 10:27) Le gona, re bontšha gore re sepela leratong ge re sa fele pelo, re le botho e bile re lebalela batho ba bangwe. Ke ka baka leo Beibele e re eletšago ka gore: “Go etša ge Jehofa a le lebaletše ka bolokologi, le lena le dire bjalo.”​—Bakol. 3:13.

Lega go le bjalo, lerato la kgonthe ga le swane le go no ikwa o nyaka go dira selo se itšego. Ka mohlala, motswadi yo a lemago ngwana wa gagwe a ka nea ngwana yoo dilo ka moka tšeo a di nyakago. Eupša motswadi yo a ratago ngwana wa gagwe e le ka kgonthe, o fela a tiiša letsogo ge go nyakega. Ka mo go swanago, Modimo ke lerato, eupša “o laya yo a mo ratago.” (Baheb. 12:6) Ge re sepela leratong, re tlo swanelwa ke go nea ba bangwe tayo ge go nyakega. (Die. 3:11, 12) Ke therešo gore ge re nea tayo, re swanetše go gopola gore le rena ga se ra phethagala le gore re ka dira dilo tšeo di sa bontšhego lerato. Se se bontšha gore ka moka ga rena go na le moo re swanetšego go bontšha lerato kutšwanyana. Re ka dira seo bjang? Anke re boleleng ka ditsela tše tharo.

HLAGOLELA LERATO​—BJANG?

Sa pele, rapela Modimo o mo kgopele moya wa gagwe o mokgethwa woo o tšweletšago lerato. Jesu o boletše gore Jehofa o nea “moya o mokgethwa go bao ba mo kgopelago.” (Luka 11:13) Ge e ba re kgopela moya o mokgethwa e bile re katanela go ‘tšwela pele re sepela ka moya,’ ka mehla ditiro tša rena di tla bontšha gore re na le lerato. (Bagal. 5:16) Ka mohlala, ge e ba o le mogolo ka phuthegong, o ka kgopela moya o mokgethwa wa Jehofa gore o go thuše go nea ba bangwe keletšo ya Mangwalo ka tsela e lerato. Goba ge e ba o le motswadi, o ka kgopela moya o mokgethwa wa Jehofa gore o go thuše go laya bana ba gago ka lerato, e sego ka bogale.

Sa bobedi, naganišiša kamoo Jesu a ilego a bontšha lerato gaešita le ge a be a swarwa gampe. (1 Pet. 2:21, 23) Go ka nyakega gore re naganišiše ka mohlala wo wa Kriste kudukudu ge re kgopišitšwe goba ge re swerwe ka go hloka toka. Dinakong tše bjalo, ipotšiše gore: ‘Jesu o be a tla dira’ng boemong bjo?’ Kgaetšedi yo a bitšwago Leigh o lemogile gore go ipotšiša potšišo yeo go mo thušitše gore a nagane gabedi pele a dira selo se itšego. O re: “Ka letšatši le lengwe, mošomigotee le nna o ile a romela bašomigotee le rena e-mail yeo e bego e bolela dilo tše mpe ka nna le ka mošomo wo ke bego ke o dira. Seo se ile sa nkweša bohloko kudu. Eupša ke ile ka ipotšiša gore: ‘Jesu o be a tla dira’ng ka motho wa mohuta wo?’ Ka morago ga go naganišiša ka seo Jesu a ka bego a ile a se dira, ke ile ka phetha ka gore ke lebale ka taba yeo le go se e iše hlogong. Ka morago, ke ile ka kwa gore motho yoo o be a swerwe ke bolwetši bjo šoro e bile a na le kgateletšego ya monagano. Ke ile ka phetha ka gore mohlomongwe o ngwadile molaetša woo a sa nagane. Go naganišiša ka mohlala wa Jesu wa go bontšha lerato le ge a be a swarwa gampe go nthušitše go bontšha motho yoo lerato.” Ee, ge e ba re ekiša Jesu, re tla dula re dira dilo ka lerato.

Sa boraro, hlagolela lerato la boikgafo, e lego leswao leo le hlaolago Bakriste ba therešo. (Joh. 13:34, 35) Tabeng ye, Mangwalo a re kgothaletša go ba le ‘boemo bja monagano’ bjoo Jesu a bego a na le bjona. Ka go tloga legodimong, “o ile a itlhohlora” bakeng sa rena, gaešita le “go fihla lehung.” (Bafil. 2:5-8) Ge re dutše re ekiša lerato la gagwe leo le se nago boithati, re tlo nagana go swana le yena le go ikwa go swana le yena. Le gona re tlo tutueletšega  go etiša dikgahlego tša batho ba bangwe pele ga tša rena. Mehola e mengwe yeo e tlišwago ke go hlagolela lerato ke efe?

MEHOLA YA GO BONTŠHA LERATO

Ge re bontšha ba bangwe lerato, re holega kudu. Ela hloko mehlala ye e mebedi:

Re holega bjang ge re bontšha lerato?

  • RE BA BOTEENG LE BANA BABO RENA LEFASENG KA MOKA: Ka ge re ratana, re a tseba gore phuthego le ge e le efe yeo re ka yago go yona, bana babo rena le dikgaetšedi ba tlo re amogela ka lerato. Ruri ke tšhegofatšo go ratwa ke ‘bana babo rena ba lefaseng ka moka.’ (1 Pet. 5:9) Re hwetša lerato le bjalo gare ga Dihlatse tša Jehofa feela.

  • RE BA LE KHUTŠO: Go “kgotlelelana ka lerato” go dira gore re thabele “setlemo se se tlemaganyago sa khutšo.” (Baef. 4:2, 3) Re bona khutšo e bjalo ka diphuthegong tša rena gotee le dikopanong tše dikgolo le tše dinyenyane. Na ga o dumele gore khutšo e bjalo e hwetšagala feela bathong ba Modimo? (Ps. 119:165; Jes. 54:13) Ge re phegelela khutšo le batho ba bangwe, re bontšha gore re ba rata kudu, e lego seo se thabišago Tatago rena wa legodimong.​—Ps. 133:1-3; Mat. 5:9.

“LERATO LE A AGA”

Paulo o ngwadile gore: “Lerato le a aga.” (1 Bakor. 8:1) Lerato le dira seo bjang? Kgaolong ya bo-13 ya lengwalo la pele leo a le ngwaletšego Bakorinthe, ditemanengtšeo ba bangwe ba di bitšago “Sereto sa Lerato,” moapostola yo o hlalosa kamoo lerato le agago ka gona. Gare ga dilo tše dingwe tšeo a di boletšego, o re motho yo a nago le lerato o nyaka dilo tšeo di holago ba bangwe. (1 Bakor. 10:24; 13:5) Go oketša moo, ka ge motho yo a nago le lerato a naganela ba bangwe, a ba kwela bohloko, a sa ba felele pelo e bile a le botho, o dira gore ka lapeng le ka phuthegong go be le botee.​—Bakol. 3:14.

Ee, re ka bontšha batho ba bangwe lerato ka ditsela tše di fapafapanego, eupša go rata Modimo go bohlokwa go feta dilo ka moka. Lerato le bjalo le kopanya batho ba ditlogo ka moka, ba merafo ka moka le ba maleme ka moka gore ba hlankele Jehofa “ka botee” ba thabile. (Tsef. 3:9) Anke letšatši le lengwe le le lengwe re bontšheng seka se seo se enywago ke moya o mokgethwa.

^ par. 2 Se ke sehlogo sa mathomo sa dihlogo tše senyane tšeo di tlago go ahlaahla seka se sengwe le se sengwe seo se enywago ke moya o mokgethwa.