Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) AUGUST 2016

Tsoma Selo se Bohlokwa go Feta Gauta

Tsoma Selo se Bohlokwa go Feta Gauta

Na o kile wa hwetša gauta? Ke batho ba sego kae bao ba kilego ba e hwetša. Eupša go na le batho ba bangwe ba dimilione bao ba hweditšego selo sa bohlokwa go feta gauta. Selo seo ke bohlale bjo bo tšwago go Modimo, bjoo “bo ka se [ananywego] ka gauta e sekilego.”—Jobo 28:12, 15.

KA GE re le barutwana ba Beibele, re swana le batsomi ba gauta ka ditsela tše itšego. Re swanetše go šoma ka thata le go tšwela pele re dira nyakišišo e le gore re hwetše bohlale bjo bohlokwa go feta gauta. Ka gona, ke’ng seo re ka ithutago sona ditseleng tše tharo tšeo gauta e hwetšwago ka tšona?

O HWETŠA GAUTA!

Ipone o sepela kgauswi le noka ke moka o bona selo seo ekego ke leswikana la go phadima. Ge o inama, o a bona gore ke gauta gomme wa thaba kudu. Gauta yeo o e hweditšego ke e nyenyane go feta hlogwana ya lehlokwana la go gotša mollo. E bile o hwetša gore e phala le taamane ka gore ga e hwetšagale gabonolo. Gateetee o thoma go lebelela go go dikologa go bona ge e ba o ka se hwetše gauta e nngwe.

Ka mo go swanago, nakong e fetilego yeo o sa e lebalego, o ka ba o ile wa etelwa ke Dihlatse tša Jehofa gomme tša go botša molaetša wa ka Beibeleng wo o neago kholofelo. Mohlomongwe o gopola gabotse ge o be o hwetša seo re ka rego ke gauta ya gago ya mathomo ya moya. Mohlomongwe seo se diragetše ge o be o bona la mathomo leina la Modimo e lego Jehofa ka Beibeleng. (Ps. 83:18) Goba seo se diragetše ge o be o ithuta gore o ka ba mogwera wa Jehofa. (Jak. 2:23) Ka yona nako yeo, o ile wa bona gore o hweditše selo se bohlokwa go feta gauta! Le gona o ka ba o ile wa fela pelo ya go hwetša gauta e nngwe ya moya.

O HWETŠA E OKETŠEGILEGO!

Ka dinako tše dingwe dikarolwana tša gauta di ka kgobokana ka meeding le dinokeng. Ka sehla se tee feela, batho bao ba šomago ka thata go tsoma gauta ba ka hwetša gauta e ntši kudu yeo e ka rekišwago ka ditolara tše diketekete.

Ge o be o thoma go ithuta Beibele le Hlatse ya Jehofa, o ka ba o ile wa ikwa go swana le motho yo a tsomago gauta e ntši. Ga go pelaelo gore go naganišiša ka ditemana tša Beibele go ile gwa oketša tsebo ya gago, e lego seo se ilego sa dira gore o be le tsebo e oketšegilego. Ge o dutše o naganišiša ka therešo e bohlokwa ya Beibele, o ile wa ithuta kamoo o ka batamelago kgauswi le Jehofa gomme wa dula leratong la gagwe o lebeletše pele bophelong bjo bo sa felego.—Jak. 4:8; Juda 20, 21.

Go swana le motho yo a šomago ka thata go tsoma gauta, na o šoma ka thata gore o ithute ditherešo tše bohlokwa tša Beibele?

Go etša motho yo a tsomago gauta, le wena o ka ba o ile wa tsoma ka mafolofolo mahumo a bohlokwa  a moya. Ka morago ga go ithuta ditherešo tša motheo tša Beibele, o ka ba o ile wa tutueletšega go tšea dikgato tša go ineela go Jehofa le go kolobetšwa.—Mat. 28:19, 20.

TŠWELA PELE O TSOMA!

Motho yo a tsomago gauta a ka hwetša dikarolwana tše dinyenyane tša yona ka gare ga maswika. Dikarolo tše dingwe tša maswika a di na le gauta e ntši ka mo go lekanego gore o ka tšwela pele o e epa. Mathomong, gauta e ka no se bonale ka gare ga maswika ao. Ka baka la’ng? Ka gobane leswikeng le tee o ka hwetša gauta e nyenyane kudu! Lega go le bjalo, motsomi wa gauta o bona gauta yeo e nyenyane e le bohlokwa moo e lego gore o tla no tšwela pele a e epa.

Ka mo go swanago, re swanetše go tšwela pele re dira maiteko le ka morago ga ge re “tlogetše thutatumelo ya pele mabapi le Kriste.” (Baheb. 6:1, 2) Ge o ithuta Beibele, o swanetše go šoma ka thata e le gore o hwetše dintlha tše difsa le dithuto tša bohlokwa. Bjale, ke eng seo o ka se dirago go kgonthišetša gore ka mehla o a holega ge o ithuta Beibele, gaešita le ge e ka be e le kgale o ithuta Mangwalo?

Dula o fišegela go ithuta. Nwelela go seo o se balago. Tšwela pele o ithuta Mangwalo gomme o tla hwetša bohlale le tlhahlo tšeo di etšago gauta. (Baroma 11:33) E le gore o oketše tsebo ya gago ya Mangwalo, diriša gabotse ditlabakelo tša nyakišišo tšeo di hwetšagalago ka segageno. Ka go se fele pelo, tsoma tlhahlo yeo o e nyakago le dikarabo tša dipotšišo tša gago tša Beibele. Botšiša ba bangwe gore ke ditemana dife le dihlogo tšeo di ba kgothaditšego le go ba thuša. Botša ba bangwe dintlha tše di kgahlišago tšeo o di hweditšego ka Lentšung la Modimo.

Ke therešo gore pakane ya gago ga se go fo ba le tsebo ya Mangwalo. Moapostola Paulo o lemošitše ka gore “tsebo e baka boikgogomošo.” (1 Bakor. 8:1) Ka baka leo, šoma ka thata gore o dule o ikokobeditše le go tia tumelong. Borapedi bja ka mehla bja lapa le thuto ya motho ka noši ya Beibele di tla go thuša gore o phele ka go dumelelana le ditekanyetšo tša Jehofa le go go tutueletša go thuša ba bangwe. Go feta moo, o tla thaba ka gobane o tla be o hweditše selo se bohlokwa go feta gauta. —Die. 3:13, 14.

Ithute ka mo go oketšegilego

Borapedi bja Lapa—Na o ka Dira Gore bo Thabiše Kutšwanyana?

Bona tsela yeo malapa a dinageng tše dingwe a swarago borapedi bja lapa ka yona gore o hwetše thušo ya seo o ka se lekago.

O Swanetše go Dira’ng Gore o Kwešiše Beibele?

Go sa šetšwe setlogo sa gago, o ka kgona go kwešiša molaetša wa Modimo wo o lego ka Mangwalong a Makgethwa.