Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI NO. 1 2016

 BEIBELE E FETOŠA MAPHELO

Mphe Ngwaga o Tee Feela wa Khutšo le Lethabo

Mphe Ngwaga o Tee Feela wa Khutšo le Lethabo
  • NGWAGA WA MATSWALO: 1971

  • NAGA: FORA

  • BOPHELO BJA PELE E EBA MOKRISTE: O BE A PHELA BOPHELO BJA BOSENYI, BOITSHWARO BJO BO GOBOGILEGO LE BJA DIHLARETAGI

BOPHELO BJA KA BJA NAKONG E FETILEGO:

Lapa lešo le be le dula Tellancourt, e lego motse wa ka leboabohlabela bja Fora. Tate e be e le Mofora gomme mma ke Motaliana. Ge ke be ke ena le mengwaga e seswai, re ile ra hudugela torotswaneng e diilago ya batho bao ba šomago ya Roma, Italy. Ge re le moo, bophelo bja lapa bo ile bja ba boima. Batswadi ba ka ba be ba fošana ka noga e phela ka baka la mathata a bona a tša ditšhelete.

Ge ke be ke ena le mengwaga e 15, mma o ile a nkgothaletša gore ke tlogele go hlwa ka gae gomme ke ikhweletše bagwera. Ka gona, ke ile ka thoma go fetša nako e ntši ke se ka gae. Go se go ye kae, ke ile ka wela ka diatleng tša bagwera ba babe. Ka letšatši le lengwe, monna yo mongwe yo a bego a bonala a na le bogwera o ile a tla go nna. O ile a nnea dihlaretagi gomme ka se di gane ka gobane ke be ke nyaka gore go bonagale gore ke godile. Kapejana ke ile ka wela sehlopheng seo se bego se itshwara ka tsela e gobogilego e bile se šomiša dihlaretagi. Ke ile ka gobošwa gantši ka tša thobalano. Ke be ke se sa iša felo ka bophelo; ke be ke se na taba le gore ke a phela goba ke a hwa. Ke be ke lewa ke bodutu o šoro. Ge ke ena le mengwaga e 16, ke ile ka leka go ipolaya ka go nwa lepotlelo ka moka la whiskey gomme ka itahlela ka letsheng. Ka baka la seo, ke ile ka tšea matšatši a mararo ke idibetše.

Ke ile ka thoma go tšeela bophelo godimo. Lega go le bjalo, ke ile ka ba motho wa dintwa le yo a tletšego bomenetša. Ke be ke botša motho gore ke nyaka go robala le yena, ge re fihla ntlong ya gagwe ke mo fa sehlare sa go mo taga gomme ka mo utswetša dilo tša bohlokwa. Dihlopha tše dikgolo tša bosenyi di be di ntirišetša go rekiša le go sepetša dihlaretagi nageng ya Italy. Ke be ke dula ke tsene mathateng le maphodisa. Bophelo bja ka bo be bo bonala bo se na morero e bile bo sa laolege. Lega go le bjalo, ke be ke dumela gore go na le lebaka la gore ke a phela. Ke ile ka rapela Modimo, ka mo kgopela gore a mphe ngwaga o tee feela wa khutšo le lethabo.

KAMOO BEIBELE E FETOTŠEGO BOPHELO BJA KA:

Ge ke be ke ena le mengwaga e 24, ke ile ka hudugela Engelane. Bophelo bja ka bo be bo le kotsing ka baka la go dirišana ga ka le barekiši ba dihlaretagi. Ke ile ka etela mma pele ke huduga gomme ka makatšwa ke go hwetša monna yo a bitšwago Annunziato Lugarà a boledišana le yena ka Beibele. * Ka ge ke be ke tseba a phela bophelo bja bosenyi, ke ile ka tšhoga  gomme ka mmotšiša gore o be a nyaka eng moo gae. O ile a mpotša ka diphetogo tše di kgolo tšeo a bego a di dirile bophelong bja gagwe e le gore a be Hlatse ya Jehofa, gomme a re ke mo holofetše gore ge ke fihla Engelane ke tla boledišana le Dihlatse. Ke ile ka dumela gore ke tla dira seo. Eupša gateetee ge ke fihla moo, ke ile ka boela ditseleng tša ka tša kgale.

Ka letšatši le lengwe ke ile ka kopana le Hlatse e nngwe e eme setarateng sa leemaema sa London, e efa batho dimakasine tša Morokami le Phafoga! Ge ke gopola seo ke se holofeditšego Annunziato, ke ile ka kgopela Hlatse yeo gore e ithute Beibele le nna.

Seo ke bego ke ithuta sona ka Beibeleng se ile sa mmakatša e le ruri. Ka mohlala, ke ile ka kgongwa ke mantšu ao a begilwego go 1 Johane 1:9, ao ge a bolela ka Modimo a rego: “Ge e ba re ipobola dibe tša rena, o a botega e bile o lokile moo a re lebalelago dibe tša rena le go re hlwekiša.” Temana yeo e ile ya nkgoma kudu ka gobane ke be ke ikwa ke šilafetše kudu ka baka la bophelo bjo ke bego ke bo phela. Gateetee ke ile ka thoma go ya Holong ya Mmušo ya Dihlatse tša Jehofa. Dihlatse di ile tša nkamogela ka borutho. Ge ke bona segwera sa kgauswi seo di bego di ena le sona—selo seo ke bego ke duma gore le nna nka ba le sona—ke ile ka nyaka go ba karolo ya phuthego ya tšona yeo e etšago lapa.

Le ge go be go se thata go tlogela dihlaretagi le bophelo bjo bo gobogilego, ke ile ka hwetša go le thata kudu go fetoša semelo sa ka. Ke ile ka lemoga gore ke swanetše go swara batho ka tlhompho le go bontšha go ba naganela. Ge e le gabotse, ke sa lwa le mekgwa e mengwe e mebe. Eupša ka thušo ya Jehofa, ke kaonefaditše. Ke ile ka kolobetšwa ka ba Hlatse ya Jehofa ke na le dikgwedi tše tshela feela ke thomile go ithuta Beibele. Seo se diregile ka 1997.

KAMOO KE ILEGO KA HOLEGA KA GONA:

Ka morago ga go kolobetšwa, ke ile ka nyala kgarebe yeo e bitšwago Barbara yeo le yona e bego e sa tšwa go ba Hlatse ya Jehofa. Ge yo mongwe wa bagwera ba ka a bona diphetogo tše dikgolo tše ke di dirilego, o ile a thoma go ithuta Beibele. Ge nako e dutše e eya, yena le sesi wa gagwe ba ile ba ba Dihlatse. Ka morago, mmamogolo wa mma, yoo a bego a ena le mengwaga ya ka godimo ga e 80, o ile a thoma go ithuta Beibele gomme a kolobetšwa pele a ehwa.

Ga bjale ke hlankela ke le mogolo phuthegong ya gešo. Nna le mosadi wa ka re hlankela re le baboledi ba nako e tletšego ba ditaba tša Modimo gomme re thuša batho ba London bao ba bolelago Setaliana go ithuta Beibele. Ka dinako tše dingwe, ke ikwa ke nyamišwa ke bophelo bja ka bja nakong e fetilego, eupša Barbara o nthekga kudu. Ga bjale ke na le lapa leo le tiilego leo ke bego ke duma go ba le lona, le gona ke na le tate yo lerato yo ke bego ke mo nyaka. Ke kgopetše Modimo gore a mphe ngwaga o tee feela wa khutšo le lethabo, eupša ruri o mphile mo gontši le go feta moo!

Ga bjale ke na le lapa leo le tiilego leo ke bego ke duma go ba le lona, le gona ke na le tate yo lerato yo ke bego ke mo nyaka

^ ser. 10 Bona sehlogo se se rego, “Beibele e Fetoša Maphelo—Ga go Moo ke Bego ke Eya Gona Ntle le Sethunya sa ka,” ka ge go anega Annunziato Lugarà, tokollong ya Morokami ya July 1, 2014, matlakala 8-9.

Ithute ka mo go oketšegilego

Ke Phelela Eng?

Ke’ng seo se ka dirago gore motho a lebelele lehu e le mogwera?