Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) APRIL 2016

‘Tlogela Kgotlelelo e Phethe Morero wa Yona’

‘Tlogela Kgotlelelo e Phethe Morero wa Yona’

“Tlogelang kgotlelelo e phethe morero wa yona, e le gore le be ba phethagetšego le ba hlaphogetšwego dilong ka moka, le sa hloke selo.”—JAKOBO 1:4.

DIKOPELO: 135, 139

1, 2. (a) Re ka ithuta’ng kgotlelelong ya Gideone le banna ba gagwe ba 300? (Bona seswantšho se se lego ka mo godimo.) (b) Go ya ka Luka 21:19, ke ka baka la’ng kgotlelelo e le bohlokwa kudu?

LEKA go nagana ka mašole a Baisiraele ao a eteletšwego pele ke Moahlodi Gideone a elwa ntwa e thata le e lapišago. Gideone le banna ba gagwe ba ile ba rakediša Bamidiane le bathekgi ba bona bošego ka moka monabo wa dikhilomithara tše e ka bago tše 32! Beibele e re botša seo se ilego sa direga ka morago ga moo. E re: “Gideone a fihla Nokeng ya Jorodane, a e tshela le banna ba makgolotharo bao ba bego ba na le yena, ba rakediša manaba a bona le ge ba be ba lapile.” Eupša ba be ba se ba hlwa ba fenya manaba a bona, le gona ba be ba sa lebanwe ke go lwa le mašole a 15 000. Manaba a a be a gateletše Baisiraele ka nywaga e mentši, ka gona Baisiraele ba be ba ka se a tlogele. Ka go re’alo, Gideone le banna ba gagwe ba ile ba tšwela pele ba rakediša manaba ao gomme mafelelong ba a fenya!—Baahlodi 7:22; 8:4, 10, 28.

2 Le rena re lwa ntwa e thata le e lapišago. Manaba a rena ke Sathane, lefase la gagwe le go se phethagale ga rena. Ba  bangwe ba rena ke kgale re elwa le manaba a. Ka thušo ya Jehofa, re kgonne go fenya dintwa tše dintši. Lega go le bjalo, ga se ra hlwa re fenya ntwa ya mafelelo. Ka dinako tše dingwe re ka lapa go lwa. Goba re ka lapa go letela bofelo bja tshepedišo ye e kgopo. Jesu o boletše gore mehleng ye ya bofelo re tlo welwa ke diteko tše dikgolo le go tlaišwa o šoro. Eupša o boletše gape gore ge e ba re ka kgotlelela, re ka fenya. (Bala Luka 21:19.) Kgotlelelo ke’ng? Ke’ng seo se tlago go re thuša go kgotlelela? Re ka ithuta’ng go bao ba kgonnego go kgotlelela? Le gona re ka ‘tlogela bjang kgotlelelo gore e phethe morero wa yona’?—Jakobo 1:4.

KGOTLELELO KE ENG?

3. Kgotlelelo ke’ng?

3 Ka Beibeleng, go kgotlelela ga go bolele feela go tiišetša, go swarelela goba go kgotlelela maemo a thata. Go akaretša tsela yeo re naganago ka yona le go ikwa ka yona ge re lekwa. Kgotlelelo e re thuša go ba le sebete, go botega le go se fele pelo. Puku e nngwe ya go hlalosa mantšu e re kgotlelelo ke seka seo se re thušago go ba le kholofelo e matla le go se lahlele toulo ge re welwa ke diteko. E re thuša go dula re tiile le go se šišinyege gaešita le ge re welwa ke diteko tše šoro. Le gona e re thuša go fenya diteko tšeo le go tsepamiša monagano dipakaneng tša rena, e sego mahlokong a rena.

4. Ke ka baka la’ng re ka re lerato le re thuša go kgotlelela?

4 Lerato le re thuša go kgotlelela. (Bala 1 Bakorinthe 13:4, 7.) Maemong afe? Go rata Jehofa go re thuša go kgotlelela teko le ge e le efe yeo a e dumelelago. (Luka 22:41, 42) Go rata bana babo rena go re thuša go kgotlelela mafokodi a bona. (1 Petro 4:8) Go rata balekane ba rena ba lenyalo go re thuša go kgotlelela “tlaišego” yeo e welago le banyalani bao ba thabilego e bile go re thuša go matlafatša manyalo a rena.—1 Bakorinthe 7:28.

KE ENG SEO SE TLAGO GO GO THUŠA GO KGOTLELELA?

5. Ke ka baka la’ng Jehofa a swanelega kudu go re thuša go kgotlelela?

5 Kgopela Jehofa gore a go nee matla. Jehofa ke “Modimo yo a fago kgotlelelo le khomotšo.” (Baroma 15:5) Ke yena feela a kwešišago ka botlalo maemo a rena, kamoo re ikwago ka gona le mohlako wa rena. Ka gona o tseba gabotse seo re se hlokago gore re kgotlelele. Beibele e re: “O tla kgotsofatša kganyogo ya bao ba mmoifago, o tla ba kwa ge ba mo llela gore a ba thuše, gomme o tla ba phološa.” (Psalme 145:19) Eupša Modimo o tla re araba bjang ge re mo kgopela gore a re nee matla a go kgotlelela?

Jehofa, yoo a re kwešišago ka botlalo, o tseba gabotse seo re se hlokago gore re kgotlelele

6. Go etša ge Jehofa a holofeditše ka Beibeleng, ‘ge go etla moleko o tla bula bjang tsela ya go tšwa’?

6 Ge re kgopela Jehofa gore a re thuše go kgotlelela, o re holofetša gore “o tla bula tsela ya go tšwa.” (Bala 1 Bakorinthe 10:13.) O dira seo bjang? Ka dinako tše dingwe, a ka tloša teko. Eupša mabakeng a mantši, o tla re nea matla e le gore  re “kgotlelele ka mo go tletšego ka go se fele pelo le ka lethabo.” (Bakolose 1:11) Le gona ka ge Jehofa a tseba gabotse mafokodi a rena a mmele, a monagano le a maikwelo, a ka se tsoge a dumeletše boemo le ge e le bofe bo eba thata kudu moo re ka palelwago ke go dula re mmotegela.

7. Nea mohlala wo o bontšhago gore re hloka dijo tša moya gore re kgotlelele.

7 Eja dijo tša moya gore di matlafatše tumelo ya gago. Ke ka baka la’ng dijo tša moya di le bohlokwa? E re re go fe mohlala šo: E le gore motho a kgone go namela thaba e teleletelele mo lefaseng, o tla swanelwa ke go ja dijo tša matšatši a mararo goba a mane ka letšatši le tee. Tšeo ke dijo tše dintši kudu. Ka mo go swanago, re swanetše go ja dijo tša moya tše dintši kudu gore re kgone go kgotlelela le go fihlelela pakane ya rena. Re swanetše go ba le thuto ya ka mehla ya motho ka noši le go ba gona dibokeng. Dilo tše di tla re nea seo re se hlokago go boloka tumelo ya rena e tiile.—Johane 6:27.

8, 9. (a) Go ya ka Jobo 2:4, 5, ke’ng seo re tshwenyegago ka sona ge re lebeletšana le diteko? (b) Ge o lebeletšane le diteko, ke tiragalo efe yeo o ka lekago go e bona ka leihlo la kgopolo?

8 Dula o botegela Modimo. Ge re welwa ke diteko, re a tlaišega. Eupša ga go felele moo. Go botegela ga rena Modimo go a lekwa. Tsela yeo re arabelago ka yona ge re lekwa e bontšha ge e ba re lebelela Jehofa e le Mmuši wa kgonthe wa legohle. Ke ka baka la’ng re re’alo? Sathane, e lego lenaba la Modimo leo le ganetšago pušo ya gagwe, o rogile Jehofa ka go bolela gore batho ba hlankela Modimo feela ka gobane a ba šegofatša. Sathane o itše: “Se sengwe le se sengwe seo motho a nago le sona o tla se gafa ka baka la moya wa gagwe.” Ke moka a re ka Jobo: “Hle otlolla seatla sa gago o kgwathe go fihla lerapong la gagwe le nameng ya gagwe gomme o bone ge e ba a ka se go roge mahlong.” (Jobo 2:4, 5) Na Sathane o fetogile ga e sa le a bolela mantšu ao? Aowa! Nywaga e mentši ka morago, ge a be a rakwa legodimong, o be a sa dutše a latofatša bahlanka ba Modimo ba botegago. (Kutollo 12:10) Lehono, Sathane o sa dutše a bolela gore batho ba hlankela Jehofa feela ka gobane a ba šegofatša. O letetše go bona re hlanogela pušo ya Modimo gomme re tlogela go Mo hlankela.

9 Ge o tlaišwa ke teko, leka go bona tiragalo e latelago ka leihlo la kgopolo. Sathane le batemona ba gagwe ba eme ka lehlakoreng letee. Ba go lebeletše, ba nyaka go bona seo o tlago go se dira e bile ba re o tlo hlanogela Modimo. Ge o lebelela ka lehlakoreng le lengwe, o bona Jehofa, Kgoši ya rena Jesu Kriste, batlotšwa bao ba tsošeditšwego legodimong le barongwa ba diketekete. Le bona ba go lebeletše ge o dutše o katana le teko yeo, eupša ba go bethela matsogo gore o atlege! Ba thabišwa ke go bona gore o kgotleletše le gore o dula o botegela Jehofa. Ke moka o kwa Jehofa a re go wena: “Morwa wa ka, hlalefa gomme o thabiše pelo ya ka, gore ke kgone go fetola yo a nkwerago.”—Diema 27:11.

Jesu o ile a dula a nagana ka meputso yeo a bego a tlo e hwetša ge a be a ka kgotlelela

10. O ka ekiša Jesu bjang tabeng ya go nagana ka meputso ya go kgotlelela?

 10 Nagana ka meputso. A re re o leetong. Ge o dutše o sepela, o swanelwa ke go feta thaba-lešoba. Ge o feta ka moo, ke leswiswi feela. Eupša o a tseba gore ge o ka tšwela pele o sepela, mafelelong o tlo bona seetša. Bophelo bo ka swana le leeto leo. O ka swanelwa ke go feta maemong a thata kudu, e bile o ka ikwa o imelwa ke mathata a gago. Go ka direga gore Jesu le yena o kile a ikwa bjalo. Ge a be a bolawa koteng ya tlhokofatšo, o ile a gobošwa le go kwa bohloko kudu. Ye e swanetše go ba e bile nako e thata kudu bophelong bja gagwe! O thušitšwe ke’ng go kgotlelela? Beibele e re o ile a lebelela “lethabo leo le bego le beilwe pele ga gagwe.” (Baheberu 12:2, 3) Jesu o ile a dula a nagana ka meputso yeo a bego a tlo e hwetša ge a be a ka kgotlelela. Moputso wa bohlokwa kudu ke wa gore o be a tla kgatha tema go kgethagatšeng leina la Modimo le go thekga tshwanelo ya gagwe ya go buša. O be a tseba gore teko yeo e be e le ya nakwana le gore moputso wa gagwe legodimong ke wa sa ruri. Lehono, diteko tšeo di go welago di ka go imela le go go kweša bohloko, eupša gopola gore ke tša nakwana.

“BAO BA KGOTLELETŠEGO”

11. Ke ka baka la’ng re swanetše go ahlaahla diphihlelo tša “bao ba kgotleletšego”?

11 Ga se rena feela re kgotleletšego diteko. Ge moapostola Petro a be a kgothaletša Bakriste gore ba kgotlelele diteko tše dintši tša Sathane, o itše: “Emeletšanang le yena le tiile tumelong, le tseba gore ditlaišego tše di swanago di kgotlelelwa ke ba bangwe mokgatlong ka moka wa bana babo lena lefaseng.” (1 Petro 5:9) Diphihlelo tša “bao ba kgotleletšego” di re ruta kamoo re ka dulago re botega, di re kgonthišetša gore le rena re ka atlega, e bile di re gopotša gore Modimo o tla re putsa ge re dula re botega. (Jakobo 5:11) Anke re ahlaahleng mehlala e sego kae. [1]—Bona tlhaloso.

12. Re ithuta’ng mohlaleng wa bakerubi bao ba bego ba beilwe kua Edene?

12 Bakerubi ke barongwa bao ba lego maemong a phagamego. Ka morago ga gore Adama le Efa ba dire sebe, Jehofa o ile a nea bakerubi ba itšego kabelo e mpsha mo lefaseng. Kabelo yeo e be e sa swane le yeo ba bego ba na le yona legodimong. Mohlala wa bona o re ruta kamoo re ka kgotlelelago ka gona ge re neilwe kabelo e thata. Beibele e re “ka bohlabela bja serapa sa Edene [Jehofa] a bea bakerubi le tšhoša ya bogale bjo bo tukago yeo e bego e dikologa e sa kgaotše gore e diše tsela e yago sehlareng sa bophelo.” [2] (Bona tlhaloso.) (Genesi 3:24) Ga go na mo Beibele e rego barongwa bao ba ile ba ngongorega goba ba nagana gore  ba bohlokwa kudu go ka phetha kabelo yeo. Ga se ba ka ba tenega goba go fela matla. Go e na le moo, ba ile ba dula kabelong ya bona go fihlela mafelelong, mohlomongwe nakong ya Meetsefula, e lego nywaga e fetago e 1 600!

13. Jobo o thušitšwe ke’ng go kgotlelela diteko?

13 Monna yo a botegago Jobo. Ka dinako tše dingwe o ka kwešwa bohloko ke selo seo se boletšwego ke mogwera wa gago goba setho sa lapa. Goba mohlomongwe o babja kudu goba o kwa bohloko ka gobane motho yo o mo ratago o hwile. Eupša go sa šetšwe seo se diregago, mohlala wa Jobo o ka go homotša. (Jobo 1:18, 19; 2:7, 9; 19:1-3) Jobo o be a sa tsebe gore ke ka baka la eng a be a tlaišega gakaakaa, eupša ga sa nka a fela matla. O thušitšwe ke’ng go kgotlelela? Sa pele, o be a rata Jehofa e bile a sa nyake go mo kweša bohloko. (Jobo 1:1) Jobo o be a nyaka go kgahliša Modimo ka dinako tšohle, go le bose goba go se bose. Go oketša moo, Jehofa o ile a thuša Jobo go bona matla a Gagwe ka go mmotša ka tše dingwe tša dilo tše di makatšago tšeo a di bopilego. Seo se ile sa kgodiša Jobo le go feta gore Jehofa o tla mo imolla tlaišegong ya gagwe ka nako e swanetšego. (Jobo 42:1, 2) Go ile gwa direga sona seo. Beibele e re: “Jehofa yena a hunolla Jobo boemong bja gagwe bja bokgoba . . . , ke moka Jehofa a okeletša Jobo tšohle tšeo a bego a na le tšona, a di oketša gabedi.” Jobo o ile a phela bophelo bjo botelele le bjo bo thabišago.—Jobo 42:10, 17.

14. Go ya ka 2 Bakorinthe 1:6, go kgotlelela ga Paulo go ile gwa thuša ba bangwe bjang?

14 Moapostola Paulo. Na o ganetšwa o šoro goba e bile o a tlaišwa? Na o mogolo wa phuthego goba molebeledi wa tikologo yo a ikwago a imelwa ke maikarabelo a mantši? Ge e ba go le bjalo, mohlala wa moapostola Paulo o ka go thuša. Paulo o ile a tlaišwa o šoro kudu, e bile o be a dula a tshwenyega ka bana babo ka diphuthegong. (2 Bakorinthe 11:23-29) Eupša Paulo ga sa nka a fela matla, le gona mohlala  wa gagwe o ile wa matlafatša ba bangwe. (Bala 2 Bakorinthe 1:6.) Le wena o ka matlafatša ba bangwe ge o ka kgotlelela.

NA KGOTLELELO E TLA ‘PHETHA MORERO WA YONA’ KA GO WENA

15, 16. (a) Ke “morero” ofe woo kgotlelelo e swanetšego go o phetha? (b) Nea mehlala yeo e bontšhago kamoo re ka ‘tlogelago kgotlelelo gore e phethe morero wa yona.’

15 Modimo o ile a laela morutiwa Jakobo go ngwala gore: “Tlogelang kgotlelelo e phethe morero wa yona, e le gore le be ba phethagetšego le ba hlaphogetšwego dilong ka moka, le sa hloke selo.” (Jakobo 1:4) Kgotlelelo e ka phetha “morero” wa yona bjang ka go rena? Ge re wetšwe ke teko, re ka lemoga gore re swanetše go hlagolela go se fele pelo, go ba le tebogo goba lerato. Ge re dutše re kgotleletše teko yeo, re tla ithuta go bonagatša dika tše le go feta, ka go re’alo ra kaonefatša semelo sa rena sa Bokriste.

Ge re kgotlelela diteko, re ba Bakriste ba bakaone kudu (Bona serapa 15 le 16)

16 Ka ge go kgotlelela go ka re dira Bakriste ba bakaone, re ka se robe molao wa Jehofa e le feela gore re tšwe tekong. Ka mohlala, ge e ba o lwantšhana le dikgopolo tše di gobogilego, o se ke wa ineela tekong! Kgopela Jehofa gore a go thuše go gana dikgopolo tše mpe. Na go na le setho sa lapa seo se go ganetšago? O se ke wa felelwa ke matla! Ikemišetše go tšwela pele o hlankela Jehofa. Ka go re’alo, o tla matlafatša tsela yeo o botago Jehofa ka yona. Gopola taba še: Ge re nyaka gore Modimo a re amogele, re swanetše go kgotlelela.—Baroma 5:3-5; Jakobo 1:12.

17, 18. (a) Hlalosa bohlokwa bja go kgotlelela go fihla mafelelong. (b) Ge bofelo bo dutše bo batamela, re ka kgodišega ka’ng?

17 Re swanetše go kgotlelela go fihla mafelelong, e sego feela ka nakwana. Nagana ka sekepe seo se nwelelago. E le gore banamedi ba sona ba phologe, ba swanetše go rutha go ba go fihlela lebopong. Motho yo a tlago go fela matla a sa thoma go rutha o tla hwa. Ka mo go swanago, motho yo a felago matla go šetše ganyenyane gore a fihle lebopong le yena o tla hwa. Ge e ba re nyaka go tsena lefaseng le lefsa, re swanetše go tšwela pele re kgotlelela. Anke re ekišeng moapostola Paulo, yo a itšego: “Ga re lape.”—2 Bakorinthe 4:1, 16.

18 Go swana le Paulo, re kgodišegile kudu gore Jehofa o tla re thuša go kgotlelela go fihla mafelelong. Paulo o ngwadile gore: “Re tšwa re fentše ka mo go feletšego ka yena yo a re ratilego. Gobane ke kgodišegile gore le ge e le lehu goba bophelo goba barongwa goba mebušo goba dilo tšeo di lego gona gona bjale goba dilo tše di tlago go tla goba matla goba bophagamo goba go iša goba sebopiwa le ge e le sefe se sengwe di ka se kgone go re aroganya le lerato la Modimo leo le lego go Kriste Jesu Morena wa rena.” (Baroma 8:37-39) Ke therešo gore ka dinako tše dingwe re tlo fela matla. Eupša anke re ekišeng Gideone le banna ba gagwe. Ba ile ba lapa, eupša ga se ba ka ba lahlela toulo. Ba ile ba tšwela pele “ba rakediša manaba a bona le ge ba be ba lapile”!—Baahlodi 8:4.

^ [1] (serapa 11) Le gona o tla kgothatšwa ke go bala ka batho ba Modimo ba mehleng yeno bao ba kgotleletšego diteko. Ka mohlala, Yearbook ya 1992, 1999 le ya 2008, di na le dipego tše di kgothatšago tša mabapi le bana babo rena ba Ethiopia, Malawi le Russia.

^ [2] (serapa 12) Beibele ga e re botše palo ya bakerubi bao ba bego ba neilwe kabelo ye.