Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) APRIL 2016

Na Bodiredi Bja Gago bo Etša Phoka?

Na Bodiredi Bja Gago bo Etša Phoka?

BODIREDI bja rena bo bohlokwa kudu e bile bo thuša batho. Eupša ga se batho ka moka bao re ba botšago ditaba tše dibotse ba lemogago seo. Le ge batho ba thabela seo Beibele e se bolelago, gantši ga ba bone go le bohlokwa go ithuta Lentšu la Modimo le rena.

Nagana ka mohlala wa Gavin. Gavin o be a eba gona dibokeng Holong ya Mmušo, eupša a sa nyake go swarelwa thuto ya Beibele. Gavin o re o be a sa tsebe Beibele gabotse gomme a sa nyake gore batho ba tsebe seo. O re o be a tšhaba gore ba tla mo kgopela gore e be setho sa bodumedi, ka gona o be a sa nyake go forwa. Wena o nagana’ng? Na o nagana gore Gavin o be a ka thušega? Nagana ka mafelelo a mabotse ao dithuto tša Beibele di ka bago le wona mothong. Jehofa o ile a botša Baisiraele gore: “Polelo ya ka ya wa bjalo ka phoka, ya etša dipula tša mesarasarane ge di nela bjang.” (Doiteronomio 31:19, 30; 32:2) Anke re ithuteng dilo tše itšego ka phoka gomme re e swantšhe le bodiredi bja rena e le gore re tle re kgone go thuša “mehuta yohle ya batho.”—1 Timotheo 2:3, 4.

 BODIREDI BJA RENA BO KA ETŠA PHOKA BJANG?

Phoka e wa gabonolo. Phoka e bopega ganyenyane-ganyenyane ge monola wo o lego lefaufaung o fetoga marothodi a meetse. Ke ka kgopolo efe mantšu a Jehofa a ilego a “wa bjalo ka phoka”? O be a bolela le batho ba gagwe ka tsela e botho, e bonolo le ya go ba naganela. Re ekiša Modimo ge re hlompha ditumelo tša ba bangwe. Re ba kgothaletša gore ba naganišiše ka seo ba ithutago sona gomme ba itirele diphetho. Ge re ba kgahlegela ka tsela yeo, ba tla thabela go kwa molaetša wa rena, gomme bodiredi bja rena bo tla atlega.

Phoka e a lapološa. Bodiredi bja rena bo tla lapološa batho ge re diriša ditsela tše di fapafapanego tša go ba thuša gore ba ithute therešo ka mo go oketšegilego. Ngwanabo rena yo a bitšwago Chris, yo a ilego a kgopela Gavin gore a ithute le yena Beibele, ga se a ka a leka go mo gapeletša gore a e amogele. Go e na le moo, Chris o ile a leka go hwetša ditsela tše di fapafapanego tša go dira gore Gavin a ikwe a lokologile gore ba boledišane ka Beibele. Chris o ile a botša Gavin gore go na le molaetša wa bohlokwa wo o tšwago ka Beibeleng le gore go ithuta ka molaetša woo go tla mo thuša gore a kwešiše gakaone seo se rutwago dibokeng. Ke moka, Chris o ile a mo hlalosetša gore diporofeto tša Beibele di ile tša mo kgodiša gore Beibele ke ya therešo. Ka baka la seo, ba ile ba ba le dipoledišano tše dintši tša kamoo diporofeto di ilego tša phethagala ka gona. Dipoledišano tše di ile tša lapološa Gavin, gomme mafelelong a amogela thuto ya Beibele.

Phoka e bohlokwa bophelong. Nakong ya sehla sa phišo le komelelo kua Isiraele, pula e ka no fetša dikgwedi tše mmalwa e sa ne. Ge go se na monola woo o dirwago ke phoka, dimela di a omelela le go hwa. Jehofa o boletše e sa le pele gore mehleng ya rena go tla ba bjalo ka ge eka go na le komelelo, ke gore, batho ba tla nyorelwa “go kwa lentšu la Jehofa.” (Amose 8:11) O holofeditše gore batlotšwa ba tla ba “bjalo ka phoka e tšwago go Jehofa” ge ba le gare ba bolela ditaba tše dibotse tša Mmušo, ba thekgwa ke “dinku tše dingwe.” (Mika 5:7; Johane 10:16) Molaetša wo re o bolelago ke e nngwe ya ditsela tšeo Jehofa a di dirišago go nea batho bao ba nyoretšwego therešo bophelo. Na re tšeela molaetša wo godimo?

Phoka ke tšhegofatšo yeo e tšwago go Jehofa. (Doiteronomio 33:13) Bodiredi bja rena e ka ba tšhegofatšo goba mpho go bao ba arabelago gabotse. Thuto ya Beibele e bile tšhegofatšo go Gavin ka gobane e mo thušitše gore a hwetše dikarabo tša dipotšišo tšeo a bego a na le tšona. O ile a dira tšwelopele ka lebelo, a kolobetšwa, gomme ga bjale o thabela go bolela ditaba tše dibotse tša Mmušo le mosadi wa gagwe Joyce.

Dihlatse tša Jehofa di botša batho lefaseng ka moka ditaba tše dibotse tša Mmušo

TŠEELA BODIREDI BJA GAGO GODIMO

Go bapiša modiro wa rena wa boboledi le phoka go ka re thuša go kwešiša gore maiteko a yo mongwe le yo mongwe wa rena bodireding a bohlokwa. Bjang? Lerothi la meetse le ka no se be le mohola, eupša marothodi a dimilione a ka kgona go thapiša mobu ka monola. Ka mo go swanago, seo motho o tee a se dirago bodireding se ka no bonala se se na mohola. Eupša ka ge bahlanka ba Jehofa ba dimilione ba swarišane modirong wo, ba kgona go nea bohlatse “go ditšhaba tšohle.” (Mateo 24:14) Ka ge ditaba tše dibotse e le tšhegofatšo e tšwago go Jehofa, na re tla di botša ba bangwe? Ee, molaetša wa rena o tla etša phoka yeo e wago gabonolo, e lapološago le yeo e lego bohlokwa bophelong!