Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) APRIL 2016

Go Botega go Dira Gore Modimo a re Amogele

Go Botega go Dira Gore Modimo a re Amogele

“Le be baekiši ba bao ka tumelo le go se fele pelo ba jago bohwa bja dikholofetšo.”—BAHEBERU 6:12.

DIKOPELO: 86, 54

1, 2. Jefeta le morwedi wa gagwe ba ile ba lebeletšana le bothata bofe?

KGAREBE e kitimela go gahlanetša tatago yona. E thabile kudu go mmona a boa ntweng a sa phela. Taba ya gore tatago yona o fentše manaba a bona e dira gore kgarebe ye e opele le go bina ka lethabo. Eupša seo tatago yona ka morago a ilego a se dira le go se bolela se swanetše go ba se ile sa e makatša. Tatago yona o ile a gagola diaparo tša gagwe gomme a lla ka gore: “Joo, morwedi wa ka! O mpheditše matla.” Ke moka o ile a botša kgarebe ye gore o holofeditše Jehofa selo seo se tla fetošago bophelo bja yona sa ruri. Kholofetšo yeo e be e bolela gore kgarebe ye e ka se tsoge e nyetšwe goba go ba le bana. Eupša gateetee e ile ya araba tatago yona ka mantšu a mabotse, ya mo kgothaletša gore a phethagatše seo a se holofeditšego Jehofa. Karabo ya kgarebe ye e ile ya bontšha gore e be e tloga e kgodišegile gore selo le ge e le sefe seo Jehofa a tlago go se kgopela go yona ke sa maleba. (Baahlodi 11:34-37) Ge tate yo a bona tumelo ya morwedi wa gagwe, o ile a ikgantšha ka yena ka gobane o be a tseba gore boikgafo  bja morwedi yoo bo tla thabiša Jehofa.

2 Jefeta le morwedi wa gagwe ba be ba botile Jehofa ka dipelo tša bona ka moka le tsela yeo a dirago dilo ka yona. Ba be ba botega gaešita le ge go be go se bonolo. Ba be ba nyaka go amogelwa ke Jehofa, gomme seo se bohlokwa go feta boikgafo le ge e le bofe.

3. Ke ka baka la’ng mohlala wa Jefeta le morwedi wa gagwe o ka re thuša lehono?

3 Ga se ka mehla go lego bonolo go dula re botegela Jehofa. Re swanetše go “lwela ka matla tumelo” ya rena. (Juda 3) E le gore re kgone go dira seo, anke re ithuteng kamoo Jefeta le morwedi wa gagwe ba ilego ba kgotlelela mathata bophelong bja bona. Ba kgonne bjang go dula ba botegela Jehofa?

GO DULA RE BOTEGA GO SA ŠETŠWE MEKGWA YA LEFASE

4, 5. (a) Jehofa o ile a nea Baisiraele taelo efe ge ba be ba tsena Nageng ya Kholofetšo? (b) Go ya ka Psalme 106, Baisiraele ba ile ba diragalelwa ke’ng ka baka la go se kwe ga bona?

4 Go ka direga gore letšatši le letšatši Jefeta le morwedi wa gagwe ba be ba bona ditlamorago tša go se kwe ga Baisiraele. Nywaga e ka bago e 300 pejana, Jehofa o kile a laela Baisiraele gore ba bolaye barapedi ka moka ba maaka Nageng ya Kholofetšo, eupša ba se mo kwe. (Doiteronomio 7:1-4) Baisiraele ba bantši ba ile ba thoma go ekiša Bakanana, bao ba bego ba rapela medingwana ya maaka le go itshwara gampe.—Bala Psalme 106:34-39.

5 Ka baka la go se kwe ga Baisiraele, Jehofa o ile a se sa ba šireletša manabeng a bona. (Baahlodi 2:1-3, 11-15; Psalme 106:40-43) Go swanetše go ba go be go le thata go malapa a Baisiraele ao a bego a rata Jehofa gore a dule a mmotegela dinakong tšeo tše thata. Lega go le bjalo, Beibele e re mehleng yeo go be go na le batho ba go botega, ba go swana le Jefeta le morwedi wa gagwe gotee le Elikana, Hanna le Samuele. Ba be ba ikemišeditše go thabiša Jehofa.—1 Samuele 1:20-28; 2:26.

6. Ke mekgwa efe ya lefase yeo e tletšego lehono, gona re swanetše go dira’ng?

6 Lehono, batho ba nagana go swana le Bakanana le go dira dilo go swana le bona. Maphelo a bona a tletše ka thobalano, bošoro le go rata tšhelete. Eupša rena Jehofa o re nea ditemošo tše di kwagalago. O nyaka go re šireletša go fo swana le ge a ile a nyaka go šireletša Baisiraele mekgweng yeo e mebe. Na re tla ithuta diphošong tša bona? (1 Bakorinthe 10:6-11) Re swanetše go dira sohle se re ka se kgonago go phema tsela ya lefase ya go nagana. (Baroma 12:2) Na re tla katana ka matla go dira seo?

JEFETA O ILE A DULA A BOTEGA GO SA ŠETŠWE GO NYAMIŠWA

7. (a) Batho ba gabo Jefeta ba ile ba mo swara bjang? (b) Jefeta o ile a arabela bjang?

7 Mehleng ya Jefeta, Baisiraele ba be ba tlaišwa ke Bafilisita le Baamoni ka gobane ba ile ba se kwe Jehofa. (Baahlodi 10:7, 8) Go tlaleletša go ditšhaba tšeo di bego di ba tlaiša, Jefeta o be a bile a sa swarwe gabotse ke bana babo le baetapele ba Isiraele. Ka ge ba be ba mo jela mona e bile ba mo hloile, ba ile ba mo raka nageng ya gabo. (Baahlodi 11:1-3) Jefeta ga se a ka a dumelela tshwarompe yeo e mo senya monagano. Re tseba seo bjang? Ka gobane ge bagolo ba setšhaba  ba be ba mo llela gore a ba thuše, o ile a dira bjalo gateetee. (Baahlodi 11:4-11) Ke’ng seo se dirilego gore Jefeta a arabele ka tsela yeo?

8, 9. (a) Jefeta a ka ba a thušitšwe ke melao efe ya motheo yeo e lego Molaong wa Moshe? (b) Selo se bohlokwa kudu go Jefeta e be e le eng?

8 Jefeta e be e le mogale wa ntwa, le gona o be a tseba histori ya Baisiraele le Molao wa Moshe gabotse. Tsela yeo Jehofa a bego a dirišana le setšhaba sa Gagwe ka yona e ile ya mo ruta go tseba dilo tšeo Modimo a rego di lokile goba di fošagetše. (Baahlodi 11:12-27) Jefeta o ile a diriša tsebo yeo bophelong bja gagwe ge a dira diphetho. O be a tseba gabotse kamoo Jehofa a ikwago ka gona ka go galefa le go itefeletša le gore o nyaka batho ba Gagwe ba ratana. Go oketša moo, o be a ithutile Molaong wa Moshe gore o swanetše go swara ba bangwe gabotse, gaešita le bao ba bego ba mo hloile.—Bala Ekisodo 23:5; Lefitiko 19:17, 18.

9 Ga go pelaelo gore mohlala wa Josefa o ile wa thuša Jefeta. O swanetše go ba a ile a ithuta kamoo Josefa a gaugetšego bana babo gaešita le ge ba be ba mo hloile. (Genesi 37:4; 45:4, 5) Go naganišiša ka mohlala wo go ka ba go thušitše Jefeta go arabela ka tsela yeo e thabišitšego Jehofa. Ruri seo bana babo Jefeta ba mo dirilego sona se ile sa mo kweša bohloko. Eupša go lwela leina la Jehofa le batho ba gagwe go be go le bohlokwa kudu go Jefeta go feta maikwelo a gagwe. (Baahlodi 11:9) O be a ikemišeditše go dula a botegela Jehofa. Boemo bjo bja kgopolo bo ile bja dira gore Jehofa a mo šegofatše gotee le go šegofatša Baisiraele.—Baheberu 11:32, 33.

Ga se ra swanela go dumelela go kgopišega go re šitiša go hlankela Jehofa

10. Melao ya motheo ya Modimo e ka re thuša bjang go phela ka tsela yeo e bontšhago gore re Bakriste?

10 Na re tla ekiša mohlala wa Jefeta? Re tla dira’ng ge bana babo rena ba Bakriste ba ka re nyamiša goba re nagana gore ga ba re sware gabotse? Ga se ra swanela go dumelela go kgopišega go re šitiša go hlankela Jehofa. O se ke wa tlogela go ya dibokeng tša Bokriste goba go fetša nako o na le phuthego. Anke re ekišeng Jefeta gomme re kwe Jehofa. Se se tla re thuša go fenya maemo a thata gomme ra beela ba bangwe mohlala o mobotse.—Baroma 12:20, 21; Bakolose 3:13.

BOIKGAFO BO UTOLLA TUMELO YA RENA

11, 12. Jefeta o ile a holofetša Jehofa eng, gona seo se be se bolela’ng?

11 Jefeta o be a tseba gore o hloka thušo ya Jehofa gore a lokolle Baisiraele kgatelelong ya Baamoni. O ile a holofetša Jehofa gore ge a ka mo thuša go fenya Baamoni, o tla mo nea motho wa pele yo a tla tšwago ka ntlong ya gagwe ge a boa ntweng. Motho yoo o be a tla ba “bjalo ka sebego sa go fišwa.” (Baahlodi 11:30, 31) Seo se be se bolela’ng?

12 Jehofa o šišimišwa ke batho bao ba dirago dihlabelo ka batho, ka gona re a tseba gore Jefeta o be a ka se dire sehlabelo sa kgonthe ka motho. (Doiteronomio 18:9, 10) Molaong wa Moshe, sebego  sa go fišwa e be e le mpho e kgethegilego yeo motho a bego a e nea Jehofa ka mo go feletšego. Ka gona Jefeta o be a era gore motho yo a bego a tlo mo nea Jehofa e le sehlabelo o be a tla hlankela taberenakeleng bophelo ba gagwe ka moka. Jehofa o ile a theetša Jefeta gomme a mo thuša go fenya manaba a bona. (Baahlodi 11:32, 33) Eupša ke mang yo Jefeta a bego a tla mo nea Jehofa e le sebego?

13, 14. Mantšu a Jefeta ao a begilwego go Baahlodi 11:35 a utolla’ng ka tumelo ya gagwe?

13 Nagana ka tiragalo yeo go boletšwego ka yona mathomong a sehlogo se. Ge Jefeta a boela gae a etšwa ntweng, motho wa pele yo a ilego a mo gahlanetša ke morwedi wa gagwe yo a bego a mo rata, e lego ngwana a nnoši wa gagwe! Na Jefeta o be a tla phethagatša seo a se holofeditšego Jehofa? Na o be a tla nea Jehofa morwedi wa gagwe gore a mo hlankele taberenakeleng bophelo bja gagwe ka moka?

14 Le lebakeng le, molao wa motheo wo o lego Molaong wa Modimo o swanetše go ba o thušitše Jefeta go dira phetho e botse. Mohlomongwe o ile a nagana ka mantšu a Ekisodo 23:19, moo Modimo a boditšego setšhaba sa gagwe gore se mo nee dilo tše dibotsebotse ka go rata. Le gona Molao woo o be o re ge motho a holofeditše Jehofa selo se itšego, “a se ke a tshela lentšu leo la gagwe. A dire tšohle tšeo di tšwilego molomong wa gagwe.” (Numeri 30:2) Jefeta o be a swanetše go phethagatša kholofetšo ya gagwe, go swana le Hanna yo a botegago yo go ka diregago gore o phetše mehleng ya Jefeta. Jefeta o be a swanetše go dira bjalo le ge a be a tseba gore seo se bolela eng go yena le morwedi wa gagwe. Ka ge morwedi wa gagwe a be a tlo hlankela taberenakeleng, o be a ka se tsoge a bile le bana. Ka gona go be go ka se be le motho yo a tlago go tšwetša pele lešika la Jefeta le go tšea naga ya gagwe e le bohwa. (Baahlodi  11:34) Go sa šetšwe seo, Jefeta o ile a bolela ka pelo ka moka gore: “Ge e le nna ke holofeditše Jehofa gomme nka se hlaname.” (Baahlodi 11:35) Jehofa o ile a amogela sehlabelo se segolo sa Jefeta gomme a mo šegofatša. Na le wena nkabe o ile wa botega go swana le Jefeta?

15. Ke’ng seo ba bantši ba rena re se holofeditšego Modimo, gona re ka bontšha bjang gore re a botega?

15 Ge re be re neela maphelo a rena go Jehofa, re mo holofeditše gore re tla dira thato ya gagwe go sa šetšwe seo se diregago. Re be re tseba gore go phethagatša kholofetšo yeo go be go ka se be bonolo ka mehla. Eupša re arabela bjang ge re kgopelwa go dira selo se itšego seo re sa se ratego? Ge e ba re arabela gabotse gomme re ekwa Modimo go tšwa pelong, re bontšha gore re phethagatša seo re mo holofeditšego sona. Go ikgafa ga go bonolo, eupša ka mehla Jehofa o tla re šegofatša wa go tlala seatla. (Maleaki 3:10) Eupša go thwe’ng ka morwedi wa Jefeta? O ile a arabela bjang ge a ekwa ka seo tatagwe a se holofeditšego Jehofa?

Re ka bontšha bjang tumelo ya go swana le ya Jefeta le morwedi wa gagwe? (Bona serapa 16 le 17)

16. Morwedi wa Jefeta o ile a arabela bjang kholofetšong ya tatagwe? (Bona seswantšho seo se lego mathomong a sehlogo.)

16 Kholofetšo ya Jefeta e be e fapana le ya Hanna. Hanna o be a holofeditše Jehofa gore morwa wa gagwe e lego Samuele o be a tla hlankela taberenakeleng e le Monasari. (1 Samuele 1:11) Monasari o be a dumeletšwe go nyala le go ba le bana. Eupša morwedi wa Jefeta yena o be a neetšwe e le “sebego sa go fišwa” se se feletšego, ka gona o be a ka se be le tokelo ya go nyalwa le go ba le bana. (Baahlodi 11:37-40) Anke o nagane feela! Nkabe a ile a nyalwa ke monna wa maemo setšhabeng ka gobane tatagwe e be e le moetapele wa Baisiraele. Eupša ga bjale o be a tlo ba mohlanka feela taberenakeleng. Kgarebe ye e ile ya arabela bjang? E ile ya bontšha gore go hlankela Jehofa go tla pele bophelong bja yona ka go botša tatago yona gore: “Ntire go ya ka kholofetšo yeo e tšwilego molomong wa gago.” (Baahlodi 11:36) Kgarebe ye e ile ya dira boikgafo bja gore e se tsoge e bile le monna le bana e le gore e hlankele Jehofa. Re ka ekiša bjang boikgafo bja kgarebe ye?

Morwedi wa Jefeta o ile a dira boikgafo bja gore a se tsoge a bile le monna le bana e le gore a hlankele Jehofa

17. (a) Re ka ekiša bjang tumelo ya Jefeta le morwedi wa gagwe? (b) Mantšu ao a lego go Baheberu 6:10-12 a go tutuetša bjang gore o dire boikgafo?

 17 Bakriste ba bantši bao e sa lego ba bafsa ba dirile boikgafo bja go se tsenele lenyalo goba ba kgethile go se be le bana, ge maemo a sa ba dumelela. Ka baka la’ng? Ka gobane ba nyaka go swarega kudu ka go hlankela Jehofa ka botlalo. Le gona batšofadi ba rena ba bantši ba gafa nako yeo nkabego ba e fetša ba na le bana ba bona goba ditlogolo. Ba nea Jehofa nako ya bona le matla a bona. Ba bangwe ba bona ba šoma medirong ya go aga goba ba ya Sekolong sa Baebangedi ba Mmušo gomme ba hudugela diphuthegong tšeo di nago le tlhokagalo ya bagoeledi. Ba bangwe ba oketša nako yeo ba e fetšago ba le tšhemong sehleng sa Segopotšo. Jehofa a ka se tsoge a lebetše boikgafo bjo lerato bja babotegi ba ka moka. (Bala Baheberu 6:10-12.) Go thwe’ng ka wena? Na o tla gafa dilo tše itšego e le gore o hlankele Jehofa ka botlalo?

RE ITHUTILE ENG?

18, 19. Re ithutile’ng pegong ya Beibele ya mabapi le Jefeta le morwedi wa gagwe, gona re ka ba ekiša bjang?

18 Jefeta o thušitšwe ke’ng go fenya mathata a gagwe a mantši? O ile a dumelela Jehofa gore a mo thuše go dira diphetho bophelong bja gagwe. Ga se a ka a dumelela mekgwa ya batho ba bangwe e mo fetela. Le gona o ile a dula a botega le ge batho ba bangwe ba be ba mo nyamiša. Jehofa o ile a šegofatša Jefeta le morwedi wa gagwe bakeng sa boikgafo bja bona, le gona O ile a ba diriša go godiša borapedi bja therešo. Gaešita le ge ba bangwe ba ile ba tlogela go dira dilo tše di lokilego, Jefeta le morwedi wa gagwe ba ile ba dula ba botegela Jehofa.

19 Beibele e re: “Le be baekiši ba bao ka tumelo le go se fele pelo ba jago bohwa bja dikholofetšo.” (Baheberu 6:12) Anke re ekišeng Jefeta le morwedi wa gagwe, re tseba gore ge re ka dula re botega, Jehofa o tla re šegofatša.