Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Phafoga!  |  December 2015

 TABA YA LETLAKALA LA KA NTLE | GO DIRA KHUTŠO KA LAPENG

Kamoo o ka Hlagolelago Khutšo ka Lapeng

Kamoo o ka Hlagolelago Khutšo ka Lapeng

NA O nagana gore Beibele e ka thuša batho go hlagolela khutšo ka lapeng? Hle bapiša seo Beibele e se bolelago le seo batho ba ba latelago bao go boledišanwego le bona ba hweditšego se hola. Ela hloko gore ke dintlha dife tšeo di ka go thušago go phema dikgohlano, go boloka khutšo le go tiiša ditswalano tšeo di swarelelago.

 MELAO YA MOTHEO YA BEIBELE YEO E THUŠAGO BATHO GO HLAGOLELA KHUTŠO

E BA LE PONO E NEPAGETŠEGO KA BA BANGWE.

“Le se dire selo ka tshele goba ka go ikgopola, eupša ka boikokobetšo le tšee gore ba bangwe ba le feta ka bogolo. Le se ke la kgahlegela ditaba tša lena feela, eupša le kgahlegele le tša ba bangwe.”Bafilipi 2:3, 4.

“Re hweditše gore go botse go lebelela molekane wa gago e le yo bohlokwa go feta wena le ba bangwe.”—C. P., yo a nago le nywaga e 19 a nyetšwe.

THEETŠA KA KELOHLOKO KA MONAGANO O BULEGILEGO.

“Tšwela pele o ba gopotša gore . . . e se be bontwadumela, e be ba lekalekanego, ba bontšha boleta bjohle go batho ka moka.”Tito 3:1, 2.

“Go se be bose ka gae go ka phengwa ge e ba motho a sa arabe molekane wa gagwe ka lentšu le hlabago. Ke gabohlokwa gore motho a theetše ka go se ahlole yo mongwe le go hlompha pono ya gagwe gaešita le ge a sa dumelelane le yona.”—P. P., yo a nago le nywaga e 20 a nyetšwe.

HLAGOLELA GO SE FELE PELO LE BOLETA.

“Molaodi o fenywa ke go se fele pelo, leleme le boleta le ka roba lerapo.”Diema 25:15.

“Dikgohlano di tla ba gona, eupša pheletšo ya tšona e ithekgile ka moya woo re o bontšhago. Ruri re swanetše go se fele pelo. Ge e ba re sa fele pelo, re bona dilo di loka.”—G. A., yo a nago le nywaga e 27 a nyetšwe.

LE KA MOHLA O SE KE WA INEELA GO DIRIŠENG MATLA GOBA POLELO GAMPE.

“Le swanetše go di lahlela ka moka kgole le lena, e lego kgalefo, pefelo, bobe, polelo e gobošago le polelo e lešago dihlong e tšwago molomong wa lena.”Bakolose 3:8.

“Ke kgahlwa ke tsela yeo monna wa ka a kgonago go itshwara ka gona. O dula a išitše maswafo fase gomme ga a ke a nkgadimola goba go nthoga.”—B. D., yo a nago le nywaga e 20 a nyetšwe.

IKEMIŠETŠE GO LEBALELA LE GO LOKIŠA DIPHAPANO KAPEJANA.

“Tšwelang pele le kgotlelelana gomme le lebalelana ka bolokologi le ge e ba motho a na le lebaka la go ba le pelaelo ka yo mongwe.”Bakolose 3:13.

“Ga go bonolo go iša maswafo fase ge motho a gateletšegile, gomme o ka akgofela go bolela goba go dira dilo tšeo di kwešago molekane wa gago bohloko. Dinakong tše bjalo, go botse go lebalela. Ga go kgonege gore lenyalo le atlege ntle le gore batho ba lebalelane.”—A. B., yo a nago le nywaga e 34 a nyetšwe.

ITLWAETŠE GO NEA LE GO ABELANA DILO KA NTLE LE BOITHATI.

“Tlwaelang go fa gomme batho ba tla le fa. . . . Gobane kelo yeo le elago ka yona, le lena ba tla le elela ka yona.”Luka 6:38.

“Monna wa ka o tseba dilo tšeo ke di ratago, gomme o dula a ntirela dilo tšeo ke sa di letelago. Ka gona, ke fela ke nagana gore, ‘Nka mo thabiša bjang?’ Ka baka leo, re sa tšwela pele re sega gotee go fihla le lehono.”—H. K., yo a nago le nywaga e 44 a nyetšwe.

O SE KE WA LAPA GO HLAGOLELA KHUTŠO KA LAPENG

Ditho tša malapa tšeo Phafoga! e boledišanego le tšona e fo ba batho ba sego kae go ba dimilione lefaseng ka bophara bao ba thušitšwego ke Beibele go hlagolela dika tšeo di thušago gore go be le khutšo kutšwanyana ka gae. * Gaešita le ge ba bangwe ka lapeng ba sa bonagale ba leka go ba le tirišano, ba hweditše gore go ba modirakhutšo go sa dutše go le bohlokwa ka gobane Beibele e holofetša gore: “Bao ba rerago khutšo ba a thaba.”—Diema 12:20.

^ par. 24 Bakeng sa tsebišo e oketšegilego mabapi le kamoo o ka dirago gore bophelo bja lapa bo thabiše, bona kgaolo 14 ya puku ya Ke Eng Seo ge e le Gabotse Beibele e se Rutago? yeo e gatišitšwego ke Dihlatse tša Jehofa gomme e hwetšagala le go www.jw.org/nso. Lebelela gape ka tlase ga DITHUTO TŠA BEIBELE > THUŠO BAKENG SA LAPA.