Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! NOVEMBER 2015

 PONO YA BEIBELE

Bofelo bja Lefase

Bofelo bja Lefase

Johane wa pele 2:17 e re: “Lefase le a feta gomme go bjalo le ka kganyogo ya lona.” “Lefase” leo ke’ng? Le tlo feta bjang le gona neng?

“Lefase” leo le tlago go fela ke eng?

SEO BEIBELE E SE BOLELAGO

Ka ge lefase leo go bolelwago ka lona le na le ‘dikganyogo’ tša go dira seo Modimo a sa se nyakego, go molaleng gore ga go bolelwe ka polanete ya kgonthe. Go e na le moo, go bolelwa ka batho bao ba sa kwego Modimo, bao ba itirago manaba a gagwe. (Jakobo 4:4) Batho bao ba bopago lefase leo “ba tla welwa ke kotlo ya kahlolo ya tshenyego ya ka mo go sa felego.” (2 Bathesalonika 1:7-9) Ka lehlakoreng le lengwe, batho bao ba kwago Jesu Kriste gomme ba dula e se “karolo ya lefase,” ba na le tebelelo ya bophelo bjo bo sa felego.—Johane 15:19.

Ka gona, 1 Johane 2:17 e phetha ka gore: “Yo a dirago thato ya Modimo o dula a le gona ka mo go sa felego.” Ee, yena yoo o na tebelelo ya bophelo bjo bo sa felego gona mo lefaseng, bjalo ka ge Psalme 37:29 e bontšha gore: “Baloki bona e tla ba beng ba lefase, ba tla dula mo go lona ka mo go sa felego.”

“Le se ke la rata lefase goba dilo tše di lego lefaseng. Ge e ba motho a rata lefase, lerato la Tate ga le gona go yena.”1 Johane 2:15.

Lefase le tla fela bjang?

SEO BEIBELE E SE BOLELAGO

Bofelo bo tlo tla ka dikarolo tše pedi. Ya pele, Modimo o tla fediša bodumedi bja maaka bjo bo rulagantšwego, bjo bo swantšhetšwago ke mogweba ka mmele yo a bitšwago “Babilona o Mogolo.” (Kutollo 17:1-5; 18:8) O ile a gwerana le baetapele ba lefase ba dipolotiki, mola a ipolela gore o botegela Modimo. Lega go le bjalo, baetapele ba ba tla mo fetogela. ‘Ba tla hloya mogweba-ka-mmele ba mo šwalalanya le go mo hlobodiša gomme ba ja dinama tša gagwe goba mahumo a gagwe, ba ba ba mo fiša ka mo go feletšego ka mollo.’—Kutollo 17:16.

Ya bobedi, Modimo o tla lebiša tlhokomelo go baetapele ba dipolotiki ka go lebanya, e lego “dikgoši tša lefase ka moka.” Dikgoši tšeo le batho ba babe ka kakaretšo, di tla fedišwa “ntweng ya letšatši le legolo la Modimo Ramatlaohle,” yeo gape e bitšwago “Haramagedone.”—Kutollo 16:14, 16.

“Tsomang Jehofa, lena bohle ba boleta ba lefase . . . Tsomang go loka le boleta. Mohlomongwe le ka šireletšwa letšatšing la bogale bja Jehofa.”Tsefanya 2:3.

 Lefase le tla fela neng?

SEO BEIBELE E SE BOLELAGO

Bofelo bo tla tla ge lefase ka moka le tla be le lemošitšwe ka Mmušo wa Modimo, e lego pušo ya lefase yeo e tlago go tšeela pušo ya batho legato. (Daniele 7:13, 14) Jesu Kriste o itše: “Ditaba tše tše dibotse tša Mmušo di tla bolelwa lefaseng ka moka gore e be bohlatse go ditšhaba tšohle, ke moka bofelo bo tla tla.” (Mateo 24:14) Modiro woo wa boboledi wo o bontšhago toka le kgaugelo ya Modimo, ke karolo ya “maswao” ao a bontšhago mehla ya bofelo. Maswao ao gape a akaretša dintwa tša lefase ka moka, ditšhišinyego tša lefase, tlala le bolwetši.—Mateo 24:3; Luka 21:10, 11.

Ka ntle le go bolela e sa le pele ka ditiragalo tša lefase, Beibele gape e re botša ka mohuta wa batho ba “mehleng ya bofelo.” Re bala gore: “Go tla ba le dinako tše di hlobaetšago tšeo go lego thata go lebeletšana le tšona. Gobane batho e tla ba baithati, barati ba tšhelete, . . . ba go se kwe batswadi, . . . ba se nago boitshwaro, ba bogale, ba go se rate go loka, . . . ba ratago maipshino go e na le go rata Modimo.” *2 Timotheo 3:1-5.

Go se go ye kae lefase le kgopo ‘le tla feta.’—1 Johane 2:17.

Ditiragalo tšeo ka moka di swaya mehla yeo e thomilego nakong ya Ntwa I ya Lefase ka 1914. Go oketša moo, ga e sa le go tloga ka ngwaga woo, Mmušo wa Modimo o tsebaditšwe dikarolong ka moka tša lefase, gomme Dihlatse tša Jehofa di tšea e le tokelo go dira modiro wo. Ge e le gabotse, makasine wa tšona o mogolo o na le sehlogo seo se rego Morokami o Tsebatša Mmušo wa Jehofa.

“Ka gona, dulang le phakgame, gobane ga le tsebe letšatši le ge e le iri.” Mateo 25:13.

^ par. 14 Bakeng sa tsebišo e oketšegilego, bona kgaolo 9 ya puku ya Ke Eng Seo ge e le Gabotse Beibele e se Rutago? yeo e gatišitšwego ke Dihlatse tša Jehofa. E hwetšagala le go www.jw.org/nso.

Ithute ka mo go oketšegilego

Ditiragalo tša Beibele di Utolla Eng ka Ngwaga wa 1914?

Boporofeta bja “mabaka a šupago” bjoo bo lego go Daniele kgaolo 4 bo bolela ka dinako tše thata tša pušo ya batho.

Ba Bantši ba tla Phologa Bofelo—Le Wena o ka Phologa

Eupša bjang? Na ke ka go kgoboketša dilo tša motheo goba go dira ditokišetšo tše dingwe bakeng sa letšatši la kahlolo?