Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Phafoga!  |  October 2015

Maboto a toropo ya Itchan Kala kua Khiva

 DINAGA LE BATHO

Go Etela Uzbekistan

Go Etela Uzbekistan

TRANSOXIANA, ke Naga yeo e lego Magareng ga Dinoka. Tartary. Turkistan. Naga yeo e be e bitšwa ka maina a mantši ao ga bjale a akaretšago Uzbekistan, e lego “Naga ya Mauzbek.” Go tloga mathomong a lekgolong la bo-15 la nywaga, ditoropo tša Uzbekistan di be di hola barekiši bao ba bego ba sepela ka Silk Road, e lego ditsejana tšeo di kilego tša kopanya China le dinaga tša Mediterranean. Ga bjale lešela la leokodi ke lona le rekišwago kudu mafelong a go rekiša mašela a Uzbek. E bile go rekišwa le mebete e mebotse yeo e dirilwego ka leokodi, wulu goba silika.

Setšo sa Uzbek se hueditšwe ke batho ba bantši go theoša le histori. Bagale bao ba tumilego le madira a bona a matla ba ile ba gwanta go phatša dithaba le maganata a Uzbekistan. Bagale bao ba akaretša Alexander yo Mogolo, yo a kopanego le moratiwa wa gagwe Roxane moo; Genghis Khan yo a tšwago Mongolia; le Timur (yo gape a tsebjago e le Tamerlane), e lego modudi wa setlogo wa naga yeo, yo a ilego a buša e mengwe ya mebušo e megolo historing.

Diaparo tša setšo

Dimonyumente tše dibotse tša mebalabala tšeo di nago le marulelo a nkgokolo ao a apešitšwego ka thaele e tala, di dira gore toropo ya Uzbekistan e bogege. Bontši bja meago ye e dirišwa e le dikolo.

 Silk Road. Ditsejana tše tšeo di bego di dirišwa ke bagwebi, tšeo karolo ya tšona e bego e phatša nageng yeo lehono e bitšwago Uzbekistan, di be di dutše di dirišwa kudu pele ga mehla ya rena go fihlela go bulwa tsela ya go phatša ka lewatleng go ya India mafelelong a lekgolong la bo-15 la nywaga C.E., gomme di be di kopana lefelong la tša kgwebo.

Go dirwa mebete ya silika

Lewatle la Aral. Ka baka la ge meetse a ile a arošwa ka morero wa go nošetša, Lewatle la Aral leo e kilego ya ba letsha le legolo la bone lefaseng, le a gopa. Uzbekistan e šomišana le ditšhaba tše dingwe tša Asia Bogare go leka go rarolla bothata bjo.

Go fetoga ga ditlhaka tša Mauzbekistan. Go be go bolelwa maleme a fapafapanego nageng yeo, gomme ka morago ga gore e fenywe ke Mamoseleme lekgolong la seswai la nywaga, go ile gwa bolelwa Searaba. Ka morago ga gore naga ye e be karolo ya Soviet Union, ditlhaka tša Selatine di ile tša thoma go dirišwa gomme ka morago tša tšeelwa sebaka ke tša se-Cyrillic mafelelong a bo-1930. Ka 1993 molao o mofsa o ile wa tsebiša gore go dirišwe ditlhaka tša Seuzbek tšeo di theilwego mongwalong wa Selatine.

Dienywa tšeo di omišitšwego lefelong la borekišetšo