Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Phafoga!  |  September 2015

 PONO YA BEIBELE

Bodiidi

Bodiidi

Go sa šetšwe maiteko a mabotse ao a dirwago go fediša bothata bjo, batho ba dimilione lefaseng ka bophara ba a diila.

Badiidi ba ka hwetša bjang lethabo?

SEO BATHO BA SE BOLELAGO

Batho ba bantši ba dumela gore lethabo le kgotsofalo di hwetšwa dilong tšeo motho a nago le tšona le gore katlego ya kgonthe e ithekgile ka gore motho o na le bokae. Ga se gwa letelwa gore badiidi ba thabe le go kgotsofala ka ge ba se na thuto e phagamego, tlhokomelo e botse ya tša maphelo gotee le tše dingwe.

SEO BEIBELE E SE BOLELAGO

Beibele e ruta gore lethabo la kgonthe ga se la ithekga ka maemo a tša ikonomi, eupša le ithekgile ka tswalano e botse le Mmopi. Beibele e re: “Go thaba bao ba lemogago gore ba nyaka dilo tša moya.” (Mateo 5:3) Go sa šetšwe maemo a bona a tša ditšhelete, bohle bao ba lemogago gore ba nyaka dilo tša moya ba tutueletšega go tsoma pono ya Modimo ge ba dira dilo, e bile ba ithuta ditherešo tša Beibele tšeo di tlišago khomotšo le khutšo ya monagano. Se ke seo se tlišago lethabo la kgonthe.

Bao ba kwešišago le go latela keletšo ya Beibele ba boemong bjo bobotse bja go lebeletšana le bodiidi. Ka mohlala, keletšo ya Beibele e thuša batho go phema mekgwa e gobatšago e bjalo ka go kgoga le go nwa bjala kudu. Mekgwa e bjalo e senya tšhelete e bile e ka feleletša ka go nyakega ga kalafo e bitšago kudu.—Diema 20:1; 2 Bakorinthe 7:1.

Beibele gape e lemoša ka ditlamorago tše mpe tša megabaru le go rata dilo tša mabonwa. (Mareka 4:19; Baefeso 5:3) Keletšo e bjalo e ka thuša motho gore a se ke a senya tšhelete ka go petša goba go hlagolela “lerato la tšhelete” leo Beibele e le hlalosago e le “modu wa mehuta ka moka ya dilo tše di gobatšago.” (1 Timotheo 6:10) Mangwalo a lemoša gore: “Le ge motho a atetšwe ke dilo, fela bophelo bja gagwe ga bo tlišwe ke dilo tše a nago le tšona.” (Luka 12:15) Ge e bewa gabonolo, tšhelete e ka se reke bophelo go sa šetšwe gore ke e kaakang. Ka lehlakoreng le lengwe, go phela ka go dumelelana le keletšo e bohlale ya Beibele go dira gore bophelo bo be le morero gomme go feleletša ka go ba le lethabo la kgonthe.

Le ge bao ba diilago ba ka thatafalelwa ke go hwetša dijo, diaparo le madulo, ba ka hwetša lethabo ka go hlagolela go kgotsofala, go kgahliša Mmopi wa bona le ka go phela ka go dumelelana le thato ya gagwe. Ba lemoga go rereša ga kholofetšo ya Beibele ge e re, “tšhegofatšo ya Jehofa e a humiša, ga a e okeletše ka bohloko.”—Diema 10:22.

LENGWALO LA MOTHEO: “Go thaba bao ba lemogago gore ba nyaka dilo tša moya.”Mateo 5:3.

 Na bodiidi bo tla ka bja fela?

SEO BEIBELE E SE BOLELAGO

Ka ge maiteko a batho a go fediša bodiidi a paletšwe, ka nako e swanetšego Modimo o tla fediša modu wa bothata bjo, e lego tshekamelo ya boithati ya batho le mebušo ya go rata go etiša dikgahlego tša bona pele. (Mmoledi 8:9) Mmopi wa rena o tla fediša mebušo ya batho yeo e laolwago ke boithati. Mmušo wa gagwe goba pušo ya legodimong, e tla kgotsofatša badudi ba lefase ka moka ntle le kgethollo. Beibele e holofetša gore Kgoši ya Mmušo wa Modimo e tla kgotsofatša dinyakwa tša badiidi. “O tla hlakodiša modiidi yo a llelago thušo . . . O tla kwela mmotlana le modiidi bohloko, o tla phološa meoya ya badiidi.”—Psalme 72:12-14.

Lefase e tla ba paradeise ya kgonthe moo bohle ba tlago go ba le dintlo le dijo, go se sa na bodiidi le gatee. Ka pukung ya Beibele ya Jesaya, Modimo o holofetša gore batho ba gagwe ba “tla bjala dirapa tša merara ba ja dienywa tša tšona. . . . Bahlaolwa ba ka ba tla thabela modiro wa diatla tša bona ka botlalo.” (Jesaya 65:21, 22) Go e na le go leka go iphediša ka tšhelete e nyenyane, bohle ba tla ipshina ka “monyanya wa dijo tša makhura” le dilo tše dingwe tše dibotse tše di tšwago go Jehofa.—Jesaya 25:6.

KE KA BAKA LA ENG GO LE BOHLOKWA?

 Go naganišiša ka kholofetšo ya Modimo ya lefase leo le se nago bodiidi go kgonthišetša bao ba phelago ka tlase ga maemo a gateletšago gore Modimo o tshwenyega ka bona le gore kgauswinyane mathata a bona a tla fela. Go nagana ka kholofetšo yeo go ka nea motho matla a go kgotlelela maemo a thata gona bjale.

LENGWALO LA MOTHEO: “O tla hlakodiša modiidi yo a llelago thušo . . . O tla kwela mmotlana le modiidi bohloko, o tla phološa meoya ya badiidi.”Psalme 72:12, 13.

Ithute ka mo go Oketšegilego

DITABA TŠE DIBOTSE TŠE DI TŠWAGO GO MODIMO!

Mmušo wa Modimo ke Eng?

Kgoši ya Mmušo wa Modimo ke mang, gomme ke eng seo Mmušo woo o tlago go se fihlelela?

DITABA TŠE DIBOTSE TŠE DI TŠWAGO GO MODIMO!

Ke ka Baka la Eng Modimo a Dumelela Bobe le Tlaišego?

Bobe bo thomile bjang, gona ke ka baka la eng Modimo a ile a dumelela gore bo tšwele pele? Na tlaišego e tla ka ya fela?

DITABA TŠE DIBOTSE TŠE DI TŠWAGO GO MODIMO!

Melao ya Motheo ya Beibele e re Hola Bjang?

Jesu o hlalositše lebaka leo re hlokago tlhahlo le melao ya motheo e mebedi ya Beibele yeo e lego bohlokwahlokwa.