Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

PHAFOGA! SEPTEMBER 2015

 MADIRENG A LEFASE

Go Lebiša Tlhokomelo E Kgethegilego Bohlabela bja Magareng

Go Lebiša Tlhokomelo E Kgethegilego Bohlabela bja Magareng

Dinaga tšeo di lego ka Bohlabela bja Magareng tšeo di humilego ka boepi bja marope e kile ya ba legae la batho ba bantši mehleng e fetilego.

Bakanana Bao ba Dirago Beine

Ka 2013, baepi ba marope ba utolotše moago o mogolo wa lebato la ka tlase woo Bakanana ba bego ba direla beine go ona nywaga e ka bago e 3 700 e fetilego. Moago woo o be o na le dinkgo tše dikgolo tše 40 tša go tšhela beine yeo e bego e ka lekana mapotlelo a 3 000 a beine a mehleng yeno. Moepi wa marope yo a ilego a hlahloba mašaledi ao a bego a le dinkgong tšeo o lemogile gore Bakanana e be e le badiri ba beine bao ba bego ba le šedi. O itše: “Motswako wa beine o be o latelwa ka šedi nkgong e nngwe le e nngwe.”

NA O BE O TSEBA? Beibele e bolela ka go dirwa ga “beine e di phalago tšohle” ya Isiraele ya bogologolo le go bolokwa ga yona ka gare ga dinkgo tše dikgolo.—Sefela sa Difela 7:9; Jeremia 13:12.

Go Oketšega ga Batho

Go ya ka pego ya kuranta ya Guardian, kua Egipita go bile le koketšego ya bana ba 560 000 bao ba belegwego ka 2012 go feta ka 2010. Magued Osman wa khamphani ya go dira nyakišišo ya Baseera o itše: “Ke koketšego e kgolo kudu go di feta historing ya Egipita.” Ditsebi tše dingwe di bolela gore ge e ba koketšego yeo e ka tšwela pele ka tsela ye, naga yeo e tla ba le tlhaelelo e kgolo ya meetse, mohlagase le dijo.

NA O BE O TSEBA? Go ya ka Beibele, morero wa Modimo bakeng sa batho ke gore ba “tlale lefase” go fihla tekanyong yeo e swanetšego le gore go be le dijo tše di lekanego bakeng sa bohle.—Genesi 1:28; Psalme 72:16.

Go Utollwa ga Ditšhelete tša Tšhipi Tšeo di Bego di Utilwe

Go hweditšwe ditšhelete tša tšhipi tša boronse tša ka godimo ga tše lekgolo tšeo di ngwadilwego “Ngwaga wa Bone” kgauswi le tsela e kgolo kua Isiraele. Letšatši kgwedi leo le šupa go ngwaga wa bone wa go rabela ga Bajuda kgahlanong le Baroma ka (69-70 C.E.), e lego seo se ilego sa lebiša phedišong ya Jerusalema. Pablo Betzer, e lego molaodi wa tša boepi bja marope o re: “Go molaleng gore ka nako yeo, motho yo mongwe o be a boifa gore bofelo bo kgauswi, mohlomongwe o be a bona madira a Roma ao a bego a batamela. O ile a uta dilo tša gagwe a holofetše gore o tla boa a di tšea.”

NA O BE O TSEBA? Ka 33 C.E., Jesu o ile a bolela e sa le pele gore madira a Roma a be a tla dikanetša Jerusalema. O ile a eletša Bakriste gore ba tšhabele dithabeng e le gore ba šireletšege.—Luka 21:20-24.